مش عارف أجيلك يارب

[الشاعر/محمد علي]

مش عارف أجيلك يا رب

أنا مش خليل الله
أرتمى جوه قلب النار
وأخرج
"برد وسلام"

وانا مش كليمك
ولا عندى العصا
أشق بيها البحر
واضرب قلب خوفى
لجل ما اعبر بالكلام

ولا انا نوح
أركب سفينة النجاه
أهرب بقومى للحياه

أنا عبد نفسى تحبنى
أنا عبد نفسى تضمنى
تبعد شيطانى
تهت وتاهت سكتى
ف الدرب ضلت خطوتى
ووقعت مش عارف أقوم
وانت الملك
وانت العزيز
وانت القريب
م الوريد
انت الودود

وانا كل عمرى بيرتجف
من خوفى منك
مش عارف أدعى من ذنوبى
وانت قلت انك قريب
ادعونى استجيب

وانا ليل نهارى بادعى
واقول يارب
انت العظيم
تواب رحيم
بتتوب على عبدك
وتاخده ف رحمتك
مشتاق لشجرة ف جنتك
مشتاق لطلة ع النعيم
إنت الكريم
بس أعمالى قليلة
والحيلة تاهت من إيديا
مش لاقى سكة غير مكانك
مش لاقى حد ياخد بايدى
وانت سيدى
لجل حبيبك النبى
ماتسيبنى ليها
الدنيا واخدانى إليها
بتغرنى
بتهزنى
بتهدنى

والشيطان واقف قصادى
خدنى ليك يارب جنبك
خدنى ليك أنا قلبى حبك
من زمان
من يوم ما جيت
بس مش عارف أجيلك

=
محمد على