متابعة متجددة : الأخبار الإيجابية والسعيدة في بلدنا مصر

[Mohammad Asaad]

معظمنا مهتمين حالياً ببطولة كأس الأمم الأفريقية اللي بيشارك فيها منتخبنا الوطني في الكاميرون وصعدنا فيها لدور الـ 16 اللي هنلعب فيه مع منتخب كوت ديفوار يوم الأربعاء الجاى إن شاء الله؛ بس ده لا يمنع إن فيه حدث رياضي تاني عظيم ومُلهم حصل النهاردة لما بطلنا المصري في رياضة السلاح "محمد ياسين" والمصنف الثاني عالميا فاز بذهبية كأس العالم لسلاح سيف المبارزة شباب في البحرين واللي بدأت النهاردة الصبح بعد ما فاز على لاعب منتخب فرنسا "لينو هيرولين" في النهائي بنتيجة 13 – 12..
مشوار بطلنا "محمد" بدأ بتحقيقه لـ 5 انتصارات من أصل 6 مبارايات في دور المجموعات، وبعدها تأهل بشكل مباشر لدور الـ 32 اللي فاز فيه على لاعب الكويت بنتيجة 15-2 ثم حقق فوزه الثاني في أدوار خروج المغلوب في دور ثمن النهائي على لاعب سويسرا بنتيجة 15-12، ثم فاز في دور ربع النهائي على لاعب فرنسا بنتيجة 15-8، وبعدها فاز على لاعب منتخب استونيا بنتيجة 15-7، وأخيراً المباراة النهائية والذهب ضد اللاعب الفرنسي..
مش كده وبس لكن كمان منتخبنا لسلاح سيف المبارزة هيبدأ بكره مشواره في منافسات الفرق بمواجهة منتخب الكويت في دور ربع النهائي، ومنتظرين إنهم كمان يشرفونا ويحرزوا مركز متقدم وميدالية في ختام البطولة..
مبروك لـ "محمد ياسين"، ومليون تحية لكل بطل بيرفع اسم مصر وعلمها لفوق.
#بالعامية_المصرية