الاستاذ رمضان مبروك ابو العلمين حمودة

[..Just Stop]

سلام عليكم

اقدم اعتزار لكل مدرس فهمنى غلط من مدرسى البوابة
ان كان التعبير خاننى فى كلمة معظمهم فنا عدلتها وخليتها بعض ياريت محدش يزعل

ازى حضراتكم يارب تكونو بخير
وكالعادة وزى معظم المصريين مش عارف ابدأ الموضوع ازاى
ندخل فى الموضوع علطول
فضلت الف وادور وانكش على صورة تصف الموضوع ده فاتكعبلت فى الصورة دى فى المنتدى

وفعلا هيا دى الحقيقة
موضوعى هيبقا عن حاجتين تلاتة كدا
اولا
التعليم فى بلدنا المحروسة
طبعا الكل شايف مناهج وكلام مكلكع فى الكتب الدراسية تكاد تكون المناهج دى اختفت من قرون فى العالم معدش غير البلد بتاعتنا دى ( ليه بقا لاننا مش زى اى حد احنا مش زى غيرنا )
ماشاء الله يدخل المدرس يقعد يتكلم على مدار الحصة او المحاضرة
بعض المدرسين ( بعض هاه )
بعضهم يعملو نفسهم بيشرحو والطلبة تعمل نفسها بتفهم وما شاء الله شغل عصير لمون فى بعضه وكأنك يابو زيدما تعبت نفسك فى المدرسة وجيت
ودا ذنب مين
مش هنقول اساتذتنا الافاضل ولا هنقول الطلاب المبجلين هنقول العيب فى النظام والبلدى يوكل
يعنى عايزين مناهج تدري مش مناهج تتصم وتدخل الامتحانات نرصها وفى الاخر استفدنا ايه ( استفدنا صلاة النبى )

تانى حاجة
الدروس الخصوصية
طبعا ماشاء الله كلنا طلبة ( طلبة علم مش طلبة قرب محدش يفهمنى صح )
شايفين الدروس الخصوصية اللى بتجرى فى العروق المصرية مجرى الدم فى الوريد
بعض المدرسين ( بعض هاه ) بيبيعو ضميرهم
تلاقى المدرس من دول ماشاء الله يدخل الحصة يرغى ربع ساعة مع الطلبة فى الفاضى وربع ساعة على ما يكتب عنوان الدرس وربع ساعة يقول الطلبة بطلو كلام يا ولاد
وعشر دقايق يفضل ينصح فيهم وخمس دقايق يقول فيهم احنا هنشرح النهاردة يا ولاد ( وفجأة الجرس يضرب ويخرج المدرس ماشاء الله فارد جناحاته وفرحان ان الحصة خلصت
والطلبة طبعا عايزة حد يشرحلها تروح جرى على اقرب مدرس ( اللى مبيشرحش فى المدرسة ) ودرس خصوصى وسبحان الله الساعة بتاعة الدرس الخصوصى يفضل يشرحها كلها وكأنه بنى أدم تانى غير اللى كان فى المدرسة
وزى ما الكل عارف اسعار الدروس الخصوصية عاملة ازاى اسعار فى السحاب ماشاء الله ( اللهم لا حسد )

والطلبة ياعينى مشحتين اهاليهم وراهم
خاصة فى مرحلة الثانوية ولى الامر بيدفع دم قلبه وفى الاخر تيجى امتحانات الثانوية زى السنة اللى فاتت والطلبة تنتحر
والمدرس نفسه بيشكى من غلو اسعا ر السلع
طب بتشتكى ليه منتا كمان اسعارك نار ومش حامل هم حد
ودا ليه ( لاننا مش زى اى حد احنا مش زى غيرنا )

تالت حاجة
نهاية المطاف
لقيت الصورة دى بردو واصفة كلامى

بعد كل التعب
ابتدائى واعدادى وثانوى وجامعة يبقا حالنا كدا !!!!!!!!!!!!!!!!
مفيش شغل وكله بيقعد يتفرج على شهادته اللى على الحيط ولما يزهق يروح يقعد على القهوة على بال ماحد يجيبله شغلانة حفر فى مشروع مجارى
والحقيقة مش عارف ايه الحل فى دا
نتعلم مش نافع نطلع من التعليم مش نافع
يبقا نعمل ايه؟؟؟؟؟؟؟؟
انا عرفت الحل لو انتو كمان عرفتو اتصلو بينا وانتو تكسبو شهادة تقدير تعلقوها جمب شهادة نهاية التعليم اللى على الحيط
وبعد دا كله نقول العيب فى مين
ودا ليه ( لاننا مش زى غيرنا احنا مش زى اى حد )
........................
عارف انى رغيت كتير ( طبعنا واللا احنا يعنى هنشتريه )
استحملونى معلش
ودايما نحب نختم الموضوع
بــ
دمتم فى رعاية الله
:::::::::::::::::::
لا اله الا انت سبحانك انى كنت من الظالمين