مهارات تثنية وجمع الأسماء المقصورة والمنقوصة والممدودة

[hassan hassa]

مهارات الجمع والتثنية (للأسماء)

السلام عليكم ورحمة الله وبركاته
درس النهاردة ناس كتير شايفاه مشكلة وصعب ورخم بس بصراحة الدرس سهل جدا ومحتاج شوية أساسيات بسيطة بس مش أكتر...هنتكلم كتير فكفاية رغي ... يلا بينا.

بسم الله والصلاة والسلام علي رسول الله أما بعد:

الجمع والتثنية مشكلة غالبا بالنسبة للأسماء في تلات حاجات: الاسم المنقوص والاسم الممدود والاسم المقصور ناخدهم واحد واحد وهنتكلم عنهم شوية قبل ما نعرف نجمعهم ونثنيهم ازاي.
الاسم المنقوص
- الاسم المنقوص (محامي – قاضي – ناسي – نواحي – وادي – مُجدي (بمعني نافع) ) دا بيبقي آخره ياء لازمة وفيه النغمة اللي في الاخر دي اللي طلعت لما كسرنا الحرف اللي قبل الياء ... أما (وردي -مادي – صناعي – مصري – ولدي – ملعبي – مبني – مَرمي) دا كله مش اسم منقوص ... ما فيهوش النغمة وأغلب الكلمات دي بتبقي اسم منسوب أو اسم متصل بياء المتكلم أو اسم مفعول.

- الأسماء المنقوصة تُرفع وتجر بعلامات مقدرة وتُنصب بعلامات ظاهرة.

- الياء في الاسم المنقوص بيتم حذفها والتعويض عنها بتنوين في حالتين في حالتين:-

إن الاسم المنقوص يكون مفرد نكرة ومجرور أو مرفوع غير مضاف مثلا (هادي – وادي – نواحي) ... هيبقوا (هذا هادٍ) (ذهبت إلى وادٍ جميل) (ذهبت إلى نواحٍ كثيرة).
ملحوظة: كلمة (نواحٍ) في المثال الأخيرة اسم مجرور بالفتحة المقدرة لأنها ممنوع من الصرف.

إن الاسم المنقوص يكون جمع مذكر سالم (كونوا هادين إلى الخير) – (أنتم هادون إلى الخير) – (لسنا بناسين لمن نحب) بنحذف الياء اللي في الاسم المنقوص وبعد كده بنحط علامة الرفع (ون) أو الجر والنصب (ين).

مثال على التثنية والجمع:
- المفرد المذكر:- 1- انت هادٍ إلى الخير. 2- كن هاديا إلى الخير.

- المفرد المؤنث:- 1- أنت هادية إلى الخير. 2- كوني هادية إلى الخير.

- المثني المذكر:- 1- أنتما هاديان إلى الخير. 2- كونا هاديين إلى الخير.
في (1) (هادي) هتبقى مثنى مذكر وبالتالي الياء المحذوفة ترجع تاني ... وبعد كدة نضيف علامة الرفع (ان) لأنها خبر مرفوع .
في (2) (هادي) هتبقي مثني مذكر ومش محتاجين نحذف الياء لأنها مش من الحالتين ... وبعد كدة نحط علامة النصب (ين) مش (ان) ما تتسرعش.

- المثني المؤنث :- 1- أنتما هاديتان إلى الخير. 2- كونا هاديتين إلى الخير.

في (1) و(2) كلمة (هادية) مش اسم منقوص مش آخرها ياء دي كلمة عادية زي معظم الكلمات التانية فمش محتاجة شرح.

- الجمع المذكر :- 1- أنتم هادون إلى الخير. 2- كونوا هادين إلى الخير.

في (1) كلمة (هادي) هتبقي جمع مذكر سالم دي حالة من حالات حذف الياء وبعد كده هنضيف علامة الرفع (ون) فهتبقى (هادون).

في (2) كلمة (هادي) هتبقي جمع مذكر سالم فبردو هنحذف الياء ونضيف علامة النصب (ين) ... فهتبقى (هادين).

- الجمع المؤنث :- 1- أنتن هاديات إلى الخير. 2- كنَّ هاديات إلى الخير.

(1) و(2) زي مثني المؤنث.

- عارف ان معظم الدرس ده أنت عارفه ... وانك عايز تسأل عن (كن) وجمعها المؤنث بقي (كنّ) ازاي مثلا ... بس استني خطوة خطوة وتثنية جمع الأفعال هتلاقيها مشروحة في درس خاص بيها وهتكون من أسهل الدروس كغيرها ^^.

الاسم الممدود
الاسم الممدود: (بناء – سماء – إنشاء – صحراء – جرداء – علماء – أدباء) الاسم الممدود هو كل كلمة مفردة آخرها همزة قبلها ألف زائدة ... وبالتالي (ماء – داء) مش أسماء ممدود لأن الألف مش زائدة وبنبحث عن (ماء) في (موه) فالألف أصلية أصلها واو مش زائدة .. وكذلك (داء) في مادة (دوي).

الهمزة في الاسم الممدود بتنقسم لتلات أقسام:-

1-همزة أصلية: يعني الهمزة موجودة في أصل الفعل زي (إنشاء) فعلها (أنشأ) الهمزة موجودة في الفعل ... والهمزة الأصلية بتفضل موجودة دايما في الجمع والتثنية فبنقول (إنشاء – إنشاءان أو إنشاءين – إنشاءات).

2-همزة منقلبة عن الأصل: ودي همزة بتبقي موجودة في الفعل بس علي هيئة حرف علة (ألف أو واو أو ياء) وانقلبت همزة لما حولناها لاسم ممدود زي (بناء – سماء) أفعالهم هي (يبني – يسمو) ... ودول في تثنيتهم وجمعهم ليهم شكلين فمثلا (سماء) في التثنية بتكون في الرفع (سماءان او سماوان) وفي الجر والنصب بتكون (سماءين وسماوين) وفي الجمع بتكون (سماوات أو سماءات).

3- همزة زائدة : دي بتبقى الهمزة زائدة للتأنيث أو للجمع ... ومش موجودة في أصل الفعل مثلا للتأنيث زي (بيضاء – حمراء) وللجمع زي (علماء – أدباء – ظرفاء) ... ودا لما نيجي بنثنيه أو نجمعه مثلا لو كلمة (بيضاء) بتبقى (بيضاوان أو بيضاوين) في المثنى و(بيضاوات) في الجمع ودا أكتر واحد يهمنا فركز عليه.

مثال على التثنية والجمع

- (هذه فتاة حسناء.)
اجعل الجملة للمثني والجمع.

المثنى:- (هاتان فتاتان حسناوان.)
اوعي تقول (حسناوتان) ... غلللط هتضيف تاء ليه؟ ... هتأنثها؟ هي كلمة (حسناء) مؤنثة جاهزة ... هتضيف تاء ليه هتأنثها زيادة مثلا!! هاا؟! ... هتبقى (حسناوان) ماشي؟ ... الحديث اللي دار من شوية ده كان حديثي معايا زمان وأقنعني.

الجمع:- (هؤلاء فتيات حسناوات.)
دي سهلة.

ملحوظة: لو قلتلك (أعطيتك وردة حمراء) وطلبت منك تثني الجملة ... هتقول (حمراوين) مش (حمراوان) لأنها منصوبة مش مرفوعة فركز على ده.
الاسم المقصور

- الاسم المقصور (كبرى – مستشفى – عليا – دنيا – قصوى – الأعلى – الأقوى) هو كل اسم آخره الف مقصورة والألف المقصورة احيانا بنكتبها ياء زي (كبري – مستشفي - قصوى) وأحيانا بتبقي الف زي ما بننطقها زي (عليا دنيا) ودا بيحصل لما يكون الحرف القبل الأخير ياء.

- فباختصار الألف المقصورة هي اللي بننطقها ألف دايما سواء اتكتبت ياء أو ألف.

- الاسم المقصور الثلاثي زي (رضا – هدي) بنكتب الألف المقصورة ألف لو أصلها واو زي (رضا) في مادة (ر ض و)... وبنكتب الألف المقصورة ياء لو أصلها ياء زي (هدى) أصلها (هـ د ي).

- الأسماء المقصورة ترفع وتجر وتنصب بالعلامات المقدرة.

المهم دا اللي بييجي عليه معظم الأسئلة في التثنية والجمع او كلها هنشتغل شغل أسئلة وحلها.

- المفرد المذكر: 1- أنت الاعلى خلقا. 2- كن الأعلى خلقا.

- المثني المذكر: 1- أنتما الأعليان خلقا. 2- كونا الأعليين خلقا.
ما بنحذفش الياء اللي في آخر اسم التفضيل ... لاحظ دا كويس عشان هنحذفها في الجمع المذكر ... ثم نضيف علامة الرفع أو النصب.

- الجمع المذكر: 1- انتم الأعلون خلقا. 2- كونوا الأعلين خلقا.
حذفنا الياء اللي في آخر كلمة (الأعلى) هنا وبعد كدة ضفنا علامة الجمع في الرفع والنصب .

- المفرد المؤنث: 1- أنت العليا خلقا. 2- كوني العليا خلقا.
أحسن لك تجيب المفرد المؤنث دايما حتي لو ما طلبتش وتحطه ع جنب كدة ... دا بس عشان ما تسرحش وتقول في جمع المؤنث (الأعليات) مثلا ودا غلط وهنبينه كمان شوية.

- المثني المؤنث: 1- أنتما العلييان خلقا. 2- كونا العلييين خلقا.
(1) دا بداية الجد ... بص با زيدي اللي حصل حاجتين بساااط جدااا ... كلمة (العليا) لما بنثنيها أو نجمعها الألف المقصورة اللي في الاخر دي بنقلبها ياء ... تمام ؟ دي اول خطوة اوعي ابدا تنساها ... بعد كدة بنضيف علامة الرفع للتثنية (ان) فتبقي (علييان) .... فلو (كبرى) ... الالف المقصورة اللي في الاخر هنقلبها ياء وبعد كدة نضيف علامة التثنية (ان) فتبقى (كبريان) ولو (دنيا) تبقى (دنييان).

(2) العليا ..قلبنا الالف المقصورة لياء فبقت (العليي) ثم ضفنا علامة التثنية في النصب (ين) لأنها منصوبة فهتبقى (العلييين) ... كدا بقي عندنا تلات ياءات الياء اللي موجودة في (عليا) من الاول ... والياء اللي نتجت من قلب الالف المقصورة لياء ... والياء اللي جت من علامة التثنية ... اوعي تتعقد ... عادي جدا انت امشي علي القواعد ... اقلب الالف المقصورة لياء وضيف علامة التثنية بس كدة دايما وهتبقى تمام علي طول.

- الجمع المؤنث : 1- أنتن العليياتُ خلقا. 2- كنَّ العلييات خلقا.
نفس النظام قلبنا الألف المقصورة لياء فبقت (العليي) وضفنا علامة الجمع المؤنث السالم (ات) فبقت (العلييات) ... امشي انت ع الخطوتين دول بس كدة وهتجيب اي اسم مقصور ... اقلب وضيف بس كدة.

- مثال أصعب
معلش هصعب بقى عشان تبقى شفت كل حاجة عن الاسم المقصور وإن شاء الله مش هتشوف حاجة غير الشكل اللي فات والشكل الصعب اللي جاي ده ودا لو افترى اوي وهتلاقي نفسك بتجيب فيه بردو بالخطوتين اللي قلت عليهم (.

- أنت (أسماهم خلقا.)

أنث الجملة وثنها واجمعها للنوعين مع تثنية وجمع وتأنيث اسم التفضيل.


1- المثنى المذكر: (أنتما أسمياهم خلقا.)
أول حاجة عملناها إننا جبنا مثني (أسمى) اللي هو (أسميان) بعد كده ضفناه للضمير (هم) ... فبقت (أسميانهم) ... بس النون بتتحذف للإضافة فبقت في الآخر (أسمياهم).

2- الجمع المذكر: (أنتم أسموهم خلقا.)
جمع (أسمى) ... بنحذف الياء اللي في اخر كلمة (أسمي) ونضيف علامة الجمع فتبقي (أسمون) ... بعد كده هنضيف (أسمون) للضمير (هم) ... تبقى (أسمونهم) ونحذف النون للإضافة فتبقى (أسموهم).

4- المفرد المؤنث: (أنت سمياهم خلقا.)
أحسن لك تجيب المفرد المؤنث دايما حتي لو ما طلبتش وتحطه ع جنب كدة عشان مش تتلغبط قلنا.
5- المثنى المؤنث: (أنتما سميياهم خلقا.)
أول حاجة نعملها ايه؟ ايون صح نقلب الألف المقصورة ياء بعد كدة ايه ؟ بعد كدة نضيف علامة التثنية (ان) فهيطلعلنا في الآخر (سمييان) ... بعد كدة هنضيفها للضمير (هم) ... فتبقى (سمييانهم) ... ونحذف النون للإضافة فهتبقى (سميياهم).




5- الجمع المؤنث : (أنتن سميياتهم خلقا.)
نقلب نضيف تبقي (سمييات) ... بعد كدة نضيف سمييات للضمير (هم) ... والتاء مش بتتحذف بالاضافة دا النون بس ... فتبقى (سميياتهم).

النهـــــاية حمد الله ع السلامة ... يا رب يكون الشرح عجبك ... عااارف اني زهقتك واخاف بجد اكون عقدتك ولا حاجة ... بس صدقني الخطوات اللي هي اقلب ضيف دي ... مش هتاخد وقت كبير منك انا كل اللي بعمله اني بعمل تصوير بطيء للي بيجرا اما في الحقيقة هي مش بتاخد وقت ولو بتاخد هتاخد وقت أد ايه؟! دقيقة دقيقتين ... بس هتوصل لاجابة مضمونة وأكيدة والخطوات دي هتديك ثقة وانت بتراجع السؤال ده ... ومع الزمن الخطوات دي مش هتاخد وقت اصلا ... كل المسألة تكرار وتمرين وهتظبط بالتوفيق .


ايـــه الجو الرخم ده؟! سيبك انت عامل ايه؟ يلا وريني مستواك حل السؤال ده؟

(أنت المحامي ألاعلي مكانة والأحسن شكلا .)
أنث الجملة وثنها واجمعها .

- نصعب أكتر
- (كن أسماهم خلقا تصر أعلاهم مكانة. (
أنث وثن واجمع اسم التفضيل وغير مايلزم.

[sollliman]

- أنت (أسماهم خلقا.)

أنث الجملة وثنها واجمعها للنوعين مع تثنية وجمع وتأنيث اسم التفضيل.
أليس اسم التفضيل أسماهم مضافا يجوز المطابقة
فمن الأسهل هنا
أنتما أسماهم خلقا- أنتم أسماهم خلقا.)
مع خالص الشكر

[hassan hassa]

أعلم هذا ولهذا قلت مع جمع وتثنية اسم التفضيل

[سلمى مختار]

إذا طلب جمع وتثنية اسم التفضيل

فالإجابة

أنتما أسمياهم خلقا أنتم اسموهم خلقا

[hassan hassa]

أليس هذا ما قلته ؟