هو ده الجهاد .. والله الناس دى بتتعب !!

Rien · #1 25-05-2009, 03:33 AM

السلام عليكم ،
ايه اخباركم ؟ طبعا الامتحانات دلوقتى جميلة وزى السكر
مش موضوعنا بلاش ملل

بس بما اننا ف وقت امتحانات يعنى
انا فاضية اكتب مواضيع .. فيه اعتراض ؟
النهاردة هاتكلم عن فئة من الشعب المصرى
بس فعلا ناس بتتعب اوى
واحنا مش حاسين بكدة
ممكن تقعد اكتر 9 ساعات متواصلة ف مجهود عظيم وكل ده ف سبيل الانتماء
بيتعبوا والله
شوفتوا النهاردة ماتش الاسماعيلى والاهلى ؟
اللى كان نهائى الدورى باين ( حاجة زى كدة

)
شوفتوا انتماء الجماهير لفرقتها ؟
لو ماشوفتهوش ف ده من حسن حظكم اكيد
المهم يعنى
الجماهير راحت الاستاد من الساعة 10 الصبح
وقعدت لحد الساعة 7 باليل
وساعتين الماتش لحد 9
وكمان ساعتين بيحتفلوا بان الاهلى كسب
مش باقولكم بيتعبوا !!
بجد وحقيقى .. الله يكون ف عونهم

لا وفيه قنوات كتيير شغالة من الصبح تحليل للقاء التاريخى ده
ومتهيألى انى شوفت حاجات ابيض واسود كدة ( تاريخ بقى )
لا واللى غايظنى فعلا فعلا
التفتيش المستميت ده
على اساس انهم هايفجروا الاستاد !!
والناس اتبهدلت يا عينى
ده غير القعدة ف الشمس بقى
واللى جايبين الغدا بتاعهم معاهم

الطف حاجة ف اليوم كله
مذيع بيسأل مدير امن اسكندرية
الجماهير هاتخرج ازاى ؟ ومين هايخرج الاول جماهير الاهلى ولا الاسماعيلى ؟
طبيعى يا اذكى اخواتك الاسماعيلى يخرج الاول ..
ليه ؟ عشان الاهلى هايكسب

انا ماليش ف الكورة فعلا
واقصى معلوماتى ان الكورة لما تدخل ف البتاعة المخرمة دى تتحسب جول
بس اهلاوية بالاكراه .. ماحدش قادر يتكلم بقى

موضوع مالوش لازمة وعمرى ماتخيلت انى احط موضوع بيتكلم على الكورة
بس استفزنى شوية .. ده غير ان جالى صداع من التليفزيون وصوت المذيع الرخم ده
واللى شغال من الساعة 4 !!
هاتقولولى وايه اللى مخليكى تتفرجى
هاقولكم انا باعمل اى حاجة غير انى اذاكر
واخويا بيتفرج .. طبيعى هاعمل ايه ؟

يلا على كل حال
مبروك للاهلى
ومش مبروك للاسماعيلى والزمالك واى حد تانى .. انتو ادرى اكيد

ويا ريت ماحدش يرد عالموضوع
عشان بس ماحسش بالذنب انى باضيعلكم وقتكم
هاتقولولى حاطاه ليه ؟
هاقولكم رخامة
يلا سلامو عليكو
ذاكرو كويس بقى .. وادعولى