نصائح هامه مني لكم

[أ:محمودبركات]

هام جدا...من دكتور الاحياء

دفعة ٢ ث
و
الدفعة اللى رايحة 3 ثانوى اسمعونى شوية 💙
1- ابدأ دروسك من شهر 8 متبدأش من قبل كده
2- تأخذ في الماده مع مدرس واحد فقط
3- الدروس الخصوصيه افضل من المراكز
4- لو هاتأخذ في سناتر يبقي تركز انك تروح بدري وتقعد في الاول وتفصل نفسك عن الي حواليك
5- ماتاخدش مع المدرس علي اساس اسمه ( عفريت الفيزياء ) ( دبابه الكيمياء ) لما يكون بيدي 6000 طالب اكيد هيطلع من عنده 2 جايبين 99% امر عادي ولا علشان ابن خالتك هيخد عنده
- ممكن مدرس مش مشهور قوي بس شاطر وبيراعي ضميره
6- جرب المدرس 3 حصص علي الاقل وشوف طريقه شرحه مناسبه ليك وبتفهم منه ولا لا مش اقل من كده
- لو حسيت انك مش فاهم منه حاجه ومش بيوصلك المعلومه غيره بس مش من اول حصه
7- الدروس في 3 ثانوي مش زي اعدادي - يعني مش هتلاقي انك قاعد مع 3 والمدرس بيديك الدرس وعارفك بالاسم لا انت ممكن تحضر مع 300 طالب آخرين فلازم تعمل حسابك انك مش هتكون ( النجم الساطع ) زي ما كان بيحصل قبل كده
8- ظبط مواعيد دروسك من البدايه علي حسب ايام الاسبوع و مواعيد الدروس وبعضها البعض
9- تأخذ في الماده مع مدرس واحد فقط ( تاني )
- هتقولي بتكررها ليها علشان متغلطش غلطه شكري ( واحد صاحبي متعرفوش ) كان بياخد في الماده مع 2 و 3 مدرسين لدرجه انه مكنش بيدخل البيت كان فاكر ان كده شطاره وتثبيت للمعلومات
10- سنه الثانويه العامه 10 شهور - بتبدأ من شهر 8 و بتنتهي في شهر 5
- قسم السنه لكذا مرحله علشان تبقي عارف في كل مرحله هتعمل ايه
11- بلاش تعلي النار قوي من البدايه علشان الانبوبه ماتخلصش - بتقول ايه ؟
- زي ما قولتلك كده ماتبدأش السنه سخن قوي و بتذاكر في ال 24 ساعه 24 ساعه علشان ماتجيش علي شهر 2 تلاقي نفسك زهقت ومليت وتعبت وتقع مره واحده
- خليك ماشي بسرعه متوسطه لا تنام ولا تعلي اوعي بس المهم انك تكون متحفز دايما ومصحصح
12- خلص مذاكرتك اول بأول - اوعي تراكم حاجه عليك - خليك خفيف دايما كده - تيجي من الدرس يا في نفس اليوم او تاني يوم بالكتير تكون مذاكر الي انت اخدته - اول باول هتلاقي نفسك مرتاح نفسيا دايما ومش مضغوط و مطمن من جواك
13 - كل شهر ادي لنفس يومين تلاته - تعمل فيهم مراجعه علي اللي فات - علشان تفوق نفسك وبالبلدي تلم الي فات باللي جاي علشان ماتفصلش .
14- خليك مع ربنا دايما
- التزم بصلاتك في مواعيدها - الصلاة هتخليك مطمئن وهادي و مستريح ومش متوتر

15- رضاء والدك ووالدتك عليك مفعوله السحر - ممكن تبقي الدنيا متشقلبه معاك - بدعوه واحده منهم كل حاجه تستقر وتتظبط - فبقدر الامكان احفظ برهم وخليهم راضيين عنك
16- انت مش في سجن - يعني جو بتاع شيل التلفزيون و قطع الانترنت ده مش هيوصل بيك لحاجه الا انك هتكون مضغوط نفسيا ومخنوق طول الوقت - انت مش صغير انت كبير وعندك اراده و هدف - يعني عارف انها سنه مهمه ولازم تدي فيها مجهود اكثر من اي سنه تانيه بس كمان لازم يكون في وقت للترفيه حتي لو محدود بس مطلوب
17- متتقولش انا عاوز اجيب مجموع كذا علشان انا عاوز ادخل كليه كذا
- لا كان فيه وخلص - انتا تبص علي ال 99% انا متليش دعوه بالكليه دلوقتي انا ليا دعوه بالكام % وابص لل 99% علشان يوم ما انزل ابقي 97% ابقي 98% اما لو قولت انا عاوز اجيب 97% هجيب 95% وهكذا - فمتركزش في الكليه ركز في المجموع بس
18- كثرة شراء الكتب الخارجيه امر مزعج وبيعملك دوشه وتحس انك مش عارف تفتح ايه ولا ايه ولا ايه - فمتفتكرش ان دي شطاره هات اللي المدرس بتاعك ينصحك بيه فقط وركز فيه مع كتاب المدرسه والنماذج بتاعت الوزاره

19- الغي كلمه ( توتر ) من قاموسك - لو اتوترت حتي لو كنت طول عمرك من الاوائل هاتتكعبل في السنه ديه وهتقع علي وشك
- انا مش هقولك زي باقي الناس هيا سنه زي اي سنه - لا هيا سنه فريده وبيتحدد عليها مستقبل - علشان كده عاوزه اهتمام اما هيا مش بعبع - قلقها بيجي من التوتر و المعتقدات الي إتربينا عليها من الصغر
- اما هي سنه لو فوقت ليها كويس وصحصحت ليها وقسمت السنه مراحل زي ما قولت هتلاقي نفسك من الاوائل بأذن الله
20- هات نتيجه حائط وعلقها في غرفتك وكل يوم بيومه تشطب علي اليوم علشان تحس ان لليوم ده قيمه مايعديش كده بالساهل - وتجيب ورق ملاحظات كده تسميه ( الجدول اليومي ) كل يوم اول لما تصحي الصبح بعد لما تصلي وتفطر تكتب فيه يومك هيمشي ازاي وهيبقي فيه ايه - هتروح درس ايه - هتذاكر ايه النهارده - هتروح فين كده

✅ واخيرا

تذكروا ان " لِكُلِّ مُجْتَهِدٍ نَصِيبٌ " وربنا معاكم