إنجاز عالمي ببصمة العالم المصري محمد ثروت حسن اكتشف الأوتو ثانية التي ستزيد سرعة الكمبيوتر مليارضعف

[Mohammad Asaad]

في التمانينات كانت طفرة علمية مدهشة لما نجح العالم المصري الراحل د."أحمد زويل" من اكتشاف "الفمتوثانية" واللي أدت بدورها لتطبيقات عملية كتيرة فادت البشرية وبسببها حصل القدير الراحل على جائزة "نوبل" في الكيمياء سنة 1999.. ورغم مرور حوالي 22 سنة من وقتها لحد دلوقتي لكن العالم كان على موعد مع إنجاز جديد تاني في نفس التخصص وببصمة مصرية برضه!..
المتابع للصحافة في الخارج ووسائل الإعلام العالمية هيلاقي إن فيه اسم مصري بيتردد خلال الأيام اللي فاتت بكثرة وهو اسم العالم المصري " محمد ثروت حسن" باعتباره صاحب إنجاز علمي عظيم.. دكتور "محمد" هو أستاذ في جامعة القاهرة وأستاذ في قسم الفيزياء والليزر في جامعة أريزونا في الولايات المتحدة الأمريكية.. إيه اللي حصل؟..
في حلقة جديدة من برنامج "مصر تستطيع" تقديم الإعلامي "أحمد فايق" واللي اتعودنا منه دايماً استضافة النماذج المصرية المشرفة في الخارج والاهتمام بالبحث العلمي وتسليط الضوء على العلماء المصريين في الداخل والخارج؛ تم استضافة د."محمد" عشان يتكلم عن إنجازه..
د."محمد" قال إن بعد ما د."زويل" قدر يرصد الجزيئات والذرات باستخدام الفمتوثانية؛ العالم قال: "أما بعد؟".. إيه اللي هيحصل بعد كده؟.. فين الخطوة الجاية؟.. ومن لحظتها بدأ العالم في البحث عن أداة أسرع لرصد حركة الإلكترونات.. وقتها د."محمد" لما درس الدكتوراه في فيزياء الأتوثانية في الولايات المتحدة كانت المجموعة البحثية بدأت تشتغل على الخطوة دي من سنة 2000، وبالفعل نجحوا في التوصل لنبضات فوق البنفسجية لكنها شديدة القصر في الطول الموجي الخاص بيها..
المشكلة اللي بتواجه النبضات إن طاقتها عالية جداً وبالتالي مينفعش دراسة المادة أو الإلكترونات في المادة العادية ولازم يتم دراستها تحت ظروف معملية في الفراغ وتحت ضغط جوي كبير جداً، وبسبب كده فضل العالم في لحظة ثبات من وجود تطبيقات كثيرة للأتوثانية لحد سنة 2016,, لحد ما قدر د."محمد" يعمل نبضات ليزر أو ضوئية تكون سرعتها في الأتوثانية..
العظيم في الموضوع إن الإكتشاف اللي نجح فيه د."محمد" هيغير مفهوم الطاقة والزمن بنبضة ضوء بتتفوق على الفمتوثانية بألف ضعف لإنها هترصد حركة الإلكترونات في زمن الأتوثانية اللي تعتبر أسرع من الفمتو ثانية بـ ألف مرة وبالتالي ده هيساهم في تطوير تكنولوجيا التحكم في المجال الكهربائي بنبضات ليزر الأوتوثانية، والعبقري إنها هتحول المواد العازلة للكهرباء زى الزجاج لمواد موصلة للكهرباء!.. يعني الدوائر الالكترونية هتكون في المستقبل من الزجاج وده بيرفع من السرعة ملايين الاضعاف والموضوع هيكون مرعب في نقل البيانات وبالتالي كمان ده هيؤدي لزيادة سرعة الكمبيوتر والموبايل لملايين الاضعاف!.. يعني إنجاز مدهش، ونقلة علمية هتغير العالم!..
بالمناسبة.. د."محمد" كان واحد من أفراد الفريق البحثي للراحل د."زويل" في سنة 2013، واللي كان بيضم جنسيات من كل العالم وكان هو المصري الوحيد معاه، ود."زويل" الله يرحمه هو اللي كان مصمم على تواجده في فريقه بالشكل اللي يخليك تفهم إنه كان شايف وواثق من ذكاء وعبقرية د."محمد"..
ماتستغربش لو لقيت خلال شهور أو حتى سنين اسم العالم المصري د."محمد ثروت حسن" مرشح أو فائز بجائزة نوبل.. عالم مصري عظيم حقق نجاح وإكتشاف مذهل العالم كله بيتكلم عنه ويستحق إننا نفخر بيه زى ما شرفنا.
#بالعامية_المصرية

المصدر : ONtvLIVE