هعملك يا أمي احتفال يملا الفضا

[أحمـدنجـم]

نفسي أعملك يا أمي احتفال يملا الفضا

م النجوم اغزل هدية متذوقة بالأفئدة

دا لو حياتي بيت بيعلى تبقي انتي ليه الأعمدة

يا حبيبتي

يا حب مالي كل ذرة مخلوط بدم الأوردة

يا حبيبتي

يا للي انتي أغلى مَن في عمري

أغلى أكيد من دا .. و .. دا

يا حبيبتي

دي وصية ربي بيكي

وصاني خير بالوالدة

أمك

ثم

أمك

ثم

أمك

مشتاق أضمك .. مشتاقلك ابنك

مشتاق لصدرك

مشتاق وعايش

في دنيا قاسية

مشاعرها ماتت .. بَاااااااارِدَة

آه يا أمي

آه يا أمي مش وجع ..

دا اشتياق للراحة في عيون الأمان

نفسي اضحك .. نفسي أفرح .. واللهِ جد ومش دلع

نفسي تعود أيام زمان

فاكرة؟

لما كل هموم حياتي بين ايديكي كانت تدوب؟

فاكرة؟

فاكرة القلوب؟

فاكرة القلوب الطيبة ساعة العصاري والجيران؟

كنت اروح بطبق عاشورا .. أو بصارة

يرجعلنا طبق الجيران - في لحظتين - مليان

فاكرة يا أمي

....

طب يلا نفرح يلا تعالي الاحتفال

مش هتيجي؟

طب ابعتي روحك تبين في دنيتي كل الجمال

طب ابعتي حتى خيال

سبحة أو سجادة منك

لسه رحتك جوه شال

يا اللي مكانك فوق عرش قلبي

اعلى يا أمي م الجبال

لا صدقيني مش هعيط

مش هلخبط فرحتك مفيش دموع

وايه يبكّي؟ هو انتي غبتي؟

هو خلاص مفيش رجوع؟

تصدقي .. كل الضيوف قالوا ايه؟

هتجيبنا ليه؟

و عيد لمين؟

وقرولك الفاتحة

وقريت معاهم

وبقيت لوحدي وياكي تاني يا ذكرى دايماً خالدة

وبرضه هعملك يا أمي احتفال يملا الفضا

م النجوم اغزل هدية متذوقة بالأفئدة

دا لو حياتي بيت بيعلى تبقي انتي ليه الأعمدة

يا حبيبتي

يا حب مالي كل ذرة مخلوط بدم الأوردة


يا حبيبتي

يا للي انتي أغلى مَن في عمري

أغلى أكيد من دا .. و .. دا

يا حبيبتي

دي وصية ربي بيكي

وصاني خير بالوالدة

أمك

ثم

أمك

ثم

أمك

مشتاق أضمك .. مشتاقلك ابنك

مشتاق لصدرك

مشتاق وعايش

في دنيا قاسية

مشاعرها ماتت .. بااااااااردة