اصل بابا نقاش !!

[..Just Stop]

سلام عليكم
ازيكم اكيد كويسين انا عارف
بدل ما اضيع وقتكو فى مقدمة لا تودى ولا تجيب هدخل فى الموضوع علطول لان المقدمات بقت حاجة غبية
ولو انا كنت كتبت مقدمة كنتو استفدتو منها بدل الهجص اللى انا بقوله دا !!
عامة ندخل فى الموضوع
فى ناس كتير وهيا ماشية فى الشارع بتشوف حاجات غريبة
تحس انها فى مجتمع مصنوع من البلاستيك
سامع بنى ادم بيقول ( ايه علاقة دا بعنوان الموضوع )
هجاوب عليه بثقة شديدة وهقوله ( انت مالك بردو )
بنبص فى وشوش الناس بنشوف حاجات غريبة كائنات بلاستيكية
تضع كل منها سكينة معجون او ربما سكنتين لو كان كان الشغل واخد حقه
ويتحول لونها من الاسود الى القمحى ومن القمحى الى الابيض
لكن العجيب فى الامر انك تلاقى وجوه ناس ويكأنها عليها طبقة من الجير
وعند سؤالك لاحدهم تجد الجواب اننا نساير عصر الموضة والالوان
والجير هو اللى ماشى اليومين دول وهذا احد اسباب غلو سعر الجير
ان الطلب زاد عليه ممن يواكبون عصور الموضة
واضافة الى الجير نجد بعض الالوان الاخرى التى تخالط الجير كالذى يتم وضعه اعلى العين
الوان طبيعية كتير جدا وكأن الاخت اللى ماشية بتعمل دعاية لدهان ما ( مش هقول سكيب علشان محدش يقول بيعمل اعلان)
دا غير الالوان المتعددة اللى لما تبصلها تحس انك بتتفرج على لوحة تزكارية لقبر المدعو (....... ...اكمل مكان النقط 7 درجات )
لدرجة ان اى حد بيبقا ماشى فى الشارع بيحس انه ماشى فى وسط مجتمع صناعى
معدش فى مجتمع طبيعى من الدرجة الاولى كله دلوقتى بقا صناعى
خاصة مع ظهور نظرية البنات الصينى اللى غرقت السوق
بقينا نحس اننا فى اليابان او الصين كل الناس بقت شكل بعض بنفس درجة لون البشرة
من هنا جت نظرية المجتمع البلاستيكى القابل للتشكيل
لان البلاستيك زى منتو عارفين قابل للتشكيل وعند درجة حرارة اقل من 100 يسهل تشكيله
انا مش عارف ايه اللى جاب البلاستيك فى كلامى بس حظه كدا
ومش عارف ايه اللى جاب النقاش فى الموضوع يمكن علشان النقاش بيفضل يخلط الوان متعددة لحد ما يطلع له اللون اللى هو عاوزه
وهذا التشبيه اقرب الى ما يتم فعله من قبل الفتيات الذين يهوون النقاشة فى الاوجه اللى لسة تشطيب جديد

مش عارف ليه الهيافة خدتنى وخلتنى اكتب موضوع ممكن كتير اوى يقولو انه اقرب الى التفاهة من الهيافة ( زى منتا بتقول كدا دلوقت )
عزيزى الريدر انا عارف ان الموضوع مش هيعجبك بس انا كتبته علشان اغلس عليك لانى فاضى
وشكرا لكل بنى ادم وصل للسطر دا لان كالعادة محدش قدر يكمل الموضوع (دا ان صح تسميته موضوع )
والموضوع دا صناعى مش طبيعى بدليل ان الوانه مش متناسقة مع بعضها
تيك كير ونشوفكم فى مجتمع طبيعى على خير
دمتم فى رعاية الله