بالصور :لجنة وزارة التربية الكويتية تهين المدرسين المصريين

[محمد مسعد شرابى]

لجنة وزارة التربية الكويتية تهين المدرسين المصريين فى مقابلات القاهرة

تكملة لمسلسل دفاع دول الخليج عن الرئيس المخلوع مبارك
أليكم قصتى مع مسابقة لجنة وزارة التربية الكويت وسفارة الكويت فى مصر

فى يوم 2/7/2011 ذهبت لسفارة الكويت بالقاهرة حتى أسأل عن المسابقة الخاصة بوزارة التربية بالكويت أجابنى الحارس من خلف الباب الحديدى المغلق - ليس فى وجهى أنا فقط بل فى وجه كل طبقة عريضة من المصريين البسطاء والذين بدون ضهر- المهم اجاب وقال لي أن اللجنة موجودة الأن بفندق سفير بالدقى ومعنديش معلومات غير كدا
فتوجهت على الفور على فندق سفير
وذهبت للبوابة الرئيسية للفندق أخبرنى الحارس أيضا أن دخول المعلمين من البوابة الخلفية فذهبت للبوابة الخلفية

وفوجئت بأن المعلمين ينتظرون فى الشارع على الرصيف أمام البوابة الخلفية للفندق تلك البوابة التى يدخل ويخرج منها العمال والأطعمة وصناديق القمامة

والجميع هنا يجلس فى الشارع ينتظر نزول مندوب اللجنة الكويتية الذين يجلسون فى أعلى الفندق فى المكيف حيث الهواء البارد مثلهم والمدرسين المصريين يجلسون فى الشمس الحارقة وعلى رصيف الفندق

وأخيرا نزل مندوب اللجنة وعلى الفور كالعادة يجعل المدرسون يقفون فى طابور ويبدأ بتنظيمهم كأنه هو المدرس وهؤلاء هم التلاميذ
وينده على الأسماء المطلوبة ويترك الباقى فى مكانه المعد له

على رصيف الشارع- أمام البوابة الخلفية لفندق سفير

شاهدت تلك الأحداث وأحسست بصاعقة صعقتنى على رقبتى من الخلف
فصحت بعلو حسى ليه يامدرسين تسمحوا للناس دى تعاملكم كدا والله كدا حرام وعيب أوى فى حقنا
رد على مدرس محترم يا أستاذ احنا عايزين ناكل عيش
قلت له عيش مسموم بالأهانة والزل عمره مايشبع

أين الإحترام دا بدل ما السفارة تحجز قاعة داخل الفندق لأستقبال المدرسين بشكل حضارى ويليق بمكانة المدرس ويقدم له واجب الضيافة على الأقل كوب من المياة


أليكم صور الذل والإهانة

[ahmed5555555]

والله عندك حق
بس احنا مش بناخد ما يكفينا فى بلدنا
لازم ناخد اللى يكفينا فى بلدنا

[دانتيلا]

فين الحد الادنى ياجماعه؟؟؟

[محمود مغاورى]

والله انت بدام سيادتك الشهامة والحموة وخداك كدة اية اللى وداك ماهو لو البلد المحروقة اللى احنا فيها كانت زى الناس دى مكنش اتزلنا لحد وبعدين فين الشمس دى الدنيا ظل والشجرة موجودة وانت رايح تشتغل عندهم هو دة النظام مش عجبك خليك فى ام الدنيا اللى هطلع ام عنينا والا انت نسيت ال 30 سنة اللى فاتوا وهتترسم على دول وانت كنت ناسى افكرك .....

[math.sherif]

المشاركة الأصلية كتبت بواسطة محمود مغاورى

والله انت بدام سيادتك الشهامة والحموة وخداك كدة اية اللى وداك ماهو لو البلد المحروقة اللى احنا فيها كانت زى الناس دى مكنش اتزلنا لحد وبعدين فين الشمس دى الدنيا ظل والشجرة موجودة وانت رايح تشتغل عندهم هو دة النظام مش عجبك خليك فى ام الدنيا اللى هطلع ام عنينا والا انت نسيت ال 30 سنة اللى فاتوا وهتترسم على دول وانت كنت ناسى افكرك .....

يا اخي المحترم الاخ الفاضل بيحكي لك علي اللي حصل ولو ركزت في كلمة تعرف انه بيقول انه اتصدم لما شاف كدا

لآنه ما كان عنده خلفيه عن اللي بيحصل وانه كمان تراجع عن قراره الخطأ وواضح من كلامك انك ممكن ترضي بالذل

والآهانه في سبيل اكل العيش الذي هو مسموم من ناس لا عندها أدب ولا اخلاق (زي الكويت)

بدل ما نرتقي بالبلد بالعمل الجاد والعزيمه دي او تزود دخلك بأي طريقه او انك تصبر او انك ترضي بما قسمه الله لك

والاخ ما أخطأ انه بيقول لينا علي اللي بيحصل دا وكمان مصوره والمصيبه الاصعب ان في اخ تاني ماشي علي

كلامك بيقولك في شجر وبتاع وحاجات اللي هوا من فصيلتك بيرضي برده بحاجات اكتر منك مع احترامي لكما

اخواتي وبدعي لكم رزقكم الله برزق طيب مبارك فيه

يا اخي احنا هنا اخوه بنحس ببعضنا ونخاف علي شعور بعض سيادتك تقوله ها تترسم

يا اخي صلي لله ركعتين والجأ لرنا سحانه وتعالي واني لآدعو نفسي واياك

لصلاة الحاجه اتضرع الي الله ونشكو له ضعف حيلتنا وقلة هواننا علي الناس

عسي ربنا يتقبل منا

رجاء مسامحتي علي أي خطأ صدر مني واي تجاوزات في حقوقكم واني اعتذر لكم هداكم الله وهدنا اجمعين

[eldeash]

لما انت عندك كرامةكده متروحش وبلاش تهين نفسك

[عابدين مدرس لغة عربية]

للأسف الشديد المعلم بيلعب دور كبير فى الانتقاص من كرامته .. كان من الواجب على هؤلاء المعلمين أن ينتصروا لكرماتهم ويطالبوا اللجنة بقاعة للانتظار وإلا انصرفوا ..
لكن للأسف المعلمون هم نتاج الثلاثين عاما المنصرمة .

[الاستاذ محمود حميد]

بس انتا مكملتش بقية الموضوع يعني من الاخر لو انتا بعد ما شوفت الذل والاهانة الي بتقول عليهم دول اكيد مش هيكون في غير حلين
الاول انك ترجع علي بيتكم علطول بعد ما اخدت الصدمة زي ما بتقول
ثانياً انك تكمل اللجنة وتدخل بعد ما تستني دورك ولو انتا عملت كدة يبقي مفيش داعي للموضوع دة
بس طالما ارتحت تحت الشجر يا وهيبة وقعدت تاخد صور للمدرسين يبقي اكيد استنيت دورك يا حلو !!!!!!!

[محمد الفاتح 2]

المشاركة الأصلية كتبت بواسطة مدرس علي ما تفرج

بس انتا مكملتش بقية الموضوع يعني من الاخر لو انتا بعد ما شوفت الذل والاهانة الي بتقول عليهم دول اكيد مش هيكون في غير حلين
الاول انك ترجع علي بيتكم علطول بعد ما اخدت الصدمة زي ما بتقول
ثانياً انك تكمل اللجنة وتدخل بعد ما تستني دورك ولو انتا عملت كدة يبقي مفيش داعي للموضوع دة
بس طالما ارتحت تحت الشجر يا وهيبة وقعدت تاخد صور للمدرسين يبقي اكيد استنيت دورك يا حلو !!!!!!!

من يهن يسهل الهمان عليه

[رناتا]

بيحصل فينا كده وانتم لسه ع ارض مصر اما لما تسافروا هيحصل فينا ايه
صدق رسول الله صلى الله عليه وسلم حين قال حفاة رعاة يتتطاولون في البنيان

[بحراوية من دمنهور]

الذل والاهانة موجودين فى كل مكان فى مصر ....... دى ثقافة شعب وبعدين اغلب اللى انت مصورهم وحضرتك اكيد منهم كانو رايحين بدون اتصال من اللجنة يعنى انت وغيرك اللى عملت كدة فى نفسك ومتهيئلى لو حضرتك كان تخصصك مطلوب وكنت دخلت امتحنت ونجحت يبقى اكيد كان الموضوع حيكون مختلف ومكانشى اصلا حيبقى فى موضوع لانك حتدارى على شمعتك عشان تقيد وده حالنا كلنا مش انت بس ......... كرامة الانسان بتيجى من احترامه الاول لذاته عشان الباقى يحترمه ويقدره ومعلش طول ماحنا بنجرى ورا السفر وخدمة غيرنا يبقى اللى بيحصل ده قليل واقل من المفروض كمان ........ مش حقول شعارات بس نفسى البلد حالها ينصلح ومبقاش ناعى هم قوت يومى وابقى عارف ان حقى حيجيلى لحد عندى واعرف ان ولادى حيعيشو بكرامة ويلاقو اقل شئ يضمن حياتهم


ملحوظة:

هى ليه كل سنة اللجنة دى بتنزل مصر وتختار لا يقل عن 300 مدرس سنويا .......؟؟؟؟؟؟

[محمد مسعد شرابى]

لا حول ولا قوة إلا بالله


أشكر كل الأخوة الزملاء اللذين كانت ردودهم تحتكم للعقل وقرأو وجهة نظرى واحترموها فأثلجت ردودهم صدري

وشكرا أيضا للأخوة الذين تحاملوا عليا فى ردودهم فأنا لست مصدوم هذه المرة فقد رأيت أشباههم فى الصدمة الأولى
جالسون على رصيف فندق سفير وسعروا خدهم للأجانب وفضلوا لقمة العيش على الكرامة

لا حول ولا قوة إلا بالله

أقول لهم
علمت أن رزقى لن يأخذه غيرى فأطمأن قلبى
الأرزاق على الله وكون انى أسعى للسفر للكويت كمثال فدا طريق رزق انا سعيت فيه
لكن مش أتنازل عن كرامتى واحترامى مقابل المادة مهما كانت الظروف
المبادىء لا تتجزأ

أنا قدمت للمسابقة زيي زى كل شاب مصرى لتحسين دخله وتكوين مستقبله
وروحت أسأل وكانت أول مرة أقدم فى الموضوع وأتفجأت باللى حكيته ليكم
صورت الصور ورجعت لبيتى على الرغم من أنى موقفتش فى طابور ولا قعدت فى الشمس أو فى ضل الشجرة
لكن حسيت بأذى نفسى مأثر عليا لغاية الأن

وانا مش بقولك يا أخى أنك متسافرش أو متسعاش لاء بالعكس أسعى لكن برأس مرفوعة
وكرامة محفوظة وأحترام متبادل

والعقد شريعة المتعاقدين
والعقد يأخى فى الكويت مش مكتوب فيه انك تنتظر خارج الفندق فى الشارع
ولا تقف فى طابور وتدخل من الباب الخلفى وترمى كرامتك وانت داخل

لا حول ولا قوة إلا بالله

[محمد حسين الشربينى]

لا حول ولا قوة الا بالله

[يارا العيسوى]

اللة اكبر هو دة اللى احنا عيزينة نهان فى بلدنا احنا اللى جيبينة لنفسنا واللة

[aswan.com]

حسبنا الله ونعم الوكيل