أشهر جمل يقولها الأب والأم في مصر صح ولا لأ ؟

Tawfeek Yahia · #1 20-08-2008, 05:18 PM

امشى جاتك مشش فى ركبك .

* جتها نيلة الى عايزة خلف تيجى تتفرج .

*ذاكر ياموكوس مش فالح غير فى الهيافه والكلام الفاضى.

* ربنا يرزقك بعيل يوريك اللي ورتهوني.

* هات كيس عيش وانت راجع.

* هو ده اللي انت فالح فيه طول اليل والنهار قاعد علي الزفت الكمبيوتر بتاعك لحد مهيجلك تخلف عقلي منه .

* كل يوم هات هات لمة ربيتلى الهتهات (الحاج طبعا) مع انى مش عارف اية الهتهات ده بس ماشية مع الجملة.

* هتذااااااااكر هتاخد عنية مش هتذااااااااااكر هتاخد بالجزمة (هو فى غيرة طبعا الحاج).

*أوعا حد يضحك عليك ويقولك جرب السيجارة دي.

*ابقى ورينى مين حينفعك فى الاخر من شوية الصيع الى انت مشيلى وراهم .

* قوم اقرا لك كلمتين ينفعوك .

* وطي المدعوق ده شويه .

* انت فاكرنا نايمين على ودانا ؟

*لما ما ترضاش تاكل في البيت:طبعا مانت اتعودت علي اكل بره .

*ياريتك تحفظ دروسك زى مانت حافظ الاغانى.

* عيـــب ... لازم تحترم اللي أكبر منك .

* لو شفت خناقه ما لكش دعوة بيها .

* كريم دا عيل بايظ وماتمشيش معاه تاني .

* مين منى دي انتى كل يوم تصاحبي واحدة جديدة ؟.

* انته مبتكلش جزر ليه .. اجيبلك برتقانه. طب كل سلطه .

* يبني بأسلوبك ده مش هتعيش معاك واحده .

* قومي ساعدي امك ده اللي هيتجوزك أمه داعية عليه.

* اوعى حد غريب يديلك حاجه تاكلها و تشربها و تاخدها منه .

* يا ابني حرام عليك الى بتعمله فينا ده.

* انا سايبالكوا البيت وماشية ومش حتشوفوا وشي تاني .

* لمى هدومك انتى مش عايشة فى زريبة بكرة اشوف بيتك هيبقى ازاى خرابة طبعا.

* وانت فاكر احنا مستنيين منك حاجه .

* المسلسل مش هينفعك ...قوم .

*ماتقعد يابنى تكمل أكلك , انت كلت حاجة!!!
(طيب ماهو انا لو جعان أو الأكل عاجبنى إيه اللى هيخلينى أقوم يعنى , هو انا غاوى جوع مثلا ) .

* كفايه رغي في التليفونات .

* كل على مهلك .. وامضغ كويس ... وما تكلش وانت واقف .. وكل من قدامك ما تحفش .

* اطفي التلفزيون وقوم ذاكر ولا و خش اوضتك .

* بلاش تمشى حافى البس شبشب وانته داخل الحمام .

* ما فيش مذاكرة على المزيكا .. وازاى بتذاكر و البتاع ده شغال جنبك .

* افرد ظهرك .

* لم شراباتك.

* ماتكلش فى ضوفرك.

* كنت فين لحد دلوقتى يا صايع.

* ماتتأخرش علشان عندك كلية بكرة بدرى.

* انا مش عارف انته طالع لمين.

* انا : ياماما بقه ايه ده ؟؟؟
ماما:مووو لمـا يــــــخدك .

* ادلعى ياهبة فى ايامك المهببة .

* ده منظر اودة بني آدم ، انت عايش فيها ازاي؟.

* هو انا الخدامه الى ابوكم جبهلكم .

* الى يطلع من الاوضه يطفى النور وراه .

*أبوك عندك أهو اتصرف معاه .

* اللي بيشيل قربه مخرومة بتخر عليه لوحده ..

* لو مش فاهم حاجه ارفع ايدك و قول للأستاذ مش فاهم .. متتكسفش .

* البس فنله قطن تحت ودفي سدرك ودخل التيشرت في بنطلون البيجامه وانته نايم .

* يأبنى المذاكره مابتخلص .... نفسى اشوفك مره ماسك كتاب.

* اعمل حسابك مش حندخلك جامعه خاصه.

* قالب ليلك نهارك طول الليل صاحى وطول النهار نايم
طبعاً ما حضرتش ولا محاضرة ولا سكشن , وطول اليوم صايع بره البيت .

* مالكش دعوة بالسياسة .. وماتمشيش في مظاهرات .و امشي جوا الحيط :D .

* احمد ربنا الاكل الى مش عجبك ده فى ناس مش لقينه .

* التهديدات المخيفه والمرعبه : مثل: هأقطم رقبتك أو هأقطع ايدك أو هأقطع لك لسانك أو هأدبحك دبح .

* قومي سخني الأكل لأخوكي.

* ابوكم كان دايم بيطلع الاول على الفصل... " لما كلهم كده امال مين الى بيطلع الاخير .

* ومن اشهر الجمل الى بتتقال كل يوم بعد الاكل :
انا مش الخدامه اللي اشترهاكوا ابوكوا اللي ياكل في طبق او يشرب في كباية يغسلها ما يركنهاش في الحوض.

* و أخيرا ::

ضرب امثلة تشجع على الكفاح و أشهرها أحد الأقارب اللي كان بيذاكر على لمبة جاز أو على عامود النور الي في الشارع و نجح وخد الدكتوراه وسافر أمريكا ( ٌٌقال يعنى كان بيعرف يركذ والناس ماشيه حوليه فى الشارع :D

د/ ماجدولين · #2 20-08-2008, 07:42 PM

حضرتك هو الموضوع فكاهى وجميل:D
وأنا يعنى عندى كدة تعقيب صغير
عشان مش نظلم أكتر ناس ليهم فضل علينا فى الدنيا دى
(بابا وماما)
هما أكيييييييييييد بيحبونا و بيتمنوا مصلحتنا

يمكن مش بيعرفوا يقولولنا كدة بالطريقة السليمة
بس أحنا كمان ساعات بنبقى مستفزييييييييين جداااااااااااااااااا

وهما مهما كانوا بشر
ولو بصينا لمعظم الكلام هنلاقية نصايح قيمة
وأن احنا اللى غلطانين

على سبيل المثال

اقتباس:

• قوم اقرا لك كلمتين ينفعوك
• أوعا حد يضحك عليك ويقولك جرب السيجارة دي.
• ياريتك تحفظ دروسك زى مانت حافظ الاغانى.
• عيـــب ... لازم تحترم اللي أكبر منك
• انته مبتكلش جزر ليه .. اجيبلك برتقانه. طب كل سلطه
• * اوعى حد غريب يديلك حاجه تاكلها و تشربها و تاخدها منه .
• المسلسل مش هينفعك ...قوم .
• اطفي التلفزيون وقوم ذاكر ولا و خش اوضتك .

* بلاش تمشى حافى البس شبشب وانته داخل الحمام .

* ما فيش مذاكرة على المزيكا .. وازاى بتذاكر و البتاع ده شغال جنبك .

* افرد ظهرك .

* لم شراباتك.

* ماتكلش فى ضوفرك.
• ماتتأخرش علشان عندك كلية بكرة بدرى
• الى يطلع من الاوضه يطفى النور وراه
• * اللي بيشيل قربه مخرومة بتخر عليه لوحده ..

* لو مش فاهم حاجه ارفع ايدك و قول للأستاذ مش فاهم .. متتكسفش .
• قالب ليلك نهارك طول الليل صاحى وطول النهار نايم
• احمد ربنا الاكل الى مش عجبك ده فى ناس مش لقينه

كلامهم مضبوط جدااااااااااااااااااااا

بس أحنا للأسف أول ما حد من الأهل يبتدى فى النصايح
نقول (الأسطوانة أياها هتبدى ونخلى ودن من طين وودن من عجين

)
مع أنهم أكييييييييد مش بيقولوا كدة من نفسهم
أكيييييييييييد هم بيقدروا الولد الكويس

وعلى فكرة
الكلمات دى مش بتتقال فى مصر بس:D:D
دة كل الأهالى فى العالم بتقول كدة

هو أحنا مش فى عصر العولمة ولا أية؟؟؟!!!!!!

withoutname2100 · #3 20-08-2008, 11:31 PM

انت عايش معانا ولا ايه فالبيت؟؟ههههه بابا وماما مش بيقولوا كل ده بس في منه بيقولوه..بس والله كتر خيرهم ..احنا فعلا ساعات مش بيقي عندنا مسئوليه ومستفزين..تقبل مروري

Tawfeek Yahia · #4 21-08-2008, 07:38 AM

يا جماعه انا بهزر مش اكتر بس فعلا الكلام دا بيتقال في كل حته وعايزين نشوف تعليقات كماااان