يوميات اصدقاء الحلقة الاولى

noor_20 · #1 13-09-2008, 05:50 AM

السلام عليكم ورحمة الله
وحشتونى اوى حبايبي واسفه على تاخيري
المره دى مختلفه ان شاء الله عن كل مره
المسلسل عباره عن وصف لحياه طبيعيه شبابيه ........ بتحكى عن مجموعه من الشباب بنات وولاد عايشين الحياه بلذتها وعذابها ومشاكلها وفرحها وحزنها
القصه رومانسيه ودراميه
عدد حلقاتها مفتوح لانها طازه
يارب تنال اعجابكم

هقولكم على بعض الاشخاص الرئيسيه الى فى الجزء الاول
رنجان : ranjaan بطل المسلسل ....... شخصيه غامضه وقليل الكلام ....... وسيم واشقر وعيونه زرقاء هو وتوأمه حبيبه لان والده امريكى لكن والدته مصريه وانفصلوا عن بعض لما كان التوام فى سن عشر سنوات ..... عايشين فى مصر واتولدو فى مصر ويعتبر رنجان نفسه مصري ابن مصري امنية حياته تحس ساره بحبه ليها مع العلم انه معروف بانه مش بيطيق البنات ولا الاحتكاك بيهم لكن ساره بالنسبه له مش اى بنت ومتعرفش انه بيحبها وكل الى تعرفه وواضح مابينهم علاقة اصدقاء ومعزه خاصه والباقى هتعرفوه فى القصه عنه

حبيبه بنوته رقيقه وجميله مجتهده وطموحه وبتحب اياد ابن خالتها اخو ساره

شيروت بنوته عصبيه اوى وفى نفس الوقت طيبه وحنينه بس مش بتحب ولا بتطيق تصرفات الشباب خصوصا رنجان وايلسوا انتيمه اكتر حاجه تهمها مظهرها وبس هى بنوته جذابه فى مظهرها وانوثتها لكن عيبها عصبيتها

ساره بنوته عمليه وتلقائيه وعفويه وصديقه لرنجان واقرب بنت ليه هى وتوامه صديقه صدوقه بجد ومرحه ورمانسيه لكن متسرعه

دينا اخت ساره اكبر منها باربع سنين عاقله وحكيمه وصارمه فى تصرفتها واوامرها حنينه جدا وطيبه اوى ورومانسيه وخطيبة عمر اخو شيروت

انتظروا باقي الاشخاص فى الحلقه القادمه

الحلقه الاولى والبدايه

كوكو كوكو و صباح يوم جديد

صباح الكسل يابنات ...... لسه بردو ......... تيب هعد لحد تلاته الى مش هيقوم هياخد دوش تمام وهو وفى سريره
واحد ... اتنين .... تلاته ........ طششششششش

بعد ما الميه نزلت عليهم اتنفضوا من ع السرير مفزوعين

ساره : ايه ده يا دينا .... حرام ليكى .. سبينا ننام شويه شيروت : يالهوى بقا .... شعرى باظ يا مفتريه .... باااااااظ
حبيبه : هه .... يادينا يعنى اما نصحى ناو هنغير ايه فى الدنيا .... والنبي سبينا ننام شويه منمتش غير اربع ساعات بس .... هاااااااوم

دينا : ده النظام ... ولازم تمشوا عليه طول مانتم هنا .... مفهوم ......... يلا ع الحمام

صوت جماعى " يوووووه "

بعد ما ساره وشيروت غسلوا وشهم ... قفشتهم دينا فى تحضير الفطار .... وتقريبا كده حبيبه
نامت فى الحمام
دينا : ساره اعملى الاومليت ... معبلى اشوف حبيبه بتهبب ايه ده كله فى الحمام ساره : بس انا مش بعرف اعمله ؟

دينا : اتعلمى ....... وانتى شيري ظبتى الفول وفضى التونه فى طبق ... يلا ماتنحيش كده

شيروت يائسه : حاااضر يا دينا

وخرجت دينا تشوف الاخت حبيبه الى نامت فى الحمام

ساره : اوف بقا .... انا مش عارفه النظام ده من امتى .. كل ده عشان ماما وبابا سافروا وسابوها واصيه عليا مش كفايه اياد خانقنى
شيروت : انا حرمت اجى هنا تانى وخالتى مش موجوده ........زز وبعدين ايه الى انا بعمله ده انا مش بفطر فول وبيض وتونه ....... هو يادوب فنجان نسكافيه وبسكويت
ساره : يعنى انا الى بفطر كده ....... يارب ارحمنى

نروح لدينا وحبيبه ....... دينا واقفه ع باب الحمام تخبط ع حبيبه
مبتفتحش حبيبه .... راحت دينا فتحت تشوف فى ايه
لقيتها ....... نايمه فى البانيو
بعد ما فطروا ....... حكمت عليهم دينا بترتيب البيت وتنضيفه
ولكن طفح الكيل عند البنات وسهوا دينا وهى فى الحمام ولبسوا فى السريع وخرجوا
اخدتهم حبيبه شقتهم الى هى فوق شقة شيروت الى فى الشارع الى ورى شارع بيت ساره ( حد فاهم حاجه )

حبيبه : هنا بقا ولا حد يضيقنا ولا يخنقنا ..... واحنا ع راحتنا
شيروت : اه ولا فى ماما ... ولا بابا ....... ولا يحزنون
ساره : مين يحزنزن ده ؟؟؟ شيروت : معرفش هما بيقولها كده
رنجان : بس فى رنجان

ايه اتخضيتوا ليه كده
حبيبه : ها .... تبعا فى رنجان ... اخويا وحبيب قلبي ..... صباحك اشته
شيروت : اووووف ..... ده الى كان ناقص ....... ده عندك ارحم يابنتى ( مع العلم انهم مش بيطيقوا بعض خالص )
رنجان : انا نازل ... مع السلامه
حبيبه : استنى بس يا رنجان هى مش تقصد
رنجان : متهمنيش ....... سيبك منها ... انا لازم انزل عشان اشوف الشغل ادعيلى بقا يقبلونى .... ادعيلى ياساره
ساره : يارب يارنجان ... يارب رنجان : يلا سلام
خرج رنجان ............. انطلقت شيروت : اوووف مابطقهوش ولا هو ولا صاحبو التنح ده
ساره : عيب عليكى دول اجدع ناس
بس هو رنجان جد شويه ومش بيحب يحتك بالبنات وانتى مضايقه بسبب كده ........ز وبعدين ده ابن خالتك مش واحد غريب ... عامليه كويس وهو هيعاملك كويس
حبيبه : هووووس .... فضونا بقا من الحوار التعبان ده .... عاوزين نروح نشوف النتيجه ... ونشوف هببنا ايه
شيروت : انا وساره متفقين لو جبنا درجه كويسه هندخل تجاره انجليش
حبيبه : بس ادعولى ربنا يوفقنى وادخل صيدله زى ماما ... دى امنية حياتى بجد
ساره : هه ..... ربنا معاكى زمعانا .. ويوفقنا ........... اووووه شوفى مين بيتصل بيا ؟؟
شيروت : ورينى ..... مين ؟؟

الى اللقاء فى الحلقه القادمه

sunsero2000 · #2 14-09-2008, 08:39 PM

مشكرين على الحلقه وفى اتتطار الباقى

H.H.KH · #3 15-09-2008, 02:07 AM

حلوة اوى اليوميات ديه ويللا مستنيين باقى الحلقات........بس هى من تأليفك؟

مسيو وليد عسكر · #4 15-09-2008, 02:38 AM

كوني واثقه سيدتي في حياتي لن انساكي
نبضات القلب صادقه تشهد خلجات لقاك
فبريد الشوق يملا صدري طائر مغرد في سماك
يحيني الحب ياخذني دوما في خطاك
احببتك بجنون واصبحت عاشقا متيما لهواك
عيناك كل مارايت و اصبحت اسيرا لعطرك وشذاك
لن تشهد دنيا الحب اسيرا مثلي مهووسا برؤياك
عشقت روحك الطاهره ولم اري في جسدك الا عيناك
لا تكفي كلماتي في الحب فقلبي وروحي فداك
مهما بعدت بيننا المسافات فا نا والله اهواك

msamido · #5 15-09-2008, 10:58 AM

واضح إنها هتبقى حلقات لذيذة

بس ليا طلب لو سمحتى
ياريت بس الألوان الكتييير دى بتتعبنى بصراحه لو لون أو اتنين يبقى كفاية أوى
وكمان كل شخص بيتكلم ياريت يبقى فى سطر لوحده علشان بنحس إن اسم الشخص التانى جزء من كلام الشخص الأولانى
فاهمانى ؟؟؟
ولا أنا

يلا شكرا على الحلقة ومستنى اللى بعده
.
.

noor_20 · #6 15-09-2008, 12:43 PM

شكرا ليكم كلكم ويارب تكون الحلقة عجبتكم والحلقات كلها هتبقى فى الردود يعنى مش كل مرة هعمل موضوع جديد وشرفنى مروركم

noor_20 · #7 15-09-2008, 12:51 PM

معانا شخصيه جديده
ايلسوا : شخص جاد وعملي وغامض اوى لايهتم بالمظاهر ... ترك بلاده فرنسا وعاش مع انتيمه رنجان فى مصر منذ عشر سنوات .... مع العلم ان سنه هو ورنجان وحبيبه "20" عام اكبر بسنه عن ساره وشيروت فاهمين حاجه

ساره : شوفوا مين بيرن ........... ده احمد
شيروت : كنسلى .... واتقلى مش تردى بسرعه
حبيبه : مش ده الشاب الى متنك فيها ومناخيره فى السما بتاع سنتر وسط البلد
ساره : ده مش تنك ولا حاجه ..... ده لطيف خالص
حبيبه : ااااااه قولتيلى ... لطيف
شيروت : ااااااااااااه خالص
ساره : انتم بتتريقوا عليا ....... تيب عند فيكم هرد عليه
وداست ع الاخضر
ساره : الو ... مين ( ال يعنى هى مش عارفه هو مين )
احمد : لاء زعلان نستينى بالسرعه دى ....... انا احمد ياقمر
ساره : سورى ياحمد .... مش مركزه ونسيت اضيف اسم لرقمك
احمد : اممم اوكى ولا يهمك ....... اخبارك ايه ياجميل
ساره : اهو تمام ... وانت
احمد : لاء انا مش تمام خالص
ساره : ليه كده بس ؟
احمد : ساره ........ اسمحى لي اشوفك ..... انا محتاج اتكلم معاكى ضرورى
ساره : اه ياحمد بس مش هينفع .... يعنى ادينى فرصه اظبط حالى
احمد : انا بترجاكى .... اتصرفى ياساره بجد محتاج اشوفك
لحظة صمت وتفكير عند ساره
ساره : خلاص ياحمد بس مش عاوزاك تاخرنى عشان محدش ياخد باله من غيابي
احمد : مش تخافى .... هستناكى فى السنتر
ساره : اوكى .... باى
شيروت : نو نو نو انتى ضعيفه موت .... وافقتى كده على طول
حبيبه : اه ياقلبي
ساره : بس .... انتم مش عارفين ولا فاهمين حاجه ........ انا هنزل وهاجى بسرعه ... ياريت تغطوا عليا
حبيبه : روحى ياختى قلبي معاكى ...
يلا سلام

************************************************** ********

على طريق من طرق مصر ..... والطريق واقف وقفه منيله والدنيا حر وينهال علينا عرق الشعوب على راى محمد هنيدى ...........فى عربيه من ضمن العربيات .... عربيه جيب بس ايه جامد كيك ... فيها شابين ... رنجان و ايلسوا انتيمه
رنجان : اوووف .... الجو حر ومش مستحمله وقفه زى دى ... عاوزين نلحق الشركه قبل ما المدير يفلسع
ايلسوا : سورى يا صاحبي المكيف عطلان ...
وبعدين ياصحابي انت غاوى تعب ليه ..... ماقولتلك نعمل مشروع سوا وكله يبقا تمام
رنجان : انت عارف الى فيها ... انا مش معايا فلوس عشان اعمل مشروع
ايلسوا : منا هدخل برأس المال وانت بالمجهود
رنجان : تانى الحوار ده ..... وانت عارف انى مش هرضى بكده ... ثم المجهود مش كفايه
ايلسوا : يعنى انت تسيب دراستك ومتكملش وتخلينى مكملش دراستى زيك .. عشان ندور ع شغل فى الشركات
رنجان : غصب عنى .... مينفعش اشتغل واكون نفسي وانا بدرس ... وبعدين انت ليه سيبت دراستك زيي
ايلسوا : ايه ياصاحبي محنا ع الحلوه والمره .... بس يارب الشهادات والكورسات بتاعة الكمبيوتر تنفعنا فى شغلانه
رنجان : قدامى فرصه اشتغل بره بس ... بلدى اولى بيا
************************************************** *************
وصلت ساره السنتر ودخلت عشان تقابل احمد الى هو صاحب السنتر

احمد : اووو ... مش معقول ... بجد مش مصدق نفسي ... نورتى السنتر كلوا ياقمرى
ساره : ميرسي ياحمد ... منور بوجودك والله
احمد : اتفضلى يا ساره ... ها تحبي تشربي ايه
ساره : تؤ ... مافيش داعى .... عشان عاوزه امشي بسرعه مانت عارف
احمد : لا ماليش فيه .... لازم تشربي ... ومش تخافى مش هعطلك
ساره : اوكى .... ممممم اشرب اى عصير فرش
طلب لها احمد عصير وقعدوا يتكلموا
احمد : ساره انا بصراحه وباختصار .... مـ ... معجب بيكى اوى من ساعة ماشفتك المره الى فاتت
ساره مرتبكه : از ... ازاى ياحمد بس ... دى يعنى كانت اول مره
احمد : ساره : المشاعر دى مش بايدى ... وكمان ملهاش ميعاد .... انتى بجد فيكى شىء جذبنى ليكى اوى .. انا مش عارف اوصفلك ازاى
لحظات صمت وخجل عند ساره وياعينى مش عارفه تتكلم لانها كمان عندها نفس الشعور ولسه مكتشفاه دلوقتى لما قالها الكلام ده
احمد : ساره ... اسف لو كان كلامى ضايقك ... انا مكنتش اقدر اخبي شعورى من ناحيتك ..
ساره : لاء ياحمد مش مضايقه متتاسفش ... انا بس مش مستوعبه ومش عارفه اقول ايه
احمد : متقوليش ياساره ... كفايه بجد انك قدامى دلوقتى ... متتصوريش انا مبسوط قد ايه
ساره : ا .. احمد ... انا لازم امشي ... اتاخرت
احمد : ياساره لسه ... ارجوكى خليكى
ساره : معلشي ياحمد .... عشان مش اتاخر
احمد : اوكى ... اسمحيلى اوصلك لمحطة المترو
ساره : مممم ... اوكى

************************************************** ***************

شيروت : اتاخرت ...
حبيبه : متاخرتش
شيروت : لاء اتاخرت
حبيبه : قولنا متاخرتش
شيروت : انا قلقانه عليها
حبيبه : ايه يابنتى هى عيله ... دى الى زيها متجوز ومخلف هههههههههه
شيروت : قلبي مقبوض ....... ربنا يستر
حبيبه : احساسك غلط .... لانك بتكرهى الشباب عشان كده مضايقه ان ساره راحت تقابله

************************************************** ****************
ساره واحمد ماشين لحد مايوصلها لمحطة المترو ..... والصمت مابنهم شغال الله ينور
حاول احمد ملأ الصمت والفراغ الى مابينهم .... وقرب ايده من ايدها ولمسها ....... لكن ردة فعل ساره سحبت ايدها والكسوف كان باين فى عنيها
احمد : مممم ... اضايقتى
ساره : لاء ... بس
احمد : مكسوفه منى
ساره لفت نفسها وبتبص له وهى بتكلمه : اممم يعنى ...... يالهوووى .... يالهووى .. يالهووى
احمد اتخض من مجموعت اللهوات دى : ايه فى ايه ياساره
ساره : رنجـــــــــــــان
شافت رنجان واقف قصادها على بعد امتار منها ... بيبصلها بحزن شديد .... مقدرش اوصفلكم شعوره بقا لما شافها كده
احمد : رنجان ... مين ؟؟
ساره : ابن خالتى .... احمد لازم اروحله .... سلام دلوقتى ياحمد
احمد : اوكى .... بس طمنينى .... ربنا يستر
وراحت ساره ناحية رنجان
ساره مرتبكه ومش عارفه تقول ايه ولا تبتدى ازاى وهو واقف ساكت وياعينى حزين خالص مالص

الى اللقاء فى الحلقه القادمه
ان شاء الله الحلقه الى جايه اطولها شويه

msamido · #8 16-09-2008, 01:08 PM

فين الحلقة اللى بعد كده ؟؟
.
.