#المخطط_اللى قولتلكم عليه:-
مبدئيا اي حد من المنصورة مش هيعرف يتصرف يكلمني بس يكون سريع وعملي..
..
الشرح : اولا ف ادامك ورقتين .. ورقة هتلزقها ع الحيطة ادامك عالمكتب ..
والورقة التانية اللى عالشمال .. فيها التقسيمة ..
_
اولا :مينفعش اعمل المخطط بالساعات لازم فترات ...
(عشان انت انسان بشرى مش انسان ألى فمتحطش نفسك ع حدية الوقت .. لانك مش هتنجح انك تلتزم بحدية الوقت .. واتمنى انك متحطش نفسك وضع اختبار ف ترسم لنفسك خطة انت عارف انك هتفشل فيها عشان لما تفشل متستقلش نفسك او تحس انك فاشل .)
_
الجدول هيكون فترات مش ساعات .. انا قسمتها حسب الصلاة .. انت شوف تقسمها ازاى ..
_
ثانيا: انت هتحط اللى واقع منك ف كل مادة ف الورقة اللى ع اليمين بنفس المنظر اللى انا عامله ..
..
والورقة اللى عالشمال دى هتقسمها عمودين .. عمود يمين وعمود شمال.. هتكتب ع اليمين دروسك ومواعيدك .. وعالشمال. هتكتب فترات اليوم بتاعك كلها .وهتعمل علامة صح ادام الفترة اللى فاضية وعلامة اكس ادام الفترة اللى فيها درس.
__
انا عملت الجدول بفرض انك بتاخد يومين ف كل مادة ..
ف السبت والتلات شبه بعض والاحد والاربع شبه بعض والاتنين والخميس شبه بعض..
__
انا يوم السبت مش هكون فاضى الا الصبح .. والعشا والسهرة . فعملت صح ادامهم وعلامة اكس ادام الباقيين .. هكذا..
___
انا هفكر ازاى ف الجدول ؟؟
انا النهارده مثلا الجمعة اهو .. وبكرة السبت ..هقول ف بالى .. بكرة هيكون عندى دروس .. من 1 ل 6 خلاص يعنى عندى تلات فترات فاضيين ..
(الصبح والعشا والسهرة ) .. خلاص هذاكر الدروس لما ارجع منها ..
هاخد فترة العشا اذاكر اللى اخدته ف الدروس ..
اخد فترة الصبح اذاكر فيها اللى هروح الدرس فيه ( اتبقى فترة السهرة ..)
خلاص يبقا فترة السهرة دى هذاكر فيها حاجة قديمة ..
(فترة السهرة اللى هى من اول عشرة بالليل كده لغاية ماتنام)
عندى مثلا اول شبتر ف قصة الانجلش مذاكرتوش كويس .. هاخده بكرة ..
يبقا انا كده خلاص عملت حسابى .. ان بكرة السبت هخلص دروسى وهاجى اذاكرها وقبل مانام هاخد شبتر القصة ..
افرض جيت بكرة تعبت مثلا .. بالليل ..
خلاص مش مشكلة .. يبقى فترة السهرة بكرة هاخد الدوا وانام عشان تعبان ..
(واعوضها الجمعة .. واكتب ف الملاحظات ف الجنب كده .. شبتر قصة يوم الجمعة متاخر عليها هاخده )
ولو جه بكرة وخلصت الشابتر اعمل جنبه علامة صح ف الورقة الملزوقة ادامك عالحيطة .. واعرف انك خلصته .. وكل ماتخلص القديم ضيف حاجات تانية ف الورقة الملزوقة دى وذاكرها .
___
مزايا الجدول :-
1-نظام فترات مش نظام ساعات .. يعني مش هتحط نفسك ع حدية الوقت ..
اللى مستحيل حد يعرف يلتزم بيها ع طول ..
2- لو تعبت ولا نمت ولا حصلك اي حاجة .. وسبت الجدول ميت سنة ورجعتله هتلاقيه زى ماهو مستنيك ..
3-المخطط مش بيجبرك ع مذاكرة حاجة معينة ف وقت معين ..
المخطط .. فاردلك الامور . وبيقولك انت باقيلك الحتت دى ف المنهج متاخرة عليك .. وف نفس الوقت عالشمال دا الوقت المتاح ادامك..
يعنى بتملا من هنا وتحط هنا ..
___
يكفيك انك عارف انت خلصت ايه ومخلصتش ايه ولامم الامور كلها وعارف كل حاجة ادامك ف مخطط عشان متحسش انك تايه ..
احساس التوهان ده اول حاجة بتضيعك .. وبتخليك تسيب كل حاجة وتمشى ..
_
4- ذاكر كل يوم لما تيجى من الدرس اللى اخدته ف الدرس مرتين ..
ومرة تالتة بعد يومين قبل ماتروح الدرس .. تبقى ذاكرته تلات مرات ..
والمذاكرة تلات مراحل وكل ده شرحناه قبل كده
#منقول
21-11-2015, 05:22 PM
العرض الشجري
