كلمتين

[المصري أشرف]

كلمتين .. دا لو لسه فيكم حد بيقرا اصلا
=======

الكلمتين دول مني انا
المواطن اللي عاش وعايش لسه في البلد دي
لو بتدور علي كلمتين بتوع لايك وشير ..مش هتلاقيهم هنا
الكلام اللي هاقولهولك دلوقتي دا بتاع المواطن اللي عايش وسط اغلب طبقه في المجتمع واللي معاشر غلابه و اللي بيته ماشي اليوم بيومه
======
قرفتوني وخنقتوني
كل شويه القرارات غلط .. الدنيا هاتولع ..ماكانش وقته
يا جدعان الرحمه بقي خنقتونا
وهي يعني من امتي كانت سويسرا
يعني هي عشان القرارات اللي اتاخدت دلوقتي… البلد هاتولع؟
طب لما عيشنا عمرنا كله مفيش قرار اتاخد؟ .. كنتوا بتقبضوا باليورو مثلا؟؟
طب هو امتي اصلا اتاخد قرارات صح لما قرارات دلوقتي غلط؟
=========
ارحمونا والنبي
البلد دي طول عمرها بيطلع ميتين اهلها من برا وجوا .. ومابتولعش وبنعيش
البلد دي طول عمرها الفقير بيزيد فقر والغني بيزيد غني .. ومابتولعش وعايشين
البلد دي طول عمرها ماشيه بالفهلوه والنصب و فتح عينك تاكل ملبن ..ومابتولعش وعايشين
=========
اللي خربها يروح يعدلها بقي
اللي شايف انها هاتولع.. يبقي ينزل يطفيها
او ينزل يكمل حرق فيها ويريحنا
انتوا ليه محسسني ان كل واحد فيكم اضطر يبيع عيل من عياله عشان ياكل ويشرب
انتوا ليه محسسني ان ال 90 مليون كلهم كان ليهم حساب في بنك لحد قبل السنتين اللي فاتوا
انتوا الشعب اللي بيقف طوابير عشان الايفون
وانتوا الشعب اللي بيقف طوابير عشان الكومباوندات
وانتوا الشعب اللي عربياته بقت اكتر من البني ادمين في الشوارع
وانتوا الشعب اللي محدش فيه بيتاجر بالفقير الا الغني المستريح اللي مش حاسس بالفقير
انتوا الشعب اللي جاب عصابه ارهاببه بنت وسخه تحكم البلد
وانتوا الشعب اللي خربها من خمس سنين
وانتوا الشعب اللي كان ومازال فرحان بالفوضي
وانتوا الشعب اللي كان بيعمل كل يوم وقفه لزيادة المرتبات والمصانع بتقفل
وانتوا الشعب اللي كنتوا بتوقفوا النقل العام لحد المرتبات ما تزيد
وانتوا الشعب اللي وقف المستشفيات لحد مطالب الدكاتره ما تتحقق
وانتوا الشعب اللي بيخزن اطنان السكر وبيعطش السوق
وانتوا الشعب اللي بيكتب علي الفيس بلدي مصر وبعدها بيغير الدولار من السوق السوده
وانتوا الشعب اقسم بالله اقسم بالله اقسم بالله اللي بيعيط علي شهيد بيموت من الجيش الصبح وبليل اقسم بالله اقسم بالله انتوا انتوا نفس الناس اللي بليل علي القهوه بتقولوا الجيش حاطط مناخيره في كل حاجه
كفايه ضحك علي الدقون بقي
=========
ياعم شايفها بتولع
انزل 11/11 او 12/12 او زي ما قال توفيق عكاشه 13/13
انزل اي وقت و احرقها بجاز.. اتفضل ربنا يوفقك
و شيل السيسي .. انا مش بدافع عنه ولا هدافع عنه
شيلوه ..شيلوه ياعم وريحونا وريحوووه.. شيلوه وهاتولنا واحد محترف
شيلوه وهاتولنا مرسي تاني ويمين الله مش بهزر
شيلوه وهاتولنا حمدين او البرادعي ويمين الله مش بهزر
اصل السيسي بيلعبها غلط ..انما دول بيعرفوا يلعبوها صح
السيسي مفكر انه بيعامل ناس بتفهم اقتصاد وسياسه وتسليح جيش وحوارات و دا مايأكلش عييييش معاكم
انما التانيين عارفين اخركم .. زي المثل اللي بيقول اطعم الفم تستحي العين
لا.. معاكم؟ ..اطعم الفم هاتشبع البطن ..ووقتها تستحي العين وينام المخ اللي بيفكر و يأنتخ الضميرررر
=======
ارحموا نفسكم شويه
ملعون ابو الفيس بوك اللي بقي بيتحكم في مصايركم
ملعون ابو الفيس بوك اللي بقي مخليكم دلاديل بتعوموا مع موجة الكلام علي الصفحات
الفيس بوك دا اللي اقنعكم ان المتظاهرين ماليين الشوارع في 2011 والحقيقه ان الشعب كله كان قاعد بيتفرج اصلا علي التلفزيون
الفيس بوك اللي خلق 90 مليون مفتي ديني وخبير رياضي وخبير اقتصادي وخبير عسكري وخبير استراتيجي وخبير فني وخبير اجتماعي
الفيس بوك اللي اقنعكم ان مبارك عنده 700 مليار ولما نجيبهم هايتوزعوا علينا
الفيس بوك اللي اقنعكم من اسبوع ان جمال مبارك نازل انتخابات الرياسه الجايه
عارفين ليه انتوا الشعب الوحيد اللي الفيس بوك استغله وضحك عليه كده؟
لان انتوا الشعب الوحيد اللي مازال بيكتب كومنت فيه رقم 5 عشان يشوف الصوره وهي بترقص
و انتو الشعب الوحيد اللي بيكتب كومنت سبحان الله علي صورة السمكه التوأم اللي اصطادوها في بحيرة سان عرقسوس في جزر البلالا
وانتوا الشعب الوحيد اللي لسه بينشر الرؤيه بتاعت الشيخ حلمبوزو و بيبعتها لعشره من الاصدقاء وبتخافوا ماتنشروهاش لان الشيخ حلمبوزو قال ان اللي هاتقف عنده الرساله ومش هاينشرها .. هايجيله تبول لا ارادي
========
مش بعفي حد من المسئوليه و أولكم انا
انا وغيرنا فعلا فشلنا
فشلنا اننا نصنع عقول تفكر رغم المحاولات والجهد
فشلنا اننا نخلي الناس تتأكد من كل كلمه بتسمعها قبل ما تنشرها
فشلنا اننا نخلق وعي
فشلنا اننا نخلق بطانه قويه نتسند عليها
مش دفاع عن حد
ولا سيسي و لا غيره
بس دي الحقيقه
احنا اللي بنجيب البلد الارض
وبرضو مش لان لكم وجهات نظر ان دا غلط و دا صح
او ان لكم وجهات نظر مختلفه عني
انما عشان طريقة طرحكم الفاشله اللي تجيب اي بلد الارض
انتوا اوووڤر في كل حاجه
اوڤر في فرحتكم… اوڤر في خوفكم

=======
نهاية الكلمتين
انا لما ولعت البلد في 2011 و اتهدت علي دماغ ابونا .. كنت عايش وباكل وبشرب واصحابي ومعارفي فاتحين بيوت ومحدش فيهم بيشحت
ولما مسك الاخوان وفشخوا البلد
كنت عايش وباكل وبشرب واصحابي ومعارفي فاتحين بيوت ومحدش فيهم بيشحت
ولما مسك السيسي علي مدار السنتين اللي فاتوا
كنت عايش وباكل وبشرب واصحابي ومعارفي فاتحين بيوت ومحدش فيهم بيشحت
ولما الدولار كان ب 18 جنيه ونص .. كنت عايش وباكل وبشرب واصحابي ومعارفي فاتحين بيوت ومحدش فيهم بيشحت
ولما الاسعار زادت والسكر قل والرز قل والزيت قل
كنت عايش وباكل وبشرب واصحابي ومعارفي فاتحين بيوت ومحدش فيهم بيشحت
كل دا وانا واللي بتكلم عنهم نكاد نكووووون محسوبين علي الطبقه الوسطي
ومرتباتنا زي الزفت والطين والقطران
واهالينا عندهم امراض وليهم علاج ومصاريف
وكل حاجه ممكن تتخيلوها
يعني الخلاصه
بطلوا هري بقي في الفاضي والمليان
اقسم بديني ما بيعترض ويكتبلكم كلام عن المطحونين والتعبانين الا المستريح والمرتاح واللي بيته مش ناقصه حاجه ومش حاسس بحد اصلا و بيتكلم علي سبيل الترفيه
يعني من الاخرررر
سيبوا اللي يتكلم .. اللي لمسه وجع او ضغط
يعني سيبوا الغلابه اللي ماعندهومش فيس بوك هما اللي يقولوا رأيهم
يعني سيبوا الناس اللي بتطلع علي تاكسي ولا بتطلع تشيل طوب ورمل كل يوم علي باب الله هما اللي يتكلموا
لما دول ينزلوا يولعوها بجاز وسخ نبقي نفكر نبص للامر بقي
======
والله صدقوني
الاجر علي الله وحده
قعدتي هنا علي المخروب دا ولا بتديني فلوس ولا باخد منها مرتب
بس والله العطيم 99% من اللي بيكتبلكم علي الفيس بيصوتوا من العيشه و مخليين الحياه سوووواد وان خلاص بنموووووت زيهم زي اللي بيقعدوا يشربوا حجر المعسل علي القهوه بعشره جنيه زيهم زي اللي بيتغدي صنف وبليل بيطلب الديلفري زيهم زي اللي كل يوم بيدفع 30 جنيه علي رئ النوم الصبح عشان يشتري علبة السجاير الاجنبي … معظمهم ناس حزينه انها عايشه وبتدفع فلوس و معترضين لانهم عاوزين يعيشوا بكل متع الحياه ببلاش
و بجد والله العظيم منه لله حسني مبارك
اللي عودنا علي ترييح الدماغ
والدعم علي كل و اي حاجه
اللي كان ناقص يدعم البامبرز ..لحد ما حسينا انه حق مكتسب
وكان بيوفر الاحتياجات وخلاص من غير ما يقولنا الديون ايه والازمه ايه و يشركنا معاه .. كان بيسد بوءكم وخلاص والبلد بتتملي ديون ومحدش حاسس
ولا كان حد يفتح جرنال .. ولا حد يفهم في سعر الدولار النهارده ايه
كنا بناكل وننااااام وبس
وياريته عجب .. نزلتوا شيلتوه
وولعتوا البلد وخربتوا السياحه ومكنتوا الارهاب منها و خلصتوا علي الاحتياطي النقدي
والاخر بعد كل دا .. لما جه واحد بيصارح بالحقيقه
اتخضيتوا وخوفتوا وافتكرتوا فجأه اننا شعب فقير واننا بلد واقعه
ياريت مبارك كان اتعامل معانا التعامل الطبيعي
وخلانا نشيل اللي البلد بتشيله
كان سقانا الخرررره من بدري
عالاقل ماكناش استغربنا طعمه دلوقتي
** افتكروا بس ان في يوم من الايام سبب الاحباط و القرف والاشمئزاز
ماكانش الاخوان اللي بنحارب فيهم ليل ونهار
ولا اللي بيتهكموا علي كلامنا عن المؤامرات
ولا اللي ضد البلد وجيشها
ولا اعلام تركيا وقطر المضلل
افتكروا ان اللي كانوا السبب هما الاغلبيه اللي انكشفت منكم ان نفسهم قصير و تحملهم ضعيف و وعيهم صفررر وانهم مجرد اكونتات فيس بوك تكتب كلمتين عن الوطن بس لما يقروا كلمتين تانيين بيتحولوا في لحظه

منقول من الفيسبوك