والله أخدناها فى كى جى : النظافة من الإيمان

[أسيل رزق]

السلام عليكم ورحمة الله وبركاته

الموضوع إنهارده مش زى أى موضوع

لفت نظرى ليه ( عادل ) لما إتريق على خلفية الإزازة فى موضوع مقابلتنا

الموضوع إنهارده بيتكلم عن النظافة

أيوه النظافة

اللى بقت حاجة نادرة بتحصل فى حياتنا

لما تقول لحد النظافة من الإيمان تلاقيه قعد يضحك ..!!

بجد شىء صعب جداً يا جماعة لما الواحد يرمى ورقة فى الأرض فعلاً بيعبر عن بيئته اللى جاى منها

بضايق جداً لما أكون ماشية مع حد ويرمى حاجة فى الأرض .. طيب يابنتى رامتيها ليه ؟؟!! تقول بكل برود : يعنى انتى شايفة الأرض نضيفة ..!!

رد مُستفز .. مين يعنى اللى خلا الأرض بالشكل ده .. مش إحنا برده ؟!!

والله بيصعب عليا عُمال النضافة بشكل عام وعمال النضافة عندنا فى الجامعة خصوصاً

لما أكون فى الجامعة 8 الصبح وأشوفهم وهما بيلموا الزبالة من الأرض .. والله الناس دى بتتعب أوى .. ومش فاهمة من قلة صناديق الزبالة والباسكتات اللى فى كل حته وصلت بينا الدرجة إننا نكسل نرمى حاجتنا فى الباسكت

لو كل واحد يمسك الحاجة اللى عايز يرميها فى إيده أو فى شنطته لغاية ما يلاقى باسكت ويرميه فيه البلد مش هتبقا بالمنظر البشع اللى بنشوفه كل يوم

الكل بيستسهل ويرمى فى الأرض وخلاص

لو نحط نفسنا مكانهم هنحس بيهم أوى

دول بنى أدمين زينا يا جماعة .. أكيد بيقرفوا من المناظر اللى بنعملها دى

فى الصين بيصنفوا الزبالة بنفسهم تلاقى فى الشارع أكتر من 20 صندوق : بلاستيك- بواقى طعام - زجاج - ....

دول عندهم شرطة مخصوص للنضافة اللى يرمى حاجة على الأرض أو مش فى مكانها المُخصص

دا حتى الهند اللى اسمهم الهند بيعملوا كده

بجد ربنا يستر علينا من اللى بنعمله فى نفسنا ده ( بندور على اللى يضرنا ونعمله )

ومش بناخد فى إعتبارنا إن كل حاجة بنرميها على الأرض ربنا بيحاسبنا عليها

كفاية رغى دلوقتى و أبقا أكمل كلامى بعدين

وعايزة أسمع آرائكم فى الموضوع