لطلاب الثانوية اسالنا اى سؤال عن اى جامعه

[vampire1188]

لو سمحت عايز اعرف كل حاجة عن كلية الهندسة الجامه الامريكية اسعارها مجموع كام شكراااا

أول حاجة انتا طلبتها السعر ..

عايز اقولك ان الجامعة الامريكية مابتمشيش بنظام السعر المحدد .. يعني مش يقولك مثلا ان انتا السنة دي هاتدفع كذا

لا .. هما بيقولولك انتا طبقا للي انتا هاتدرسة هاتدفع كذا

وبما ان الجامعة ماشية بنظام الساعات المعتمدة .. بالتالي طبقا لعدد الساعات اللي انتا هاتدرسها هاتدفع على قدها

وغالبا عدد الساعات مابيقلش عن 30 ساعة .. اذن حضرتك هاتدفع في الترم الواحد 42 الف جنيه

طبعا عايزك تعرف انهم هناك مش ماشيين بنظام التيرم الاول والتيرم التاني بتاع الحكومة !

لا هما ماشيين بنظام تاني شبه بتاع الحكومة

النظام بيتلخص على اساس ان السنة كلها بتتقسم لاربع فصول دراسية

فصلين دراسيين مدتهم كبيرة (اللي هيا بتساوي في الحكومة الترم الاول والتاني)

ودول اسمهم fall semester = الترم الاول .. spring semester = الترم التاني

وفصلين دراسيين مدتهم صغيره (ودول اختياريين على حسب مانتا عايز تاخدهم او لأ)

وبيبقوا في الاجازة طبعا

الاول اسمه winter session ودا بيبقي في اجازة الـ fall ، التاني اسمه summer session ودا في الاجازة الكبيرة

طبعا ماتنساش ان اي حاجة وكل حاجة في الجامعة دي بتمشي بالفلوس

يعني تروح تسحب ابلكيشن عشان تسجل في المادة .. تدفع فلوس .. تعمل دروب للمادة .. تسحب فلوس

تنسحب من الكورس .. تدفع فلوس .. وهكذاااااااا

الكلام اللي فات دا كله بالنسبة للفلوس .. يعني من الاخر لو مقتدر والحالة المادية كويسة والحمدلله خشها

بالنسبة بقي لقسم هندسة .. عشان تبقي عارف برده .. هما هناك مقسمين الجامعة لتلات اقسام رئيسية

قسم للعلوم الطبيعية .. وقسم للعلوم الهندسية .. وقسم للعلوم الانسانية .. غير اللغات

العلوم الهندسية دا بيضم كليات الهندسة وكلية الحاسبات والمعلومات

طبعا عشان تبقي عارف المبني بتاعهم هناك من أبرز المباني اللي في الجامعة كلها

ومنطقة الكلية بتاعة هندسة دي من اكتر المناطق الحيوية اللي في الحرم عندهم هناك .. وتحب تقعد هناك اوي

بس هتواجهك مشكلة وهيا الشمس .. عشان للاسف الكلية بتطل على منطقة اسمها بارتليت بلازا

ودي كلها شمس .. بارتليت بلازا دي زي ماتقول كدا عاملة زي حوش المدرسة !! .. بس على كبير بقي

عشان ماخنقكش في الرغي الكتير ..

انتا كل اللي بتعمله بتروح تقدم عادي جدا زيك زي اي بني ادم رايح يقدم في الكلية

بتروح تسحب ملف اسمه admission application .. ودا بـ 250 جنيه .. ممكن يكون غلي ، هابقي اسألك صحابي

بعد كدا وانتا بتكتب البيانات بيقولك حدد الميجور بتاعك لو انتا هاتخش هندسة ..

طبعا نصيحة مني ليك .. سيبها فاضية وماتعملش تشيك عليها .. لإن انتا هاتبقي جديد لسه ومش عارف حاجة

فاما تخش جوا هاتتلاقي دكاترة كتيرة هايساعدوك ويحددولك انتا ايه هوا القسم المناسب ليك

بعد طبعا ماتتعرض لاختبارات الانجليش وامتحانات الـ ELPT والتويفل والـ voice room وكل الكلام دا

ربنا هايكرمك ان شاء الله وتعدي (طبعا لو كنت كويس في الانجليش ، لكن لو تعبان وفر على نفسك)

بعد كدا قبل الدراسة مابتبدأ (بتبدأ في اول يوم حد من شهر 9) بـ 3 ايام فيه حاجة اسمها فريشمان بروجرام

ودا بيبقي عبارة عن برنامج معد خصيصاً للناس الجديدة اللي هما لسه داخلين جداد ..

بمعني اصح حاجة كدا زي الويلكم بارتي بتاع اي جامعة حكومية .. بس البرنامج دا بيبقي مستمر لمدة 3 ايام

بيعرفوكوا فيه الجامعة ماشية ازاي وايه النظام وبتتعرفوا على بعض والدكاترة بيعرفوكوا على نفسهم وهكذا يعني

بعد كدا بتبدأ الدراسة ..

طبعا قبل مابتبدأ الدراسة سيادتك بتكون عملت ايميل لنفسك على موقع الجامعة ..

من خلال الايميل دا بتقدر تسجل في المواد بتاعتك

ملحوظة (هناك انتا اللي بتختار المواد بنفسك ، مافيش حد بيجبرك على حاجة)

هاتقولي يعني ايه ؟ .. هاقولك يعني انتا هناك مش زي الحكومة ..

في الحكومة بيجبروك على دراسة عدد معين من المواد خلال الترم الواحد

لكن في الايه يو سي لأ .. بيحددولك عدد معين من المواد لا تتجاوزة (قول مثلا 6 مواد في الترم الواحد)

وانتا بقي بتختار المواد اللي على مزاجك .. بس في نفس الوقت هما بيقيدوك

لإن مثلا عشان تسجل في مادة معينة لازم تكون نجحت في مادة بتكون مؤهلة ليها

من الااااخر .. انتا اللي بتسجل المواد بنفسك .. وعشان ماتتعبش نفسك في حاجة هناك اسمها advisors

ودول عبارة عن ناس من سنة رابعة للي هما الـ minors .. دول هما اللي بيقولولكوا وبينصحوكوا

التوتال بتاع عدد الساعات في قسم الهندسة اياً كان قسم ايه ..

هوا 162 ساعة خلال 5 سنين (10 ترمات) على الاقل

وطبعا فيه اقسام هناك على حسب مجموعك ورغبتك ..

فيه هندسة ميكانيكية ، اكتوارية ، رياضة ، اليكترونية ، زراعية ، بناء ،

والسنة اللي فاتت حطوا قسم بترول وتعدين .. ودا طبعا عليه اقبال كبير جدا

أظن انا كدا جمعتلك المعلومات اللازمة .. وقولتلك السيناريو العام للي هايحصل

ومن الاخر ماحدش هايعرف يشرحلك النظام بتاعهم الا اذا كان هناك وراح هناك وتعامل معاهم في الجامعة

واي استفسار تاني انا تحت امرك ..