هيفيد بإيه؟؟ قصيدة لمحمد على

[الشاعر/محمد علي]

هيفيد بإيه؟؟

لسه السؤال مالوش جواب
عايز كتاب
(علشان نجاوب )
بتحبهـــا؟
وإيه يفيد حبك لها؟
وإيه يفيد لو حس بيك قبلها؟
وإيه يفيدك قُربها؟
أو بٌعدها؟
وإيه يفيد شوقك لها؟
ونيران بتغلى جوَّ قلبك
لو يوم لقيتها واقفه تضحك
أو يوم لقيتها ناسيه ترن
عقلك يجن
لو خاصمتك
وإيه تفيد المَراسيل
وُبُكا الليالى
والسهر
ووجع القلوب
وانتَ يادوب
قُدَّام عيونها مِ المَاجَهِيل
وعُمرها ما لك تِحن
وعُمرها ما فكَّرِت فى الحُب لحظه
ولا عمرى أحظى
بنظره منها
ويفيد بإيه إنى أدوب فى البُعدِ عنها؟
ويفيد بإيه لما انسئل عنها
ألاقى دمعتى
نازله بتجرى ع الخدود
مالقاشى رد
وافضل أعد
ف الليالى ألقى عذابى مالوهشى حد
ويفيد بإيه إنى أكون
ف عيونك انتى زى فارس
فارس وجى يخطف أميرتُه
تدوب ف سيرتُه
والا ماتدوبشى
أحكم عليكى
والا ما احكمشى
وانده عليكى
وصوتى مايوصلشى
ويفيد بإيه سفر الأمير لبلاد بعيده
عَند الدينار
لاجل ما يجيلك فتى
يمد الخطوة قبل الخطوة يخبط بكل العزم بابك
يلتقى القلب متحول
يلتقى الشوق كلام
يلتقى النور ضلام
والتقى قلبى وحيد
عمّال بيسأل
ما حيلتُه غير الأسئله
عمال بيرحل جوّه فى دمى
القلب الاخضر حالف مايرجع
قبل ما يحقق مراده
والمراد لما يلاقيه هايفيد بإيه؟




شعر محمد على