هااااااااااااام الى كل البشمهندسين الخبرة

[mdamido]

المشاركة الأصلية كتبت بواسطة eng_dero

(بسم الله الرحمن الرحيم)

-----------------------

التوبيك ده منى او من كل البشمهندسين الجدد للبشمهندسين اللى بقالهم زمن طبعا فى هندسه او خلصوا يعنى
(المهم)

*طبعا احنا بعدما عرفنا اننا فى هندسه فرحانين اه
..... بس مش اوى
وده لاننا عرفنا مآسى الكليه والناس اللى فيها

**وطبعا احنا لازم نستغل حضراتكوا لاننا ببساطه كل اللى نعرفه مواد ثانوى وكيميا وفيزيا غير كده لأ

*** واللى عايزة اعرفه اننا اكيد لازم يبقى عندنا فكرة عن اى حاجه فى الكليه عالاقل فى اعددى مينفعش ندخل كده مش فاهمين اى حاجه خالص

****هنا بقه دوركم عايزه اعرف احنا لازم يبقى عندنا فكرة عن ايه وايه لازم نبدأ ندور عليه ونعرفه اى كتب لينكات فيها حاجه عن دراستن اى حاجه ممكن تفيدنا ونبقى مستعدين بيها للمعركه اللى داخلينها

*****بس كده كفايه وميرسى ليكوا مقدما

اولا الف مبرووووووووووك على دخولك كلية الهندسة

تاني حاجة عايز اقولك برافو على تفكيرك ده من الاول هو يمكن شوية حماسة في الاول بس اتمنى انها تمكلي عليها عشان تبقي معيدة في الكلية ان شاء الله بس معيدة من النوع الشاطر

المهم بقى
اعدادي بصراحة كوكتيل لكل حاجة وانا مش هنا عشان اعيد اللي قاله الباشمنهندسين قبلي (مشكووورين)

بس عايز اقول شوية ملاحظات :

* يريت متدخليش الكلية كانها معركة بينك وبين الكلية عشان متخسريش كده كل حاجة في الاول
في الثانوية وبرغم كل حاجة بتحصل فيها الا انك بتاخدي حقك تالت ومتلت في الورقة ونسبة قليلة جدا اللي بتتظلم في الثانوية ,,,,,,, الكلام ده مش موجود في الكلية مش كل مرة حتاخدي حقك تالت ومتلت ياما اكتر ياما اقل وانتي حتحسي بكده

* لو ليكي اصحاب جدعان يخافو على مصلحتك (بنات او اولاد ) الاستغلال مفيش احسن منه خصوصا في الكلية اضمن لك انك جيد جدا مستريح مع مزاكرتك ولو عايزة امتياز يبقى تتعبي شوية اكثر في المزاكرة اما لو لا قدر الله مفيش النوعية دي من الاصحاب معاكي يبقى الافضل تبعدي عن الصحوبية او بمعنى اصح متدخليش اصحابك في المزاكرة ولا تعتمدي عليهم و لا تسالي على حاجة ولا كانك في الكلية اصلا Help yourself now

* على حسب الكلية بتاعتك ونظام الدكاترة انا معرفشي دخلتي ايه بس مش الكلية بتاعتي اكيد (لان انا في معتقل جوانتانامو في منوف ) لو الدكاترة بتنزل الكتب اول او تاني اسبوع بالكتير حلو اوي وكل حاجة زاكريها خلصيها اول باول ومتناميش في الخط مع باقي الناس ( يااااااااه انت بتدحي من دلوقتي السنة طويلة ) غالبا الناس دي بتجيب اكتر منك اخر السنة
اما لو الكتب بتغيب زي عندنا على متنزل في المكتبات والكلام ده يريت بقى لما تحضري المحاضرات تبقى تعرفي الدكتور بيتكلم في ايه (تكتبي عناوين المواضيع ) ومفيهاش مانع لو رحتي المكتبة وفتحتي كتاب قعدتي تبصي فيه كده وتفتكري الدكتور كان بيقول ايه جمبك كا****ينو او هوت تشوكلت لان ساعتها مش حتبقى مزاكرة على قد مهي حتبقى المام بالمواضيع اللي اتشرحت ومتغرقيش في الاخر لو كان الكتاب 300 صفحة

* في سنة اعدادي مادة اسمها رسم هندسي ووصفية انا بقولك من دلوقتي وربنا يشهد على كده خدي فيها كورس على طول اول متبدا الدروس فيها انتي حتاخدي كورس في الوصفية بس


ولو عايزة امتياز متضيعيش اي درجة مهما كانت شيتات او التقارير اللي ملهاش لازمة او حتى حاجة طلبها دكتور مش مهمة
مثلا عندنا دكتورطلب مننا نكتب شعر عن مادة الرياضة وحياخد خمسين او عشرين درجة زيادة درجات زي دي لا يستهان بيها طبعا لو تقدري تكتبي شعر وده على سبيل المثال


اتمنى اني مكنش قاطعت عليكم كلامكم يا باشمهندسين واسف للتطويل ولو في اي حاجة تسالي فيها انا تحت امرك

مقولتوش بقى حتروحو اجازة ولا لا