كل طلاب الثانوية العامة تدخل هنا وتقرأ الموضوع

[فن المذاكرة]

الموضوع ده اقتراح او رأى من احد اعضاء مجموعتنا

بسم الله الرحمن الرحيم ..

معلش هو موضوع طويل جدا بس هتستفيدوا ان شاء الله

الموضوع دا للناس اللي داخلين 3 ثانوي

قبل ما اتكلم عن المذاكرة انت لازم تبعد عن الناس دي :
1-اللي بيحبطوك و بيقولوا ان ثانوية عامة صعبة جدااا
2-اللي بيضيعولك وقتك
3-اللي بيقولولك العب طول السنة و هتلم المنهج ف اخر شهرين
4-اللي بايعينها ومش فارق معاهم يجيبوا مجموع ولا لأ ...
بالنسبة للمذاكرة :
بتفرق من حد للتاني .. في ناس بتذاكر الصبح و ناس بتحب تذاكر بالليل .. في ناس بتسهر .. ناس بيناموا بدري و يصحوا بدري ..
شوف الطريقة اللي تريحك و الوقت اللي بتحب تذاكر فيه
الاهم من كل دا انك لازم تعرف ان الثانوية العامة زي اي سنة قضتها ف حياتك ولا هي صعبة ولا سهلة ..
هتلاقي مواد بتحبها جداااااا و مواد تانية بتبذل فيها مجهود اكبر لانها اصعب بالنسبالك ..
هتدخل الامتحانات تلاقي امتحانات متوسطة و امتحانات فيها اسئلة مستواها اعلي شوية وامتحانات سهلة ..
والله يا جماعة احنا اللي بنصعب الموضوع علي نفسنا و بنبقي داخلين 3 ثانوي كأننا داخلين سجن مثلا ..
بنقنع نفسنا انها سنة اصعب من كل اللي عدا و اننا صعب نجيب مجموع ..
بيكون عندنا اعتقاد ان السنة دي هتبقي مذاكرة بس و مش هنخرج ولا هنشوف اصحابنا

الكلام دا غلط و مبيحصلش ..
قبل ما تدخل ثانوية عامة اسأل نفسك :
1- انا عايز اجيب مجموع ليه ؟؟!
2- هل عندي القدرة ان استحمل سنة كاملة علشان ف الاخر افرح اهلي ؟؟
3-هل الناس اللي قبلي اللي جابوا مجاميع عالية ربنا ادالهم حاجة زيادة عني ؟؟
4-انا اقدر اجيب كام السنة دي ؟؟
5-ايه هدفي و ايه اللي انا عايز اخرج من السنة دي وانا محققه ؟؟
بعد ما تسأل نفسك الاسئلة دي و تفكر فيها كويس جدااا ..
حاول طول ما انت ف ثانوية عامة يكون قدامك شكل الناس بتوع السنة اللي فاتت ..
افتكر كدة اللي جاب 97 كان فرحان ازاي .. و اللي منجحش كان عامل ازاي .. و اللي طلع من اوائل مدرسته كان شكله ازاي ..
بص علي الناس دي طول الوقت و اسأل نفسك عايز تكون زي مين فيهم ؟؟؟
بالنسبة للمدرسين :
1-قدامك اول شهر جرب فيه اللي انت عايزه لو قدامك اكتر من مدرس و بعد كدة اثبت مع مدرس واحد ..
2-ابعد عن اي مدرس مش بيشد عليك حتي لو كان ممتاز و متقنعش نفسك انك هتذاكر من نفسك وانك مش مستني حد يشد عليك و يخليك تذاكر طول السنة ..
3-دور علي المدرس اللي بيحل كتير جدااا و اللي بيمتحن كل حصة و بيشوف الواجب .. المدرس اللي انت بتخاف منه و بتعمله حساب
4-بلاش تاخد مع اكتر من مدرس ف مادة واحدة صدقني هتشتت نفسك جدااا و مش هتركز .. كفاية مدرس واحد ف كل مادة
5-ابعد عن اي مدرس بيعقدك و بيصعبلك الموضوع اويييييي و بيحبطك ..
اعمل الحاجات دي :
1-علق ورقة علي الحيطة او ف مكان شايفه طول الوقت و اكتب عليها المجموع اللي نفسك تجيبه او الكلية اللي بتحلم بيها و خليها قدامك طول ما انت بتذاكر
2-متعملش جدول علشان مش هتمشي عليه و هتحس باحباط لانك ممشتش عليه
3-خلي عندك 7 ورقات كل مادة ف ورقة اكتب فيها انت الاسبوع دا جبت كام ف الامتحان و قارن درجاتك بالاسبوع اللي بعده .. شوف مستواك و اعرف انت بتزيد ولا بتقل ولا زي ما انت ..
4-اوعي تذاكر المواد اللي بتحبها بس و تهمل الباقي لانك هتتعب جدا ف الاخر و متخليش مادة تيجي علي حساب مادة
5-مفيش حاجة اسمها هبدأها جد اوي او مش هذاكر من اول السنة انسي كل الكلام دا .. انت لو ذاكرت اللي خدته ف نفس اليوم والله هييجي عليك وقت تحس انك مخلص مذاكرة ف كل المواد .. خد قرار انك مش هتنام النهاردة غير لما تذاكر اللي خدته ف الدرس .. و بجد بلاش تسيب اي حاجة تتراكم عليك للحصة اللي بعدها علشان متتحولش الثانوية العامة لسجن فعلا
6-هييجي عليك وقت و تزهق وتقول انا خلاص تعبت و مش قادر اكمل .. ف الوقت دا من حقك تفصل من المذاكرة و الدروس يومين اخرج مع اصحابك او اعمل حاجة بتحبها .. غير جو ف اي مكان و ارجع تاني للمذاكرة
7-شجع نفسك ومتستناش ان حد يكلمك يشجعك قول لنفسك انك تقدر توصل للمجموع دا .. قول انا هتعب و اذاكر عشان افرح اهلي .. فكر ف احساسك يوم النتيجة لما تجيب المجموع اللي نفسك فيه .. تخيل شكلك قدام الناس وانت بتقول انا جايب 98 مثلا .. تخيل نفسك و انت بتطلب من اهلك كل اللي نفسك فيه و بيعملهولك فعلا
8- متضيعش وقت .. متضيعش وقت .. متضيعش وقت 😄😄
9_ابعد عن اي فكرة هتقلل من همتك زي الكليات العسكرية وفكرة التأجيل 😉
-ذاكر كل المواد و كل ما تحس انك انجزت حاجة كافئ نفسك ..
صدقني اي حاجة ف الدنيا ممكن تتعوض الا الثانوية العامة .. النت و الفيس بوك و السفر و كل الحاجات دي تقدر تعملها ف اي وقت و تتعوض الا الثانوية العامة ..
خلينا نغير فكرة الناس عن الثانوية العامة بقي و نأكدلهم ان الثانوية العامة عمرها ما كانت كابوس ..
طول ما انت بتذاكر يوم بيوم هترتاح و هتستغرب من اللي بيقول دي سنة صعبة جدا ...
خليك واثق ف ربنا و ف نفسك و ف قدرتك انك هتوصل لحلمك ..
اتعب اوييييي علشان تجيب مجموع عالي ومتبقاش خايف من التنسيق ..
خليك انت اللي تحدد الكلية اللي هتدخلها مش مجموعك هو اللي يدخلك اي كلية ..
متوصلش نفسك انك تبقي قاعد قلقان من التنسيق و بتفكر هتجيلك كلية ايه ..
انت تقدر تتجاوز كل دا بانك تذاكر كل حاجة اول باول والله الموضوع ابسط بكتييير من اللي انتوا فاكرينه 😊 ..
متخافش و توكل علي الله .. ربنا مش هيضيع تعبك و تعب اهلك معاك ..
ربنا يكرمكوا و يوفقكوا و يرزق كل واحد الكلية اللي بيحلم بيها ..