:::رشح نفسك لمنصب المدير وشارك في المسابقة::::

[BaNZeR]

دلوقتي تقدر تسجل في المسابقة وترشح نفسك لمنصب مدير مدرسة

مش محتاجين منك أكتر من الآتي
إنك تكون مدرس اول او اكبر

فقط ابعتلنا على وزارة التربية والتعليم بياناتك ودرجتك وتقدر تكسب معانا ترقية
المسابقة سهلة وبسيطة

حنديك امتحان وتحله
لو حليته صح حتكسب معانا الترقية لمدير مدرسة
او ممكن لو حليت نص نص تاخد وظيفة وكيل
لو خسرت مش حنقولك هارد لك
المسابقة فوز وخسارة
وبالتالي يبقى انت حتخسر معانا منصبك الحالي ولو كنت مدير المدرسة وحترجع معانا ملازم اول ...عذراً مدرس اول من تاني
وإن شاء الله ممكن تلحقنا دور تاني لو عبرناكو يعني وممكن تكسب معانا تاني

التسجيل في المسابقة اجباري على جميع المدرسين والوكلاء والنظار والمديرين
ومن لم يشترك حيرجع برده مدرس اول وحيزيد عليه العقوبة وحياخد جدول حصص كمان !!

ونقولكو كلكو ربنا يوفقكو وتنجحو معانا في المسابقة
ولا اراكم الله "راسب" فيكم

>>>>>>>>أنتهت المقدمة<<<<<<<<

يمكن حضراتكم فاهمين انا بتكلم عن ايه
وخصوصاً السادة المدرسين
ويمكن البعض مش عارف انا بتكلم عن ايه

شوف القرار الاخير اللى نزل ده وانت تفهم قصدي

مفاجأة رهيبة رفعت وزارة التربية والتعليم جميع وكلاء ونظار ومديري جميع المدارس بالمحافظات. أصدر د. يسري الجمل وزير التربية والتعليم قراراً بإجراء مسابقة بشغل وظيفتي وكيل مدرسة ومدير مدرسة لمدة 3 سنوات ومن لا يدخل المسابقة من المديرين والوكلاء الحاليين بالمدارس يعود مدرساً أول ويتسلم جدولاً للحصص وإذا رسب المدير أو الوكيل الحالي أيضاً يعود مدرساً أول كما كان قبل سنوات عديدة وقبل أن تتم ترقيته لمدير أو وكيل مدرسة. الوزارة لا تعترف بالمدير أو الوكيل الحالي لأية مدرسة وطلبت من الجميع أن يتقدم لشغل وظيفة مدير أو وكيل مدرسة بشرط أن يكون معلماً أول (أ)وقضي سنة بعد حصوله علي الكادر لوظيفة وكيل مدرسة وأن يكون معلماً خبيراً أو معلماً أول (أ)وقضي أربع سنوات بعد الدرجة الأولي للتقدم لوظيفة مدير مدرسة وفي حالة نجاح المتقدم للمسابقة يمضي 3 سنوات في وظيفة المدير أو الوكيل.

ده أحد قرارات السيد المبجل وزير التربية والتعليم الاستاذ الدكتور يسري الجحش
عفواً
يسري الجميل

آخرة العملية التعليمية بقت مسابقة !!
ولو المدير "رسب" في الامتحان يرجع ملازم اول
قصدي مدرس اول
ويدي حصص كمان

طيب ايه اللى حيحصل لو كل المدرسين نجحوا وبقو مديرين ؟
هل المدرسة حتحتوي على مديرين ومدرس واحد فنقلب الميزان؟
ايه اللى حيحصل لو منجحش ولا وكيل؟
حنستغنى عن المنصب ده ؟

معنديش كلام اكتر من كده عايز اقوله
فالموضوع لا يستدعي إلا السخرية
وعمار يا وزارة التربية والتعليم

والآن اصبح هناك سؤال يراودني بشدة

هل فائدة المدرس أن يَمتحن الطالب أم أن يُمتحن أمام الطالب ؟؟؟؟؟؟

ياريت محدش من المدرسين يضايق من اسلوبي الساخر في الكلام
ويعلم الله إني ساخط لهذه القرارات ولست ضدكم
ولكني فقط حزين للمستوى الذي هبطنا إليه
فلم يسعني سوى الضحك بعدما قرأت ذلك