كلمتين صغيرين ياحلوين يامقطقطين(الطلبه الجدد بطب بيطري القاهره )

[SENDRILLA]

بصو يا دكاتره
النهارده وانا بكلم ملك الرحمه ع الميل
كان في سوء فهم كده وصلنا لان في موضوع كويس اوي ليه نفس فكرة الموضوع ده في منتدي تاني
وكان المفروض عشان افهم اني ادخل الموضوع اشوفه
وبالفعل بعتتلي اللينك ودخلت
وبصراحه الموضوع فيه مجهود جامد جدا
من طالب عندنا في الفرقه التالته اسمه احمد فتحي ( علي حسب ما ملك قالتلي )
وهو اسمه في المنتدي brave heart
حبيت انقللكو الموضوع هنا عشان تستفيدو منه
هو كاتبه علي هيئة حلقات
وكمان ده اكبر مني يعني اكيد انا كمان هستفيد منه
ربنا يجازيه خير
وهنزللكو الموضوع بنفس الصوره
حلقات
ودي الحلقه الاولي
وهحاول انزللكو كل يوم حلقه او 2 عشان قبل العيد بقي والكحك والبيتي فور بقي
كل سنه وانتو طيبين
اليكم بالحلقه الاولي

تحية طيبة وبعد؛



لم أكن أنوي عمل مثل هذا الموضوع خصوصا في الوقت الحالي..نظرا لإنشغالي ولضيق الوقت في هذا الشهر المبارك.


ولكن طالما هناك ولو شخص يحتاج لهذه المعلومات فلايمكنني تأخير الموضوع


وهذا العمل خالص لوجه الله ...لا اريد شيئا سوي الدعاء لي ولوالداي
وأتمني ان يوفقني الله في تقديم كل ما أملك من إفادة


والله الموفق


.
.


الموضوع خاص بطلبة( جامعة القاهرة)


................................

أولا :أهلا بكل طالب طب بيطري جديد...وإن شاء الله بالتوفيق في الدراسة..وفي المجال البيطري بصفة عامة.

ونصيحة للجميع : حب الكلية وإلا هتتعب أوي

حتي لو مش حابب الكلية إقنع نفسك بما قسمه الله ليك...لأن هو ده النصيب في الأول ولأخر

فامشي فيها بمزاجك وإلا إنت إللي هتتحمل كل العواقب بعد كدا...اللهم بلغت اللهم فاشهد.

..............................

نظام الدراسة والكلية

.

.

الكلية نظامها بيتبع حاجة إسمها (نظام الساعات المعتمدة) هو في حد ذاته مش وحش...لكن بكل اسف بيطبق في كليتنا غلط خالص يعني بياخدوا من النظام ده إللي علي مزاجهم..يعني مش بيطبق بحذافيرة.

برده لسه موضحتش يعني إيه ساعات معتمدة

أقولك

النظام ده يعني ليك في الترم مواد بعدد ساعات معينة متقدرش تسجل مواد أكتر من العدد المخصص للترم..يعني كل مادة ليها عدد ساعات ثابتة (جزء للمحاضرات وجزء للعملي)....المهم في أول السنة هيقولك تروح تسجل مواد الترم إللي عليك في بدايه اول اسبوع دراسي وإلا مش هتحضر السكاشن....

أوضح أكتر

ولانه زي ماقلت نظام ساعات مش مطبق صح ..فانت غصب عنك هتلاقي جدول نزلك بالمواد إللي عليك في الترم وهو ده إللي حضرتك مطالب تروح تسجل مواد الترم ده عند المشرف الأكاديمي

(المشرف الاكاديمي هو دكتور مسؤل عن عدد طلبة معين طول السنة ...من حيث تسجيل المواد أو اي حاجه إنت محتاجها علي طول تلجأ ليه.....وهما بينزلوا كشف اول الدراسة بأسامي المشرفين دول وارقام الطلية إللي مع كل مشرف)

متقلقش يعني كل شيء هيكون واضح بإذن الله.

المهم هتلقي جدول المواد بتاع الترم الأول نزل ممكن قبل الدراسة كمان بكام يوم....وده إللي هتستمر عليه طول الترم إن شاء الله.

اوك

طب بالنسبة للمحاضرات.

في كليتنا العزيزة المحاضرات ليها موعد واحد!! يعني مش بمزاج حضرتك ..وده برده يخالف نظام الساعات المعتمدة! لكن نقول إيه!

المهم كل الطلبة بتحضر مع بعضها موعد المحاضرة بتاع كل مادة...ومش بيكون فيه إعادة ليها. عشان كدا لازم متفوتش حاجه (وهنوضح الحضور ده بعدين إن شاء الله).

يعني يمكن يكون موعد المحاضرة واحد لقله عدد الدفعات

بالنسبالنا كنا 450 تقريبا أو اقل شويه. والدفعة إللي بعدينا حوالي 250

مش عارف إنتوا كام بئي؟!

بالنسبة للسكاشن

اولا يعني إيه سكشن:

سكشن ده هو الجزء العملي من المادة واللي المفترض إنك بتطبق فيه عمليا ...يعني علي حسب المادة

المهم...بيقسموا الدفعة كلها إلي 6 سكاشن إن شاء الله

أ – ب – ج – د – هــ - و

ترتيب ابجدي

وبينزل للسكاشن مواعيد مختلفه ...هنا بئي مش كله مع بعضو زي المحاضرات!

وكل واحد لما يشوف رقمة في الدفعة (علي الكرنية إن شاء الله) هيعرف هو في اني سكشن

وعليه بيشوف موعده إمتي في الجدول وبيحضر علي اساس الموعد ده

وغالبا بيكون أ وب مع بعض بالتبادل

و

ج , د مع بعض

هـ , و مش بعض

هما بيقسموها كدا..ومحدش يسألني ليه؟!

اوك ..كدا وضحنا شوية نظام الكلية ونبذه عن المحاضرات والسكاشن

دلوقتي إنت المفروض عرفت بئي مكانك في الدفعة والامور بتضحح واحدة واحدة

.....................................

الأدوات المطلوبة

ييجي حد يقولي طب أنا مطلوب مني أدوات إيه يا دكتور؟!

أقولك أنا

أهم شيء محتاجة في بداية الكلية هو البالطو ...

ومش هتدخل اي سكشن لاي مادة من غيرة (مع إنه بيفوتوا كتير يعني..بس نخلينا محترمين أحسن ونجيب البلطوا عشان مش كل مرة هتعدي علي خير)

هتلاقي ناس تقولك ادوات تشريح ومش عارف إيه.

سيبك من اي كلام ...وهتسمع كلام في الكلية دي كتير اووووي

اسمع من هنا وخرج منها هنا!!

إنت كل إللي محتاجة في أولي حاليا

هو البالطو عشان كل السكاشن

بالإضافة لألوان خشب

ودي هيطلبوها منك في قسم الهستولوجي عشان الرسم

(هنتكلم عن الهستو دي بالتفصيل بعدين إن شاء الله)

يعني الخلاصة

بالطوا و ألوان خشب ....ليس إلا.

طيب في ناس مش عارفة تجيب منين البالطوا....اقولك ببساطة هتلاقي ناس بتبيعة داخل الكلية ...أو ممكن حضرتك تنزل القصر العيني هتلاقي هناك محلات ادوات طبية ملهاش عدد . وكمان هيكون سعرها أحسن من سعر الكلية!

والألوان....أكيد مش محتاج أقولكم يعني.

أوك كدا إتكلمنا عن الأدوات إللي انا محتاجها

....................................

طيب معلومة مهمة لازم نقولها في الأول

الكلية بتاعتنا ليها مقرين...والأتنين في ميدان الجيزة...في واحد أمام كوبري فيصل و (جمب مدينة الطلبة للبنات) بالظبط...والمقر ده هو إللي فيه الأدارة

وفيه بعض اقسام الكلية

والمقر التاني

برده يعتبر في الميدان ..لكن ده أمام كلية زراعة بالظبط وده بيسموه المبني القديم

والأول بيسموه المبني الجديد

والمقر ده فيه باقي الاقسم وفيه أغلب العملي لـأنه فيه المشرحة والهستولوجي وكدا

وهنتكلم تفصيلا لاحقا إن شاء الله.

وعموما هما في الجدول بيقولك المدرج الفلاني في المبني القديم او الجديد

وبالمثل السكشن الفلاني برده في المبني القديم او الجديد

متقلقش يعني الجدول بيكون فيه التفاصيل دي...بس ربنا معاكوا لأن الواحد بيفضل رايح جاي من هنا لهنا لحد ما الصحة راحت خلاص! ولسه لما تعرفوا بقية المشورة!!

انا بهزر طبعا...الأمور هتبئي تمام إن شاء الله

......................................

برده لازم نذكر حاجه كمان ...مصاريف الكلية ملهاش دعورة بفلوش الكتب

مصاريف الكلية هتدفعها هتدفعها في اول السنة

وهي بتكون في حوالي يعني 150 يزيد او يقل شوية ...مش متذكر والله

أما الكتب فانت حر تجيبها والا متجيبهاش ملهاش دعورة بالمصاريف...وإن شاء الله برده مش هننسي موضوع الكتب لما نتكلم بعد كدا.

امممممممممم

أعتقد كدا مش ناسي حاجة إن شاء الله

دي بس مقدمة بسيطة ....وهييجي تفصيلا كل شيء عن المذاكرة والمواد وكدا إن شاء الله

ولو إفتكرت شيء هضيفة واكيد مش هبخل بيه بعون الله

لو في اي شيء مش واضح انا موجود بفضل الله

والسلام عليكم

يتبع؛




BraVe He*RT