تقرير عن حقوق انجليزى جامعة القاهرة

[silkhassan]

بسم الله الرحمن الرحيم
انا طالب دخلت كلية حقوق انجليزى جامعة القاهرة لسة فى سنة اولى حبيت اوضح شوية حاجات للى هيهدخلها و للاسف انا مكنتش اعرفها

انا شايف ان الكلية سيئة جدا جدا جدا

طبعا فى ناس هتعترض على الكلام ده

انا هقول عيوب الكلية و انتوا اللى تحكموا

فى حاجة لازم تخدوا بالكوا منها و هى ان الكلية دى بتاخد اقل مجموع فى الكليات الانجليزى يعنى حقوق انجليزى من 85 و تجارة انجليزى من 87 و سياسة و اقتصاد انجليزى من 94.5

عيوب حقوق انجليزى
1-مفيش معيدين (يعنى مفيش اعادة شرح و حل اسئلة و الاسئلة المتوقعة )
2-مبنى المدرج زبالة لو قارنتوه بتجارة انجليزى
3-الحمام بلدى و اوحش من حمام جامع او حمام مدرسة ابتدائى
4-الدكاترة بيشرحوا فى السريع من كبر حجم المنهج
5-المناهج كبيرة جدا (على سبيل المثال : الترم الاول انت بتاخد 4 مواد : تاريخ قانون - احوال شخصية لغير مسلمين - مدخل قانون - قانون دستورى . تاريخ قانون دى كتابين على بعض 350 صفحة و احوال شخصية 250 صفحة و قانون دستورى 250 صفحة و مدخل قانون كتابين 600 صفحة و الترم التانى 6 مواد شريعة اسلامية 700 صفحة (كتابين ) political system لدكتور جان لوكا (ايطالى ) بيتكلم انجليزى بس تقريبا 100 صفحة انجليزى بس المشكلة انك هترجمهم و مادة international organization كتاب 500 صفحة انجليزى و هترجمهم و مادة anglo american 40 صفحة انجليزى و مادة criminology and penology دى صغيرة بس المشكلة فى الترجمة و مادة economics دى مش هتفهما اصل دى المادة الوحيد اللى فهم الباقى كله كلام مرصوص )

6-انت بتتخرج من كلية حقوق انجليزى قدامك 5 طرق : الاولى : نيابة (وسطى) الثانية : تبقى دكتور (دى عايزة مذاكرة كتير ) الثالثة : محامى (و دى مفيش اكتر منها ) الرابعة : شئون قانونية فى شركات و عمل عقود (وسطى ) الخامسة : المنظمات الدولية (وسطى )

اللى انا اقصده من ده ان الشغل فيها مش مترمى اوى يعنى زيه زى تجارة انجليزى . لكن بتاع تجارة انجليزى عدى الاربع سنين لعب لكن انت هتتفحت فى الاربع سنين

7-اتحاد الطلبة انت بتشترك فيه مع حقوق عربى يعنى بالعربى شبه استحالة طالب من حقوق انجليزى يدخل انحاد الطلبة لان بتوع عربى و هما الاغلبية استحالة يختاروا بتوع انجليزى

8-الدفعة كلها بتاخد مع بعض اه الدفعة 178 واحد بس فيه عيب وهو مثلا لو غبت عن محاضرة مش هينفع تعوضها فى مجموعة تانية لان مفيش مجموعات . الدفعة كلها مع بعض

9-مصاريف الكلية 5150 ج و للاسف مش بناخد خدمات كلية هندسة اللى مصاريفها 300 ج

10-انسى حاجة اسمها امتياز نهائيا من صعوبة الكلية

11-فى ارض الواقع مفيش فرق بينها و بين عربى : انت بتاخد 10 مواد 5 عربى و 5 انجليزى ( تعالى نعرف 5 انجليزى الاولى هى criminology and penology و دى بتوع عربى بياخدوها و اسمها علم اجرام و عقاب وللحد كبير نفس المنهج مع فرق اللغة و المادة الثانية international organization و دى بياخدوها بالعربى اسمها تنظيم دولى نفس المنهج مع فرق الترجمة الباقى بس فعلا اللى فيه فرق يعنى انت داخل كلية عشان فرق فى 3 مواد لكن تجارة انجليزى فى فرق فى كل المنهج

12-مفيش ميد ترمات (عشان تحدد مستواك و عشان تشوف شكل الامتحان و تستعد له )

13-مفيش اعمال سنة (حضور-مشاركة-ميد ترمات الخ ) المادة من 20 يعنى المفروض تجيب 20 عشان تقفل لوحدك او 10 على الاقل عشان تنجح

14- الامتحان اسئلته قليلة بس السؤال اجابته كبيرة قوى لدرجة ان عادى الطالب اللى يجيب جيد جدا بيخلص ورقة الاجابة


خد بالك من حاجة لما تيجى تسأل عن الكلية اوعى تسأل اللى فى الكلية (ما عدا انا ) لان عموما فى فكر للاسف موجود فى مصر وان مفيش كلية وحشة و اى واحد فى كلية استحالة يقولك انها وحشة حتى و لو وحشة فعلا لانه بيصبر نفسه لحد ما يكدب الكدبة و يصدقها

قبل ما تخش حقوق انجليزى شوف بنفسك تجارة انجليزى او سياسة و اقتصاد انجليزى


انا ندمان على دخولى كلية حقوق انجليزى للاسف صدقت الكلام بخصوص ان دى كلية العظماء و كلية الوزراء انا عايز ارد على الحتة دى شوف كام واحد محترم اتخرج منها وشوف كام واحد متبهدل فى حياته


انا حاليا بفكر اسبها و اعيد السنة و احول سياسة واقتصاد انجليزى او تجارة انجليزى


بالنسبة للورق :
مواد الترم الاول (العربى ) هتلاقى ملازم بتباع فى مكتبة المتحدة و القبة (دى تراجع منها فقط يعنى لازم تذاكر من الكتاب )
مواد الترم الثانى شوف ورق دروس للمواد الانجليزى او ممكن تاخد درس ب 65 ج او 75 ج

طبعا الشريعة لازم هتذاكرها من الكتاب


لو فيه اى استفسار انا هبقى ارد

ويارب اكون قدرت لوصلكوا الحقيقة كاملة

[zizoninja]

اية يا عمنا فاتتتتح علي البحري لية كدة خييييير مش قوي كدة انا قرفان منها اكتر منك بس اقولك اية احسن من تجارة انجليش1000000000000 مرة
لييييييييييييىة ؟؟
علشان اولا انت زي مقلت الطلاب 170 واحد تجارة انجليش 1300 واحد
وهما برضو محتاجين تقديرات عشان يشتغلوا مهو مش معقول حاخد واحد مقبول وانا قدامي جيد و جيد جدا دووول اكتر من 1300 في القاهرة بس قوللي بقي كام شركة وكام بنك حيستوعبو ال 1300 مع العلم دي جامعة القاهرة بس وحقوق انجليزي فرصك احسن لية
عشان انت موجود في 7 جامعاااات بس في مصر كلها
اما تجالرة انجليزي موجود في 14 جامعة حكومية غير الخااااصة الي مالي البلد بزنز في كل جامعة
صح ولا اية هما عندنا شوية اهماااال كبير بس ان شاء الله يتعدل

[نو نيم]

اانا جبت 78 وعلمى ممكن احصل كلية حقوق انجليزى او عربى؟؟؟

[silkhassan]

العدد عمره مايبقى مشكلة الا لو مفيش فرص عمل انا هقولك فرص عمل تجارة انجليزى :
مصانع - بنوك - شركات (جميع التخصصات) حسابات (مدارس - جامعات - محلات ) - بورصة - سياحة - زراعة -صيد . انا عايز اقولك مفيش مؤسسة او شركة فى مصر بدون خريجى تجارة . اه العدد كبير بس الفكرة ان فرص الشغل كتييييييييييييييييييييييييييير جدا بالنسبة لحقوق انجليزى

كل تجارة انجليزى حكومة تعلم على الخاص عشان كدة عمر ما بتاع الحكومة ما يبقى زى الخاص . الفكرة لو معاك وسطى هدوس فى الاتنين لكن من غير وسطى حكومة احسن



و على فكرة مفيش فرق بين حقوق انجليزى و عربى يعنى انت بتقارن مع عربى فى كل الكليات و الجامعات و ده طبيعى ان احنا بناخد القانون المصرى زى بتوع عربى فى الاساس



احنا الاهمال سمة تتسم بها كلية حقوق عربى و انجليزى و عمرها ما تتغير . انا اعرف ناس دخلوا الكلية و اتخرجوا و هى زى ما هى زبالة




ده حاجة عادية انك تقول ان الكلية احسن من تجارة انجليزى عشان تصبر نفسك بما ابتليت

الفكرة انا و انت لبسنا . ما تلبسش حد معانا فى الكلية السيئة دى



برده اخرة كل العيوب فى حقوق انجليزى الباقية جعلها رقم واحد فى الاهمال و الضياع و السوء

على فكرة فى 12 حقوق انجليزى فى مصر اشهرهم : القاهرة - عين شمس - اسكندرية

[silkhassan]

مستحيل حقوق انجليزى اما عربى ممكن

[zizoninja]

بص يا كبيير حقوق انجليزي موجودة في 7 جامعااااااات بس في مصر كلهاااااا
ثانيا جميل اوي الي انت قلتة عن تجارة ان ما فيش حاجة مش محتاجة تجارة وبردة مفيش حاجة مش محتاجة مستشار قانوني سواء بقي مصنع ولا شركة ولا حتي مدرسة ولا هو في اي جهة في مصر او العالم حتي شغالة بمحاسب بس من غير مسئول قانوني لو فية حتي مدرسة ياريت تقولي اية و ازاي و فيييين

[zizoninja]

اة وفي حاجة كمان نسييييت قولها بص هو اكيد الرزق بتاع ربنا وكل حاجة لكن انت لما تلاقي ناس موجديييين بكثرةةة سواء عربي او انجليزي في تجارة حتاخد اكيييد المتفوقييين بس ولا اية لاكن لما تكون الدفعة محددودة اكيد اكيد فرصك احسن امال لية بقي كلية اعلام و سياسة واقتصاد قمة عشان محدودين ققدر بردة ققلك ان حقوق انجليزي محدودة في مصر كلها 7 جامعااات بس ةفرص شغلهها انا حكتبهااا وموسعة كمااان

[zizoninja]

تعالي نتكلم شوية عن مجالاات العمل و عاييييز اي حد يقرا الموضوع دة يبص علي الكومنت دة
اولا لو بتقدييير ممكن تشتغل في النيابااات بانوعها زي الادارية والعامة ومجلس الدولة و هيئة قضايا الدولة
وكمان ليييك الشغل كمستشار قانوني في شركات و بنوك اجنبية بياخدو بتوع انجليزي وليك افضلية
وكمان في الخارجية وليك اولوية عن سياسة و اقتصاد وسئال اي حد
وكمان في مكاتب التحكيم الدولية و المحاماة الدولية
وكمان بقي لو حتي حبيت تشتغل في شغل تجارة الي اي موءهل عالي ممكن يشتغل فية زي الhr و الmarkting فا دة عن طريق دبلومممة وممكن ةتاخدها

[zizoninja]

وكمان انت قلت انها زس عربي طيب انا بقي حقلك العكس تماما لا دي تجارة هي الانجليزي زي العربي انت كحقوق انجليزي مختلف تماااااما عن عربي انت اة بتدرس القانون المصري زي عربي بس انت عندك مواااد كاملة مختلفة زي الanglo و مواد التحكيم الدولي مثلا

[silkhassan]

اللى لاحظته فى ردك انك مش مختلف معايا ان الكلية صعبة طوال الاربع سنوات و ان اخر شىء يمكن الحديث عنه هى الخدمات

و اختلفك معى بخصوص العمل جميل

السؤال : لو افترضنا ان فرص عمل الكلية معقولة . هل فعلا الكلية و العمل يستحق المعاناة التى تعانيها فى كلية حقوق . بمعنى ادق هل العمل مريح و كويس و بيدى فلوس لدرجة انك تبهدل نفسك و تستحمل كم من المعاناة و انت شايف اصحابك فى تجارة انجليزى عايشين حياتهم و الحياة حلوة و سهلة و لطيفة و مفيش مشكلة ؟؟؟

انت ليه قولت على تجارة انجليزى و عربى برده حقوق انجليزى و عربى و فيها ناس كتيييييييير

بخصوص العمل :

عموما اى واحد فى اى كلية جاب تقدير هيلاقى شغل ليه ؟ لانه هيبقى احسن و احد فى اللى معاه . يعنى لو انت جايب امتياز فى اى كلية . انت المفروض هتتعين و تشتغل قبل كل الناس اللى جايبة جيد جدا و جيد و مقبول و ده فى كل الكليات

فكرة انك تقول تجيب تقدير دى فكرة مش سليمة لان اى حد فى اى كلية جاب تقدير هيلاقى وظيفة يعنى التقدير مش مرتبط بحقوق

النيابة (واسطى )

مستشار قانونى فى شركات زيك زى بتاع عربى الا لو هتشتغل فى شركات

multi national ودى طبعا وسايط و كمان نفس فرصتك زى فرصة تجارة انجليزى فى الشغل

انا اختلف معاك فى موضوع السياسة .اكيد كلية سياسة و اقتصاد دارسين بشكل اوسع و على فكرة برده عايزة وسطى

موضوع التحكيم الدولى ده عايز تعمل دبلومة فى التحكيم الدولى و بكدة هتدرس . لو انت فى تجارة انجليزى و عايز تدرس MBA ماجستر تجارة

فى اختلاف جذرى بين مواد تجارة انجليزى و تجارة عربى و مش مجرد ترجمة زى المنظمات الدولية

الاختلاف الحقيقى بين حقوق عربى و انجليزى زى ما قلت anglo و دى عايزة حاجة من الاتنين يا وسطى يا دراسة

اللى اقدر اقوله ان مفيش فرق فى شغل تجارة و حقوق انجليزى (من حيث وفرته) لكن بالنسبة للدراسة و الخدمات . تجارة انجليزى لا يمكن مقارنتها بحقوق انجليزى من حيث الخدمات

[student/salma]

انا جايبا 82.5ممكن ادخل حقوق انجليزي او تجارة عين شمس انجليزي او اي الحجات الانجليزي المتاحة ليا؟لو سمحت ردوا عليا انا مرحل تانية و مش عارفة اعمل ايه؟

[silkhassan]

تجارة انجليزى عين شمس او حلوان ان شاء الله

[student/salma]

شكرا علي الاجابة بس كان عندي استفسار تاني هي تجارة انجليزي عين شمس نفس مستوي تجارة انجليزي جامعة القاهرة عشان الفرق في المجموع بيبقي كبير؟و كمان هي جامعة عين شمس احسن اني ادخلها و لا جامعة من الجامعات الخاصة,في الشههادة يعني,و شكرا

[silkhassan]

تجارة انجليزى القاهرة لا تفرق كثيرا عن عين شمس و اكيد تجارة انجليزى احسن من اى جامعة خاصة ما عدا طبعا الجامعة الامريكية

[ليااان]

انا جايباه 90%علمى ودرجة الانجليزى 44 ممكن الحق حقوق انجليزى؟؟؟؟؟؟؟؟؟