"ملتقى طلاب 3 ثانوي"

[سري جداا]

بسم الله الرحمن الرحيم

أنا آسفة جدا لو كنت قطعت عليكم الموضوع اللى كنتم بتتكلموا فيه . بس قولت انتهزها فرصة بما إنه مافيش حد كان بيحكى مشكلته .
انا مشكلتى جايز تكون تافهة جدا بالنسبه للمشاكل اللى قريتها بس ارجوكم يا جماعة افهمونى و حسوا بيا انا مش عايزة حد يحبطني زى ما كل احكيها لحد يقولى نفس الرد شبه اللى قبله قالهولى

انا مبدئيا فى كلية مش فى ثانوية . انا مشكلتى انى حبيت و اتدبست كمان . انا بحب واحد من 4 سنين تقريبا و حب من طرف واحد . بحبه جدا و متعلقة بيه اوى . و ولا مرة فكرت انى اصارحه او حتى الفت نظره
انا مشكلتى انى متعلقه بيه و بحبه لدرجة انى مش متحملة فكرة انه يكون لحد غيرى . و مافيش حد غيره لفت نظرى ولا فى الكلية ولا فى العيلة ولا فى اى مكان مع ان فيه ناس غيره بيحبونى كتير
انا ساعات بحس انه بيحبنى و ساعات بحس انه مش بيحبنى و الكلام ده من نظراته . ساعات بحس من نظراته ليا انه بيحبنى اوى و ساعات لما مش بيبص لى او ياخد باله منى - احنا جيران على فكرة - بقول هو مش بيحبنى
ساعات بقعد لوحدى فى اوضتى و اقعد ابكى بالساعات بسببه . لإنى كل لما بشوفه ببقى فرحانة و زعلانة فى وقت واحد و محدش يستغرب . ببقى فرحانة لانى شوفته طبعا و زعلانة لاني خايفة مش اوصل له
انا مؤمنة ان اللى ربنا كاتبه هنشوفه . بس انا مش بقيت قادرة استحمل الحب ده كله لوحدى . انا بحبه لدرجة انى لما بشوفه خرج من بيته لاى سبب حتى لو كان رايح الكلية بزعل اوى و بحس ان روحى خرجت منى و راحت معاه . انا حاسة انى بقيت مريضة نفسيا خصوصا و انى فى مرة فكرت انى اقتله و كنت هنفذ كده فعلا و فكرت فى خطة بس رجعت استغفرت ربنا و قولت ايه الهبل اللى هعمله دة !
ماتفتكروش انى بعيدة عن ربنا لا الحمد لله بفضل الله انا قريبة منه و كمان انا مش فكرت اكلم اللى بحبه عشان ربنا
تعرفوا دايما اقعد لوحدى و اصلى صلاة حاجة لربنا و بقعد اعيط و اتحايل عليه يكتبه من نصيبى و بفضل ربنا ان حبه مأثرش على مذاكرتى انا في ثانوى كنت كل لما اقرف من المذاكرة كنت بفكر فيه شوية و اقول يا سلام لو دخلت كلية حلوة كدة و هو جاله الخبر دة هيفرح اكيد و يمكن اكبر فى نظره دة طبعا بجانب تفكيرى فى اهلى فكنت بقوم اذاكر و ربنا وفقنى و دخلت الكلية اللى كنت عايزاها و بردو بذاكر فيها مش بلعب
انا بحبه اوى يمكن اكتر من نفسى انا عندى اتعذب بموته احسن ما اتعذب بانه بقى لحد تانى لان دى هتبقى صدمة كبيرة اوى عليا دة حتى مجرد التفكير فى كدة بتعب اوى و بحس انى بموت
نسيت اقولكم انه فى كلية بس اكبر منى بتلات سنين بس
ماتفتكروش انى ببالغ بس دة بجد نقطة فى بحر من اللى انا حاسه بيه و من العذاب اللى انا عايشاه

ياريت الاقى عندكم رد يريحنى مش يعذبنى زيادة