نصائح للدكاترة الجداد

[ahmedfezo]

سلام عليكم يا دكاترة


أنا عندى كلمتين فى السريع (أصلك خانقينى ومحشورين فى زورى) للجداد بتوع سنة أولى


1-اوعى تقول نفسك فى مجدى يعقوب ..........مجدى يعقوب مبقاش مجدى يعقوب الا لما طلع برة مصر


2-الكلية لاتصنع عظماء .....أنت وحدك من يحقق النجاح

اوعى تفتكر أنك لما دخلت طب حتتخرج تبقى زى مجدى يعقوب .......لأانك بعد أول امتحان هتبقى أقصى طموحاتك دكتور ربيع

3-متدخلش جروب الدفعة ......لأن فى ناااس حقودة وسوسة وبتنيمكم فى العسل وهما يجيبوا امتيازات


4-اوعى تلبس البالطو او تعلقوا على كتفك أول يوم .........لأن ببساطة هيتحفل عليك من للى أكبر منك


5-لا للتركيم أو التأجيل بحجة هلم فى الأخر ................مش هتلم ولاحاجة هتشيل بس

6-كتاب القسم ورئيس القسم ....عليك أنت بالسمع والطاعة

7-اوعى تخش اسخسار مجموع أو علشان أفرح أبويا أمى

صدقنى هتلعن أبو اليوم للى دخلت فى طب ...........وبالمناسبة أبوك وأمك بعد أول فشل ليك هيزعلوا


8-خليك مرتبة سفنج تشرب كل للى هيحصلك وبعدين اعصر نفسك وجهز نفسك للسنة الجديدة ....جد مش هزار


9-أسطورة الفلوس والعربية ووووو انساهم ............دول لما توصل 40 -35 سنة كدة

10-عارفين دكتور ربيع .......بالضبط عايزك تتخيل نفسك مكانه لأن ده هو واقع كل الدكاترة فى مصر بد التخرج


11-احفظ عنواين الناس للى بتقول (اتعب دلوقتى ترتاح بعدين ) لأنك بجد هتحتاج تطلع ميتين أبوهم
وبالمناسبة لو حد قالها قدامك .....استجمع الطاقة فى كف واضربه وقوله (اخرررررررسسسسس)
ده مش قلة أدب بالعكس أنت بتعاقبه علشان هو كداب

12-كلية طب لا تعطى مستشفى مجانية عند التخرج ......بتكلم عن الناس للى بتقول هعالج الفقراء .....ببساطة هتبقى أنت واحد منهم

13-اهتم بالتقديرات .......لأن التخصص بعد كدة بالتقدير مش بالحب


14-متاخدش كورسات الا لو محتاج .....غير كدة لا

15-حاول تتعود على الوحدة لأن بعد كدة مش هتشوف غير الكتاب .....جد برضه

16-أى حد يقولك أسطورة الخمسة عين (عربية وعزبة وعروسة وعمارة وعيادة ) قوله (أسطورة الثلاثة ألف
ارحم أمى العيانة)

17-هتتسال عشرين ألف مرة تخصص ايه وهتخصص امته ....لا والأدهى يختارولك النخصص على مزاجهم (أراك توزع من تخصصات أمك ) .....ويجى واحد يكمل عليك ويقول اتخصص أسنان

18-خلى بالك التخصص بعد التخرج وأول ماتخصص محدش هيفكر يسألك السؤال أصلا كلهك فجأة هينسوا أنك تخصصت

19-اعمل حسابك على الناس للى هتيجى تكشف عندك ببلاش أول ماتفتح العيادة

20-حاول تتعرف على عم عبده وأبلة عطيات (العمال )لأنهم أهم من عميد الكلية نفسه

21-فى الكلينكال الغياب وامضتك على ورقة الحضور اهم منك انت شخصيا

22-جهز فلوس كتير علشان هتدفعهم للمرضى فى امتحان الكلينكال


23-اوعى تسيب حاجة من المنهج ولا أى صفحة .....لأن هى دى للى هيجى منها الامتحان وهى برضه للى هيسالك فيها فى الشفوى


24-صحابك فى الكليات التانية بيروحوا 5 أيام ..............أنت بتروح كل يوم ....خلى بالك الجمعة بيبقى فى امتحانات برضه (سنة خامسة وساتة )

25-اتعلم ضرب الحقن وسحب العينات ومهارات التمريض والاسعافات الأولية .......الشعب المصرى مش هيعترف بيك كدكتور لو معملتش

26-اتعلم مهارات الدفاع عن النفس وفنون القتال ............لأنك لما تتخرج وتشتغل حتحتاجهم

27-بالنسبة للبنات هتتأخروا عن الجواز شوية معلش استحملوا

28-بالنسبة للولاد ......شوفلك شهادات ومعادلات أجنبية ...لو حبيت يكون لك قيمة

29-تعلم تتداروا على نفسكم علشان الحسد

30-امضى على أبوك تعهد بأنه هيصرف عليك لغاية سن ال28 ..........جد مش هزار

31-زى مالحب بيجى بعد الجواز .....الطب الحقيقى بيدا بعد الامتياز

32-اوعى تحبوا أو تتعلقوا بحد اثناء الكلية ......صدقونى هتسيبوا بعض هتسيبوا بعض

33-البنات ...افتكروا سيبتوا هرمون الاستروجين فين .....لأنكم بعد التخرج هتحتاجوه

34-اتعلم قلة النوم من دلوقتى .....لأنك ممكن تعدى عليك أيام بدون نوم أصلا

35-الطب حفظ مش فهم .....والله العظيم حفظ مش فهم

36- استمتع بالاجازة كويس لأنه عملة نادرة فى كليتنا

37-افرح بالنتيجة والكلية قد ما تقدر ....لأنه هتكون بجد اخر فرحة فى حياتك صدقنى

38-لازم تحب الطب علشان تنجح فيه

39-لو بدأت تكلم نفسك عادى جدا ....بس اهم حاجة لازم يكون فى أوضة مقفولة علشان ميقلولوش عليك مجنون

40- نظم وقتك أبوس ايدك .....وانسى الفسح والخروجات


وللحديث بقية ان شاء الله