تنصحونى احول صيدلة عين شمس كلينكى

[TITOOOOOOHATRK]

هو حضرتك فى طب ولا صيدلة

[dr besho]

انا روحت عين شمس و سالت هي مجرد مادة بتتاخد في 3 و 4 صيدلة بس ممكن تاخدي فيها كورس خارجي لو حبيتي من اعداي

[Bent 3bdo]

اولا مبروك ليكو و ان شاء الله تبقى فتحه خير عليكو
بالنسبه لكلينكال ف عين شمس مفهاش صيدله كلينكال بالمعنى اللى بتقوله
احنا بناخد ف تالته و رابعه مواد كلينكال بس مش كلها
يعنى مش زى ما تخش كلينكال م الاول ف جامعات تانية
شهادتك بتبقى علوم صيدليه عادى مش كلينكال
بس الميزة انك عشان واخد كلينكال ف تالته و رابعه
ممكن تاخد دبلومه سنتين تبع الجامعه بتبقى ب 1000 تقريبا

بالنسبه للساعات المعتمده
فهو ف عين شمس تصميم دوائى
و ف القاهرة كلينكال

نظام السااعات المعتمده ده
يعنى مش ترمات زى العادى
لا ساعات
يعنى الكورس بتاع الماده دى ده كذا ساعه ودى كذا و هكذا بقى
و بيبقى عندك امكانيه انك تختار ترتيب بعض المواد ايه تاخده الاول و ايه تأجله بس متكونش مترتبه ع بعض
يعنى ممكن تبقى انت و صاحبك ف نفس الترم بس مش بتاخدو كل المواد زى بعض
بس ف الكورسات المترتبه ع بعض مينفعش
و لو لا قدر الله مثلا شلت كورس زى الاورجانك 1 مينفعش تاخد2 غير لما تنجح ف 1 الاول
مش زى العادى تشيها معاك السنه اللى بعدها عادى مع الكورس اللى المفروض تاخده عادى
و بتمتحن ترم و اخر سنه عادى
و طبعا بفلوس
و مفهوش اعدادى بتبتدى من اولى ع طول
و بيبقى ف غياب و حضور ف المحاضرات مش زى العادى
و مفيش درجات رأفه (بعد الشر عليكو محدش يحتاجلها بس عشان تبقو عارفين المعلومات كلها )

يا رب اكوت افدتكو
و لو حد عايز يسأل عن حاجه تانيه انا موجوده

[Bent 3bdo]

منصحش حد بكلينكال الصراحه
بعزقه فلوس ع الفاضى و ملوش مجال شغل ف مصر و لسه بدرى اوى ع ما يطبق هنا ده لو اتطبق
غير انك كورسات الكلينكال مغرقه الدنيا ممكن تاخدها ف اى حته و تاخد عليها شهاده وكله
فلو انت مش ظبط نفسك ع شغل برة ف المجال ده نصيحه من أخت اكبر منكو بلاش

[g_boy19942000]

المشاركة الأصلية كتبت بواسطة bent 3bdo

اولا مبروك ليكو و ان شاء الله تبقى فتحه خير عليكو
بالنسبه لكلينكال ف عين شمس مفهاش صيدله كلينكال بالمعنى اللى بتقوله
احنا بناخد ف تالته و رابعه مواد كلينكال بس مش كلها
يعنى مش زى ما تخش كلينكال م الاول ف جامعات تانية
شهادتك بتبقى علوم صيدليه عادى مش كلينكال
بس الميزة انك عشان واخد كلينكال ف تالته و رابعه
ممكن تاخد دبلومه سنتين تبع الجامعه بتبقى ب 1000 تقريبا

بالنسبه للساعات المعتمده
فهو ف عين شمس تصميم دوائى
و ف القاهرة كلينكال

نظام السااعات المعتمده ده
يعنى مش ترمات زى العادى
لا ساعات
يعنى الكورس بتاع الماده دى ده كذا ساعه ودى كذا و هكذا بقى
و بيبقى عندك امكانيه انك تختار ترتيب بعض المواد ايه تاخده الاول و ايه تأجله بس متكونش مترتبه ع بعض
يعنى ممكن تبقى انت و صاحبك ف نفس الترم بس مش بتاخدو كل المواد زى بعض
بس ف الكورسات المترتبه ع بعض مينفعش
و لو لا قدر الله مثلا شلت كورس زى الاورجانك 1 مينفعش تاخد2 غير لما تنجح ف 1 الاول
مش زى العادى تشيها معاك السنه اللى بعدها عادى مع الكورس اللى المفروض تاخده عادى
و بتمتحن ترم و اخر سنه عادى
و طبعا بفلوس
و مفهوش اعدادى بتبتدى من اولى ع طول
و بيبقى ف غياب و حضور ف المحاضرات مش زى العادى
و مفيش درجات رأفه (بعد الشر عليكو محدش يحتاجلها بس عشان تبقو عارفين المعلومات كلها )

يا رب اكوت افدتكو
و لو حد عايز يسأل عن حاجه تانيه انا موجوده

ممكن توضيح اكثر على الاكلينيكيل يعنى هو عبارة عن اية و ممكن اخدو من اولى و بيكام و لما باخدو تبع الجامعة بوصل لانهى حد معاهم و بيكتب فى الشاهدة اكلينيكل ولا لا

ثم توضيح عن الساعات المعتمدة و دية موجودة فى كل الكليات ولا لا و بيكام

ثم اية تانى بفلوس

ثم تنصحينى نعمل اية من اول اولى لحد 5 و التخرج و اية اللى مش ناخدوا و اية المهم و المطلوب و كدة

[Bent 3bdo]

المشاركة الأصلية كتبت بواسطة g_boy19942000

ممكن توضيح اكثر على الاكلينيكيل يعنى هو عبارة عن اية

كلينكال يعنى الدكتور بس يشخص الحاله
و انت عليك بناءا ع التشخيص ده انك تحدد الدوا و الجرعه و كل الحاجات الخاصه بالدوا
و ان الدكتور بس وظفته انه يشخص الحاله دى
و ده طبعا مش موجود ف مصر

و ممكن اخدو من اولى و بيكام و لما باخدو تبع الجامعة بوصل لانهى حد معاهم و بيكتب فى الشاهدة اكلينيكل ولا لا

لو هتاخدو من اولى فانت هتخش قسم لوحده اللى هو ساعات معتمده و ده مش ف عين شمس
و بيبقى من 10 ل 13 الف ف السنه مش عارفه الرقم بالظبط بس ف الرينج ده

و لو دخلته بيبقى مكتوب ف الشهاده

مش فاهمه يعنى ايه بتوصل لانهى حد معاهم ؟

ثم توضيح عن الساعات المعتمدة و دية موجودة فى كل الكليات ولا لا و بيكام

قصدك كل الكليات يعنى طب و هندسه وكده ؟ و لا كل الجامعات ؟
لو قصدك صيدله كل الجامعات فغالبا اه
بس بتختلف بقى هو ايه كلينكال زى القاهرة ولا تصميم دوائى زي عين شمس
و ان كان ف الاغلب بيبقى كلينكال
و بكام زى ما قولتلك ف الرنج اللى فوق كده حسب كل جامعه
و ع فكرة ف كليات النظام العادى بتاعها هو ساعات معتمده مش اللى بفلوس
زى علوم السويس كده

ثم اية تانى بفلوس

اعتقد هو الكريدت بس
غير بقى الفلوس العاديه بتاعه المصاريف و الادوات و حاجات كده عاديه يعنى

ثم تنصحينى نعمل اية من اول اولى لحد 5 و التخرج و اية اللى مش ناخدوا و اية المهم و المطلوب و كدة

و الله منصحكش بحاجه حاليا
في ناس بسمعها بتاخد كورسات انجلش
و الاقى سناتر بتعمل كورسات لمواد الكليه
حاسه انه ملوش لازمه الصراحه
يعنى لو عايز انجلش اهو حاجه هتفيدك عامه لو انت محتاج
انما كورسات لمواد الكليه
فكله هتاخده مش محتاجه
مش ثانويه عامه هى عشان تاخدو كورسات قبلها شهر
عيشو حياتكو و انسو جو الدح بتاع ثانويه عامه
بالنسبه للكورسات بقى ف الدراسه اللى هى الدروس
ف ع حسب كل واحد
انا عن نفسي مبحبذهاش و لو اتعودت عليها مش هتقدر تكمل من غيرها
و لو قررت انك هتاخد فنصيحه متاخدش ف كل المواد يعنى شوف المواد الصعبه اوى
لان فعلا بتضيع وقت كتير اوى ومش هتلحق تلاقح بين المحاضرات و الكورسات و هتبتدى تطنش المحاضرات
و جرب احضر محاضرات الاول و شوف هتفهم من الدكتور و لا لا
و اعمل حسابك انك ف الاول مش هتبقى فاهم اوى و واحده واحده هتلاقيك ابتديت تفهم وتتابع معاه و تعرف كل دكتور بيأكد ع ايه و نظام اسئلته ايه
و ف نص المحاضرات كده هتلاقيهم بيقولو كتير ع اسئله هيجبوها و يجبوها
الادوات متشلوش هم الموضوع ده خالص
ف اول سيكشن كل قسم هيقولولكو ايه الادوات اللى عايزنها و تجبوها منين
و هتلاقو فيه أسر ف الكليه كمان بتبيع و الموضوع بيبقى بسيط
و انت كمان لو روحت بس لمحل الادوات الطبيبه لو هو قريب م الجامعه و ع طول فيه تعامل معاه مع الطلبه اول لما تقولو اعدادى صيدله هيجبلك كل حاجه من غير ما تطلب حاجه حاجه

ف الكليه بقى هتلاقى اتحاد الطلبه و الاسر بتعمل ندوات و محاضرات و ورك شوبس
عن التعامل مع المرضى و marketing و Team work و حاجات من دى شوف اللى عايز تاخده خده

[g_boy19942000]

بجد شكراااااا

وضحتى حاجات كتير بس فية كام حاجة كدة اعتقد انك مش فهمتيهم منى

1_الاكلينيكل لو مخدتش فية حاجة و مشيت مع الكلية على اساس هاخدوا هيكون حلو و مش بطال ولا ملوش لازمة و لو عملت الدبلومة لما اخلص دية هكون كدة درست الاكلينيكل و بيكام هى

2_اية الكريدت دة

3_ناخد الساعات المعتمدة دية ولا ملهاش لازمة و هل هى فى المنهج بس دية تفصيلا ولا حاجة تانية زى الاكلينيكل

4_فية تكييف فى القاعات ولا لا

انا بجد كنت عاوز طب بعيد شوية السنة دية بس الحمد لله استحملينى فى الاسئلة بقى و شكراااااااااااااا

[Bent 3bdo]

المشاركة الأصلية كتبت بواسطة g_boy19942000

بجد شكراااااا

وضحتى حاجات كتير بس فية كام حاجة كدة اعتقد انك مش فهمتيهم منى

1_الاكلينيكل لو مخدتش فية حاجة و مشيت مع الكلية على اساس هاخدوا هيكون حلو و مش بطال ولا ملوش لازمة

يعنى ايه حلو و مش بطال و لا ملوش لازمه ؟
قصدك من جهه ايه انك تشتغل بيه ؟ ولا تستفيد منه كمعلومات ؟
لو من ناحيه المعلومات فأكيد هتستفاد
لو من ناحيه الشغل فاعتقد لا لازم تبقى عامل دبلومه او ماجستير او واخد كورسات معتمده ع الاقل

و لو عملت الدبلومة لما اخلص دية هكون كدة درست الاكلينيكل و بيكام هى

اه هتكون كده درسته هيبقى معاك دبلومه فيها و معتمده و كل حاجه
الدبلومه بتبقى بالف تقريبا ع حسب ما أنا فاكرة

2_اية الكريدت دة

credit hours

3_ناخد الساعات المعتمدة دية ولا ملهاش لازمة و هل هى فى المنهج بس دية تفصيلا ولا حاجة تانية زى الاكلينيكل

انا وجهه نظرى انه لا
الساعات المعتمده ف عين شمس التصميم الدوائى
بيخادو زياده عننا ماده واحده بس اللى هى دراج ديزين 2
و مش بياخدو مواد علوم اللى احنا بناخدها ف اعدادى
فبيبقو ف بعد الكورسات سابقنا يعنى كورس هما ياخدو الترم الاول احنا نكون بناخده الترم اللى بعديه
و المفروض يعنى حسب اللى بيتقال ان بما انهم تصميم دوائى ان يبقى ليهم اولوليه ف شركات الادويه
بس ف الاخر 90 % من الشغل ف شركات الادويه بيبقى وسايط
فمش محتاجه انك تدفع كل سنه 12 الف
ممكن تاخد كورسات او تدرب ف شركات او تحضر ماجستير او دبلومه ف المجال اللى هتشتغل فيه اعتقد هيبقى احسن و هيبقى ليك فرصه اكبر

الكلينيكال
بردو شايفه ان لا
مجال شغله ف مصر محدود جدا ف معاهد الاورام
و ف الاخر هى وجهات نظر انت ممكن تسأل حد ف القسم ده اكيد ليه وجهه نظر تانيه
عشان تعرف الرأين و تختار انت حسب اللى هيناسبك

4_فية تكييف فى القاعات ولا لا

المدرج فيه 6 تكيفات لا تقلق حتى البرى لاب (المدرجات الصغيرة اللى جنب المعامل ) فيها
بس هتفطسو ف المعامل
هما السنه دى ركبو مراوح اخيرا
بس لما بنيجى نشتغل بيقفلوها

انا بجد كنت عاوز طب بعيد شوية السنة دية بس الحمد لله استحملينى فى الاسئلة بقى و شكراااااااااااااا

الخيرة فيما اختاره الله
و العفو مفيش حاجه
لو عايز تسأل عن حاجه تانيه انا موجوده

[dandana.s]

طب معلش يا دوك انا اولى صيدلة عين شمس بردو
وداخلاها غصب عنى علشان كنت جايبة 98.7 وكان نفسى فى اسنان
فقوليلى اى حاجة حلوة تحببنى فيها لحسن مش طايقاها لانى كنت بفضل الاحياء بكتيييييييييير عن الكيميا
وهل هى صحيح المبنى بتاعها لسة جديد
معلش استحملينى علشان انا مستحملة دخولى الكللية دى بالعافية وعلى عينى

[Bent 3bdo]

المشاركة الأصلية كتبت بواسطة dandana.s

طب معلش يا دوك انا اولى صيدلة عين شمس بردو

اهلا و سهلا
الكليه هتنور

وداخلاها غصب عنى علشان كنت جايبة 98.7 وكان نفسى فى اسنان

لو علمتم الغيب لاخترتم الواقع
احمدى ربنا محدش عارف الخير فين
انسى اسنان خالص و بصى ع مميزات صيدله
ده حتى اسنان ارف يا بنتى ؟ كنتى هتقضى حياتك ف بوء الناس

فقوليلى اى حاجة حلوة تحببنى فيها لحسن مش طايقاها

انا ؟ و حاجه حلوة عن الكليه؟
النمرة غلط
هو كليتنا فيها حاجات حلوة كتير
يعنى هيبقى ليكى مجالات شغل اكتر من اسنان
سواء ف صيدليه ف الشارع او ف مستشفى او ف مصنع ادويه او ميديكال ريب او حتى تفتحى صيدليه وتقعدى ف البيت
و ف عين شمس بغض النظر عن انها اصعب من بقيه الجامعات
بس الدكاترة الحق يتقال محترمين الا قله قليله اوى يعنى هتلاقيهم 5 بكتير
غير كده التعامل بتاعهم كله باحترام حتى لما يحبو يطردوا حد اتفضل برة يا دكتور
من غير شتيمه ولا قله ادب
و براحتك تاكلى و تشربى ف المحاضرة
هتلاحظى الفرق لما تتعاملى مع دكاترة علوم و هندسه وطب
بغض النظر يعنى عن امتحانتهم اللى زى الفل فتصحيحهم حلو اوى
و هتلاقى في activities كتير



لانى كنت بفضل الاحياء بكتيييييييييير عن الكيميا

هتلاقى احياء كتير متقلقيش خالص
بتحبى الحفظ هتحفظى لحد ما تشبعى


وهل هى صحيح المبنى بتاعها لسة جديد

اهو المبنى


معلش استحملينى علشان انا مستحملة دخولى الكللية دى بالعافية وعلى عينى

لا يا بنتى مفيش حاجه
و شوفى لو عايزة تسألى ع حاجه تانيه
و انسي فكرة انك كارهه الكليه دى
بما انك كده كده خلاص داخلاها سواء حبتيها او لا فحاولى تحبيها احسن

[g_boy19942000]

انا يا دكتورة اقتنعت بكلامك عن الاكلينيكل و عن الساعات المعتمدة مادام كدة كدة بناخد نفس الحاجات بتاعته ما عدا مادة واحدة و فى الاخر الواحد هيعمل ماجيستير فى المجال اللى هيحبه رغم انه ممكن يشتغل فى كل المجالات و حبيت صيدلة رغم انها كلهااااااااااااااااااااااااااااااااااااااااااااااا اااا بناااااااااااااااااااااااااااااااااااااات

[dandana.s]

المشاركة الأصلية كتبت بواسطة bent 3bdo

لا يا بنتى مفيش حاجه
و شوفى لو عايزة تسألى ع حاجه تانيه
و انسي فكرة انك كارهه الكليه دى
بما انك كده كده خلاص داخلاها سواء حبتيها او لا فحاولى تحبيها احسن

شكرا يا دوك
ادعيلى بس افوق من الصدمة اللى انا فيها وارضى بقضاء ربنا

[mahy.truefriends]

الاحسن انك تدخل عادي و بعد كده تعمل دبلومه في الصيدله الاكلينيكيه

[Bent 3bdo]

المشاركة الأصلية كتبت بواسطة g_boy19942000

انا يا دكتورة اقتنعت بكلامك عن الاكلينيكل و عن الساعات المعتمدة مادام كدة كدة بناخد نفس الحاجات بتاعته ما عدا مادة واحدة و فى الاخر الواحد هيعمل ماجيستير فى المجال اللى هيحبه رغم انه ممكن يشتغل فى كل المجالات

ربنا معاك
بس احسن تسمع من حد ف القسم بردو
عشان تبقى سمعت م الاتنين بردو

و حبيت صيدلة رغم انها كلهااااااااااااااااااااااااااااااااااااااااااااااا اااا بناااااااااااااااااااااااااااااااااااااات

دى بالنسبه لكو ميزة ولا ايه ؟

المشاركة الأصلية كتبت بواسطة dandana.s

شكرا يا دوك
ادعيلى بس افوق من الصدمة اللى انا فيها وارضى بقضاء ربنا

العفو يا حبيبتى
ربنا معاكى ان شاء الله
و روقى كده بقى

[g_boy19942000]

انا سمعت ان الصيدلى ممكن يفتح معمل تحاليل بس بعد دبلومة بيعملها و لكن هناك عقبة و هى انه بيرفع قضية بيسكبها و مضمونة بس مش عارف اية لزمتها و كدة اية الحوار دة ممكن حد يوضحلنا