مهم جداااا جدا لجميع اعضاء المنتدى ارجو الدخول

[جمانة2]

السلام عليكم ورحمة الله وبركاته
اسالكم بالله اللى يدخل ويقرا الموضوع
ميخرجش الا ما ينفذ اللى انا هقول عليه
دة بعد اذنكم طبعا


انا عايزة كل شاب يدخل يقول اللى مش عاجبه
فى اى بنت هنا من الناحية الاخلاقية
وفى اسلوب حوارها مع الاخرين
وايه الحاجات اللى ممكن تسقط صورة البنت
من نظر الشاب
حتى لو كانت تافهة
وتقولوا عالتافهة بالذات لان الواحدة ممكن تغلط
فى شىء تافه وهى مش وخدة بالها
دون توجيه الانتقاد لشخص بعينه
بل انتقاد الخطا فقط

وعايزة من البنات
تنفذ نفس الطلب

على فكرة انا عاملة الموضوع عشان ينفع الطرفين
مش عشان تعملوا منافسة فى الكلام
وعشان كل واحد يستفيد من اخطاءه حتى لو فى حاجة تافهة
مع العلم ان الحاجة التافهة ممكن تخلى الناس تقول عليك مش محترم

تنبيه هام
مش عايزة اى حد يوجه
كلام لواحد تانى بيقول
رايه وينتقده
منعا للخلافات
كل واحد يقول وجهة نظره
بهدوء وبتوضيح دون التعرض
للاخرين بالنقد
ودة اهم طلب





واللى اهم منه ادعولى ان اكون من اهل الفردوس الاعلى
وانجح فى الامتحانا بتفوق

[love ur life]

ايه الجمال دا ...والله توبيك تحفه جدا جدا..وان شاء الله هتبقي من اهل الفردوس..

انا اللي مش بيعجبني ان الاعضاء بيخدوا الكلام ع نفسهم ....رغم ان الموضوع بيبقا عام جدا

..ومش بشوف الاراء البّناءه..يعني انا بدخل الموضوع بلاقي ردود ع مشاركات عضو مش ع التوبيك نفسه
مش بستلطف الفكره دي ..فيه حاجات اه بتبقا عايزه تعليق ..بس مش بالطريقه دي..

[وردة امل]

موضوع جميل اوى
وربنا يجعلك من اهل الفردوس

انا بكره الولد اللى بيعاكس البنات برخامة
واللى بيشرب سجاير
بيفتكرها رجولة

وسورى يعنى والولد اللى بيسقط البنطلون
ببقى نفسى اولع فيه

[التوأمان]

موضوع بجد تحفه

و انا بقى فى حاجات كتير مش بتعجبنى فى الشباب

منها بقى على سبيل المثال مش الحصر

الى بيدخنوا و فاكرين انهم كده صح و الى ميدخنش للاسف يحسسوه انه جبان و مش راجل

الولاد الى بتفتكر نفسها كبرت على اهاليها و بتعوقها ( مع ان دى توجد فى البنات ايضا )

الولاد و الموضه المهببه الى بيعملوها فى بنطلونتهم و شعرهم و لبسهم كله و الحظاظات و الانسيالات و السلاسل بجد مسبوش حاجه للبنات

و الولاد بقى الى بتعاكس فى البنات بجد قمه قلة الادب تلاقى الواحد منهم بيعاكس الى رايحه و الى جيه و مش مهم سنها و لا شكلها بجد الواحد بيحس انها مجرد اشباع رغبه مش اكتر (اوعوا حد يفهمنى غلط ههههههههــ )

كفايه كده احسن لو اتكلمت تانى هطلع كل الى جوايا و ممكن اعمل مشاكل

و بجد موضوع روعه و ربنا يزيدك .

[Mr. Ali 1]

أتمني من الجميع الالتزام بما نبهت بشأنه كاتبة الموضوع
وكل عضو أو عضوة يعبر عن رأيه فقط دون أي تجاوز
وخاصة في الألفاظ .
وان شاء الله أقول رأيي في الأخر علشان محدش يعلق عليه
ربنا يوفقك في الامتحانات وتنجحي بتفوق ( كده دعوتين , كان فيه دعوة قبل كده )

[بحب ربنا]

الحاجه الى غيظانى قوى ان الولد يصاحب بنت ويمشى معاها وتيجى عند اختو ومحدش يتكلم
طيب مش البنت الى انتا مصحبها دى ليها اخوات زيك بيخافو عليها طيب انت يتخاف على اختك خاف على البنات التانيه
واكيد الى بتعملو فى البنات هيتعمل مع بنت قربتك او اختك
وكما تدين تدان

[الأستاذة أم شاهندة]

موضوع رائع فعلاً


أكثر ما يضايقنى


تجاوز الحدود بين أى من الطرفين والبدء باستخدام كلمات (عسل _باشا_ قمر) بين الجنسين

ليس من اللائق حدوث هذا سواء فى الحياة أو فى المنتدى

لابد من وجود حدود فى لغة الحوار حتى لا يسمح بتجاوزات أكبر

ومرة تانية موضوع مميز حقاً

[Heartbeat]

دايما موضوعاتك جميلة يا جمانة
ويارب تكونى من اهل الفردوس الاعلى حبيبتى

انتى قصدك توجيه الانتقاد يكون للاشخاص فى المنتدى بس
مش الحياة العامة.... مش كده؟؟؟
اصلى شايفة ان فى ردود على الحياة العامة بس

بالنسبة للمنتدى فممكن اكتر حاجة مش بتعجبنى فى تصرفات بعض الاعضاء
هى التدخل فيما لا يعنيهم
وكمان ساعات بلاقى انتقادات للبنات عموما بطريقة مش لذيذة
وساعات كمان ناس بتستهزء ببعض الموضوعات وكأنها داخلة الموضوع علشان تهزر
وتظهر خفة دمها
بجد دى حاجة بتضايقنى جدا
لان المفروض اننا نحترم الموضوع حتى لو مش عاجبنا

تقبلى مرورى يا قمر

[Heartbeat]

اه وافتكرت حاجة كمان هتشلنى
بالظبط اللى الاستاذه ام شاهندة قالت عليها
وشوفتها وبجد كان نفسى اضرب العضو اللى قال كده
وكنت مستغربة جدا
كنت اول مرة اشوفها فى المنتدى

هى "والله انت عسل"
وللاسف كانت من بنت

ربنا يهدى

[hassan43]

ربنا يكرمك و يجعلك من اهل الفردوس الاعلى

اللى بيضايقنى عن جد و ده رأيي الخاص انى الاقى اب و ام محترمين و يسمحوا لبنتهم ان تلبس و تتزين بملابس غير محترمة و غير محتشمة
انا لا اصادر على حرية احد
لكن المفروض يكون فى احترام لشعور الآخرين
المفروض نربى بناتنا الصغار على لبس الملابس المحتشمة و لا نعودهن على الملابس القصيرة
حتى اذا كبرن يعرفن ما لهن و ما عليهن و لا يحتجن لنصيحة من احد
ارجو الا اكون ضايقت احد برايى

ربنا هب لنا من لدنك رحمة و هيء لنا من امرنا رشدا
اللهم يا و اسع المغفرة اغفر لنا يا ارحم الراحمين اللهم اعطنا رزقاً حلالا و هب لنا من لدنك وداً و إقبالا يا من إليه المآل اصلح لنا الحال و بدل حالنا من حال الى أحسن الاحوال و بلغنا الامال و و ارزقنا صدق النية لله فى الافعال و الاقوال و الاحوال و اخرج اللهم الفاسد من اعمالنا وطهرنا ظاهرا و باطنا و سلمنا من كل فتنة و محنة و جعلنا اهلا لمحبتك و ارقنا لذة طاعتك و محبة اهل مودتك احشرنا مع الصالحين بجاه سيد المرسلين سيدنا محمد صلى الله عليه و سلم
آمين

[جمانة2]

انا عايزة رايكم بخصوص
الاستهتار اللى بيحصل
فى المنتدى بالخصوص
وفى الحياة بشكل عام
وشكراااااااااااااااااااااااا
لكم اخوانى على التفاعل
الرائع والمهم جدااااا للبنت والولد

[عاشق البلانكو الابيض]

انا مش بيعجبنى لبس البنااات الايااام دى خااالص
يعنى انا وصغيرررر كنت دايما بشوف البنات لابسة الخماار
ومفيش بنت بتلفت النظر وهى ماااشية فى الشااارع
ام دلوووقت اعوذ بالله يعنى الا من رحم ربى
ويقولك هى دى المووووضة نعمل اااايه
وكمااان تلاقى الوحدة حااطة برفااان وسط الناااس
يعنى القى فى القطرر وحدة حاطة البرفاان فى شنطتها
ومطلعاه تحط منه هى وصحبااااتهااا واصلا لو راجل شم
ريحته عليهاااا هتبقى زانية
وكمااان اللى تعرف ولاد فى الجاااامعة
علشااان يصررررف عليهاااااااا وهو العبيط
مبسووووط بكده
يلا كفاااااية كده بقااااااااا
شكرررا على الموضوع الجميل

[H.H.KH]

اللى مش بيعجبنى فى الاولاد ان فى منهم فاهم الرجولة غلط تماما
يعنى فاكر انه كل مايوقع اكبر عدد من البنات يبقى كدة هو وااااااااو يعنى ديه اول حاجة
وكمان فى اولاد _انا مش عايزة اقول عليهم رجالة عشان خسارة فيهم الكلمة _ بيكونوا تقريبا حالفين ليكسروا قلب اللى البنت اللى بتحبهم بعد ما بيوقعها فى حبه يعنى ويعملها البحر طحينة
مش عارفة اقول ايه تانى بس ده اللى عندى دلوقتى

[waleed ansary]

موضوع أكثر من راااااائع
جزاكى الله كل خير
بجد موضوع رائع وبيناقش قضيه هامه
ومش هتكفينى صفحات المنتدى كلها علشان اوضح وجهة نظرى بس كل اللى اقدر اقوله
ربنا يهدى شباب وبنات المسلمين إلى كل ما يحبه ويرضاه

[الـشـيـمـ ء ـا]

الموضوع جميل جدااااا
شكرا ليكى يا جمانه

واكتر حاجة بتضايقنى فى المنتدى
ان فى موضوعات كتير وردود كتير بتبقى باللغه العربيه الفصحى
هههههههه
اصل انا بلاقى كل الناس بتتكلم باللغة العاميه اكتر ومتعودة عليها
وبحس ان اللغة العامية بتلمس القلوب اكتر
و مش بتكلم فصحى الا فى اسئلة درس العربى
وممكن يكون فى لفظ بقى صعب كدة ومش عارفاه فاحس ان انا بتكلم لغة تانيه

و بالنسبه للحياة عامة
ان فى ولاد كتير بيبقو فاكرين انهم احسن من البنت لمجرد انه اسمه ولد
وبيدى لنفسه حق انه يقول على نفسه راجل ايا كان طباعه
وعلى هذا الاساس بيعمل تصرفات مستغلظة فى الغباء