تكمله(فكرت تدخل قصر البارون؟انا دخلته)

[SENDRILLA]

اتفضلوا
دي الحلقه الرابعه
اتمني تستمتعوا بيها

وبكرر
انا بجيب الردود بالنص يعني مش بغير فيها حاجه خالص
كل الكلام علي لسانه

اسيبكم مع الحلقه بقي
الحلقه الرابعه


السلام عليكم ورحمة الله وبركاته،،
اسف على التاخير ..
بس احب اوضحلكم حاجة ..فى ناس كتير عايزين يدخلوا القصر لكن هو حاليا مش مزار سياحى عادى بمعنى انك مش هاتدفع تذكرة وتدخل تتفرج والا ماكناش نطينا من على السور ..كنت بادخلة لمدة 4 سنين متواصلة من قبل ما الحكومة تاخدة ماكنش فى سور كان سلك شائك متقطع نعدية وندفع فلوس للحراس (تظبيط يعنى)وندخل على السريع ونطلع لان الحارس كان هو سيد الموقف علشان المفاتيح كانت معاة ومافيش غير باب واحد..دلوقت الحكومة اشترتة من اصحابة وممنوع الدخول لمدة سنتين الى ان ينتهى الترميم
عايز اوصلكم الصورة بشكل اوضح
لو رحت(لاقدر اللة ونويت تدخل)هتلاقى سور حديد عالى ..من الشمال فى عمارة ساكن فيها وزير الداخليةالسابق ..من الشمال حراس للعمارات المجاورة وكلب حراسة بيجرى حتى وراء العربيات مش مصدق عدى من هناك..من الخلف هتلاقى حراس فندق البارون وفى الجنينة الخلفية هتلاقى حوالى 4 كلاب (اية التعقيد دة ؟؟؟)دة لو انت مش عاوز تمشى قانونى وناوى تغامر ..لكن مانصحش حد لانى كنت هاقضى ليلة لطيفة فى القسم مع ناس ظراف جدا فى مكان شاعرى اسمة (التخشيبة على مايبانلوا صاحب)
ايوة اتمسكت فى مرة بجد بس ربنا سترها والحمد للة ..عموما القصر قريب من قصر الرئاسة فدى كفاية قوى لاى حد
سؤال ..طب كنتوا بتدخلوا ازاى ؟؟؟
بقالى 4 سنين بادخلة 11مرة يبقى مش هاعرف ادخلة ازاى
لما كنا بنقرر اننا رايحين القصر كنا لازم نيجى ببناطيل واسعة ولبس غامق لان القصر دلوقتى مفتوح وممكن حد يشوفك وانت جوة ويكون كل واحد معاة كشاف وكنت احيانا باخد مطواة معاى (مش بعيش على فكرة لان سمعت ان فية ثعابين لكن ماشوفتش الصراحة )
فى مكان السور عندة اقل من الحديد(التقاء السور الحديد الجديد بسور القصر القديم) وبما ان السور القديم فية نهايتين فعندك مكانين تنط منهم
شافونا فى مرة بننط من واحد قفلوة وسابوا التانى (النصر بيد الاعداء احيانا) فبنط من التانى
ثانيا الكلاب
لو احنا ثلاثة افراد رايحين واتنين بس هايدخلوا فلازم الثالث يغطى ..يعنى يروح لمكان بعيد فى السور ويحدف طوب ويقرب من السور وكانة هينط فالكلاب كلها بتجرى علية وبالتالى فضالنا مكان نجرى منة واكيد هو بيبعد عن المكان كلة لما الكلاب بتجرى علية (تهويش)
ثالثا حراس القصر
احسن ناس متابعين التليفزيون هتلاقيهم قاعدين على الشمال بيتفرجوا ومعاهم شاى (المنظر دة مش بيتغير من 4 سنين)ساعات بيقوما ياخدوا لفة للاطمئنان بس مش اكتر فلازم تنتظر للوقت المناسب والثالث اللى بيغطى بيلف هو كمان (اللى تبعنا )لو لاقى حد قام يلف يرن لاى حد فينا علشان مانطلعش فى اى شباك
لكن كل الكلام دة على الرغم من صعوبتة بس مش هو دة المقلق ...هو لعب عيال اة لكن برضة محتاج حد مستعد يغامر
لكن المقلق هو بعد ماتدخل القصر ..........وهو دة اللى انتوا مستنين تعرفوة وخصوصا المرة رقم 9
استراحة قصيرة
انتوا عارفين الدافع وراء انى اعمل دة كان حبى للمغامرة والاماكن القديمة لانى كنت اسمع عنة كتير ومش باصدق ..فحبيت ادخلة
غير كدة كنت باحس انى زعيم عصابة بجد لما العملية اتطورت ...كل مالحراس يعملوا حاجة يمنعونا من الدخول نفكر ونقعد مع بعض ونطلع بحل
وتخطيط اية تمام ..لدرجة اننا فى مرة (كريم وانا )فى مدرسة القبة الثانوية وكنا فى تانية ثانوى حكينا للناس جنناهم وحبوا يروحوا
قررنا اننا نزوغ فى يوم على اساس ان عدننا بالكتير هيكون 4 وقولتلهم يستنونى اما باب المدرسة الساعة 9 الصبح ...وانا باشترى بطارية للكشاف ببص على الباب لاقيت زحماااااااااااة ..لما قربت ...اية يا جدعان فى اية ...لاقيت الجماهير الغفيرة .....اوووة احمد على الليدر بتاعنا ..
بصراحة كنت هاطلع اجرى ,تخيل انك هتزوغ ب12 طالب وانت ال13؟؟؟؟؟؟؟المهم ان قولتلهم التعليمات واخدناهم مشى من سراى القبة لحد قصر البارون 0(لاتعليق)قسمناها فرق كل 3 فى حتة واحنا ماشيين لان فى دوريات مباحث بتكشف المزوغين
والخطة نجحت الحمد للة واللى ماسمعش الكلام ولى امرة راح خدة من القسم >....(دة حصل بجد مع اتنين منهم)
والغريب انى كنت الوحيد اللى رجع المدرسة تانى علشان اكتب حصة حضور باليوم كلة (لحسن يضيع على الاوفر تايم )مدرستنا دى كانت مانجة
الاستراحة خلصت
استنوني عشان احكيلكم اللى حصل فى المرة رقم 9
في امان الله



اتمني تكون عجبتكم
وادعولي احقق اللي بتمناه
( سندريللا )