هم يضحك .. وهم يضحك ..

[madozz]

بعد 3 سنين مرار وتعب وقرف ومصايب وبلاوي سودا وزرقا وبيج وكاروهات وخناق وزعيق وضغط اعصاب ما فيش منه اتنين .. يجي يقولك بكل سهولة الحد الادني وصل 98 % .. بكل سهولة أحلامي تتبخر وطموحاتي تتكسر المهم هو يكون سعيد بأن الحد الادني وصل 98 % .. بعد وفاة أبويا الله يرحمه "اتوفي السنة دي" اللي كان حلم عمره يشوفني "دكطور" قد الدنيا في "كولية التيب" وكنت هأموت وأحققله الأمنية علشان يرضي عني يجي هو يقولك الحد الأدني 98% .. قرايبي كلهم ضاغطين ضغط رهيب علي اعصابي طول السنة علشان أبقي أول "طور" في العيلة ونرفع اسم العيلة باسمي يجي هو ويقولك الحد الأدني 98% .. بعد سنة شوفت فيها زمايلي وهما ماسكين البالطو الابيض كل صبح رايحين "الكولية" وأقول هأبقي زيهم .. سنة بحالها قاعدها كلها علي مادة واحدة علي أمل ان التنسيق يبقي زي السنة اللي فاتت يجي برضه هو هو ويقولك الحد الأدني 98 % .. بعد دموع أمــــي وفرحتها بيا أني أنا عديت الكيمياء صافي تماما يجي ويقولك الحد الأدني 98% .. بذمتكم مش هم يضحك .. وهم يضحك ..