كلمتين صغيرين ياحلوين يامقطقطين(الطلبه الجدد بطب بيطري القاهره )

[SENDRILLA]

اولا المواد
بصوا مبدئيا انتو عندكو في سنه اولي التيرم الاول 7 مواد
هستولوجي واناتومي ورعاية حيوان ولغه وحاسب الي وبيولوجي وبيوفيزيكس
ناخدهم واحده واحده كده
الهستولوجي :
ماده لذيذه جداااااااا
النظري بتاعها في التيرم الاول عباره عن انواه الانسجه اللي في الجسم
كل دكتور هيدخل يشرحلكو نسيج منهم
وطبعا كله بالانجليش
العملي بتاعها سكشن ساعتين كل اسبوع والدكتور بيدخل يشرحلكو ملخص كده للنسيج اللي خدتوه في النظري وبعدين تشوفو 7 عينات تقريبا وترسموهم في الكتاب باقلام ازرق واحمر خشب
ومذاكرة الماده في التيرم الاول حلوه جدا من كتاب دكتور سمير الشافعي واطلس د.جهاد
وفي ناس بتفضل الاطلس مع كتاب القسم بتاع د. مختار
انا بقي كنت بذاكر من ال3 واحيانا معاهم ورق
_____________________________
الاناتومي :
ماده برده مش بطاله
هتاخدو فيها في التيرم الاول القدم الاماميه والخلفيه لحيوان نموذجي وهو الحصان
ده العملي
النظري بقي حاجات كلها في جسم الحيوان وبرده كنموذج الحصان
بس مش فاكره الموضوعات بالظبط بصراحه
لكن المره الجايه اكون لقيت الكتاب واشوف
والمذاكره غالبا من ورق بينزل في المكتبات وبيبقي ملخص
وعلي حسب الورق اللي بترتاحيله تمام
والنظري سكشن كل اسبوع 3 ساعات بس يعني ممكن تاخدو ساعتين بس والساعه يا اما تراجعو فيها اللي خدتوه في السكشن ده واللي فات يا اما غالبا بتعدو تضحكو وتهزرو اصل جو المشرحه لذيذ اوي
________________________________
رعاية الحيوان :
النظري بتاعها بتاخدو الحصان مثلا وتاخدو كل حاجه عنه
6 حيوانات او 7 وكل حاجه عنه وكل دكتور بيدخل يشرح حيوان من اوله لاخره
وبتتذاكر من المحاضرات
العملي بتاخدو في الكليه الجديده
نص السكشن تقريبا نظري عملي والباقي عملي ع الحيوان
وبرده بيتذاكر من السكاشن وممكن ورق مساعد يعني
__________________________________
البيولوجي:
ينقسم ل2
زولوجي وبوتاني
الاتنين ازبل من بعض
يعني هما مش صعبين بس المشكله انكو مش هتبقو عارفين تذاكرو منين
بس في ورق بينزل في الاخر كده مراجعات نهائيه هيظبطكو
والعملي هتتقسمو مجموعتين مجموعه تاخد زولوجي الاول 6 اسابيع والتانيه بوتاني وتبدلو بعدين
وبتاخدوها في علوم
_____________________________________
بيوفيزيكس او فيزياء حيويه:
ودي برده في علوم
وهتعدو طول السنه بتحاولو تفهمو الدكتوره بتقول ايه
غالبا مش هتعرفو يعني بس حاولو
وفي ناس كتير بتفهم يعني زيي كده الحمد لله
بس اللي ظبطنا مراجعه برده كده مع الدكتوره وجبت فيها جيد جدا
والعملي بتاعها 8 تجارب تقريبا وهتشتغلو واحده فيها في امتحان العملي
______________________________________
عنجليزي :
بتبقي محاضره كل اسبوع وانصحكو انكو تحضروها
وفي الاخر الدكتور بتشوف حد كان بيكتب وراها كل حاجه وتقولله ينزللها في المكتبه والدفعه كلها تصورها
ومن السهل تقفيلها لو عندكو خلفيه عن الانجليش من ثانوي واعدادي وكده
_____________________________________
حاسب الي :
وده سمعت انه اتلغي من عليكو
بس يعني هنقول انها ماده مش كتير بينجحو فيها
مش لحلجه غير لان الدكتره مزاجها كده
بس سمعت ان الدكتوره دي مسكت منصب في كليتها
وبالتالي اللي هيديكو المعيدين
لو المعيدين اللي هيدوكو يبقي ان شاء الله اضمنو امتياز
لان الماده هايفه جدا
بس الدكتوره مكانتش حتي راضيه تعرفنا احنا خدنا ايه في الكتاب ومخدناش ايه



يااااااه
ايدي وجعتني اوي من الكتابه
بس يارب تكونو استفدتو
وعلي فكره اول 3 مواد ب 100
والباقي ب 50
يعني مجمل التيرم 500 درجه
ومش هنقبل باقل من امتياز سامعين
وربنا يوفقكو
وان شاء الله الحلقه الجايه يا اما تختارو انتو موضوعها
يا اما لو تحبو انا اكلمكو في حاجه تانيه
والسلام عليكم ورحمة الله