كنت بتعمل ايه ؟! .. احكيلنا ..

[الاسطورة]

بسم الله الرحمن الرحيم
نبدأ مع مرحلة جديدة
الابتدائى
_ انا كنت ف مدرسة خاصة اسمها مدرسة منار العلم ...تقدروا تقولوا ان مستواها كان كويس بالنسبة للطلبة زمايلى يعنى مافيش تشرد قوى ...بس اكيد فى مواقف
_طبعآ كننا ف اولى ابتدائى تقريبآ وبابا كان بيعرفنى المد بالألف ..وانا قاعد ماليش ف اى حاجة...كان بيمثلهالى بكلمة ثعبان...لحد ما ف الاخر قالى ثعبااااااااان ..انا تعباااااان هههههههههههههه
وبرضو طلعت مش باحب العربى
_مرة ف 3 ابتدائى ..كان قاعد جنبى واحد صاحبى اسمه عمر..فجأة قالى محمود ..قولتله يا نحم ...قالى الحق انا ها اقع ف الشارع
طبعآ انا فضلت اضحك لما جالى هبوط حاد والمدرسة بقى جابتنى من قفايا وع السبورة بره وبتضحك على ايه
المهم قولتها عمر قالى كذا قالتلى طيب وايه يضحك ف كده
ست غريبة والله
_ طبعآ انا قولتلكم ان المدرسة خاصة يعنى حجمها صغير وعدد الطلبة صغير وكده ...وعايشين بقى ف الالتزام وبتاع
مرة ف رمضان كنت مدى لواحد صاحبى فلوس يشتريلى صواريخ لان الراجل جنب بيتهم ...جابهم واحنا ف المدرسة ...طلبت معايا بقى انى افرقع واحد ف الحوش وفى حصة شغالة ..المهم كان ليا واحد صاحبى مصيبة اسمه محمد شاكر هو اللى ها ينفذ معايا ..اخدته وطلعنا ف دور فاضى عشان نرمى الصاروخ قابلنا واحد زميلنا ..
قولناله احنا ها نعمل كذا كذا بعشم بقى ...قالنا ماشى وسابنا ونزل..المهم تم العمل الارهابى والصاروخ صوته جلجل ف المدرسة .. المهم نزلنا الفصل لقيت الناظر مستنينا ف الفصل ...كنتوا فين يا شباب ..كننا بنصلى ...طيب تعالوا ورايا ...ف مكتبه بقى قالك انتوا اللى فرقعتوا الصاروخ ..طبعآ احنا ما حصلش يا مستر ..قالك زميلكم فتن عليكم ...انا قولت اه يا ابن ال.... المهم قعد يقرر فينا وانا ها اعملكم استدعاء ولى امر ومش عارف ايه وانا مفيش خالص ...لحد ما صاحبى راح معيط وقايله ..قالى ايه الحال دلوقتى ...انا برضو قولتله ما حصلش ... المهم ان الحوار خلص على كام عصاية ولو اتكررت ها افصلكم
_ بعدها بكام يوم ف حصة العلوم ....واحد صاحبى ضايقنى مسكنا ف بعض ...نزلنا للناظر ..الراجل استقبلنى احلى استقبال والله ...المهم قالنا ايه اللى حصل ..حكيتله انا طبعآ انى الحمل الوديع وان الواد هو اللى مسك فيا ..قالى انت كذاب وانا مش باصدقك ..وطبعآ ادانى اللى فيه النصيب وطلعنى الفصل
_الموقف ده بقى بعيد عن المدرسة ....عندنا ف البيت جزامة طولها حوالى مترين..كبيرة قوى ...المهم راجعين مرة كلنا من برة ..فا انا بافتح رف الجزامة ..قامت وقعت فوقى انا واخويا ..الحمد لله ربنا ستر مافيش حاجة ...المهم بقى ف الحوار انى كنت طالع من تحت الجزامة عمال اضحك ...واخويا يعيط ..فا سابونى قالك بيضحك مش مشكلة ...يقولوا لاخويا بتعيط ليه يقول اصل محمود بيضحك ...هو ده كل اللى كان مزعله ..بس بجد يومها ربنا نجانا ..الحمد لله
_طبعآ انا كان عندى هواية انى اتخانق مع الشباب اللى كانوا بيوقفوهم زى ما بيقولوا شرطة ..عشان اطلع من الحوش ف الفسحة ..واحد زميلى بقى واحنا ف 3 ابتدائى زقنى من ع السلم ..وقعت ايدى اتكسرت ..المهم طلعت الفصل المدرسة تتحايل عليا يا ابنى انزل تحت للمرضة شوف فى ايه ..وانا اقولها لا انا كويس ...لما روحت البيت كانت ايدى متبهدلة روحت للدكتور طلعت مكسورة ..بابا جه المدرسة تانى يوم وازاى ده يحصل ...وازاى ماحدش يودينى للدكتور ولا اى حاجة ..المدرسة تقوله انا اتحايلت عليه ..وانا اقول ما حصلش ..يا ابنى انا مش قولتلك ...اقولها لأ ..يومها بابا كان ها يوقع المدرسة ..بس حصل خير

تقريبآ ده الابتدائى بتاعى ..مش جامد قوى برضو ...انتظروا بقى الاعدادى والثانوى ...والمشكلة كلها ف الثانوى ده