لما الواحد يبقي تعبان يروح لأى دكتور؟!

[خارج عن القانون]

أنا لما كنت تعبان.. قلتلهم أنا عايز دكتور بيطري يكشف عليا!! وفعلت بنا الدهشة الأفاعيل ـ واستبد بنا الحرج ولم يبد واحد منا جواباً أو تعليقًا ولاحظ عم عبد الله ذلك فأعاد كلماته مؤكداً أي والله يا اسيادنا طلبت دكتور بيطري استوضحته! بيطري ؟!

رد بابتسامة الواثق والعالم ببواطن الأمور أصل يا أخ البيطري هو الوحيد اللي ما بيسألش الزبون بتاعه مالك أو بتشتكي من إيه..
وما بين الضحكات وآهات الإعجاب استطرد حكيم الجنوب ساعات الواحد بيبقي تعبان وعيان لدرجة إنه مش عارف إيه بالظبط اللي عايز تصليح يبقي البيطري بس هو اللي يقدر يقوم بالموضوع ده وتناثرت التعليقات الصاخبة والله كلنا عايزين بيطري برضه يا بخت البهايم.

المفروض البيطري تأخذ مجاميع أعلي من البشري يا عم طيب هو فيه طب نفسي بيطري؟ آه ليه لأ برضه هتلاقي الدكتور من دول يبص في عين الحيوان بس مش حيكلمه برضه، ونظرت لصاحب الليلة متأملاً عم عبد الله والد اثنين من أقرب أصدقائي وفي منزلة الوالد لكل الشلة منذ أكثر من ثلاثين عامًا، شيد الروف أعلي منزله وأبدع في تزيينه وترتيبه بأحواض سمك الزينة وأقفاص العصافير ونباتات الظل والشمس والمراوح والشبابيك وكان يحلم بأن يقضي فيه أوقات بعد المعاش ولكننا حرمناه من ذلك وتواجدنا بصورة شبة يومية في هذا المنتدي الرائع وشهد هذا الروف منافسات الطاولة والدومينو ثم الاستميشن حتي تاريخه..
ولم نغضب يومًا من تعليقاته ولاسخريته من هذا الشباب الذي لن يجد يومًا ورق الشجر ليأكله «اللي هو إحنا» طبعاً ما إحنا قاعدين ليل ونهار نلعب ومش في دماغنا أي حاجة وكان إن زهق منا عم عبد الله فرجع إلي موطنه الأصلي ومسقط رأسه في مصر العليا.. في الصعيد الجواني ليقضي أيام ما بعد المعاش وها هو يعود بعد أكثر من عشر سنوات وهو كما هو بطلاقته وعصبيته وحكمته عميقة التأثير متدفقة الخبرة صعيدي كما يجب أن يكون الصعايدة صلب الرأي مثقف حاد الذكاء وعم عبد الله وطني أكثر من الحزب الوطني نفسه لم يسمح يومًا بمهاجمة الحكومة ولا الحزب الوطني ولا أي وزير في هذا البلد.. كان رأيه دائماً أن الخطأ علي الناس وعلي الشعب لأنه لا يعمل كما يجب واختلفنا معه كثيراً ودائمًا ولكنه. ظل دائماً في موقع الإعجاب باتساقه الشديد مع نفسه ومع حياته وظروفه واليوم كانت مقولته الخاصة بالبيطري ولم نرد أن نثقل عليه وقد قارب الثمانين من عمره فاستأذنا في الانصراف وكلماته ترن في كل أدمغتنا علي اختلاف التوجهات والميول يانهار أسود يا جدعان كلنا تعبانين وعيانين ومش عايزين نتكلم ولا حتي قادرين، البيطري فعلاً هو رجل الساعة وهو المطلب الأكثر شعبية وإلحاحًا من رجل الشارع سيبك بقي يا حاج من كلاسيكيات رغيف العيش وبنزين 80 وحديد التسليح وكل الكلام ده إحنا خلاص ورمنا وفيصنا ومش عارفين نقول أي حاجة يبقي هو البيطري حيقعدنا قدامه ويقلب فينا ويعرف إيه الموضوع ويعالجه لو قدر يعني بس أهو أضعف الإيمان إننا نحس أن فيه حد هيحس بينا ويحاول معانا وخلاص ومع الاعتذار لبني الحيوان فإن بني الإنسان الذين ميزهم الخالق جل شأنه بالعقل والتفكير والفهم والكلام مع اختلاف النسب أصبحوا أهوج ما يكون للعلاج وما يدريك قد تتطور الأمور مستقبلاً ونتبادل الأمكان مع الإخوة الحيوانات.. إحنا نروح المراعي والغيطان والزرايب وهم يقعدوا في البيوت والمكاتب والإدارات ويبقوا يقابلوني لو أخدوا حق أو باطل وإحنا مش هانغلب أهه الأكل في الأرض والبرسيم مالي الدنيا والميه في الترع زي بتاعة الحنفية.. وهنلاقي ورق الشجر وناكله علي رأي عم عبد الله وما تخافش من أي تلبك معوي أو مغص ربنا يزيد ويبارك في البيطريين بس نلحق نحجز يا جماعة وهنيئاً لنا برعاية جمعيات الرفق.. بالإنسان!!

منقووول عن جريدة الدستور
بس مقال زى الفل والله

[new vet]

شكرا علي المقال الرائع ده واتذكر مقوله العالم اليوناني ابقراط عندما قال اذا كان الطبيب البشري هو طبيب الانسان فان الطبيب البيطري هو طبيب الانسانيه وهذه المقوله لمن يحاول ان يقلل من قيمه الطبيب البيطري الذي يعالج ويرحم حيوان غير ناطق لايستطيع ان يعبر عن الامه ولا يستطيع ان يبوح بما داخله فارجو عدم التقليل من قيمه هذا العلم الذي اجمع كل العاقلون علي عظمته وحاول بعض الجاهلون التقليل منه

[LA STELLA]

بص انا من المعارضين لفكرة كليات القمة
لان اصلا مكانتها بعد التخرج بدأت تقل ، لا فيه شغل او شغل مش زى ما مفروض يكون ولا فيه مرتب

وفيه بقى كليات تانية فى بلدنا اتظلمت جامد
مثلا يعنى
احنا بلد زراعى وثرواتنا وخيرنا كتير " بس بيروح للاجانب بس "
كليتين زى الزراعة والطب البيطرى
الواحد يهتم بيهم
وباللى بيتخرجوا منهم
و الابحاث العلمية فى المجالات دى
شوف هنأكل كام مليون لما نحافظ ع ثرواتنا الزراعية والحيوانية
يعنى انا ضد التقليل من شأن كلية الزراعة
لان احنا فى الاصل قلت بلد زراعى و فلاحين
لان فلاح دى كلمة مش وحشة ابدا زى ما الاتراك سابوا فى افكارنا
لانهم كانوا لما بيتكلموا عن المصرى كانوا بيقولوا : فلاح خرسيس !
لو تسمعوا الكلمة دى
لما هناكل لحمة وزرع نظيف بردو ، اعتقد كدة بنبى شباب كويس جسديا وتمام اوى من الناحية الصحية والغذائية
ولا ايه بردو ؟؟

انا برفض التقليل من شأن اى كلية مهما كانت
لان كليات بسيطة جدا - فى نظر العامة - لو اهتمينا بيها شوية صغيرة اوى اوى هى اللى هتغير شباب و حياة بلدنا


فائق احترامى وتمنياتى بالتوفيق للجميع

[خارج عن القانون]

المشاركة الأصلية كتبت بواسطة new vet

شكرا علي المقال الرائع ده واتذكر مقوله العالم اليوناني ابقراط عندما قال اذا كان الطبيب البشري هو طبيب الانسان فان الطبيب البيطري هو طبيب الانسانيه وهذه المقوله لمن يحاول ان يقلل من قيمه الطبيب البيطري الذي يعالج ويرحم حيوان غير ناطق لايستطيع ان يعبر عن الامه ولا يستطيع ان يبوح بما داخله فارجو عدم التقليل من قيمه هذا العلم الذي اجمع كل العاقلون علي عظمته وحاول بعض الجاهلون التقليل منه

شكر لمرورك كلامك سليم
وعلى فكرة الطبيب البيطرى المهنة الاولى في المانيا يليها المحامى يليها الطبيب البشرى
معانا ان شاء اللة يوم 20/9 علشان اول يوم بيكون فية شرح

[خارج عن القانون]

وجهة نظر يجب التدقيق فيها تدل على نظرة فلسفية اكثر تعمقا رغم بساطة كلمتها (السها اللممتنع|||) ومتفق معاكى تماما

[ممدوح مصطفى الانصارى]

اختيار موفق جدا
شكرا على الاختيار
الطبيب البيطرى عندنا لم ياخذ المكانة الكبيرة التى يعرفها عنه مجتمعة؟
على فكرة من 40 سنة كان لى اخ لا يمشى _كسيح_احتار فيه اطباء البشر ،فكتب الله له الشفاء على يد طبيب بيطرى مصرى .
تقبل مرورى .......عظيم احترامى

[KHALOOOD]

معلش يا مان هروح مشوار وارجع ارد
اصلى افتكرت حاجه مهمه لازم اعملها
معلش جات فيك بقى

[SmSm Basha]

مقال جامد فعلا .... وعلى فكرة عم عبد الله دا في منه كتيير من المصريين

شكرا ليك على الموضوع

[MohammeD el_SadaT]

بجد

المقاله مش قادر أقول عليها أى تعليق أنا قرأتها 3 مرات وكل مره بحس إنها فعلاً بتوصف حالنا
إحنا عاوزين حد يحس بينا ويخاف علينا من غير ما نتكلم عاوزين حد يرفع عننا الظلم عاوزين حد نستجير بيه وقت الشدائد ونشكيله همنا ونحكيله غمنه حد ميقولناش فيكو إيه حد يفهمنا من مجرد النظره

عارفين بقه المشكله فى إيه إنه فعلاً موجود بس إحنا اللى بعدنا عنه
" ربنا سبحانه وتعالى "
موجود فهو الحى الذى لايموت وهو القادر على كل شىء ويمهل لكن لا يهمل
ربنا سبحانه وتعالى هو الوحيد القادر على أخذ الحق من الباطل
لكن إحنا اللى بعدنا عنه نسناه وإشترينا الدنيا وهوينا الشيطان وزلزلتنا المصائب وإنخرطنا فى الكائبر
إمته هنتوب وهنفوق ونعرف إن اللى إحنا فيه ده ما هو اللى سخط من الله سبحانه وتعالى علينا

إمته هنعرف إننا غلط غلط فى تربينا غلط فى سلوكنه غلط فى كل حاجه حتى الحاجه الصح لو عملناع مبنكملهاش صوت الحق كممناه والباطل نصرناه والحق زيفناه

وفعلاً
لو فضلنا على الحال ده مش هنلاقى ورق الشجر ناكله ما إحنا أصلاً خساره فينا الأكل

[!!!دمعة حزن!!!]

بصراحه مقاله جميله جداا

احنا اللى عاملين فى نفسنا
عشان بطلنا نستعمل العقل فى تصرفتنا

وهو دا اللى تعبنا
لدرجه اننا مش عارفين احنا تعبانين من ايه

وعاوزين طبيب بيطرى
يعالجنا من غير ميسئلنا بنشتكى من ايه

ربنا يرحمنا برحمته الواسعه

[خارج عن القانون]

المشاركة الأصلية كتبت بواسطة mohammed.el_sadat

بجد

المقاله مش قادر أقول عليها أى تعليق أنا قرأتها 3 مرات وكل مره بحس إنها فعلاً بتوصف حالنا

إحنا عاوزين حد يحس بينا ويخاف علينا من غير ما نتكلم عاوزين حد يرفع عننا الظلم عاوزين حد نستجير بيه وقت الشدائد ونشكيله همنا ونحكيله غمنه حد ميقولناش فيكو إيه حد يفهمنا من مجرد النظره

عارفين بقه المشكله فى إيه إنه فعلاً موجود بس إحنا اللى بعدنا عنه
" ربنا سبحانه وتعالى "
موجود فهو الحى الذى لايموت وهو القادر على كل شىء ويمهل لكن لا يهمل
ربنا سبحانه وتعالى هو الوحيد القادر على أخذ الحق من الباطل
لكن إحنا اللى بعدنا عنه نسناه وإشترينا الدنيا وهوينا الشيطان وزلزلتنا المصائب وإنخرطنا فى الكائبر
إمته هنتوب وهنفوق ونعرف إن اللى إحنا فيه ده ما هو اللى سخط من الله سبحانه وتعالى علينا

إمته هنعرف إننا غلط غلط فى تربينا غلط فى سلوكنه غلط فى كل حاجه حتى الحاجه الصح لو عملناع مبنكملهاش صوت الحق كممناه والباطل نصرناه والحق زيفناه

وفعلاً
لو فضلنا على الحال ده مش هنلاقى ورق الشجر ناكله ما إحنا أصلاً خساره فينا الأكل

شكراا ليك جداا
تحليل زى الفل