النصائح الذهبية لطلاب الثانوية العامة علشان تجيب مجموع

[أ:محمودبركات]

النصائح الذهبية لطلاب الثانوية العامة علشان تجيب مجموع







1- تنظيم مواعيد دروسك بحيث تكون في يومين بس و ممكن تخلي الدروس على 3 أيام عادي برضه مفيش مانع يعني كفاية 3 دروس في اليوم




2- هتجيب فرخ جلاد

* هتقسمه أربع أرباع

* كل ربع تقسمه سبع أجزاء

* بمعنى ... الشهر في أربعة أسابيع كل ربع يساوي أسبوع 4x7=28

* و كل أسبوع فيه سبعة أيام اللي هما السبع أجزاء اللي حوا كل ربع وتكتب ما هو مطلوب تنفيذه كل يوم و تمشي على اللي أنت كاتبه و إوعى يقع منك يوم لو مشيت على الجدول هتلاقي نفسك خلصت اللي مطلوب منك في الشهروفى جدول المذاكره المفروض المواد الصعبه تتذاكر ضعف المواد السهله لو مشيت على النظام ده هتيجي في آخر الأسبوع تلاقي نفسك أنجزت حاجات وتقدرتخرج مع صحابك لو خارجين ولو متابع حاجة في التلفزيون زي برنامج مثلاً أو مسلسل على الـ MBC Action مفيش مانع

ما تكتبش من الساعة الفلانية للساعة الفلانية هعمل كذا و النظام الفاشل ده

هو تكتب بس الأربع حاجات اللي هتعملها في اليوم وخلاص ....... تعملهم إمتى تعملهم إزاي دي أنت و مزاجك بقى

بس المهم ..... إوعى تنام قبل ما تخلص اللي في الخانة بتاعة اليوم

و مع الوقت هتلاقي نفسك بدأت تتعود على المذاكرة و بقيت بدل أربع حاجات يومياً بقوا 5 و 6




3- إوعى تزوغ من الدروس مش ها تعرف تعوضها




4- إبتعد عن الألعاب ( الأون لاين و السايبر ) علشان بتشد و مش بيتشبع منها بسهولة




5- إبتعد عن العادة السرية واحلام اليقظه اللي بتعمل إحساس شديد بالملل وبلاش الجلوس بمفردك في غرفة مغلقة




6- ما تفتكرش نفسك سوبرمان بمعنى متجيش تقول أنا النهاردة تعبان و تبوظ يوم في الجدول و تقول هدوس على نفسي و أعوضه مع اليوم اللي بعده .... مش هتعرف




7- حاول ما تكلمش أي حد جنبك في الدرس و تفكك من العيال اللي بيقعدوا يعلقوا على كل كلمة ( إبقى أقعد قدام علشان العيال اللي بيعلقوا دول بيقعدوا ورا دايماً )




8- صلي و إدعي .... الصلاة بتفصل البني آدم و تهديه نفسيأً و تعمل حاجز بينه و بين المشتتات الصلاه الصلاه الصلاه .. وقرأءة القرأن الحاجات دى بتديك روح تانيه تحس انك واثق من نفسك وتحس ان ربنا راضى عنك وهتحس بحاجات كتير بجد عكس الى مش بيصلى مش بيبقى واثق من نفسه




9- المخ البشري عنده مقدرة لا نهائية على التعلم والثانويه العامه ابسط كتيرمن الجامعة واسألوا دفعة 2017