شرح تفصيلي وشامل لكل شئ متعلق بكلية التجارة جامعة القاهرة-تم تعديل المجموعة المميزة

[vampire1188]

بسم الله الرحمن الرحيم

صباح الخير للى بيقروا الموضوع الصبح ومساء الخير للى بيقروا الموضوع بالليل

موضوعنا النهارده شامل كل صغيرة وكبيرة ممكن تتخيلوها عن كلية التجارة – جامعة القاهرة

يعنى من النهارده مافيش استفسارات .. مافيش انا ماعرفش .. مافيش انا هاسئل فى الشئون

وبالتالى ياريت تركزوا معايا جدا لان الموضوع طويل طويل طويل وفيه كل تنتوفة عن الكلية

بس قبل اي حاجة عايزين نتفق اتفاقين حلوين كدا

- الاتفاق الاول -
ياريت نقرا الموضوع الاول ونفهم الكلام وبعد كدا اللى عنده اي استفسار مهما كان هوا شايف انه ساذج ياريت يسأل ومايتكسفش

- الاتفاق التانى -
الموضوع دا هايبقى مغلق يعنى غير مسموح لاي شخص مهما كان انه يحط اي رد فيه ودا عشان بس الموضوع مش يتلخبط وفي نفس الوقت كلنا نستفيد ومانتشتتش واللى عايز يسأل اي سؤال يخش على اللينك دا
http://thanwya.com/vb/showthread.php...10#post3696010
ويحط السؤال اللى هوا عايزة وان شاء الله الرد هايكون عنده .. واكرر .. اى سؤال انا تحت امرك

عموما الموضوع هايتقسم على هيئة اجزاء
وكل جزء محطوط فى رد لوحده
الاجزاء اللى هانتكلم فيها فى الموضوع دا هى كالآتى
- يعنى ايه كلية التجارة ؟
- شرح تفصيلى لأماكن الكلية بشئونها بمدرجاتها
- خلصت ثانوية عامة وعايز اقدم فى الكلية اعمل ايه ؟
- التربية العسكرية (للطلاب الذكور فقط)
- الانشطة جوا الكلية (جماعات – اتحاد طلبة – موديلز – ملاعب جامعة .. الخ)

وحاجات تانية كتيييييييير يمكن فيه ناس فى خلصت الكلية وماتعرفهاش !!

عايز نفــس عميــق من كل واحد بيقرا التوبيك دا دلوقتى كدا ويفتح دماغه معايا عشان فيه كلام زي الفل هايتقال دلوقتى ان شاء الله

انزل بالماوس وقول بسم الله
..........

[vampire1188]

يعنى ايه كلية التجارة – جامعة القاهرة ؟؟





كتير من الناس دخلت الكلية وماتعرفش يعنى ايه تجارة

كتير من الناس اتخرجت من الكلية وماتعرفش يعنى ايه تجارة !!
واللى اكتر منهم الناس اللى مادخلتش الكلية وماتعرفش يعنى ايه تجارة !!

العقل بيقول حاجة حلوة اوى .. الطبيعى انك قبل ماتخش المكان لازم تبقى عارف انت داخل ايه على الاقل معلومات بسيطة عشان تحاول تأقلم نفسك معاه

لكن المشكلة ان الناس اللى دخلت الكلية 98% منهم داخل عشان مجموعه مايسمحلوش انه يدخل كلية مجموعها أعلى من تجارة وفي نفس الوقت حرام يخش كلية مجموعها اقل من كلية تجارة

عشان كدا بيصاب بحالة من اليأس والاحباط الشديدين اللى بيخلوه يقول انا هاخش تجارة وخلاص

وزي مايكون تجارة دى حاجة مالهاش اى تلاتين لازمة !!

فالطبيعى انك قبل ماتخش الكلية او حتى لو انت جوا الكلية لازم تبقى عارف شوية معلومات عن كليتك

مبدأياً كدا كلية تجارة دى هيا واحده من ضمن اربع كليات كانوا هما النواة الاساسية فى بناء جامعة القاهرة سنة 1911(ايام ماكان اسمها جامعة فؤاد الاول)

ودا كان شكلها ايام زماااااااان

وكانت مدة الدراسة فيها 3 سنين بس والمواد كانت بسيطة جدا لا تتعدى الـ 8 مواد فى التلات سنين كلهم !!
واول دفعة اتخرجت منها كانوا 19 طالب بس
(دلوقتى لو اتخرج منها 10 الاف بنقول عليهم قليلين !!)

بعديها بكام سنة الناس اللى كانوا ماسكين ادارة الجامعة قالوا ماينفعش اننا نسيب كلية التجارة من غير تقسيمة كدا .. فقالوا احنا هانقسمها لقسمين
قسم تجارة – وقسم اقتصاد
(مع مراعاة ان كلية سياسة واقتصاد كانت ساعتها لسه مش موجودة)
قسم تجارة قسموه لتلات شعب "محاسبة-ادارة تجارية-ادارة صناعية"
قسم اقتصاد قسموه لشعبتين "سياسة – اقتصاد"

بعد كدا جم بقى فى سنة 59 ايام عبد الناصر قالوا جيه الوقت اللى ننشأ فيه كلية خاصة بالسياسة عشان نطلع ناس تشتغل صح فى الخارجية
وطبعا دا خلاهم يفصلوا القسم الاقتصادى كله من كلية التجارة وأعادوا تقسيم كلية تجارة تانى لقسمين وهوا محاسبة وادارة اعمال .. وبعدها بكام سنة اضافوا ليه قسم التأمين
وفى سنة 92 جيه عمو الوزير حسين كامل بهاء الدين (فلة من فلول النظام السابق :D)
وطلع قرار وزارى غريب وقال احنا هاننشأ قسم انجليزى داخل كلية التجارة بحيث ان الطلبة هايدرسوا كل مواد التجارة بالانجليش
وبعدها على طول بـ 3 سنين جيه دكتور محمود بازرعة ربنا يكرمه وعمل اتفاقية مع جامعة سيتى فى لندن وانشأ قسم العلوم الاكتوارية

ودى بقى معلومة جديدة عليكوا .. ان من المتوقع انشاء قسم جديد خاص بكل شئون البورصة والاستثمار والاوراق المالية بس لسه ماتحددلوش اسم وهوا بقيلهم كام سنة بيتناقشوا فيه

ودى كانت نبذة تاريخية لااااااازم تعرفوها عن الكلية
لان ليس من البديهى ان طالب يخش يدرس 4 سنين فى الكلية وهوا مايعرفش اى حاجة عن تاريخها

[vampire1188]

شرح تفصيلى لكل أماكن الكلية

خلصت ثانوية عامة وعايز اقدم فى الكلية اعمل ايه ؟
مبروك يا عم الحج .. خلصت ثانوية عامة وكبرت اهو وداخل الجامعة بقى وهاتعيش حياااااااتك

نتيجتك ظهرت .. تنسيقك بدأ .. كتبت رغباتك .. جاتلك كلية التجارة
قشطة اوى .. عايزك تطبع نتيجة التنسيق اللى ظهرت على موقع التنسيق على ورقة بيضا عادية
وحطها على جنب

روح مدرستك الصبح بدرى كدا زى الشاطر واسحب ملفك من هناك واللى هايبقى جواه
- استمارة الثانوية العامة
- استمارة الاعدادية و استمارة الابتدائية
- شهادة الميلاد
والملف ماينقصش ورقة

روح لأى مصوراتى محترم خليه يصورك صورة كويسة كدا .. وياريت تبعد عن صور الثانوية العامة القديمة عشان 90% منها بيبقى شكلها عار والواحد اصلا مابيصدق الثانوية تخلص !!

وانت راجع من عند المصوراتى عايزك تشترى دوسيه من ابو كبسولة عشان هوا دا اللى حضرتك هاتحط فيه كل ورقك لما تيجى تقدم فى الكلية

حد يقولى ماينفعش اى دوسيه تانى ؟

اقوله لاء لازم يكون بكبسولة عشان ورقك يبقى متحافظ عليه ومايتبهدلش ومايضيعش وهوا محطوط فى الكلية

شهادة الميلاد لازم تكون موجودة طبعاً سواءاً القديمة او الجديدة مش فارقة
وفى جميع الاحوال ماعندكش شهادة ميلاد روح لأقرب سجل مدنى وطلع منه شهادة الميلاد المميكنة بـ 7 جنيه

فى "بعض" الأحيان بيطلبوا حاجة اسمها استمارة 2 جند
ودى وظيفتها انه بيتعملك تأجيل للجيش من خلال الكلية .. لان القانون بيقول انك اول مابتوصل لسن الـ 18 بتكون تحت طائلة الاستدعاء للجيش

وفى كثير من الاحيان الجيش بيعتبر مابين سن الـ 18 : 20 دول بيدرسوا فامش بيهتموا بيهم .. عشان كدا ممكن الكلية ماتطلبش استمارة الـ 2 جند باعتبار ان سنك لسه 17 سنة

استمارة الـ 2 جند بتتجاب من مديرية الأمن اللى منطقة سكنك تابعة ليها بـ 50 قرش

وكدا كدا فيه جزئية كاملة خاصة بموضوع تأجيل الجيش والعسكرية هانعرف فيه كل حاجة

فى بعض الاحيااااااان برده ساعات بيطلبوا صورة البطاقة (عشان متقولوش فامبير ماقالش)

لو ماطلعتش البطاقة لسه مش مشكلة ولو بتاع الشئون خنق عليك شوط فيه وعن ثقة

دلوقتى صورك معاك .. استمارة الثانوية العامة معاك .. شهادة ميلادك معاك .. استمارة الـ 2 جند معاك .. جواب التنسيق اللى انت طبعته من ع الموقع معاك

هاتحط كل الحاجات دى فى الدوسيه ابو كبسولة اللى اشتريته من المكتبة اللى جنب بيتكوا وتستنى لما ميعاد التقديم بتاع مرحلتك يبتدى (اللى هوا 99.5% هايبقى مرحلة اولى)

ميعاد التقديم بيبقى غااااالباً فى آخر شهر 7 لان نتيجة الثانوية العامة بتظهر فى حدود نص سبعة
وفى جميع الاحوال تابع الاخبار وشوف المواعيد وروح قدم

[vampire1188]

ميعاد التقديم فتح ؟

الله اكبر .. بداية مرحلة تعليمية جديدة فى حياتى .. اخيراااا هاخش الجامعة اللى بسببها دوقت المر سنتين !!

هذا هو لسان حال كل طالب لحظة مابيعرف ان تقديم الكلية فتح وانه هايروح الكلية بكرة وهايقدم

تصبح الصبح .. تاخد الدوسيه بتاعك اللى جواه :
- شهادة الميلاد
- 6 صور (وتكتب اسمك فى ضهرهم)
- استمارة الثانوية العامة
- استمارة 2 جند (طلبة ذكور فقط)
- جواب التنسيق

اتأكدت من ان كل حاجة موجودة ؟ تمام يعنى ؟
بيـــس
تنزل من بيتك تروح ع الجامعة
ماتنزليش الساعة 7 الصبح او 2 الضهر
لا خليك فى المعقول .. الساعة 7 مش هاتلاقي حد لان شئون الطلبة بتبتدى شغل على 9ونص
الساعة 2 برده مش هاتلاقى حد لان الشئون بتقفل على واحده ونص
(مع ان دى مش المواعيد الرسمية بس انا بقولك الواقع العملى اللى هاتمشى عليه من لحظة التقديم وطول الاربع سنين بتوعك)

هاتوصل الجامعة بالسلامة .. هاتخش من باب كلية التجارة .. بتاع الامن هايقولك رايح فين ؟ قوله داخل اقدم ورقى فى شئون الطلبة

هاتمشى من باب تجارة لغاية ماتوصل لشئون الطلبة زى ما الصورة دى بتوضح
(انا عامل احلى واجب اهو وبالصور كمان عشان ماحدش يتوه جوا)

هاتتلاقى شبابيك كتير .. هاتروح للشباك اللى انا معلملك عليه فى الصورة
بالاحمر دا لشئون عربى
بالابيض دا لشئون انجليزى

هاتتلاقى زحمة كتيرة اسأل الاول وشوف دا شباك اولى ولا لاء وبعد كدا خش فى الطابور

ولحد هنـا هانعمل استوب
ونفترق لطريقين
طريق اللى مقدمين لتجارة عربى – طريق اللى مقدمين لتجارة انجليش

[vampire1188]

اللى مقدمين لتجارة عربى
خش فى الطابور لغاية ماتوصل للموظف .. اديله الدوسيه زى ماهوا وسيبه يتعامل .. وانت واقف هاتلاقيه طلع ورقك واتأكد منه وتلاقيه فتح كشف فيه اسماء كتيرة كدا .. الكشف دا فيه اسماء الناس اللى مكتب التنسيق رشحهم لدخول كلية التجارة
بعد مابيتأكد من ان اسمك موجود فى الكشف وكله تمام بياخد الدوسيه منك ويقولك شكرااااااا مع الف سلامة
وكدا مبروك .. لقد تم قيدك فى كلية التجارة

اللى مقدمين لتجارة انجليش

طبعاً قبل ماتقدم لازم تبقى عارف نقطتين مهمين جداً
1- لازم تكون جايب على الاقل 40 من 50 فى الانجليش فى الثانوية العامة .. واقل من كدا ماينفعش

2- قبولك فى تجارة انجليش كاااااان بيبقى معتمد اعتماد كلى وشامل على التنسيق الداخلى
بس حاليا الوضع اتغير وبقى رغبة منفصلة
بمعنى انك لما بتيجي تملي الرغبات بتاعة التنسيق وكوباية الشاي جنبك بتبقى تجارة انجليش رغبة موجودة زيها زيها كلية اداب وكلية اعلام
والحوار الفاكس بتاع انك تقدم في تجارة عربى وبعد كدا تقدم في تجارة انجليش وتدفع 100 جنيه ويتعملك تنسيق داخلي وتستني لغاية اما النتيجة تطلع و ياتتقبل ويبقى تمام او ماتتقبلش وتترمي في تجارة عربي غصب عنك دا كله خلاص بخ مابقاش موجود

وطبعا النظام دا مميز جداااااااا جدا جدا
يعنى المفروض تحمدو ربنا عليه وتبوسو ايدكو وش وضهر
اولا عشان رحمك من حتة التدبيس اللى بتحصل في تجارة عربى في حالة عدم قبولك في تجارة انجليش
ثانيا فتح فرصة قدام زمايلك الغلابة بتوع المرحلة التانية انهم يخشو ويقدمو في تجارة عربى

يارب اكون قدرت اوضح المعلومة كويس
طيب السؤال الذى يطرح نفسه بقى

القبول بيتم ازااااااااى ؟؟

عن طريق المجموع الاعتباري يا برنس الجيل

ايه المجموع الاعتباري دا ؟؟

المجموع الاساسي بدون المستوي الرفيع
+
مجموع اللغة الانجليزية
(ولازم يكون فوق 40 من 50)
+
المستوي الرفيع للغة الانجليزية إن وجد

ودا معناه ان لما نتيجة التنسيق تنزل
هاتلاقي مجاميع معدية الـ 400 والـ 405
ماتستغربش من المجاميع العالية اوي دي
لان المجاميع دي زي ماقولتلك كدا فوق

نرجع لمرجوعنا تاااانى

دلوقتى حضرتك اتقبلت الحمدلله وجاتلك تجارة انجليش القاهرة

هاتقدم زيك زي بتوع تجارة عربى بالظبط
تحضر الفايل بتاعك وتحط جواه
- استمارة الثانوية العامة
- شهادة الميلاد
- صورة البطاقة (اختياري)
- بطاقة الترشيح
(ويكون مطبوع عليها الرغبةالمقبولة بوضوح تام)
- 6 صور
وتروح بيه لشئون طلبة تجارة انجليش

هاتقف فى الطابور .. هاتخش لغاية ماتوصل لموظف الشئون تقوله عايز اقدم فى تجارة انجليش

هايقوم ساحب الدوسيه بتاعك ويتأكد من ان اسمك موجود فى الكشوفات اللى مكتب التنسيق بعتها للكلية
وياخد منك الفايل ويبقى تمااااااام اوي كدا وزي الفل
الف الف مبروك حضرتك بقيت طالب في تجارة انجليش

وانت واقف بقى ماتنساش تقوله لو سمحت عايز إذن دفع مصاريف
وفي اليوم اللى بعده او يوم بقى انت تحبه تروح للخزنة بس يحبذ يبقى قبل الدراسة عشان الخزنة بتبقى زحمة جدا ايام الدراسة

ودا مكان الخزنة

هاتدفع الفلوس في الخزنة (4500 جنيه) وتستني شوية هاينده على اسمك ويديك 3 ورقات .. هاترجع تانى لشئون الطلبة بتاعة تجارة انجليش وتديله التلات ورقات دول عشان تعمل بيهم اثبات دفع مصاريف
ولو ماعملتش اثبات دفع يبقى كأنك مادفعتش حاجة
ولازم وانت بتعمل الاثبات يبقى معاك صورة
عشان الصورة دي هيا اللى هايتعملك بيها الكارنيه
وكدا يبقى تماااااام اوي اوي

[vampire1188]

شكله ايه الكارنيه دا ؟؟؟

اااادى شكله ياسيدي

كارنيه تجارة عربى

كارنيه تجارة انجليش



مع مراعاة ان الكارنيه ليه 3 وظايف :
- دخولك الجامعة بيبقى من خلاله
(وبعد الثورة وتغيير الحرس الجامعى بتاع الداخلية بأفراد امن مدنى اصبح من الصعب جدا دخولك الجامعة بدون الكارنيه)
- اى امتحان بتخشه بيبقى من خلاله
- بدون الكارنيه انت تعتبر غير مقيد فى الجامعة اصلا
وممكن تعرض نفسك لحوارات مش كويسة خاصة لو اتقفشت
(ودى صعبة شوية فى جامعة القاهرة بالذات)
- كلية الحاسبات والمعلومات بتقدم خدمة بيع سيديهات الويندوز والاوفيس الاصلية باسعار رخيصة جدا جدا وعشان تجيبها لازم يبقى معاك الكارنيه

[vampire1188]

شعبة جورجيـــا

عشان نبقى متفقين من اولها كدا
لو الانجليش بتاعك محترم وقادر تدفع 20 الف جنيه في السنة كمل البوست دا معايا للاخر
لو الانجليش بتاعك تعبان ومش مقتدر ماليا يبقى اقفل الموضوع احسن ووفر على نفسك وقتك

كــان يا ما كان في سنة 2005

كان فيه دكتور اسمه محمد يوسف كان ساعتها عميد كلية التجارة جامعة القاهرة .. الدكتور دا قرر يعمل اتفاقية شراكة وتعاون مع جامعة امريكية اسمها

Georgia State University

مشاورات من هنا واتفاقيات من هناك لغاية ما الموضوع تم على خير والاتفاقية تمت بنجاح

وكان مضمون الاتفاقية بتقول ان هايتم انشاء برنامج اسمه برنامج جورجيا والدراسة فيه هاتبدأ بدءاً من سنة 2007 والشهادة اللى الخريج هاياخدها هاتبقى معتمدة من الجامعتين

(القاهرة و ولاية جورجيا) ومصاريف البرنامج دا 20 الف جنيه سنوياً

وكدا تكون خلصت الحكاية

نرجع بقى من الاول خالص ونشوف ايه قصة جامعة ولاية جورجيا دي

اولا زي ماحنا عارفين ان فيه 52 ولاية امريكية

من ضمن الولايات دي ولاية صغننة كدا اسمها جورجيا

ولاية جورجيا دي موجود فيها 48 جامعة

من ضمن الـ 48 دول جامعة ولاية جورجيا

بس لازم نفرق بين حاجتين مهمين

جامعة جورجيا وجامعة ولاية جورجيا

لان جامعة جورجيا (Univ. of Georgia)

تصنيفها عالميا الـ 88

اما جامعة ولاية جورجيا (Georgia State Univ.)

تصنيفها الـ 523

وبالتالى لما تيجي حضرتك تخش شعبة جورجيا ماتبقاش فرحان اوي انك داخل برنامج تبع جامعة امريكية لان الجامعة دي تصنيفها عالميا 523 !!

ودي كانت اول نقطة حابب اتكلم فيها

ثانيا مصاريف الجامعة دي في امريكا 4 الاف دولار

يعنى تقريبا هوا هوا نفس سعر المصاريف بالمصري

بس الـ 4 آلاف دولار دول رقم متدني جدا مقارنة بجامعات تانية زي جامعة كورنيل بيتدفع فيها 20 الف دولار وجامعة بنسلفينيا بيتدفع فيها 30 الف دولار

وبلاش بقى نتكلم عن جامعة زي هارفارد اللى بيتدفع فيها سنويا 45 الف دولار !!

يعنى من الآااااخر الـ GSU دي جامعة غلبانه في امريكا

ودي تاني نقطة كنت حابب اتكلم فيها

وبالتالى ماتشوفش نفسك اوي وتعيش في الدور انك بتدفع 20 الف جنيه في السنة وتبقى حاسس انك جامد بقى وملك في الكلية !

المعلومتين دول كنت لازم تعرفهم عشان ماتبقاش داخل وبتدفع فلوس في حاجة انت حاسس ان هيا جامدة بس في الواقع هيا عادية من منظور التعليم الامريكي مش المصري

طبعا بعد ماقريت الكلمتين دول نفسك اتسدت وقولت ايه الشعبة التعبانه اللى انا عايز اخشها دي

بالرغم من انها طبقاً للتعليم الامريكي هيا عادية مش تعبانه .. ولكنها بمقياس التعليم المصري حاجة كويسة

كويسة في حاجتين :

- نظام التعليم

- عدد الطلبة واعضاء هيئة التدريس

أولاً : نظام التعليم

نظام التعليم في الشعبة دي امريكي بحت .. ونظام الدراسة الجامعي في امريكا ناس كتير مصريين مايعرفهوش ولو عرفوه بيستغربوه وبيحسو انه معقد شويتين .. انا بقدر الامكان هحاول اوضح النظام ماشي ازاى ودا اللى فعلا بيتمشي عليه في الشعبة .. ولو ربنا مش اراد انك تخش الشعبة دي فدا هايكون معلومات عامة ليك اهو مسيرها تفيدك

بص ياسيدي .. فتح دماغك معايا كدا وفوق وماتنامش

اولاً .. مافيش حاجة اسمها ترم اول وتانى

لكن فيه حاجة اسمها

Fall Semester و Spring Semester

الـ Fallدا بيساوي الترم الاول في النظام المصري عشان دايما الترم الاول بييجي في الشتا

الـ Spring دا بيساوي الترم التاني في النظام المصري عشان دايما الترم التاني بييجي في الربيع

بالاضافة لان فيه حاجتين اضافيتين

Winter Session و Summer Session

الوينتر بتبقى في اجازة الفول سيمستر والسامر بتبقى في اجازة الاسبرينج سيسمتر

وظيفتهم ايه ؟ هاتلخبطك شوية ومش مهم تعرفها ومش مطبقة في برنامج جورجيا لكن في امريكا بتبقى موجودة فعلا

ثانياً : الكليات والاقسام في الجامعة

في جامعات امريكا واوروبا عموما وحتى كمان في الجامعة الامريكية هنا في مصر بيقسمو الجامعة كلها لاربع كليات رئيسية وممكن تزيد او تقل على حسب الجامعة

وكل كلية بيبقي فيها اقسام .. الاقسام دي بتساوي الكليات عندنا في التعليم المصري

كل قسم من الاقسام دي بيتقسم لتخصص .. واللى هوا بيساوي الاقسام عندنا في التعليم المصري

نوضح اكتر ...

الاربع كليات بيبقو متقسمين كالاتى :

1- Faculty of Archaeology and Anthropology

اللى هيا كلية الآثار وعلوم الانسان

2- Faculty of Sciences and Engineering

اللى هيا كليات العلوم والهندسة

3- Faculty of Social Sciences

اللى هيا كلية العلوم الاجتماعية

4- Faculty of Business

كل كلية من دول بيبقى تحتها اقسام فيما عدا آخر واحده اللى هيا عندنا في مصر بتساوي كلية تجارة .. وعشان هيا ليها اهمية كبيرة عندهم في اوروبا عاملينلها كلية لوحدها بس عندنا في مصر الوضع يختلف !!

فمثلا كلية زي كلية العلوم الاجتماعية دي تلاقي تحتها اقسام كتيرة زي :

علوم سياسية – فلسفة – تاريخ – أدب انجليزي

وكل قسم من دول بتلاقي تحتيه تخصصات كتيرة

زي مثلا علوم سياسية تلاقي تحتيه تخصصات زي علاقات دولية والاقتصاد السياسي والشئون الافريقية .. الخ الخ

المعلومة دي بيتهيألي مالهاش علاقة باللى احنا بنتكلم فيه بس دي معلومة عامة ليك يعنى مش اكتر اهو بالمرة تعرفها

ثالثا .. النظام كله ماشى على حاجة اسمها الساعات المعتمدة

Credit Houres

طبعا اكيد حضرتك سمعت عن الساعات المعتمدة دا وكنت بتسمع انه حاجة كويسة بس ياتري ...

يعنى ايه ساعات معتمدة ؟

يعنى قبل ماتخش الدراسة الكلية بتقولك اللى اوله شرط اخره نور .. انت يا حج مطلوب منك انك تجتاز عدد ساعات معين عشان تاخد شهادة التخرج بتاعتك

غاااااااااااالبا عدد الساعات المعتمد دا بيكون 120 ساعة للسنة الواحده

طب بالذمة هل يعقل ان في 4 سنين هاحضر 120 ساعة بس ؟! يا بلاش !!

لا طبعاً .. فتح دماغك اوي معايا في الحتة دي عشان تفهم

كل ساعة من الـ 120 ساعة دول بتمثل اسبوع

وكل اسبوع عدد الساعات الفعلية اللى المفروض تحضرها في كل مادة على حدة 4 ساعات

يعنى الساعة الواحده التقديرية = 4 ساعات فعلية لكل مادة

وانت عندك في الترم الواحد غالبا بيبقى 3 شهور

يعنى 12 اسبوع .. وانت مطالب انك تحضر في كل مادة 4 ساعات زي ماقولنا

يعنى في الترم الواحد مطالب انك تحضر

4 ساعات × 12 اسبوع = 48 ساعة / للمادة الواحده

وانت عندك 5 مواد

يعنى توتال الساعات اللى المفروض تحضره في الترم الواحد لكل المواد

48 ساعة للمادة الواحده × 5 مواد = 240 ساعة

يعنى في السنة كلها 240 × 2 = 480 ساعة

ودا معناه انك لو لاقيت مادة ومكتوب قدامها 4 credit hours يبقى دا معناه ان الاربع ساعات دول اسبوعيا

لو مافهمتش ارجع اقراها تانى وتالت

بناءاً على عدد الساعات دا بيتم حساب النتيجة بتاعتك

والنتيجة مابتبقاش نتيجة عادية زي ماحنا عارفين

لا بيبقى اسمها GPA

ودي اختصار لكلمة طويلة اسمها

Grade Point Average

يعنى معدل النقاط التراكمي .. بيتحسب ازاااااااي ؟؟

انسى نظام التعليم المصري بتاع النهاية العظمى والسفلي دي ! صحصح معايا

اثناء مانتا بتدرس طبعا بيقابلك ميد تيرم وكويزات واسايمنتات وبلاوي زي دي .. معلومة مش جديدة يعنى

بس الجديد هنا انك بتتحاسب بنظام النقط

بمعنى انك في نهاية السيمستر بتلاقي كل مادة بتتحسبلك بالنقط ..

طب ازاااى

يعنى مثلا تلاقي مادة زي الماث انت جايب فيها A ومادة زي الايكونوميك جايب فيها +B .. فاهم حاجة ؟

اكيد طبعا مش فاهم .. ابسطهااااالك

الحرف بيشير للتقدير زي جيد جدا وامتياز ومقبول

النقطة الواحده بتشير لدرجتك

ودا توزيع التقديرات مع النقط .. والنظام دا هوا النظام العالمي واللى ماشي في كل الجامعات

A= 4.0 point ودا يعنى انت كدا برنس

A-= 3.7 point كدا دي زي جيد جدا

B+= 3.3 point دي يعنى تمام

B= 3.0 point دي يعنى جيد

B-= 2.7 point دي يعنى شد حيلك شوية

C+= 2.3 point دي يعنى صحصح من الغيبوبة بتاعتك

C= 2.0 point دي يعنى مقبول ومستواك زفت

تحت كدا يبقى ربنا معاك بقى !!

طيب انا جاتلي النتيجة لاقيت نفسي جايب الاتى :

financial accounting = B+ 3.3

OB = B 3.0

Economic = C+ 2.3

Management = A- 3.7

Math = B- 2.7

1- هاضرب النقط بتاعة كل مادة على حدة في عدد الساعات الاسبوعية (4 ساعات) عشان يطلعلي حاجة اسمها Quality Hours

2- هاقسم الـ Quality Hours على اجمالى عدد الساعات في الاسبوع (4 ساعات)

3- الرقم اللى يطلع اضربه في عدد الساعات الاسبوعية لكل المواد اللى انت بتدرسها ( 5 مواد يعنى 20 ساعة)

نطبق ؟؟ يالا بينا

1- الفانياشيال 3.3 × 4 = 13.2

2- الاو بي 3.0 × 4 = 12

3- الايكونوميك 2.3 × 4 = 9.2

4- مانجمنت 3.7 × 4 = 14.8

5- ماث 2.7 × 4 = 10.8

نبتدي نجمع بقى اللى طلع دا

هايطلع المجموع 60 نقطة
بعد كدا نقوم قاسمين الـ 60 نقطة دول على 20

يطلعلنا 3.0 .. واللى هوا بيساوي في التقدير كااااااام ؟؟

B واللى احنا قولنا عليه قبل كدا يعنى جيد

لو مافهمتش ارجع تانى واقراها مرة واتنين وتلاته

عشان انا عارف انها رخمة

ثالثاً : اعداد الطلبة

شعبة جورجيا بتتميز عن غيرها بان اعداد الطلبة بتاعتها قليل جدا .. لو جمعت الاربع دفعات من اولي لرابعة

هاتلاقيهم كلهم على بعض كدا مايكملوش 120 طالب

الجامعة الامريكية AUC بجلالة قدرها كانت واخده في دفعة 2008 تقريبا على ما افتكر 140 طالب لسنة اولي في كلية ادارة الاعمال هناك

(مع العلم ان الكلية دي واخده احسن كلية ادارة اعمال على مستوي الشرق الاوسط وافريقيا لسنة 2010)

قارن بين عدد دا ودا .. هاتلاقي ان عدد سنة اولي في الايه يو سي يساوي عدد شعبة جورجيا كلها

اي نعم فيه فوارق في الكواليتي بتاعة التعليم بس احنا بنتكلم في نقطة العدد

رابعاً : اعضاء هيئة التدريس

عندكو 18 دكتور من احسن الدكاترة اللى ممكن يدرسو في مصر .. وماشاء الله كلهم واخدين الدكتوراه من جامعات عالمية

خامساً : الشهادة

ان شهادة التخرج لما بتطلعلك بتبقى طالعالك من جامعتين

كلية التجارة جامعة القاهرة

و كلية روبنسون لادارة الاعمال بجامعة ولاية جورجيا

(هاتقولي يعنى ايه روبنسون هاقولك ان النظام في امريكا انهم بيسمو الكليات هناك على اسماء الدكاترة الجامدين تخليدا لذكراهم زي كلية الهندسة في جامعة تكساس مثلا اسمها كلية كوكريل .. الخ)

اذن من الوضع العام نستنتج ان الشهادة اللى سيادتك هاتاخدها مش عليها القيمة اوي .. بس التعليم اللى هاتتعلمه هايبقى كويس ومتميز

متهيألي كدا كل واحد فينا كوِّن فكرة كويسة عن الشعبة دي وقدر ياخد رأي فيها

السؤال اللى بيشغل بالك دلوقتى طبعاً

انا خلصت ثانوية عامة .. اقدم في الشعبة دي ازاى ؟؟

نتيجة التنسيق ظهرت صح ؟ وطلعلك كلية التجارة صح ؟

مش شرط انها تكون انجليش .. لو عربى اتس اوكي

تاخد بطاقة الترشيح اللى هايكون مكتوب عليها

تم ترشيحه لكلية تجارة القاهرة

وتروح بيها الجامعة لشئون تجارة انجليش

وتقولهم لو سمحت انا عايز اقدم في برنامج جورجيا

هايديك اذن دفع بقيمة 150 جنيه

هاتروح تدفعهم في الخزنة وتستني لما الراجل بتاع الخزنة ينده على اسمك ويديك كام ورقة كدا هاتاخدهم وترجع بيهم تانى على شئون انجليش

وتدي الكام ورقة دول لنفس الراجل اللى اداك اذن الدفع

هايقوم واخد الورق دا منك ومديك ابليكيشن التقديم

http://www.mediafire.com/?bcegilcahf47xsr

هاتملاه مع نفسك وتقوم مديهوله تانى

بعدها بيتصلو بيك عشان يقولولك على ميعاد للانترفيو بتعمله حضرتك مع دكتور من الدكاترة

عشان يشوف انت الانجليش بتاعك كويس ولا لاء

وبعد مابتخلص الانترفيو روح بيتكو واستني تليفون منهم عشان يقولولك انت ناجح ولا لاء

وممكن يبعتولك ع الميل برده

ولو مانجحتش يبقى انت كدا اتدبست في تجارة عربى خلاص

طب ياتري القبول بيتم ازاى ؟؟

بياخدو اعلى مجاميع متقدمة في ضوء العدد المطلوب

يعنى هما مثلا عايزين 50 طالب

اتقدملهم 80 .. بياخدو اعلى 60 مجموع متقدم

والـ 60 طالب دول بيتعملهم انترفيو لغاية مايصفوهم على 50 اللى هوا العدد المطلوب فعلا

فهمـــت ؟؟

اول ماحضرتك بتتقبل وبيكلموك ويقولولك انت اتقبلت

تطير على الجامعة عشان تدفع المصاريف بتاعتك

ممكن تدفعها كاش 20 الف مرة واحده

وممكن تقسطها على قسطين مرة في الفول سيسمتر ومرة في الاسبرينج سيمستر وقيمة القسط بتكون 10 الاف جنيه

نظام الدراسة جوا احنا عرفناه والحمدلله

مكان الدراسة فين ؟؟

الكلية خصصتلك آخر دور في مبنى شعبة انجليش

فيها انضف قاعات موجودة في الكلية

ودي صورة قاعة فيهم

والقاعات دي ماحدش بيحضر فيها غير طلبة جورجيا بس حتى قافلين الدور كله بباب ازاز زي ماهو واضح في اول صورة في البوست كدا

كدا الموضوع خلص والحمد لله

كدا انا خلصت تجارة عربى كلها وتجارة انجليش كلها بما ضمنهم اكتواري وجورجيا

مش باقى غير الامتحان والنتيجة والانشطة داخل الكلية

الامتحان والنتيجة انا شايفه مش مهم اوي دلوقتى لان لسه بدري

فان شاء الله البوست الجاي هابتدي اعرفكو بقى جو الكلية ماشي ازاى وايه اتحاد الطلبة وايه رعاية الشباب والموديلز وحاجات كتيرة

ابقـــو معنــــا :D :D

ملحوظة : البوست الجاي ممكن يتأخر شوية لانشغالي باجراءات الجيش .. ادعولي يا جماعة

[dndoonh]

ياااااا مستر فامبير
انا ثانوووى تجااره وعايزه اكمل فى القااهره ينفع ولا ايه الحووار

[emma3]

هو انا ممكن اقدم شعبة انجليزى و شعبة جورجيا ولا شعبة وحدة بس..

[freetigerf]

طب بالنسبة لخريجى جورجيا دول بيبقى نظامهم فى الشغل ايه هل هما مطلوبين ولا عادى ولا ايه النظام اصلا

[ahmed abdel twab anani]

عليا النعمه انت برنس وربنا هيبركلك انا طالب ثانويه عامه لسه مخلص وجيلك السنه الجايه تجاره القاهره

[Dina ElGendy]

هما القسمين دول لازم الاشتراك فى واحد منهم ولا ممكن نكمل ال4 سنين عادى من غير م اشترك فى الاقسام دى؟؟و بالنسبة للقسم الاكتوارى انت قولت مصاريفه 4500 المصاريف دى غير مصاريف كلية تجارة ُeيعنى فى السنة لو دخلت قسم اكتوارى ادفع 9000 ولا هى 4500 و بس ؟؟وكمان ان كنت اعرف ان التخصص بيكون فى سنة رابعة و انت قولت ان التخصص من سنة ثانية فياريت بس اعرف هو التخصص بيكون من سنة كام بالظبط....و ان اسفة طولت عليك و اسئلتى كانت كتيرة بس ربنا معاك و يوفقك

[Dina ElGendy]

[quote=Dina ElGendy;3867905]هما القسمين دول لازم الاشتراك فى واحد منهم ولا ممكن نكمل ال4 سنين عادى من غير م اشترك فى الاقسام دى؟؟و بالنسبة للقسم الاكتوارى انت قولت مصاريفه 4500 المصاريف دى غير مصاريف كلية تجارة ُeيعنى فى السنة لو دخلت قسم اكتوارى ادفع 9000 ولا هى 4500 و بس ؟؟وكمان ان كنت اعرف ان التخصص بيكون فى سنة رابعة و انت قولت ان التخصص من سنة ثانية فياريت بس اعرف هو التخصص بيكون من سنة كام بالظبط....و جزاك الله خير isa

[Dina ElGendy]

[هما القسمين دول لازم الاشتراك فى واحد منهم ولا ممكن نكمل ال4 سنين عادى من غير م اشترك فى الاقسام دى؟؟و بالنسبة للقسم الاكتوارى انت قولت مصاريفه 4500 المصاريف دى غير مصاريف كلية تجارة ُeيعنى فى السنة لو دخلت قسم اكتوارى ادفع 9000 ولا هى 4500 و بس ؟؟وكمان ان كنت اعرف ان التخصص بيكون فى سنة رابعة و انت قولت ان التخصص من سنة ثانية فياريت بس اعرف هو التخصص بيكون من سنة كام بالظبط....و
جزاك الله خير

[محمود محسن مصطفى]

ممكن حضرتك تقولنا ازاى نختار التخصص وعلى اى اساس واهمية كل تخصص واحتياج سوق العمل لة بالنسبة لتجارة انجليزى
معلش سؤال تانى انت بتقول ان عدد تجارة انجلش 400 او 500 طالب وبيقسموهم مجكموعات صغيرة مع ان السنة دى احنا فى جامعة القاهرة عددنا 1096