الأهلي.. نادي القرن.. والباقي يخش الفرن !!!!

[reda_mafia50]

بسم الله الرحمن الرحيم

مبدئيا كده ومن غير ضرب..

أنا جاي النهاردة عشان أرغي في موضوع واحد..

موضوع خطير..

موضوع شائك..

فأرجو أن تتسع صدوركم وتتفتح عقولكم لما سوف أقوله..

حوارنا النهاردة في الرياضة.. وفي جزء مهم جدا منها..

وهو:

لماذا لا أحب الأهلي؟؟

الأهلي فريق عريق.. كبير.. فريق بطولات فعلا..

وشرف كبير لأي مصري أنه يشجع النادي الأهلي.. نادي القرن..

لكن أنا أعلن بمنتهي الصراحة والوضوح.. أنا لا أحب الأهلي..

أحترمه.. لكن لا أحبه..

أما بقى عن الأسباب اللي تخليني ما احبش الأهلي.. فأنا هاسردهالكو كلها دلوقتي..

مبدئيا أنا بشجع فريق عيان من فرق الأقاليم.. ألا وهو الإسماعيلي..

بحبه.. زي ما أنت بتحب الأهلي... وزي ما أنت بتحب الزمالك..

صحيح هو فريق ما بيخدش بطولات إلا فيما ندر.. وصحيح أنا ممكن أحضر بطولة كمان - إذا عمري وصل لستين سنة مثلا -..

بس بحبه..

بيتهمنا الأهلوية أننا حاقدين عالنادي الأهلي..

والله يا جماعة ما حقد.. مش حقد أبدا..

بس كل قصة ليها روايتين...

من حق الأهلي أنه يبني نفسه كفريق.. وأنه يتطلع أنه يكون أقوى فريق في الدوري..

بس الأهلي عنده من المقومات ما تجعله يحترم مشاعر الغير..

يعني مثلا تخيلوا.. أنا إسماعلاوي وفرقتي فيها أربع خمس لعيبة كويسين..

جابولي دوري وكاس..

أفاجئ بيهم بيتسرسبوا واحد ورا التاني لفريق منافس.. مش لشيء إلا أنه فريق غني؟؟

يعني هو مكتوب عليا اللي انا مش راضي عنه في الحياة وباشوفه كل يوم يحصل حتي في وسيلة الترفيه بتاعتي؟؟

مصدر الفرحة؟؟

مش كفاية الغني في بلدنا دايس عالفقير في حياتنا.. والقوي بيسكع الضعيف علي قفاه؟؟

مش كفاية الظلم اللي أمريكا بتعمله فينا والكيل بمكيالين؟؟..

مش كفاية أن احنا صغيرين وقليلين في العالم أصلا... نبقى برضه صغيرين وقليلين حتى في الفرق اللي بنشجعها؟؟

ولا هو المطلوب مني أني أشجع الفريق القوي الغني وخلاص..

ما هو أنا قدامي حل من اتنين.. يا أفضل اشجع فرقتي واحافظ علي انتمائي لبلدي وفريقي.. واتنقط ولا اتشّل..

يا أما أشجع الفريق الغني المقتدر اللي معاه يدفع ويجيب أحسن لعيبة.. وفي الحالة دي بقى لو كل الضعاف اللي بيشجعوا الفرق الغلبانة اللي زي حالاتنا عملوا كده هيبقى مصر كلها بتشجع فريق ولا فريق ونص..

وتولع بقى الكورة وبقية الأندية..

يا جماعة انا عاوزكوا تبصوا للموضوع من وجهة نظر لو كانت الكورة دي دولة.. رئيسها اتحاد كوره همه الوحيد الحفاظ علي السلطة والكرسي..

وفي سبيل ده ما يقدرش يقلب عليه الناس اللي جابتوه هنا - الحزب الأهلي الوطني - وفي نفس الوقت الحزب ده عاوز يقضي علي كل أحزاب المعارضة اللي همها التغيير وإضفاء جو من المنافسة والديموقراطية..

نيجي بقى للشعب.. شوية شعب زي حالاتنا مقهور وشايف الظلم واقع عليه.. ظلم الفقر وقلة الحيلة وعدم القدرة علي التأثير في صنع القرار..

شعب بيتفرج علي التلفزيون - لما يكون في مناظرة بين الحزب بتاعه والحزب الأهلي الوطني - يلاقي مذيعة التلفزيون في برنامج أغاني ومعرفش أيه واحد يتصل بيها يقولها أنا عاوز أغنية ما ابصر أيه ولا ما ادرك أيه وأتمني الفوز النهاردة للنادي قصدي للحزب الأهلي..

لحد كده عادي.. ما هو واحد من جمهور الحزب ومن حقه يقول اللي هو عاوزه..

لكن المذيعة اللي هي لا مقدمة برنامج رياضي ولا محللة ترد عليه وتقوله فعلا أحنا النهاردة نتمني الفوز للأهلي ويارب عماد متعب يجيب جون ويفرحنا..

يفرحكوا؟؟؟

يفرح مين.. آآآآآآآآآآآآآآآه انتي قصدك يفرح مصر؟؟

ما هو الحزب ده برضه من مصر.. ولا احنا مالناش نفس نفرح؟؟

مش من حقنا؟؟ لو مش من حقنا.. يبقى يا أما نعزل ونسيب البلد دي..

يا أما ماحبش الأهلي..