اين نحن من هؤلاء !!

[نقاء الروح]

تعاون الافراد مش كفاية
او مش هو الخطوة الاولى للاصلاح
لازم الظروف حوالينا تكون مهيئة بقدر كافي
بعدين ييجي الدور علينا كمواطنين نساعد بعضينا ..
لأن المناظر المؤسفة دي نتيجة خطأ حكومات ونظام دولة
لأنها مش عشان مصر فقيرة فحالنا بئا كدا
دا عشان فئة من المجتمع استأثرت بكل حاجة
ودا ال ظهر فالارقام والحسابات المهولة
ال بنسمع عنها للمتهمين حالياً ..
لكن زي ما المشكلة اخدت سنوات عشان تتبلور وتتفاقم
هتحتاج فترة عشان نقضي عليها وتختفي
لكن لازم توضع خطوات ومنهجية محددة لكدا
بدل التخبط والفوضى ال بنعشها
بعديها يبدأ دورنا كمواطنين ..

موضوع مهم جدا وجميل
تسلمي ياقمر ..

[Mr. Ali 1]

المشاركة الأصلية كتبت بواسطة الصمت الحزين

التعاون مع بعض فى الفرح والمواساة والكوارث شئ جميل زى حضرتك ماقلت

ونساعد بعض ويكون فى بينا روح تعاون اكيد شئ رائع

لكن فى الامر ده يا مستر انا مش بطالب الشعب كشعب او بالاكراه انه يساعد ويقدم مساعدته

انا يا مستر بقول ان كلو واحد يقدر يساعد باللى يقدر عليه

بقول ان لو كل اسرة تعاونت مع بعضها ودفعت جنيه

وجمعت مبلغ وجابت بالمبلغ ده حاجة وادتها لاسرة محتاجة
او عطتها لواحد مش معاه تمن الكشف
او شلة اصحاب مع بعضها عملوا نفس النظام
او بيت ساكن فى شارع وجمع من البيوت اللى ساكنة فى الشارع
وجمعوا مبلغ ويعطوا لاسرة محتاجة
بجد شئ جميل لما يحصل بكده هنحاول نسد الفجوة بين الفقير والغنى
هو صحيح الحكومة واجبها تعمل كده او بالاخص وزارة التنمية المحلية
بس احنا بردو يا مستر لازم نتعاون عشان نقضى ع المشكلة باسرع مايمكن
مشكلة العشوائيات دى ليها اخطار كبيرة جدا
عندهم اخطار ثقافية اقتصادية وصحية اما من الناحية الثقافية دى
السكان دول عندهم شعور بعدم الانتماء وعدم الاستقرار وظروف معيشة
قاسية جدا ومش عارفين يوفروا سكن او زواج وده بيخليهم يبصوا لاصحاب
الفلل والاملاك وبيخلق عندهم نوع من الحقد والغيرة وده اللى بيطلع منهم
البلطجية والحرامية والمنحرفين اما الجانب الصحى فهما عندهم امراض كتيرة جدا وبكتريا وهما بتنقلهم من مكان لمكان هيتنقل المرض معاهم
وناس كتييرة هتتعدى منهم وهتنتشر الامراض
ومشاكل تانية كتيرة ناتجة عنها
فاحنا لازم نساعدهم عشان نقضى عليهم فاسرع وقت
ونساعد بردو الحكومة
يعنى يا مستر المدير فى المدرسة اكيد مش هو اللى بيشيل المدرسة لوحده اكيد فى معاه وكيل ومدرسين بيساعدوه واللى بيساعدوه المدرسين
الطلبة والطلبة لما تكون شاطرة ونشيطة
بيشجعوا المدرسين ع الشرح
وفى النهاية بيخرج الهدف هو الحصول ع التعليم
يعنى دى منظومة كاملة ومتكاملة عرفت تحقق اهدافها بالمشاركة والتعاون
من جميع الافراد الموجوده فى المنظومة
ومعنى كلامى ده ان الحكومة بردو هتساعد يعنى مش هتهرب
هتبنى مساكن للناس دى
واحنا مجرد ساعد بنساعد عشان ننشط الحركة
والحكومة متنمش
ده كل اللى اقصده

شكرا يا مستر عى مشاركتك

بجد تورتنى

ايه دا يافرح ؟ ردك أطول من مشاركتي الطويلة
بصي يا فرح , زي ما قلت التعاون بين البشر شيء جميل ومفيد ونافع وضروري وكل الأديان السماوية تحث عليه .
لكن مش في كل الحالات يا فرح .
الموضوع بيتكلم عن العشوائيات . انتي عارف تكلفة بناء المساكن للناس اللي في العشوائيات دول كام ؟؟
يا فرح أنا شفت في احدي حلقات عمرو الليثي 800 فرد عايشين في مراكب صغيرة جداً . ال 800 فرد دول لهم دورة مياة واحدة ( مفيش رجال ولا سيدات ) عايشين في المركب صيف وشتاء !! متصورة معيشتهم ممكن تكون شكلها ايه ؟! يا تري احنا بردوا اللي هنتعاون ونبني ليهم مساكن ؟ وبعدين احنا دول مين ؟ مش الشعب المصري ؟ والحكومة بتاعتنا دي ايه ؟ مستوردة ؟ ولما الحكومة تنبي مساكن للناس دول وتراعي صحة المواطنين وتعالجهم وتكون مسئولة عن تعليمهم وتوظيفهم , يا تري الحكومة بتدفع من جيبها حاجة ؟ ولا كله من جيوب الشعب المصري ؟!!
أنا نفسي ان المؤسسات والجمعيات الخيرية ( اللي عددها بيكتر يوم عن يوم ) نفسي تختفي خالص من المجتمع المصري ( تدريجياً ) انتي قلتي وزارة التنمية المحلية . فين وزارة الصحة ؟ وزارة التربية والتعليم ؟ وزارة التضامن الاجتماعي ( هو فين التضامن الاجتماعي دا ) وزارة القوي العاملة ؟ وغيرهم !!!
نفسي أيام الخليفة عمر ترجع تاني ( مش عمر بن الخطاب , لأ . عمر بن عبد العزيز ) في أواخر خلافته ( كل خلافته سنتين وشهور ) أرسل له ولاة الأمصار بأنهم أرسلوا الأموال مع الجنود وعمالهم يجوبون بها أنحاء الولاية ويقولون للناس ( من لا يستطيع أن يتزوج فنزوجه , من لا يستطيع أن يبني داراً فنبني له , من .... ) فيرجع العمال بالأموال كما هي . لماذا ؟ لأن الحاكم عدل بين الرعية وكان أهلاً للمسئولية وأرسل لكل ذي حاجة حاجته دون أن يكلفه مذلة السؤال .
دور الحكومة لا يؤديه الأفراد , بل تؤديه الحكومة رغماً عنها . انتي عارفة يا فرح مساكن الشباب اللي مش لاقي خالص والحكومة ( اللي زي ما هي في السياسة ) قالت انها بتسلم ... وحدة سكنية كل شهر . عارفة الشقة ايجارها كام ؟ 375 جنيه شهرياً والمساحة 70 متر !!!!
هو دا دور الدولة ؟ دا دور الحكومة ؟؟ عايزانا احنا اللي نبني للناس والحكومة بتاخد الفلوس مننا احنا وتحطها في جيوبها !!
المفروض ان الشقق دي تكون ببلاش يعني مجاناً . الناس المخصص ليهم الشقق دي ( دا المفروض علي الورق بس ) مش معاهم حاجة . لكن الدولة بتلعبها صح علي حساب الشعب المصري . عشوائيات زي ما انتي قلتي ليهم مشاكل اجتماعية واقتصادية وصحية وتعليمية وأخلاقية وأمنية أيضاً . يا تري لو الحكومة وفرت للناس دول المسكن , مش الحكومة دي بردوا هي اللي هتتجنب المشاكل السابقة كلها ؟!!
العلاج علي نفقة الدولة اللي كان بيتسرق لأصحاب الملايين والمليارات , الأراضي اللي اتباعت بملاليم لأصحاب المليارات ويتم بنائها وبيع الشقة بمئات الألاف من الجنيهات . فين دور الدولة يا فرح ؟ فين واجبها تجاه المواطنين ؟ لما ألاقي الدولة بتأدي واجبها تجاه المواطنين , ساعتها أبقي أساعد في أي حاجة . لكن انا كفرد أؤدي المهمة اللي المفروض الدولة تؤديها , فهذا هو الخطأ بعينه .
الدولة تبدأ وبعدين انا وغيري نساعد .
( كتبت أطول من ردك يا فرح )

[Hopeful Girl]

الموضوع جمييييييييييييييل جدا يا فرح

وفعلا البلد بقت حالتها سيئة جدا

احنا فعلا بتصعب علينا الناس دى لما بنشوف الصور دى

بس ايه اللى فى ايدينا

ماشى هنلم الجنيه من كل فرد

انا بسمع عن جمعيات كتييييييييييرة وخاصة من بعد الثورة

بيقولوا بنعمل و بنعمل

والله أنا شايفة انهم مش بيجوا ناحية القرى الفقيرة دى

هما كل اللى بيعملوه بيشوفوا القرى اللى تبع المحافظات الكبيرة بس

أنا عن نفسى

بجد نفسى اعمل ليهم حاجة

نفسى أساعدهم بجد

والبلطجية اللى فى البلد دول

أنا نفسى اعرف هما ليه بيعملوا كده

ليه اللى بيعملوه فى الناس ده

هما مش المفروض ان دول مصريين

يعنى لو فكروا فى مصلحة مصر

وحاولوا يعملوا حاجة لبلدهم

مش كان يبقى احسن

نفسى بجد نعيش فى خير و أمان

بدل ما احنا بنمشى دايما خايفين

ونفسى بجد حال البلد يتعدل

بس اكييييييييييييد مش هيتعدل الا بينا احنا

الشعب