لسه في ثانوية عامة ><" ... {مساعدة لو سمحتم !!}

[لؤلؤة*]

السلام عليكم ورحمة الله وبركآته
أنا لسه طالبة في ثانوية عامة ،، علمي علوم
بإذن الله عندي طموح كبير بس مش عارفة أبدأ منين
وأعمل ايه عشان أتفوق وأكون الأولى على الثانوية ان شاء الله
بقالي شهرين ونص تقريبا من بداية الدروس
مش عارفة أنظم وقتي ،،
يعني باختصار جيت القسم هنا لأن ميولي هايكون هنا بإذن الله
والسنة الجاية هاتلاقوا اسمي اتغير بإذن الله ,, ماعلينا
المهم
باختصار تجربتكم في الثانوية .. أعمل ايه بالظبط عشان أجيب مجموع 99% وال 100%
يعني مثلا نظام المذاكرة ,, ورد القرآن وهكذا
بانتظاركم .....
بحفظ الله

[EyadOsa]

بصي يا ستي باختصار كده انا داخل اولى طب وكنت زيك في اول 3 4 شهور في الدروس وكده متلخبط ومش عارف انظم وقتي بمعنى اجمع اللي خته في كل اسبوع في الدروس واذاكر كل حاجة عشوائياً كده من غير ترتيب او وقت معين بس كنت بتابع دايما اللي باخده في الدروس ما بسيبهوش يفوت حتى لو ما ذاكرتوش كنت اقراه قراية بتركيز عشان استفيد حاجة قبل الخصة اللي بعدها.....المهم لحد شهر 4 كده بدأت بقى أشد وازيد وقت المذاكرة واشد في المواد اللي حاسس اني عاوز اضبط نفسي فيها اكتر واراجع المواد اللي انا كنت بذاكرها كيوس اوي على مدار السنة زي الفيزياء وشديت حيلي في اخر شهرين ونص دول والحمد لله ربنا كرمني وجبت 98.17 اي نعم مش 99 ولا 100بس اهو الحمد لله حققلي اللي انا عاوزه ودخلت طب .....ورد القرآن يا ريت تعملي بيه عشان كلام ربنا حيحفزك تذاكري اكتر من اول السنة وما تكسليش لاخر السنة عشان ما تتعبيش ويا رب السنة الجاي نلاقيكي بتكتبي كلام زي ده

سلام عليكم.

[لؤلؤة*]

والله جزاك الله خيرا
كلامك حمسني للمذاكرة لأني لحد دلوقتى كنت قرفانة منها ع لآخر بجد !!
بس قررت لحد آخر الأسبوع ألم اللي فايتني عشان بعد كده ان شاء الله أذاكر المادة في يومها ^^
#
مش مشكلة المجموع كان ايه ،، المهم فعلا انك حققت اللى كنت عايزه
ماشاء الله مجموعك مش وحش أبدا ،، للأمام ان شاء الله
#
كنت بعمل زيك كده بالظبط ،، مافيش مذاكرة أوي يعني يادوب كنت بتابع وأحل الواجب ع القد وخلاص
ان شاء الله أتابع معاكم هنا على مدار السنة وأقولكم آخر التطورات بإذن الله
#
جزاك الله خيرا
بحفظ الله

[لؤلؤة*]

صح ،، بالنسبة لورد القرآن ، هاحاول أقرا صفحتين في اليوم بإذن الله بداية من النهاردة

[EyadOsa]

بالتوفيق يا دكتورة ان شاء الله ربنا معاكي وزي ما قلتلك اهم حاجة والله مش يبقى عدد ساعات مذاكرتك كتير على قد ما يبقى كل ساعة بتذاكري فيها دماغك رايقة وجاهزة للمذاكرة وذهنك صافي عشان تطلعي بحاجة من مذاكرتك ....وانا كان ليا صحاب اشطر مني بكتير ومن اول السنة بيذاكروا كتير جداً لحد الامتحانات وقفلوا مواد بالهبل وجم عند مادة معينة نقصوا فيها اكتر من 8 درجات وملحقوش صيدلة حتى

[لؤلؤة*]

بص ،، والله العظيم يعنى مش عارفة أشكرك ازاي يا دكتور إياد
كلماتك بجد بتشجعنى أوى
معلش والله متقلة عليك ،، بس سؤال : المفروض ان عندي يومين فاضيين
الثلاثاء والجمعة ..
يوم السبت ببدأ الساعة اتنين يعني عبال مالبس وكده
وبرجع البيت ستة !!
الأحد ببدأ تسعة الصبح ونفس الكلام برجع على ستة ستة ونص
الاتنين نفس الكلام هو ويوم الخميس
الأربع هو الوحيد اللي برجع فيه بدري ع الساعة اتنين تقريبا
مشكلتي اني مش عارفة أبدأ أذاكر امتى لما الدروس مطيرة نص اليوم وبروح تعبانة وكده
ولما اذاكر ،، الحمد لله بكون فايقة بس مش عارفة أذاكر لكل مادة كام ساعة
وأذاكر كام مدة في اليوم
باختصار : أخلي مذاكرتي نظامها ايه يعني بما انك عرفت تنظم وقتك ^^
وجزاك الله خيرا وجعله الله في موازين حسناتك ،،

[EyadOsa]

بصي يوم السبت احسن حاجة تذاكري 3 ساعات قبل بداية دروسك من الساعة 10 الصبح كده بحيث تكوني نمتي بدري على 11 او 12 بالليل كده وبالتالي تكوني نمتي بتاع 8-9 ساعات كده حلوين اوي عشان تبقى فايقة طول اليوم ولما ترجعي على 6 كده خديلك ساعتين كده كفاية لو فيكي حيل عشان تبقى مذاكرة بفائدة .....الاحد حاولي تشدي على نفسك وتصحى بدري على 7 كده تذاكريلك ان شاء الله ساعتين ولما تخلصي الدروس نامي براحتك لانه واضح انه يوم تقيل مفيش فرصة اوي تذاكري ..... الاتنين نفس الكلام عشان حيبقى مليان دروس .... الثلاثاء ده بقى تعوضي فيه الاحد والاتنين بحيث تذاكري فيه 6-7 ساعات على مدار اليوم ويا ريت يكون اكبر عدد ساعات منه الصبح عشان تركيزك يكون اكتر وتستفيدي من مذاكرتك ..... الاربعاء برده ممكن تيجي على نفسك وتصحى 7 كده تذاكري 5-6 ساعات بتركيز قبل الساعة 2 ولما ترجعي لو تعبانة تنامي براحتك .........الخميس حيبقى مليان دروس فحاولي تخطفيلك ساعتين ولا حاجة الصبح بدري قبل الدروس تستفيدي بيهم ......الجمعة برده يبقى يوم خاص بالمذاكرة من الصبح بدري وحتبقى فاضية فتذاكري اللي معرفتيش تذاكريه يوميه في الدروس في الايام اللي بتبقى مليانة دروس


من ناحية نظام المذاكرة وعدد المواد ده حاجة انتي بس اللي تقرريها بمعنى عشان تبقى متوازنة ما تحطيش مواد كتير كل يوم مادتين كفاية عشان تطلعي مذاكرة كل مادة كويس وتختاري لكل يوم في عدد ساعات فاضية كتير زي الجمعة والثلاثاء بحيث تكون مادة تقيلة زي العربي ومعاها حاجة علمية زي الكيمياء او الفيزياء مثلا علشان يبقى شوية حفظ مع شوية فهم ومن ناحية كام ساعة لكل مادة برده انتي اللي تحدديها عشان دي فروقات ما بين الطلبة انتي تقرري عاوزة تخلصي ايه في العربي مثلا النهاردة مدرسة كذا في الادب ونص كذا وفصول القصة كذا وما تكتريش عشان ما تضيعيش الوقت في مادة واحدة على حساب التانية ولو بتكرهي الادب مثلاً خدي معاه حاجة بتحبيها او فيها متعة اللى حد ما زي القصة كده مثلاً (لو كنتي بتحبيها)


وفي الآخر لا شكر على واجب يا دكتورة ربنا معاكي ومفيش تقل ولا حاجة الواحد قاعد فاضي واحنا كنا زيكوا كده ايام الثانوية بنسال اللي اكبر منا اسالة كتيرة اوي وكانوا بيردوا علينا بصدق وافادونا وساعدونا اننا نوصل الكليات اللي احنا عاوزينها وبالتالي ده اصبح واجب علينا للدفعات اللي اصغر منا نرد الجميل اللي عملوه فينا اللي اكبر منا

[لؤلؤة*]

جزاك الله خرا
فعلا نظام المذاكرة بدأت أعدّله
و فعلا اليوم مابيكملش 3 مواد أصلا ><"
الحمد لله النظام بدأ يمشي شوية
#
طيب بالنسبة لكمية الحل والمراجعة
أنا جايبة لكل مادة كتابين ماعدا الألماني !
و يادوب بلحق أحل واجب المدرس وبس
ان شاء الله أحاول من أول الأسبوع ده أطبق النظام اللى قلت عليه
المراجعة بقى تبقى ازاي ؟؟!!
يعنى هاكون تقريبا مخلصة حل على الدروس اللى خدتها أراجع عليها ازاي ؟!
#
بالنسبة لموضوع كلية الطب
كل الناس شايفة انى متأهلة لدخول الكلية ومتوقعين منى حاجة كبيرة
المشكلة انى مش واثقة فى نفسي
بس دلوقتى ثقتى بقت 50% الحمد لله
خآيفة بس أجيب مجموع ماحصلش فيه أي حاجة
الكل شايف انى بذاكر ومجتهدة وأنا مش شايفة كده
المفروض أعمل ايه ؟
#
بالنسبة لورد القرآن الحمد لله منتظمة على خمس صفح في اليوم ولله الحمد ^^

[لؤلؤة*]

نسيت أقول : من يوم السبت الجاي بإذن الله هاكمل حفظ مع معلمتى
يعنى الـ3 ساعات بتوع الصبح هايكونوا للقرآن والحفظ وكده !
#
في حل من اتنين ،
{إما أذاكر قبل حلقة القرآن أو بعد مارجع من الدرس}
أو
{ماذاكرش يوم السبت ! وده مستحيل على ما أظن}

[EyadOsa]

المشاركة الأصلية كتبت بواسطة لؤلؤة*

جزاك الله خرا
فعلا نظام المذاكرة بدأت أعدّله
و فعلا اليوم مابيكملش 3 مواد أصلا ><"
الحمد لله النظام بدأ يمشي شوية
#
طيب بالنسبة لكمية الحل والمراجعة
أنا جايبة لكل مادة كتابين ماعدا الألماني !
و يادوب بلحق أحل واجب المدرس وبس
ان شاء الله أحاول من أول الأسبوع ده أطبق النظام اللى قلت عليه
المراجعة بقى تبقى ازاي ؟؟!!
يعنى هاكون تقريبا مخلصة حل على الدروس اللى خدتها أراجع عليها ازاي ؟!
#
بالنسبة لموضوع كلية الطب
كل الناس شايفة انى متأهلة لدخول الكلية ومتوقعين منى حاجة كبيرة
المشكلة انى مش واثقة فى نفسي
بس دلوقتى ثقتى بقت 50% الحمد لله
خآيفة بس أجيب مجموع ماحصلش فيه أي حاجة
الكل شايف انى بذاكر ومجتهدة وأنا مش شايفة كده
المفروض أعمل ايه ؟
#
بالنسبة لورد القرآن الحمد لله منتظمة على خمس صفح في اليوم ولله الحمد ^^

بصي اللي اعرفه من صحابي ان الالماني سهل زيه زي الفرنساوي والايطالي ومش حتاج كتب كتير هو كتاب واحد كويس شامل كفاية اوي ....انا كنت شغال فرنساوي كتاب واحد بس وكنت بحل كتير منه لانها كانت مادة جميلة وقفلتها بسهولة ولله الحمد كذلك الالماني .... من ناحية المراجعة احسن حاجة انك كل لما تخدي جزء كبير شوية في كل مادة تراجعيه كله على بعضه طبعاً ده بعد ما تكوني ذاكرتي كل درس في وقته علشان ده حيديكي ثقة كبيرة اوي انك لما تخشي امتحان اخر السنة بالمنهج كله ما تخافيش انك حتنسي حاجة وده احساس حتحسيه في الامتحان حتى لو مذاكرة ما تخافيش ولكن اول ما تشوفي الورقة وتمشي في الحل حتلاقي كل حاجة بتفتكريها وطبعاً في المراجعة اهم حاجة تحلي الاسئلة الرخمة بالذات تاني وتعدي عليها في كل مادة من الكتب الخارجية وغيره ..... من ناحية الثقة بصي طول ما انتي شكة في نفسك يبقى انت كده ان ساء الله في الطريق الصح ومش بهزر لان مستحيل تلاقي واحد دخل الكلية دي وكان واثق انه حيجيبها ان عن نفسي كنت مش واثق في نفسي خالص وبالذات لما اروح الدروس واحس ان في بنات شطارين جداً كتار واقول لنفسي انت مستحيل تلاقي مكان في كلية طب وسط البنات الشاطرين دول كلهم بس في النهاية الحال انقلب وعدد قليل جداً منهم دخل معايا طب اسكندرية وانا لحقتها الحمد لله وبعدين ما دام انتي بتذاكري كويس خلاص اهم حاجة ضميرك يستريح عشان لو دخلتيها ان شاء الله يبقى الحمد لله ربنا ارادلك حاجة تانية تعرفي انها احسنلك تماماً وعلى آخر السنة قبل الامتحانات بشهرين تلاتة كده حتحسي فعلاً قد ايه كانت سنة عبيطة وتافهة ومش زي ما كان الكل بيخوفنا منها وان كلام الناس هو اللي بيجيبنا ورا كل اللي عليكي تذاكري وتعملي اللي عليكي وخلاص ده غير ان الحمد لله انتي بتحافظي على ورد القرآن يبقى كده ربنا حيكون معاكي على طول وبيساعدك وده يخلكي تطمني انك حتوصلي لهدفك ان شاء الله

[EyadOsa]

المشاركة الأصلية كتبت بواسطة لؤلؤة*

نسيت أقول : من يوم السبت الجاي بإذن الله هاكمل حفظ مع معلمتى
يعنى الـ3 ساعات بتوع الصبح هايكونوا للقرآن والحفظ وكده !
#
في حل من اتنين ،
{إما أذاكر قبل حلقة القرآن أو بعد مارجع من الدرس}
أو
{ماذاكرش يوم السبت ! وده مستحيل على ما أظن}

ما شاء الله جميل جداً استمري على كده وربنا حيكرمك باحسن مجموع ان شاء الله والاحسن ليكي انك تذاكري قبل حلقة القرآن او بعد الرجوع من الدرس ايهما افضلك حسب كونك مجهدة ولا لأ .....وربنا يوفقك والسنة الجاية تكوني بتدي نصايح لحد اصغر منك وتحكيله تجربة ناجحة ان شاء الله يا دكتورة.

[لؤلؤة*]

فعلا نظام المراجعة ده طبقته الحمد لله مع العربى وكان ناجح جدا الحمد لله
#
الموضوع ان الألمانى سهل ،، عشان كده هو أقل مادة بذاكرها في المواد
وده اللي مقلقنى منه ع الآخر بجد ><"
#
المشكلة مش فيّ عشان الكلية ، المشكلة في البيت لأنى أكبر واحدة فى اخواتى
وعندى قرايب ومعارف كتير في سنى و والدى مستنى انى أتفوق عليهم كلهم !!
مع اني لو دخلت بإذن الله طب قصر عينى أو غيره
مش هاتفرق لأنى مش عايزة اشتغل ،، عايزة أدْرِس وبس !!
#
بالنسبة لاستمارة الرغبات المفروض أعمل فيها ايه
لسه ماخدناش الاستمارة بس عايزة أعرف المفروض هاكتب فيها رغبات ايه !!
لأن اللى سألتهم ماخدتش منهم جواب واضح .
وشكرا على اهتمامك بالموضوع

[EyadOsa]

بصي اللغة التانية بالذات ما تقلقيش منها طول ما انت بتذاكريها حتى لو ساعة في الاسبوع حتتراجع كويس جداً قبل امتحانات آخر السنة اهم حاجة دلوقتي تحفظي الكلمات كويس والقواعد وخلاص وفي المراجعات تقدري تحلي كتير عليه .... الفرنساوي كان اقل مادة بذاكرها واكتر مادة بقفل امتحاناتها عشان كنت بستمتع بيها وقفلتها بسهولة جداً آخر السنة ....... كلنا اباءنا كده ده شئ طبيعي عاوزين يشوفونا احسن ناس في الدنيا بس انت ما توتريش نفسك ان عندك قرايب كتير في سنك ولازم تتفوقي عليهم انسيهم ده مستقبلك انت ودي احسن طريقة تتفوقي بيها وصح ما دام مش عاوزة تشتغلي عاوزة تدرسي يبقى على مهلك شوفي وقرري نفسك تخشي ايه وتكون حاجة مناسبة ليكي ولرغبتك في الدراسة بس ....استمارة الرغبات احنا كنا مليناها على شهر 2 كده وبسيطة خالص شبه بتاعة 3 اعدادي يعني حتكتبي اسمك عربي وانجليزي وقسمك علمي وشعبة ايه علوم ولا رياضة وعنوانك وتاريخ ميلادك والادارة التعليمية والمحافظة ولما تروحي المدرسة تمليها حيبقى فيه مدرسين معاكي في كل فصل حيمشوا معاكوا وهما حيوجهوكوا واهم حاجة بس حتكتبي مواد التخصص اللي هي احياء كيمياء فيزياء جيولوجيا وعلوم بيئية الخاصة بعلمي علوم.... العفو يا دكتورة زي ما قلتلك ده واجب عليا افيدكم بعد ما استفدت من الناس اللي اكبر مني وساعدوني في دخول الكلية....وربنا معاكم جميعاً

[لؤلؤة*]

جزاك الله خيرا ،، طبقت نصيحتك الأخرة دى في الألمانى ونجحت معايا شوية الحمد لله ،،
يادوب بحاول أخلص الكلمات والقواعد كده على قد ماقدر ...
ماشاء الله ،، ربنا يجعلك من المتميزين دايما ^^
#
موضوع الشغل مش شاغل دماغى دلوقتى ، لأن مافيش أمل أشتغل في مصر أصلا ،،
يعنى أنا اللي مش عايزة أشتغل داخل مصر ،،
عشان الواحد يطلع دكتور وليه سمعة يا اما يفتح عيادة أو يشتغل في حكومة ستين سنة !!
بإذن الله لو اتخرجت من الجامعة بممتاز أو ممتاز مع مرتبة الشرف هاعمل حاجة من اتنين ،
يا اما أسافر أو أفضل وأكمل دبلومة وماجيستير ودكتوراة وبعد ما اخلص أدخل تعليم مفتوح ..
#
حلو موضوع الاستمارة كده ,, بس لما سألت قالولي بتكتبي رغباتك في الكليات كالتالي :
كلية طب القصر العيني
طب عين شمس
طب محافظة كذا ،،،
الى آخر المحافظات وبعدها اتنقل على صيدلة نفس الكلام ،، وببدأ بالأقرب ليا وبعدها المحافظات وهكذا .
الكلام ده صح ؟
#
ثم عندى سؤال : موضوع ان الدراسة في الطب بشكل عام كلها لغة انجليزية ؟؟!!
ومالهاش علاقة بالانجليزي اللي درسناه الا في بعض الكلمات ,,
يعنى من أول سنة كده مش هانفهم حاجة ,, لأن المواد باللاتيني القديم أو الجديد

[EyadOsa]

بالنسبة لاستمارة رغبات الكلية اصلا مفيس استمارة ورقة هي بتتعمل على موقع التنسيق وصحيح اول حاجة تكتبي طب القاهرة لو اقرب حاجة ليكي والموقع حيعمل Error لو اول رغبة ما كانتش في محافظتك او لو في محافظة مفيهاش كليات مش هيقبل الا ان اول رغبة تبقى اقرب حاجة ليكي وبعد كده تكتبي من الاقرب للابعد بالترتيب ولو عكستي حيعملك error برده ولما تخلصي طب تخشي على اسنان نفس الكلام وبعدين صيدلة نفس الكلام وبعديت تختمي ال48 رغبة بعلاج طبيعي او طب بيطري اجباري عشان عدد كليات الطب والاسنان والصيدلة اقل من 48 وانتي لازم تكتبي ال48 رغبة وبعدين تعملي save ليهم.......بالنسبة لدراسة الطب هي بتبقى فيها كلمات لاتيني في المواد كلها لكن الكلام نفسه الشرح بيبقى انجليزي عادي وكل الناس اللي اكبر مننا قالوا المشكلة دي حتواحه بتوع العربي واللغات كلهم بس مش حتزيد عن شهرين اول اقل كل واحد وشطارته وحتتعودي في وقت قصير ......بالنسبة للسفر بره طبعاً انت لو ضامنه تسافري بره يبقى اي كلية حتخشيها حتلاقي شغلانة محترمة بره بس المهم انك تشغلي حاجة بتحبيها يعني تسألي نفسك عاوزة تبقى دكتورة بشري تعالجي الناس وتدرسي جسم الانسان كله وتعملي حسابك حتطولي فيها 7 سنين وتكليف او نيابة وما جستير 3 سنين تقريبا قبل السفر ولا عاوزة تبقى دكتورة اسنان تخلصي في 6 سنين من غير ماجيستير ولا غيره ولا تبقى صيدلانية تخصصك الادوية وكده وشركاتها ولا دكتورة بيطرية بتحبي الحيوانات وكده .....خدي قرار من دلوقتي شوفي عاوزه تبقى ايه عشان تشتغلي على هدفك ده بدون تشتيت انا قبل التنسيق وبعد النتيجة كنت محتار جداً بين اسنان وبشري رغم اني طول عمري نفسي ابقى بشري زي والدي بس ناس صحابي زنوا عليا ان اسنان احسن عشان مش طويلة زي بشري بس دلوقتي فعلاً في اول اسبوع كلية بقيت بحس بقيمة كليتنا عن اسنان مع احترامي ليهم ومكانة بشري وحسيت اني خدت قرار صحيح حتى لو صعب ومشواره طويل .....ربنا يوفقك وتوصلي للي انتي عاوزاه