الأمتحان هيجى صعب !

[mena.nady]

بعد ما شفنا أمتحان العربى والفيزيا
أنا رأيى أن الأمتحان هيجى صعب جدا
بنصح كل الناس تذاكر على أد ما تقدر . علشان ميندموش زى ما أنا ندمت على مساله الكهربيه فى الفيزيا
ربنا معانا كلنا أن شاء الله

[Elgohary1a]

على فكرة الامتحان كان سهل بس احنا شعب ممكن ناخد المركز الاول فى الاحباط الدولى

[mena.nady]

الأمتحان مكانش سهل . انا طالب 3-6 فائقين رياضه فى السعيديه وجايب 98% وعارف يعنى أيه أمتحان صعب ^^
الأمتحان كان فيه جزئيات كتير مستخبيه فى المنهج
ومن كتر روشتى داخل اللجنه مركزتش فى الكهربيه وحليتها غلط
أنا بس قلت أفيد الناس . الناس متوقعه أنها هتدخل تلاقى 1+1 تساوى 2 وتطلع
لا الأمتحان مش بعيد يبقى أصعب أمتحان ميكيانيكا .... وفيه سنين كتير الأمتحانات جت فيها صعبه وقبليها الناس كانت مقتنعه كده برضوا أن الأمتحانات هتيجى سهله . وفى الاخر تفاجئوا
أنا نصحت والباقى عليكوا يا جماعه

[ahmed_mega]

وايه يعنى مدرسه متفوقين !!!!!!!!!
وبعدين عادى جدا لو حتى جه نفخ مش هيبقى على كله وبعدين يا اخى طمن الناس بلاش تشاؤم

[mohamedmohamed1]

على فكرة نصيحة منى الامتحان هيجى قريب لسنة 2008 انا قولت قريب منه مش زيه وشكراااااااا

[mena.nady]

ماشى ما أنا بقول للأخ الجوهرى لما بيقول كان سهل أنى عارف لأنى طالب فائقين وعارف أمتى أقول على أمتحان سهل أو صعب
صدقنى في ناس متوقعه أمتحان سهل وده أكبر غلط
ولو أنته فكرت للحظه ان الأمتحان هيجى صعب هتلاقي فى مسائل مكنتش عارفها مخك هيشتغل بأفصى قوته علشان يحلها لخوفك من الأمتحان
غير كده والجو البمبى ده وأن كل شئ لذيذ مش هينفع

[Elgohary1a]

الامتحان صعب فى حالتين وده الى انا اعرفهم الصراحه
1-للى مش مذاكر
2-لو جاب حاجه من بره المنهج مرتبطة بمنهجنا زى مثلا فيزياء من اولى ثانوى جابها فى خطوة فى مسئلة عندنا ومتتحلش المسئلة الا متعمل الخطوة بتاعت اولى ثانوى غير كده مفيش حاجه صعبة

[ahmed_mega]

لأنى طالب فائقين وعارف أمتى أقول على أمتحان سهل أو صعب

ههههههههههههههههههههههه غريب التعليق دا هو الطالب العادى ميعرفش الامتحان السهل من الصعب

وبعدين يا سيدى الفاضل اقولك انا وجه نظر بقى لو عديت طلبه علمى رياضه هتلاقيهم حوالى 40 او 50 الف كليات الهندسه بتاخد 20 الف وفيه اللى هيقدم كليات عسكريه وفيه اللى مكنش يحلم بعلمى اصلا ودخله عشان هجس السنه اللى فاتت بس على العموم كله ان شاء الله هيلحق هندسه

"بس شخصيا يا رب ييجى اشد من 2008 عشان اللى اشتغل يبان واللى ............ يبان برضه "

تحياتى

[mena.nady]

رأيى : الأمتحان يكون صعب لما يجيب جزئيات مخفيه أو نادره المجئ
فأتوقع يجيب حته متجهات كده صعبه
وحته فى الديناميكا متعلقه بالشغل والقدره والطاقه لأنهم ليهم علاقه ببعض أوى
علشان طبعا مشتقه الشغل تدى قدرة

[mena.nady]

المشاركة الأصلية كتبت بواسطة ahmed_mega

ههههههههههههههههههههههه غريب التعليق دا هو الطالب العادى ميعرفش الامتحان السهل من الصعب

وبعدين يا سيدى الفاضل اقولك انا وجه نظر بقى لو عديت طلبه علمى رياضه هتلاقيهم حوالى 40 او 50 الف كليات الهندسه بتاخد 20 الف وفيه اللى هيقدم كليات عسكريه وفيه اللى مكنش يحلم بعلمى اصلا ودخله عشان هجس السنه اللى فاتت بس على العموم كله ان شاء الله هيلحق هندسه

"بس شخصيا يا رب ييجى اشد من 2008 عشان اللى اشتغل يبان واللى ............ يبان برضه "

تحياتى

هممممم .. شفت أمتحان الأنجليزى ؟ شفت كام واحد قال عليه صعب وهوا حته أمتحان تافه لا يصلح أمتحان لتانيه ثانوى حتى ؟ ده قصدى .. الطالب المتفوق يفرق عن الطالب المتوسط والأقل من المتوسط فى أن بعض الطلاب المتوسطين ممكن يحلوا سؤال وأعتقادهم أنه سهل وممكن يشوفوا سؤال سهل ويعتبروه صعب
أما الطالب المتفوق عارف أن الحته ديه نادره المجئ والحته ديه مشهوره والحته ديه ... وهكذا
أنا شايف أن الناس سابت الموضوع ودخلت فى موضوع كونى فى فصل فائقين أو لا

[Elgohary1a]

خلاصة الكلام: قال شاكسبير''من يعمل جيدا فليس لديه وقت للدموع''

[ahmed_mega]

لا الناس مسبوش الموضوع ودخلوا فى حته الفائقين
حضرتك باسلوب مستفز بتحاول تبرير اى كلمه تقولها بجمله "اصل انا فى فصل فائقين "

وعلى العموم ربنا يوفق الطلبه كلهم وانت اولهم يا سيدى

[mena.nady]

المشاركة الأصلية كتبت بواسطة ahmed_mega

لا الناس مسبوش الموضوع ودخلوا فى حته الفائقين
حضرتك باسلوب مستفز بتحاول تبرير اى كلمه تقولها بحمله "اصل انا فى فصل فائقين "

وعلى العموم ربنا يوفق الطلبه كلهم وانت اولهم يا سيدى

طيب خلاص يا سيدى أنا أسف على الأسلوب اللى بان مستفز !
بس أنا بحاول أوضح للناس أنى مش طالب مفتحش كتاب علشان كده بيقول على الأمتحان صعب
أمين يا رب . ربنا يوفق كل اللى يأخد الأمتحان جد
بس ليا تعليق على كلامك
أنته بتقول يا رب يجى أشد من 2008 .. هههه طيب ما أنته أهه رأيك أنه هيجى صعب أمال أيه بقى ؟

[ahmed_mega]

هههههههههههههههههههههه اوعى تكون فهمتنى صح انا بس عايز اللى اشتغل يبان مش اكتر ولا تشاؤم طول ما هو فى المنهج يا رب يجى فحت انما يطلع برة المنهج هنا بقى نبقى نتكلم

مش معقول واحد مفحوت مذاكرة طول السنه ويتساوى مع اللى قاعد ع النت ومقضيها حب على الفيس ولا ايه رايك

[mena.nady]

المشاركة الأصلية كتبت بواسطة ahmed_mega

هههههههههههههههههههههه اوعى تكون فهمتنى صح انا بس عايز اللى اشتغل يبان مش اكتر ولا تشاؤم طول ما هو فى المنهج يا رب يجى فحت انما يطلع برة المنهج هنا بقى نبقى نتكلم

مش معقول واحد مفحوت مذاكرة طول السنه ويتساوى مع اللى قاعد ع النت ومقضيها حب على الفيس ولا ايه رايك

لا . تمام أنا معاك فى النقطه ديه
بس الفكره برضوا أن فيه ناس بتأخده على أساس أنه سهل وتتخدع
لكن لو نصحتها وقلتلها خدوا الأمتحان شويه جد علشان هيجى صعب أكيد هيختلفوا تماما . صح ولا أيه ؟