طلع اللي في جيبك ياض ...(((( فلسفة التثبيت ))))

[M.Sherif]

التثبيت فن
التثبيت علم يجب تدريسه

طبعا مااقصدش ((( تثبيت الموضوعات )))

بتكلم عن تثبيت الناس في الشوارع اللي بقا في عز الضهر

ركبت من اسبوع مع سواق تاكسي

و ماشيين في أمان الله

شاور لنا واحد

السواق وقف علشان يشوفه رايح فين

الراجل مالحقش يقول الكلمة لاقيت السواق خد ديله في سنانه و انطلق يجري

قلت للسواق بالراحة يا عم

انا كنت هلبس في ازاز العربية

علي مهلك

و بمجرد ما قلتله الكلمتين دول لاقيته فتح معايا في قصص تثبيت مالهاش اخر

الراجل باين عليه اتهري تثبيت

قاللي ده منظر واحد اامن انه يركب معايا؟

و فعلا منظره كأنه شارب كل سجاير الحشيش اللي في مصر !!

و حكالي بقا السواق علي قصص فعلا تخليه يسيب المهنة دي فورا

قال لي انا شاور لي مرة اربعة شباب

ركبوا معايا للعبور ....

و في وسط الطريق و قبل العبور بحاجات بسيطة

و في منطقة مافيهاش صريخ ابن يومين

لاقيت المطوة قرن الغزال اتزرعت في رقبتي من الشاب اللي ورايا

و اللي جنبي راح خانقني

و الاتنين التانيين واحد طلع يراقب الدنيا فيها ايه
و التاني راح طالع م العربية و لف لي عند الشباك

و قاللي بصوت جهوري مبحوح مليان بلطجة

طلع كل اللي في جيبك ياض يابن ال............

ساعة ....موبايل...كاسيت العربية.....فلوس.....نضارة.....جاكيت !!

كان هاين عليه ياخد البنطلون

و لسه بيلف كده علشان يشوف اللي بيكلمه

راح غارز السكينة في رقبته فاتحهاله

بيقولي لاقيت رجلي بتترعش و مش عارف اتلم علي اعصابي

و مش قادر افكر

و لا حتي قادر ارد عليهم بالكلام

و هما قاموا بالواجب

خدوا كل اللي معايا

حتي الهدوم

و بوظوا عجل العربية كله

و كسروا الازاز

و بعد ما خلصوا

الولد اللي جنبي قام بعزم ما عنده خابطني علي راسي بحاجة كده بايده مش عارف هيا ايه

و طلعوا يجروا

و سبوني وانا خلاص مرمي علي الارض غرقان في دمي

وقفت بالعافية علي رجلي عد شوية و اشاور لاي عربية تقف لي في المنطقة المقطوعة دي

لكن ساعة ولا حد عايز يقف

لحد ما وقف اتوبيس نقل عام

و طلعت علي السلالم و انا غرقان دم

و بمجرد ما حطيت رجلي علي السلم

قمت واقع علي باب الاتوبيس

طلع السواق يجري عليا و الركاب و عرفوا القصة

و طلبوا مني ابلغ في القسم

و اه من القسم

كل اللي عمله الظابط انه قاللي

يابني احمد ربنا انك لسه علي قيد الحياة تولع الفلوس وكل حاجة

احنا بنروح نلم جثث كل يوم و رقاب مقطوعة و اشلاء من الطرق دي و في عز الضهر !!!

خلص السواق كلامه

و بدأ يحكيلي في قصص تانية بالتفصيل و بيقسم لي حصلت معاه هوا شخصيا

و علشان كده حرم يقف لأي حد شكله مش مظبوط

مصايب بتحصل

احنا في غابة يا جماعة؟؟؟؟

مافيش اي سلطة علي الناس دي؟؟؟؟

طب هما مش بيبقوا في وعيهم و عندهم استعداد يعملوا كل حاجة تتخيلها

احنا فين؟

الحكومة فين تسيطر علي الوضع ده؟؟؟؟

الموضوع انتشر اوي فعلا بشكل بشع و في النهار للاسف !

القصص دي بقيت اسمعها كل يوم والله

اسوء شئ في الدنيا انك لا تأمن علي نفسك و علي بناتك واخواتك و اهلك في بلدك !!

انا عارف طبعا ان كل ده نتيجة لمشاكل كتير مالهاش اخر لازم تتحل اولا

زي البطالة ..و الحالة الاقتصادية في مصر..و انتشار المخدرات
بشكل عادي جدا و في الشوارع وادام كل الناس

الله يكون في عون الموضوعات اللي بتتثبت كل يوم