|
||||||
| كليات المجموعة الرياضية (الهندسة - الحاسبات والمعلومات - التجارة & التجارة إنجلش - الفنون التطبيقية والجميلة) |
|
|
أدوات الموضوع | انواع عرض الموضوع |
|
|
|
#1
08-04-2010, 02:02 AM
|
||||
|
||||
مـنـحـة الـ iTi - برنامج تطوير مهارات خريجى الجامعات + كورس معهد بيرلتز للغات كامل
السلام عليكم ورحمة الله وبركاته ازيكوا يا تجاريين ؟ يارب تكونوا بخير وتكون الدراسة ماشية معاكوا تمام النهارده موضوعنا مختلف شوية عن الدراسة والاستفسارات ووجع الدماغ دا النهارده موضوعنا عن منحة مهمة جدا جدا جدا المنحة دي اسمها منحة الـ iTi الموضوع عشان بس تبقوا مصحصحين معايا انا مقسمه لقسمين القسم الاول دا هاتكلم فيه عن المنحة واهميتها القسم الثانى دا هاتكلم فيه عن المنحة خطوة بخطوة نبدأ بقى ونشوف .... القسم الاول المنحة دي اسمها EDUEgypt EDU دي اختصار لكلمة Education Development for Universities in Egypt " برنامج تطوير مهارات خريجى الجامعات" البرنامج دا هو واحد من أحد البرامج اللي بيقدمها معهد النظم والمعلومات iTi بس اللي بيميزه عن غيره انه بالتعاون مع - وزارة التعليم العالى - وزارة الاتصالات - معهد النظم والمعلومات - معهد بيرلتز للغات - شركات عالمية (IBM - Vodafone .. الخ الخ) كل اللي حصل ان وزارة التعليم العالى شافت ان فيه فجوة كبيرة اوي بين مستوى خريج الجامعة وسوق العمل وبينقص الخريج دا مهارات كتيرة زي الكمبيوتر واللغة وطريقة الكلام والتعامل مع الغير .. الخ عشان كدا وزارة التعليم العالى قررت انها تتعاون مع وزارة الاتصالات عشان تقدم منحة وبرنامج كامل متكامل بحيث ان الطالب اللي يخضع للبرنامج دا يبقى مؤهل على طول انه يخش سوق العمل ويعرف يشتغل على طول وزارة الاتصالات وافقت على الموضوع دا .. وطبعا عشان معهد النظم والمعلومات هو أحد الهيئات التابعة لوزارة الاتصالات فعشان كدا تم إسناد الموضوع دا ليه باعتبار انهم ليهم باع كبير في الموضوع دا معهد النظم حط العناوين الرئيسية للمنحة وكانت بتتلخص في انهم بيدرِّسوا الكمبيوتر ومهارات الاتصال ولكن بالانجليش وفعلا الموضوع دا بدأ تنفيذه على ما أعتقد في سنة 2007 تقريباً بعدد قليل جدا لا يزيد عن 300 طالب من جامعة القاهرة "ككل" والطلبة دول كانوا من الفرقة الرابعة بعد كدا الموضوع لاقى نجاح كبير جدا لانهم لاقوا ان مستوى الطلاب اتحسن فعلا ووفروا على الشركات مجهود كبير .. عشان كدا فيه شركات تانية دخلت في الموضوع وبقت داعمة للمنحة وبتصرف عليها هيا كمان و دا كان نبذه عامة عن المنحة القسم الثانى لغاية الترم الاولانى السنة دي (2009/2010) كان شرط الالتحاق بالامتحان المؤهل للمنحة حاجتين : 1- انك تكون جايب جيد "على الاقل في سنة تانية" 2- انك تنجح في امتحان القبول بتاع المنحة الترم التاني بقى في السنة دي برده (2009 / 2010) الوضع اتغير .. وأصبح القبول من سنة تانية وبالتالى أصبح شروط الالتحاق كالآتى : 1- انك تكون "انتظام" من الفرقة التانية 2- انك تنجح في امتحان القبول بتاع المنحة والدراسة هاتبدأ مع بداية السنة الجايه مباشرة هنا بقى فيه حد هايسألنى سؤال مهم اعرف منين اصلا اني هاخش الامتحان ؟؟ لو انتا كنت في سنة تانية السنة دي وانتظام يبقى اسمك موجود في الكشوفات والكشوفات دي موجودة في الدور الرابع في مبنى الامتحانات كل اسم هاتتلاقوا جنبيه ****** نمبر طويل كدا ال****** دا هاتاخده وتكتبه وتشوف مواعيد الامتحان بتاعتك امتى وظبط نفسك على الحال دا وبكدا انتا اتأكدت ان اسمك موجود وانك داخل الامتحان ان شاء الله مكان الامتحان في حتة اسمها معهد النظم والمعلومات القوات المسلحة المعهد دا موجود في مدينة نصر قدام طيبة مول واللي مش عارف الطريق انا ممكن ابقى اوصفهوله المهم يوم الامتحان لازم تبقى متواجد في المعهد دا ميعاد الامتحان بتاعك بوقت كافى وبالتالى هايبقى قدامك اختيارين عشان تروح المعهد 1- انك تركب الاتوبيسات اللي الكلية بتوفرها للطلبة ودي مجانية واتوبيسات مكيفة وفايف ستار هاتاخدك من قدام باب الجامعة لغاية باب المعهد وهاترجعك تاني بعد ماتخلص امتحانك 2- انك تروحها مواصلات على رجليك بعد مابتوصل للمعهد بتقعد في الاستراحة هناك استراحة لذيذة جدا وفيها دي جي ومشروبات وحاجة كوول خالص يعني هاتفضل مستنى لغاية ماتتلاقى المشرف ييجى ويجمعكوا في جروب وتمشوا وراه لغاية ماتطلعوا للقاعة اللى هاتمتحنوا فيها - كل 20 طالب هايتجمعوا في جروب ويخشوا القاعة (مكيفة ورخام وحاجة نضيفة جداً) - كل طالب هايقعد على جهاز خاص بيه - كل طالب ماينساش ياخد معاه قلم وورقة - كل طالب ماينساش ياخد ال****** نمبر اللي كتبه قبل كدا عشان دا اللي انتا هاتمتحن بيه ملحوظة مهمة جدا جدا المعهد هناك بيتعامل معاك على انك كود يعني مش بيتعامل بأسماء نهائى وبالتالى لو نسيت ال****** بتاعك يبقى احسنلك تروح يا أما بقى هاتدوخ عشان تجيبه من هناك وهاتتذل بعد مابتطلع هاتتلاقى المشرف بيرحب بيك ويطلب من كل طالب انه يفتح الجهاز اللي قدامه اثناء مانتا بتفتح الجهاز المشرف هايديك ورقة مكتوب فيها عنوان العنوان دا هاتكتب عنه برجراف نصيحة : ركز اوى في اللي مكتوب وماتتحولش واعرف هوا عايز ايه كويس عشان فيه واحد من صحابي كانوا كاتبينله talk about your home واتكلم عن بيتهم حتة حتة واوضة اوضة وبعد ماخرج من الامتحان فوجئ انهم يقصدوا بكلمة home دي يعني الوطن !!!! مدة الكتابة في البراجراف دا حوالى 10 دقايق ماتنساش طبعا تكتب اسمك وال****** نمبر بتاعك وبعد كدا بتقوم مسلم الورقة للمشرف في اللحظة دي خط نفس عمييييق جدا عشان اللي جاي ادهى وأمر !! المشرف هايطلب من كل واحد انه يفتح ابلكيشن معين على الديسك توب الابليكيشن دا فيه الامتحان بتاعك طبعا اول ماهاتفتح هايظهرلك username و password المشرف هايمليك البيانات وكل حاجة تمام بعد مابتدوس انتر .. في اللحظة دي انتا بينك وبين بداية الامتحان تكة زرار دوس start ويبقى انتا كدا بدأت الامتحان اللي هايبقى قدامك في اللحظة دي عبارة عن40 سؤال في الاوفيس عموما والانترنت والويندوز وطبعاً الاسئلة بالانجليش بعد مابتخلص الـ 40 سؤال بتخش على 20 سؤال تانيين ودول مختصين بالـ IQ (اختبارات الذكاء) مع ملاحظة ان اسئلة الذكاء برده بالانجليش يعني عشان تحل السؤال لازم تترجمه الاول (دا ان عرفت تترجمه اصلا) وبعد كدا تفكر في الترجمة عشان تحل !! وبعد ما بتخلص الـ 60 سؤال اللي فاتوا دول بتدوس finish نسيت اقول ان الـ 60 سؤال دول بيتحلوا فى 20 دقيقة خد نفس عمييييييييق عشان اللي جاي أدهى وأمر !!!! في نفس الابليكيشن هاتخش على امتحان جديد مدته 5 دقايق الامتحان دا بيقيس حاجتين : - دقة كتابتك على الكيبورد - سرعة كتابتك على الكيبورد فى الامتحان دا الشاشة هاتبقى متقسمة جزئين الجزء الفوقانى قطعة طويلة عريضة كلها بالانجليش وبتتكلم عن موضوع معين وفيه كلمات معقدة ماتتفهمش !! والجزء التحتانى دا اللي انتا هاتنقل فيه الكلام اللي في الجزء الفوقانى في مدة اقصاها 300 ثانية نصيحة : ركز في الحروف الكابيتال وعلامات الترقيم يعين مثلا مش يبقى في القطعة مكتوب Egyptismy country,and ilove it وسيادتك تكتب egypt'smy country.and i love it بعد مابتخلص القطعة خد نفس عمييييييييق عشان اللي جاي طحن هاتقفل الابليكيشن وتفتح الانترنت اكسبلورر اللي ع الجهاز بتاعك هايطلب منك يوزر نيم وباسوورد برده كالعادة اطلب من المشرف البيانات دي وهايديهالك في اللحظة اللي هاتدوس فيها انتر هاتكون بدأت الامتحان فعلا الامتحان دا هوا المرحلة قبل الاخيرة وهوا عبارة عن 80 سؤال انجليش متنوعين بين grammer و vocabulary و expressions ومدة الامتحان 40 دقيقة ملحوظة الـ 80 سؤال بيكونوا جايين من - منهج التويفل - جامعة كامبريدج اثناء مانتا بتحل هاتتلاقى واحد ظريف داخل عليك في القاعة وبيقولك ان ميعاد انترفيو الانجليش بتاعك كذا كذا ولازم تحضره والا امتحانك اللي انتا امتحنته دا مالوش لازمة وهايتلغى وهاتسقط طبعا انتا اصلا هاتنفضله لانك مشغول بالـ 80 سؤال اللي قدامك اللي مش هايخلصوا اساساً !! بعد مابتخلص الـ 80 سؤال ان شاء الله بتقفل الجهاز وتنزل تتأكد من ميعاد الانترفيو الانجليش بتاعك امتى وفين وبعد كدا روًّح بيتكوا ونام هاتيجي بقى للمرحلة الأخيرة اللي الكل بيترعب منها انترفيو الانجليش هاتروح لليوم اللي انتا هاتعمل فيه الانترفيو وفي الميعاد بتاعك (والتزم بالمواعيد وماتتأخرش) ومكان الامتحان غالباً هايبقى في الدور الرابع في قاعات الامتحانات هاتطلع فوق هاتتلاقي واحد من مديرين المنحة بيستقبلك وبيدخلك قاعة فيها ناس هاتمتحن معاك برده شوية وهاتتلاقى واحد داخل ومعاه ورق بيوزعه عليكوا  الورق دا عبارة عن انك انتا بتقيم نفسك يعني انتا شايف مستواك ايه في الانجليش هاتتلاقى مثلا في اول صفحة يقولك you can make a flexible conversation ويديك مستويات بقى 1 - 2 - 3 - 4 وانتا تختار وهكذا ... ولاحظ في الصورة ان فيه بيانات بتتكتب البيانات دي مهمة جدا خاصة الايميل ورقم الموبايل والاسم لانك لو ربنا أكرمك ونجحت هايتصلوا بيك ع الموبايل ويقولولك انك نجحت هاتستنى شوية لغاية ما يندهوا عليك وهاتقوم داخل الانترفيو عبارة عن مقابلة بتتعمل بينك وبين مدرِّب من المدربين اللي بيدرِّسوا في معهد بيرلتز للغات والمقابلة بتبقى عبارة عن دردشة بينك وبين المدرب وكله بالانجليش طبعا مدة المقابلة حوالى ربع ساعة وممكن تمتد لتلت ساعة على حسب ظروفك هاتتلاقى الـ instructor قاعد مستنيك (وغالبا 90% هاتكون بنت) في لحظة دخولك للانترفيو اقلب انجليش يعني مافيش حاجة اسمها عربى هاتقول سلامو عليكو هاتتلاقى المدرب بيقولك hi هاتيجي تتكلم عربى هايقولك sorry i don't understand المهم هاتتلاقى المدرب بيطلب منك انه لما يسألك السؤال تقول الاجابة كاملة يعني مثلا what's your name ماتقولش Ahmed لا تقول my name isAhmed هايسألك يقولك Have you been to Alex ماتقولش yes أو no لا تقول yes, i have been to Alex وهكذا .... هيا اي نعم حاجة تشل شوية بس هوا دا اللي هايتطلب منك نصيحة من مجرب - خليك هادي جدا وبااااااارد جدا جدا - اياك والتوتر - ابعد عن الفزلكة والرغى الكتير في المواضيع اللي مالهاش لازمة - جاوب على قد السؤال واسكت لانك بتتكلم مع واحد محترف وبيعرف يعلى رتم الكلام ويوطيه زي ماهوا عايز هاتستنى النتيجة لغاية ماتنزل في ميعاد هما بيحددوه وبيعلنوا عنه مسبقاً ولو نجحت "لااااازم" هايبلغوك بخبر انك نجحت عن طريق : - الايميل - الموبايل (باتصال او بماسيدج) - الكشوفات اللي بتنزل فى الكلية بعد مابتعرف انك نجحت ان شاء الله بتتأكد من مواعيدك كويس اوي من الـ admin. room في الدور الرابع في قاعات الامتحانات مع ملاحظة الآتى : 1- غياب يومين اسمك هايتحذف من المنحة نهائى 2- تأخير 3 ايام بيوم غياب وبكدا أكون خلصت موضوع المنحة فيه بقى حاجة تالته كدا عايز اتكلم فيها برده للمعلومات العامة مش اكتر أولا المنحة دي معمولة خصيصاً عشان حاجة اسمها صناعة التعهيد outsourcing يعني ايه تعهيد ؟ الكلمة دي في الـ orientaition قعدوا ساعتين يشرحوهالنا وماحدش فهم حاجة !! لكن الموضوع بيتلخص في مثال بسيط اوي 1- شركة فودافون مجالها الاساسي اصلا خدمة الاتصالات والشبكات 2- وبما انها بتخدم ناس فايبقى لازملها خدمة عملا 3- وعشان نشاط الشركة الاساسى الاتصالات (مش خدمة العملا) فابتروح لشركة زي شركة exceed عشان تطلب منها انها تتعهد بانها تقوم هيا باستقبال طلبات العملا وخدمتهم بإسم فودافون 4- مقابل ان شركة فودافون تدى سهولة اتصال لشركة exceed او مقابل عمولة معينة على حسب الاتفاق بين الشركتين وهوا دا بقى الغرض الاساسى من المنحة انهم يطلعوا ناس تقدر تقوم بوظيفة خدمة العملا على أكمل وجه وباحترافية شديدة ثانياً البرنامج متقسم لحوالى 4 مراحل المرحلة الأولى : الانجليش المرحلة التانية : كمبيوتر المرحلة التالته : مهارات الاتصال والتفاوض المرحلة الرابعة : تنمية بشرية ودراسة المنحة كلها بالانجليش طبعاً عشان كدا البرنامج بدأ بالانجليش كمرحلة اولي زي ماقولنا في الاول ان القائم بتدريس اللغة الانجليزية في البرنامج دا معهد بيرلتز للغات كتير مننا مايعرفش ايه هوا معهد بيرلتز دا اصلا (وانا كنت واحد منهم ) - معهد بيرلتز دا هو معهد بيدرس لغات كتيرة انجليش / فرينش / المانى .. الخ الخ - بيملك حوالى 500 مركز في 70 دولة في جميع انحاء العالم - يعتبر أغلى مركز في مصر بيدى كورسات انجليش (1000 جنيه في الليفل الواحد) - عدد المستويات 8 + 2 مستوى للتخصص (يعني من الاخر اللي بيوصل لليفل 8 دا بيبقى خلاص بيتكلم زيه زي الامريكى) في البرنامج بقى انتا بتخش ليفل معين بيتحسب ازاي ؟؟ بيبقى على حسب الحل اللي انتا حليته في امتحان القبول والانترفيو والطالب عموما في البرنامج دا ليه 3 ليفلات يعني انتا اتحطيت ليفل 1 يبقى هاتدرس 1 ، 2 ،3 لو اتحطيت في ليفل 3 يبقى هاتدرس 3 ، 4 ، 5 لو اتحطيت في ليفل 5 يبقى هاتدرس 5 ، 6 ، 7 وهكذا ... نيجي بقى لشوية ارقام واحصاءات - من 2007 : 2009 كان القبول من الفرقة الرابعة فقط لا غير وكانوا لا يتعدوا الـ 400 طالب - بدءا من السنة دي 2009 / 2010 قرروا انهم ينزلوا المنحة دي لطلبة الفرقة التالته وكان عدد المرشحين لدخول الامتحان حوالى 3500 طالب من جامعة القاهرة من كليات التجارة / الآداب / الآثار / سياسة واقتصاد وتم قبول عدد 1120 طالب فقط !! - عدد طلبة الفرقة الرابعة المسجلين بالمنحة السنة دي حوالى 600 طالب كالآتى : > تجارة 430 طالب > سياسة واقتصاد 53 طالب > آثار 31 طالب > آداب 66 طالب - الشركات الراعية للمنحة هى : > ECCO > WASLA > RAYA > IBM > TelePerformace > HSBC Bank > Vodafone > Etisalat > Mobinil فيه ملحوظة مهمة جداً المنحة دي غير مقتصرة على جامعة القاهرة فقط لكن المنحة شغاله في 6 جامعات تانية غير جامعة القاهرة >> جامعة حلوان << آداب - تربية - تجارة - سياحة وفنادق >> جامعة عين شمس << آلسن - آداب - حقوق - تجارة "عربى" - تربية >> جامعة الاسكندرية << تجارة - آداب - سياحة وفنادق >> جامعة أسيوط << تجارة - تربية - آداب بالاضافة لجامعة الزقازيق والمنصورة (احسن ناس طبعا ) طبعاً بعد ما المنحة بتخلص جميع الجامعات بتشرفنا ان شاء الله في جامعة القاهرة لحضور حفلة التخرج تحت قبة جامعة القاهرة (اللي اوباما قال فيها الخطاب الشهير) والحضور بيبقى رسمى بدلة للشباب - تايير او اي حاجة كلاسيك للبنات و دا شكل الشهادة (مش هاتلاقيها ع النت كله غير هنا)  ملحوظة اول حفلة تخرج حصلت كانت السنة دي وكانوا مجمعين دفعة 2007 و 2008 مع بعض بحضور وزير التعليم العالى ووزير الاتصالات بالاضافة لرئيس جامعة القاهرة وعين شمس و نائب رئيس شركة "ساتيام" الهندية أشهر شركة بتقوم بصناعة التعهيد في العالم وصور الحفلة نازلة على السايت بتاع المنحة للى عايز يشوفها http://www.iti.gov.eg/eduegypt/edu_egypt.html " كنت موجود انا في الحفلة دي بس قاعد في الدور التالت  "ودي بعض الماتيريال اللي هاتقابلكوا اثناء دراستكوا للكورس فيه بعض المعلومات العامة عن المنحة اللي عايز يستلمه يروح الـ iTi admin. room الدور الرابع بقاعات الامتحانات ودا النموذج اللي أول ماهاتبدأ المنحة هايوزعوه عليك عشان تملى فيه بياناتك كاملة عشان لو حصل اي مستجدات يقدروا يوصلولك ولو فيه اي بيانات تم حديثها زي رقم الموبايل او العنوان او الايميل تروحلهم وتقولهم انا عايز اغير بياناتي دا كل مرة هايوزعوه عليك وتشوف اسمك وتعمل قدامه صح وماتنساش - يومين غياب تبقى بره الكورس - تلات ايام تأخير بيوم غياب دا هايوزعوه عليك مرتين وبياخدوا رأيك في البرنامج عموماً مع ملاحظة ان دا اسمه استقصاء يعني ماتكتبش اسمك عليه وبكدا اكون خلصت التعريف بالبرنامج وبكل حاجة عنه وأظن انا كاتب كل التفاصيل ومش سايب فتفوتة المفاجاءة بقى كورس الانجليش الخاص بمعهد بيرلتز كـــامــــل من ليفل 1 : ليفل 8 - الروابط ميديا فاير عشان تتبسطوا - قسمت كل ليفل في فايل لوحده عشان اللي عايز ينزل ليفل معين مايبقاش مجبر انه ينزل الكورس كله في فايل واحد >> level 1 << >> level 2 << >> level 3 << >> level 4 << >> level 5 << >> level 6 << >> level 7 << >> level 8 << انا عارف ان الموضوع طويل
بس ماينفعش اني كنت اختصر فيه عشان فيه ناس كتيرة بتبقى عايزه تعرف أدق التفاصيل عنه وعموما ربنا يوفقنا جميعا إن شاء الله آخر تعديل بواسطة vampire1188 ، 23-04-2010 الساعة 05:36 PM |
|
#2
08-04-2010, 03:27 AM
|
||||
|
||||
|
طبعا انا بيشرفنى انى اكون اول واحد يرد عليك وبجد مجهووووووود عالى اوى اوى اوى يا فامبير وان شاء الله يكون فى ميزان حسانتك
و يكون فيه لسنه تالته عشان خساره والله كورس زى ده يضيع يعنى بس اكتر حاجه مضايقانى اقتباس:
وطبعا مستنيين باقى اللفيلات وشكرا يا فامبير تانى عشان انتا كده بجد جبت من الاخر والله ربنا يايكرمك وينجحك وتجيب امتياز يارب
__________________
"فى الأنتصار أزداد بك فخرا وفى الهزيمة أزداد لك عشقا ولا تزيدنى شماتة الأخرين الا حبا فيك" |
|
#3
08-04-2010, 04:47 PM
|
||||
|
||||
|
مجهوود كبير اوى يا فامبير وبجد اى كلمات شكر مش هتديلك حقك ربنا يجعلة فى ميزان حسناتك .
انا دلوقتى فى تانية انجلش واعايز اقدم فى المنحة اروح فين
__________________
انك لا تستطيع أن تشتري السعادة بكل أموال العالم لأن مملكة السعادة موجودة في فكرك ومشاعرك. |
|
#4
08-04-2010, 07:00 PM
|
||||
|
||||
|
السلام عليكم ورحمه الله وبركاته
جزاك الله خير يا فامبيـر ماشـــاء الله موضوع شامل ؛ في منتهي الجمال ولاقيت إجابات لـــــكل الأسئلة اللي فـ دماغي بجد والله شرح جميل جداً << و دا مش جديد عليك يا محمود >> بس في سئوااااال ؟؟؟ إزاي الطالب يجهز نفسه للمنحة دي ؟؟ يعني يعمل آيه من دلوقتي علشان يجتاز المنحة ؟؟ ربنا يجعله في ميزانـ حسناتك تقبل تحياتي ... |
|
#5
09-04-2010, 07:22 AM
|
|||
|
|||
|
شكرا يا فامبير علي المعلومات الجامده دي
بس انا كنت عايز اعرف هو امتحانات النت والاكسل ..الخ زي icdl بلضبط فيها عملي يعني ولا مختلفه واختيارات |
|
#6
09-04-2010, 03:25 PM
|
||||
|
||||
|
انا مش فاهم حاجه انتوا بتبيعوا ايه هنا فى الموضوع ده
|
|
#7
09-04-2010, 05:44 PM
|
||||
|
||||
|
لو سمحت يا فامبير .. ..
ممكن تقولى أذاكر الأقتصاد منين ؟؟ أصل الكتاب كبير جداً أذاكر من ملازم [ س و ج ] ولا منين ؟؟ أصلي محتاااار جداً وبردوو عاوز أجيب مجموع # وربنا يوفقنا جميعاً |
|
#8
11-04-2010, 02:14 PM
|
||||
|
||||
|
اقتباس:
والله لو فيه امكانية اني كنت اعرف اجيب نموذج من الامتحان كنت جيبت عشان تشوف بنفسك |
|
#9
11-04-2010, 02:21 PM
|
||||
|
||||
|
اقتباس:
يالا ربنا يوفقك في الميد تيرم وابقى طمنا عليك اقتباس:
هيا الكلية كدا كدا طبيعي رشحتك لدخول الامتحان المؤهل لدراسة البرنامج كل اللي هاتعمله انك هاتطلع على مبنى الامتحانات الدور الرابع .. هاتتلاقى في كشوفات محطوطة دور على اسمك فيهم وان شاء الله أكيد هاتتلاقيه (ابقى دقق في الاسماء كويس عشان هما كتير) هاتتلاقى جنب اسمك ****** نمبر طويل كدا .. اكتبه و اوعى يضيع منك هاتتلاقي في الكشوفات على طول جدول الامتحان والتوقيتات بتاعته وشوف مواعيدك ايه .. ولما ييجي يوم الامتحان هاتروح لحتة اسمها معهد النظم والمعلومات التابع للقوات المسلحة ودا موجود في مدينة نصر (في الشارع اللي قدام طيبة مول مباشرة) هاتمشي في الشارع دا طوالى لغاية ماتوصل لبوابة رقم 6 .. خش منها وعيش بقى |
|
#10
11-04-2010, 03:41 PM
|
||||
|
||||
|
اقتباس:
الف شكر يا محمود بجد مش عارف اشكرك ازاى ( انا لسة مصمم على فكرة التمثال الى جنب العيوطى بدل المعارض الى واجعين دماغنا بيها دى  ) ان شاء اللة فى اقرب فرصة اطلع ادور على اسمى واعذرنى لو مشاركاتى قليلة عشان ظروف الامتحانات الى مبتخلصش دى  ادعولى بقى فى الميد تيرم عشان انا لسة طالع من امتحان math2  وصاية
__________________
انك لا تستطيع أن تشتري السعادة بكل أموال العالم لأن مملكة السعادة موجودة في فكرك ومشاعرك. |
|
#11
11-04-2010, 02:53 PM
|
||||
|
||||
|
اقتباس:
1- ازاي انك توصل لمرحلة ان اسمك يتحط في كشوفات المرشحين لدخول الامتحان ؟ 2- ازاي انك تعدي الامتحان نفسه ؟ السؤال الاول دا لازم انك تجيب جيد .. هاتقولي ليه هاقولك عشان انتا انتساب .. فانتا لازم تجيب جيد عشان تحول لانتظام واسمك يتحط ضمن المرشحين السؤال التاني دا بقى ماعتقدش اني هاقدر اجاوبك عليه لانه معتمد عليك انتا .. الامتحان معظمه عبارة عن تقييم للانجليش عندك يعني عندك مثلا امتحان الذكاء والاوفيس اللي في الاول دا كله بالانجليش فانتا لو اصلا مش فاهم السؤال اكيد هاتجاوب غلط وبالتالى مش هاتنجح غير كدا كمان الانترفيو اللي بيتعملك في الاخر خالص .. دا بقى مش عايز واحد بيفهم وبس لا دا عايز واحد على الاقل يعرف يفتح حوار ويتكلم في اي حاجة فهوا الموضوع كله معتمد على مستواك في الانجليش .. لو كويس ان شاء الله هاتعدى لو تعبان مش هاتعدي |
|
#12
11-04-2010, 02:56 PM
|
||||
|
||||
|
اقتباس:
بس الاختيارات اللي تحير بقى .. انا اللي فاكره من الامتحان بتاع الاكسيل دا عبارة عن شوية اسئلة متضمنة الاختصارات بتاعة البرنامج .. والمعادلات ازاي تجمع وتطرح وفي الوورد ازاى تحدد البراويز والمسافة بين السطر والسطر يعني لو تاخد بالك من الاسئلة عايزة واحد فاهم وبيتعامل مع البرامج دي |
|
#13
11-04-2010, 03:02 PM
|
||||
|
||||
|
اقتباس:
اقتباس:
عشان الاقتصاد عايز دماغ شوية .. المادة مش حفظ على طول .. لان جزئيات الرسومات دي بتبقى عايزة فهم فيه ناس بتحفظها بس بتتعب .. انا مش عايزك تحفظ الرسومات لا انتا ارسم الرسمة واشرحها بنفسك انا عن نفسي كنت بذاكر من الكتاب والمحاضرة وجيبت فيها 18 طبعا هاتقولى ازاااااااي دي مادة غبية ومعقدة .. هاقولك اني كنت بحضر وبركز اوي اوي مع الدكتور وبفهم دماغه ماشية ازاي لو عايز ملخصات السين وجيم هات مش مشكلة .. بس ماتعتمدش عليها كليا في المذاكرة الاهم المحاضرة والكتاب .. وخلى الملازم دي للتلخيص مش اكتر |
|
#14
12-04-2010, 03:21 PM
|
||||
|
||||
|
انا الحمد للة لقيت اسمى بس للاسف ميعاد الامتحان السبت الى جى وانا هخلص ميد تيرم على الخميس وبالتالى مش هيبقى عندى وقت اراجع اى حاجة فكنت عايز اسأل هل لو ماروحتش الامتحان السنادى اسمى هينزل فى المنحة السنة الى جاية
ولو روحت ولاقدر اللة مانجحتش اقدر ادخل المنحة السنة الى بعديها ولو نجحت وخدت ليفل معين اقدر السنة الى بعديها ادخل المنحة واخد اليفل الى بعدية ........ انا بجد مخنوق الى عامل الميعاد مش مراعى ان فى حاجة اسمها ميد تيرم وحاطط طلبة الانجلش كلهم يوم السبت بجد حاجة تخنق
__________________
انك لا تستطيع أن تشتري السعادة بكل أموال العالم لأن مملكة السعادة موجودة في فكرك ومشاعرك. |
|
#15
13-04-2010, 05:33 PM
|
|||||
|
|||||
|
اقتباس:
الجامعة مابقتش جامعة وربنا .. بقت عبارة عن حاجة زي ارض المعارض اللي في مدينة نصر كدا ووسط المعارض دي شوية مدرجات على شوية مباني عشان يبقى اسمها جامعة !! والأدهى والأمر تلاقيك ماشوفتش اللي حصل في يوم الافتتاح بتاع معرض الطلبة الوافدين دي جي وشباب وبنات بيرقصوا وحاجة لا تطاق والله اقتباس:
اقتباس:
اقتباس:
اقتباس:
بس عموماً حتى لو كان الميعاد صح انتا ماقدامكش اي اختيار تانى واللى هايمشى عليك هايمشى على باقى زمايلك اللى هايمتحنوا معاك برده يعنى مش انتا لوحدك اللى مش هاتلحق تذاكر |
| العلامات المرجعية |
«
الموضوع السابق
|
الموضوع التالي
»
العرض المتطور
|
|
جميع الأوقات بتوقيت GMT +2. الساعة الآن 10:09 AM.
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
Copyright ©2000 - 2024, Jelsoft Enterprises Ltd.
