حلقات سلسلة ايجابية بنات فى بنات

[مسيواحمدشعبان]

وأول حلقات سلسلة
إيجابية بنات في بنات

راااااااااائعة جدااااااااا إن شاء الله
الحلقة الأولى .. حياة روتينية مملة تحتاج لتغيير قوى وجزرى

*******

اما هو .. بقولك ايه انا داخل انام عندي بكرة شغل الصبح بدري مش فاضي للتفاهات

وهى .. معلش هقفل معاكى التلفون دلوقتى أصل الأكل ع النار والراجل زمانه جاى

والتانى : يا أمى سيبيني أنام شوية .. مش هيجرى حاجة لو طنشت أول محاضرة .. الدكتور مش بياخد غياب

الثانية : يا رب ننجز بقة والشغل ده يخلص أنا قرفت بقالى 3 ايام شغالة فيه والمفروض اسلمه من امبارح .. هو أنا عندى كام إيد !!

والباشا : سيبهولى وانا اخلصلك ورقك كله من عنيا ..ياه متأسف أصل اليوم عدى بسرعة طب معلش فوت علينا بكرة !!

الباشا التاني : امتى بقة ربنا يتوب علينا من الشغلانة دي والصحيان بدري ..

حياة روتينية مملة جدااااااا .. افتقدنا فيها التغيير

هتعملى ايه النهاردة .. ولا حاجة ماهو اللى نبات فيه نصبح فيه ايه الجديد ؟!!

رفعا لشعـــــار يالا نتغير واسقاطا لشعار الروتين الممل

تعالوا نبص نظرة سريعة في حياتك

ايوة حياتك انت .. حياتك إنتى !

الصبح اقوم السااعة .. والبس هدومى وانزل الساعة .. آخد الفطار بتاع كل يوم (يمكن نفس الصنف من الجبنة او غيره) راكب المواصلات .. داخل الشركة او الكلية او .. نفس الناس بتشوفهم كل يوم .. محاضرة مش فاهم فيها حاجة ..الكافتريا بتناديني .. امتى المحاضرة تخلص عاوز افطررر .. شكلى كدة هاكل إيد حد جانبي !!

روتييييييييييييييييييييين

عارفين إيــــــه اللى ينقصنا في حياتنا ؟؟

التغيير .. عاوزين تغيير جامد .. أفكار جديدة في الشغل أهداف سامية من الجامعة .. تميــــز في كل حاجة

نتعرف على ناس أكتر .. نقرب من ربنا أكتر .. تحسين أخلاقنا وكسب قلوب الناس .. طاعة الوالدين وأولي الأمر

تعالوا نشوف إزاى هنحقق التميز ؟؟

إزاى هنغير روتين حياتنا للأفضل بحيث كل واحد يقوم نشيييط لشغله او لكليته .. قمة الحماس .. ابتسامة في وجه زوجتك في الصباح.. وداعا للعبس والملل .. ومرحبا بالتفاؤل والحيوية وقمة الإيجابية



إنتظرووونا في الحلقة التانية من (( إيجابية بنات في بنات ))

[مسيواحمدشعبان]

الحلقة الثانية : حيــــــــاتي إتجــــــــــددت
***********

تجديد النية مطلووووووب .. طب يالا نجدد نيتنا ..اه خلاص جددتها

يا سلاام؟؟

طب إزاي؟! .. انتو بتسكتوني وخلاص

في ناس كتير تسمع كلمة جدد نيتك ومتكونش عارفة يعني إيـــه!!

تعالوا نحط نية لكل حاجة .. إزاى؟

تيجو نمسك كل موقف من المواقف اللى فاتت ونحللها تحليل دقيق ؟

اقتباساما هو .. بقولك ايه انا داخل انام عندي بكرة شغل الصبح بدري مش فاضي للتفاهات

لو هو كان بيكلم زوجته ..فاحسن نيتك تتكلم معاها بلطافة .. اعذريني أنا عندي شغل كتير ولازم أنام مش هقدر اتعشى انهاردة معاك

تعالوا نفكر في النتيجة العملية للموقفين :

في كلا الحالتين : هو هينام ومش هيتعشى .. وهي هتاكل مثلا او تشتغل حاجة في البيت لوحدها

طب نيجي للأثر النفسي : في الحالة الأولى كلاهما سيغضب وفي الحالة الثانية كلاهما سيتفق وهيكون في رضا متبادل

نيجي للجانب الديني والأخلاقي : قمة الأدب والإحترام المتبادل .. ثواب عظيم فخيركم خيركم لأهله معاملة طيبة وحسن خلق تواد وتراحم

اقتباسوهى .. معلش هقفل معاكى التلفون دلوقتى أصل الأكل ع النار والراجل زمانه جاى

أما الأخت دي ناقصها ترتيب أولويات .. واحتساب نوايا

لازم نرتب أولويتنا .. ماتصلش بواحدة صاحبتي علشان اكلمها ولا أسأل عليها وأنا ورايا اللى أهم من كدة عندي زوج لازم أطيعه وأرضيه عندي شغل في البيت لازم يكون جاهز ونظيف .. فطاعة الزوج فرض أما الأخرى فهي من باب الصدقة والأمر بالمعروف والنهي عن المنكر .. فأيهما أولــــى؟؟؟

فلنرتب أولوياتنا ونعدد نوايانا

أنا هعمل الأكل بنية ارضاء زوجي

ادخال سرور على مسلم (الاولاد والزوج)

إفطار صائمين

وهكذاااا .. ليست نوايا بالتحدث الشفهى وإنما هى نابعة من الداخل ياااااااارب أنا هعمل كذا علشان أرضيك لأن هدفك الأول والأخير هو رضا الله يااااااااه لو حطيتي الأمر ده في رأسك دائمااا ..هدف تسيري به طوال حياتك ..((((رضا الله)))) اللهم اجعل أكبر همنا رضاك


تابعوناااا في الحلقة الثالثة ..

[Dr.love ferdos paradise]

جزاكك الله خيراا وجعله في ميزان حسناتك
موضوع رائع واسلوب النقاش فيه جميل اوي

في رعاية الله

[مسيواحمدشعبان]

الحلقة الثالثة

مراحل تجديد حياتي والإنصراف التام عن الروتين

اقتباس:

والتانى : يا أمى سيبيني أنام شوية .. مش هيجرى حاجة لو طنشت أول محاضرة .. الدكتور مش بياخد غياب

تقدر تقولى إنت نازل من بيتكم وتاعب نفسكم ليه أصلااااا؟؟

علشان اتفوق
طب بتتفوق لمين؟؟

اولا :لله ارضي ربي بطلبي للعلم وافادة غيري

ثانيا :لوالديا علشان ارضي والديا عني وادخل السرور على قلبهما واكون لهم قرة عين ..مااااأجمل نظرة الوالد لولده وهو فرح ومسرور بتفوقه!!!

ثالثا:لبلدي .. فتقدم الأمم يكون بعقولها البشرية المبتكرة ..

رابعا وليس أخيرا :للمسلمين بتفوق علشان انا مسلم يعني مش أى حد تفوقي له معنى في ديني .. تميزي مطلوب وأسعى دوما له

اااه.. لو وضعنا هدف التميز في رأسنا .. كل شئ هيتحل

أتميز إيه يا عم أنا آخري احضر المحاضرة وبوس ايدك وش وظهر!!

لاااااااا وألف لااااااا

انا مسلمة ملتزمة بحجابي .. لازم أكون متفوقة .. فحجابي لا يعقونى عن أى شئ .. أتفوق وأذاكر لله .. علشان كدة كل يوم بقوم في قمة النشاط .. عندي هدف أسعى له .. متميزة في كل شئ قدر الإمكان لأنى ملتزمة عرفت طريق ربي .. علاقتي بربي جعلتنى أفعل كل ما يرضيه بكل رضا وسرور

((هدف التميــــــــــز ليس صعبا))

لكنه يحتاج لمرونة فكرية وجد وإجتهاد وصدق نية وعزيمة ويااافرحة قلبك بالنتيجة !

لا أقصد نتيجة امتحانات الترم فقط ولكن نتيجة تميزك في شئ يكفي أنك ممكن أن تكون سببا في التزام أحد الاشخاص بسلوكك .. نعم والله بسلوكك .. حسن خلقك ونظافتك وهندمتك وتفوقك ومعاملتك الطيبة

عاوزين نوظف حياتنا كلها وسكلوكنا صح

ولاااازم نقضي على الشيزوفرينيا اللى عندنا

انه يتفوق احدنا في الجانب الدنيني فقط او الدنيوي فقط

وإنما هنساعد بعض على خوض تجارب حياتية بحياة في عالم التميز والتجديد و الفرح والرضا الدااائم بإذن الله ..

الحلقة القادمة .. [عنوان عمليات غسيل المخ وتناول المنشطات الحيوية!!!)

هنتكلم عن تحقيق التميز في كل المجالات والحياة بعد التجديد والأهدافالقوية من الحياة ومن كل فيمتو ثانية في حياتك لابد أن نوظفه صح ونستغل كلقدراتنا وأوقتنا..نسأل الله أن يبارك لنا في أوقاتنا..آميييين

[Dr.love ferdos paradise]

جزاك الله خيراا وجعله في ميزان حسناتك
موضوع جميل
في انتظار الحلقه القادمه
ان شاء الله

[بنت دمنهور]

جزاك الله خيرا

حلقات جميلة ومفيدة

يا ريت يتثبت

جعله الله فى ميزان حسناتك ان شاء الله

[مسيواحمدشعبان]

الحلقة الرابعة : عمليات غسيل المخ وتناول المنشطات الحيوية!!!

البس دي .. حط ايديك ال2 هنا وانا هقفلك الزراير (مريلة)
خد دي كمان .. ايه دي؟ .. حقنة بينج بس علشان العملية
يالا بقة قول معايا 1 .. 2 ..3 .. 4 .. 5
حاضر 1 .. 2 .. خخخخخ

يالا نفتح الدماغ ونشتغل في العملية


***
1 / أول ما تصحى الصبح .. قول الأذكار .. بقلب خاشع
2 / نظفي دماغك تمام من أى حاجة تضايقك او هتعطلك عن حاجات سواء حصلت امبارح او اى يوم
3 / نفس عميييييييق
4 / جدد نواياك كل يوم الصبح وافتح صفحة جديدة بيضاء مع الله
واخري بيضاء مع الناس واخرى خصوصا لزوجك .. متقلقيش لو الكشكول خلص هنجيبلك واحد تانى
5 / حدد هدفك كويس أوى وضعه نصب عينيك وأعمل له جاهدا مهما كان الجهد المبذول فستكون النتائج مذهلة باذن الله وعندها ستنسى كل ذرة تعب تعبتها في سبيل تحقيقك لهدفك وتفوقك وتميزك

المنشطات الحيوية دي لازم تاخدها علشان العملية دي تنجح

إيــــــه ده أنا فييييين
إنت مييييين؟؟
ألو؟؟
دمااااااااغي ..
إيه اللى حصل ..؟؟

ماتخفش دي مجرد عملية بسيطة بس علشان يتم نجاحها باذن الله
لازم كل فترة وكل وقت تاخد المنشطات دي وصدقنى ربنا لن يكتب لك التعب والضيق بها أبداااا (ان شاء الله)

1/ ذكر الله (( قبل الاكل وبعده وقبل النوم وفي كل وقت ))
كل ما تكتر كل ما الأمل في الشفاء يكتر
دواعى الإستعمال:
الضيق .. فقدان الصبر وقوة التحمل .. الملل .. القلب القاسي
نتائج الإستعمال :
بركة في الوقت .. سعة في الرزق .. قدرة على الصبر والتحمل .. قوة الإرادة .. حب الله والعمل على رضاة ..حياة جديدة مليئة بالخير .. فرحة في القلب ما بعدها فرحــــة .. تحقيق رضا الله جل وعلا

2 / أخذ الأمور ببساطة (( مرة واحدة بعد ما حد يضايقك ))

إزاى؟؟

موقف من الواقع :
شكلك في الإسدال وحش أولى .. مكبرك كدة وعاملك طنت أم أحمد
اسم الله عليكي انتى يعنى هو لبسك ده عاجبك
ياشيخة روحى ..

بعد أخذ المنشط .. نعيد صياغة الموقف
شكلك في الإسدال وحش أولى .. مكبرك كدة وعاملك طنت أم أحمد
ههه .. مين أم أحمد دي .. بصي أنا بصراحة لبسته لأنى لازم أطيع ربنا ومش قادرة أقولك على كمية الفرحة والنور اللى في قلبي أنا حاسة بمعانى حلوة كتير .. فليرضى عنى من يرضى وليسخط من يسخط فأنا لم أعد اسعى لغير رضا الله
يااااه .. كلامك جميل .. ونعم بالله
يالا وانتى كمان حاولى تاخدى الخطوة يمكن صعبة في الأول بس نتيجتها جميلة اوووى .. طاعة ربنا لا تقدر بثمن ومفيش حاجة مفروضة علينا إلا وفيها الخير لينا

أم أحمد اللى كانت بتتكلم عليها دي .. لبست الاسدال من الغسالة على طول
قالت انا كدة كدة مش باينة ومحدش عارفنى فخلاص

انما ام فاروق طبعا أقصد النبوتة الملتزمة >> مهندمة غسلت الاسدال وعملته بالمكواة ونسقت ألوان غير ملفتة أو سوداء وكانت قدوة لغيرها من الفتيات
وهذا نوع من أنوااااع التميز .. تميز في الهندام والجمال والأناقة

***
لو واحدة ضايقتك ماتخديش موقف منها وحتى لو خدتى لازم تنسي على طووول وتفتحي كل يوم صفحة جديدة بيضاااء لأن الدنيا دي كلها مش مستاهلة .. ومش انتى اللى ينفع الناس تزعل منك أو تزعلى حد .. لا مهما واحد أحرجتك في أى حاجة خدى الأمر بهزار

لييييييه؟؟
هو أنا معنديش كرامة؟؟
لا يا حبيبتي ولكن .. حبك لله ووضعك لهدف نصب عينيكى هيخليكي تعلى أكبر من كدة لأن هدفك كبيير أوى وهو انك تكونى قدوة لغيرك بحسن اخلاقك والتزامك بأوامر الله
خدي الموضوع بهزار واتكلمى عادي .. وزي ما بيقولوا اعرف صاحبك وعلم عليه ..بس بطريقة تانية .. يعني اعرفي كل واحدة بتزعل من ايه وتجنبيه

وفقكن الله أخواتى
يارب تكون العملية نجحت ..
يالا البسوا المريلة واعملوا الزراير ورنوا عليا آجي أخلص لكم العملية
ووعد .. ان شاااااء الله
تعيشون في سعــــــــادة ما بعدها سعادة

[Dr.love ferdos paradise]

جزاك الله خيرااا
ان شاء الله عيتم تثبيت الموضوع
لمتابعة الحلقات
في رعاية الله

[amoona 2009]

المووضوع جامد جدا ومقنع اخر حاجه بارك الله فيك ومستنين حاجات اروع مرسي و

[مسيواحمدشعبان]

الحلقة الخامسة : حيــــــاة بشكـــــل جديـــــــد

تقدري تقوليلي الفرق بين النملة والنحلة ؟؟؟

ها ... ؟؟

فكرييييي؟؟؟

ايه الفرق بينهم؟؟؟

أقووووووول؟؟؟

الفرق بين النملة والنحلة هو ان:

النملة : بتشتغل علشان تجمع الغذاء بتاعها وتأكله كما هو لا جديد فيه ولا يتغير عملها يوم عن يوم بل عملها ثابت

انما النحلة : بتشم الرحيق من الأزهار وتقوم بتصنيعــــه بقدرة حباها الله إياها وتحوله إلى عسل نحل طبيعي فيه شفاء للناس

يا ترى انتى نملة ولا نحلة ؟؟
هل بتبتكري في عملك ؟؟ في شغلك ؟؟ في بيتك ؟؟ في أفكارك ؟؟ في تعاملاتك ؟؟
يا ترى عندك جديد ... !!
حياتك شكلها ايه روتينية مملة ؟؟ ولا نشيطة مبتكرة ؟؟

تعالوا نشوف حياتنا بالشكل الجديد .. بمنظور جديد .. بفكر جديد

القدرة التى حباها اللى للنحلة نمتلك أقوى منها وهي العقل .. فهل استخدمناه في سعادتنا ؟؟

ايه رأيك في واحد مثلا كل يوم شغلته واحدة ..تعالوا نفهم الموضوع بتفصيل اكتر ونطبقه على عمل كل واحدة وواحد فينا ..

عندنا دلوقتى شغل معين (كل واحد يطبق الموضوع على شغله) والشغل ده عبارة عن مجموعة من الاستفتاءات يقوم مجموعة من الناس في الشغل بوضع الإستفتاءات دي ومجموعة اخرى وظيفتها انها تجمع النتائج وتعمل حصر لها ومجموعة اخرى تقدم تقارير عن النتائج دي ومجموعة اخرى تصيغ حلا للمشكلة التى قاموا بعمل الاستفتاء من اجلها و مجموعة بترجم اللحل ده وآخر مجموعة بترسل الحلول دي لشركات معينة تواجه نفس المشكلة
لاحظتم اييييه؟؟
ان العمل ((عمل اى حد فينا )) عبارة عن ترس في ماينة واحدة لو تعطل ذلك الترس هيقف بسببه كل التروس والمكنة كلها هتعطل .. صح ؟؟

طب انا مثلا لو من المسؤلين عن ارسال الحلول دي للشركات الأخرى .. ابتكر في عملى ازاى ؟؟ اذا كان اصلا العمل بتاعى محدد لا جديد فيه !!
ودي مشكلتة معظمنا ...

هنقوله ابتكر بأول حاجة .. تجديد النية .. ثم نفس عمييييييق .. إجتهاد فيالابتكار .. فكر كويس هتنشغل جامد هتتطلع بفايدة كبيرة.. هتلاقي 1000 فكرة جديدة .. يعني ممكن ترسل لمجموعة الشركات الى انت عارفها .. وتشترك على موقع اعلان عن شركات تبحث وتكتبلهم انا عندى حل للمشكلة الفلانية .. وتنشر .. يبقى كدة انت ابتكرت انك بحثت على النت .. كمان ممكن ترسلمساعدتك لاصحابك ذوى الاعمال الاخرى .. وممكن .. وممكن .. لو فكـرت بإصرار هتوصل بجد ..

**********

تعالي إنتى على بيتك عند ورق كارتون بتاع علبة الجاتوه مثلا .. مترميهاش حاولى تستفيدي بها اقصى استفادة ..فكرى .. هتبدعي ..فتتميزي ..فتحققى تغيير قوى ..وحياتك يكون فيها شئ كبير من التجديد..

**********

انتظروناااااا في الحلقة القادمة (السادسة).. ((أفكــــــار x أفكـــــــار))
بس طالبة منكم حاجة مهمة أوى .. كل واحدة تدخل تكتب لنا حاجة عاوزة تعملها أفكــــــار .. او تتكلم عن طبيعة عمل معين ونحطله أفكــــار ..

عاوزين نشوف خليـــــــــة نحـــــل!! من ملكات النحل ..

مرونة فكرية تخترق حواجز القميص الجبس اللى مغلفة به الجماجم ..

مرونة فكرية بلا حدود .. ورونا الإبداع في أقووووى تفاعل ..

[زهرة الياسمين]

جزاك الله خيرا

وأسأل الله ان يجعله فى ميزان حسناتك

ومتابعه ان شاء الله

اما انا بقى نفسى اغير فعلا روتين حياتى لانه بقى ممل بجد

يعنى بقوم الصبح اشوف شغل البيت وبعدها الاكل وبعدها

بقعد اراجع قران وبعدها ممكن اقرا كتاب وباقى اليوم على النت

نفسى فى افكار جديده نفسى اغير البرنامج ده لانه مش

بيتغير خالص وانا زهقت جدا

[بنت دمنهور]

السلام عليكم

فعلا والله ربنا يبارك فى حضرتك

ويجعل هذا المجهود فى ميزان حسناتك ان شاء الله

متابعــــــــة ان شاء الله

[Dr. Toka]

ربنا يكرم حضرتك يامسيو الموضوع اكتر من رائع

[Dr.love ferdos paradise]

جزاك الله خيراا
وجعله في ميزان حسناتك

في رعاية الله

[بنوته مسلمه]

ربنا يجازيك كل خير حضرتك

وجعله الله في ميزان حسناتك