نصيحة طالب جامعى لطلبة علمى رياضة اللى مجبوش مجموع هندسة

[X-Lance]

للأسف طلبة الثانوية العامة مبتعرفش الكلام ده الا لما بتدخل الجامعة .. أنا فى تجارة انجليش عين شمس و عايز أقولكم ان فرص العمل عندنا أحسن حتى من هندسة .. خصوصا بالنسبة للطلبة اللى بيجيبوا جيد جدا و امتياز .. و عايز أقولكم ان مفيش حاجة اسمها كليات قمة .. القمة ان أنت تتميز فى كليتك أيا كان اسمها .. و نصيحة لطلبة علمى رياضة اللى مجبوش مجموع هندسة حكومة .. فكر كويس و اهدى قبل ما تقرر تدخل هندسة خاصة و اعرف كل كلية بتدرس ايه الأول عشان ممكن تلاقى مجالات تانية كتير تكون أنت حاببها أكتر و عارف انك هتتميز فيها عن باقى الناس .. و أوعى تدخل هندسة عشان اسمها .. انك تتميز فى كليات تانية عن باقى الناس أحسنلك بكتيير انك تدخل هندسة و تجيب مقبول بالعافية كل سنة



أنا كنت نفسى أدخل هندسة و كنت زيكم كده بالظبط و أكتر .. بس لما مجيبتش مجموع هندسة حكومة ابتديت أفكر ايه البدايل و أعرف أكتر عن الكليات التانية بتدرس ايه بالظبط و لما اتخرج ممكن أشتغل فى ايه و ايه فرص العمل بتاعة الكلية دى .. و بالنسبة ليا أكتر كلية شدتنى بعد هندسة كانت تجارة انجليش رغم ان مجموعى كان يجيب حاسبات و معلومات لكن أنا عشان مش بحب شغل الكومبيوتر و البرمجة و عارف انى مش هتفوق فى المجال ده فرفضت ان أنا أدخلها رغم ان هى بتاخد أعلى مجموع بعد هندسة



لكن سمعت بعد كده عن تجارة انجليش و ساعتها كان أول حاجة اسأل عنها هى شغلها و فرص العمل بتاعتها و عرفت ان اللى بيتفوق فيها و بيجيب تقدير عالى و اللى بيكون فاهم جدا الحاجات اللى درسها فى الكلية* بيكونوا أكتر ناس مطلوبين فى البنوك و الشركات و خصوصا انهم دارسين كل حاجة بالانجليش و اللى مش مصدقنى يسأل أى حد كبير عن شغل تجارة انجليش



أنا مش بقول للناس انها تدخل تجارة انجليش , لكن بقولكم فكروا كويس قبل ما تختاروا هندسة خاصة , و بحاول أقدملكم بديل تانى عن هندسة بجانب حاسبات و معلومات , أنا لما دخلت تجارة انجليش اكتشفت ان الكلية دى بتدرس فيها مواد كتيير جدا و متنوعة بجانب المجال اللى أنت هتكمل فيه



بصراحة مقدرش أقولكم ان تجارة انجليش كلية سهلة لأن مفيش حاجة اسمها كلية سهلة أو كلية صعبة , و مقدرش أقولكم برضو انك لما تخش الجامعة هترتاح بقى من ثانوية عامة , من الأخر لو هتريح فى الجامعة أيا كانت الكلية مش هتجيب تقدير و مش بقولك برضو انك تقضيها مذاكرة , أنا بقولك طالما أنت حابب الحاجة اللى أنت بتدرسها و بتجتهد و بتذاكر يبقى سيب الباقى على ربنا



أنا عن نفسى اكتشفت فى نهاية أول سنة ليا انى لو كنت جيبت مجموع هندسة و دخلتها كنت هتعب جدا و هفشل فيها لسبب واحد , انى بكره الفيزياء و هندسة كلها فيزياء و رياضة . و فى نفس الوقت حسيت انى اتعلمت حاجات كتير أوى فى تجارة انجليش بالذات لما تكون بتدرس كل المواد بلا استثناء بالانجليش



حاول لما تدخل الكلية مايكونش هدفك الأول انك تجيب تقدير و خلاص , لأن اللى بيفرق بين الناس مش التقدير بس , التقدير و الفهم , لازم تكون فاهم جدا اللى أنت بتدرسه عشان ده اللى هيكمل معاك بعد كده , و صدقونى ثانوية عامة مش أخر الطريق , بالعكس دى بداية الطريق و هتعرفوا الكلام ده كويس لما تدخلوا الجامعة , ياما ناس كانت جايبة مجاميع كبيرة جدا و دخلت هندسة و مقدرتش تتفوق فيها , اللى عايز يتفوق فى هندسة لازم يكون متميز جدا فى الرياضة و الفيزياء بصفة عامة على كلام زمايلى اللى فيها



أخير بالنسبة لتنسيق تجارة انجليش , أنت أولا فى التنسيق بتقدم على تجارة عادى. بعد ما تقبل فيها بتقدم جواها على انجليش و بيتعمل تنسيق داخلى فى الكلية على اللى هيقبلوه و لازم تكون جايب درجة عالية فى الانجليزى بتختلف من سنة لسنة و من جامعة لجامعة يعنى ممكن يكون مطلوب منك 45 أو 42.5 و التنسيق بتاعها طبعا بيختلف برضو من سنة لسنة يعنى السنة اللى فاتت مثلا تجارة انجليش عين شمس كانت واخدة 87.5% أدبى و 90.5% علمى و ده اسمه مجموع اعتبارى له حسبة كده معينة

أتمنى أكون أفدتكم و أى استفسار على أى حاجة أنا تحت أمركم

[هشام إرهى]

طمنتنى اووووووووى كلام ف الجون

[sahar2012]

ممتاز جداً وكلام منطقى

[سامياتى]

ربنا يكرمك زى مابتفكر فى غيرك وتنصحه
اسأل الله العليم الخبير ان يرزقك من حيث لاتحتسب وان يوفقك فى كل خطوات حياتك

سؤالى هو ابنى حصل معاه بالظبط الكلام اللى قلته وبفكر فى تجاره انجلش القاهره بس قلقانه اكتب فى التنسيق تجاره بس وبعدين الاختيار لانجلش متجيش يبقى مقلب كبير
مجموع سنه تالته الاعتبارى هو 415 فهل ممكن تيجى ولا لآ
مع الشكر

[a7medl0vers]

المشاركة الأصلية كتبت بواسطة سامياتى

ربنا يكرمك زى مابتفكر فى غيرك وتنصحه
اسأل الله العليم الخبير ان يرزقك من حيث لاتحتسب وان يوفقك فى كل خطوات حياتك

سؤالى هو ابنى حصل معاه بالظبط الكلام اللى قلته وبفكر فى تجاره انجلش القاهره بس قلقانه اكتب فى التنسيق تجاره بس وبعدين الاختيار لانجلش متجيش يبقى مقلب كبير
مجموع سنه تالته الاعتبارى هو 415 فهل ممكن تيجى ولا لآ
مع الشكر

بالنسبه للمجموع الاعتباري ده لتجاره انجلش عين شمس يجي اساسي ويخش وهو حاطط رجل ع رجل وبالنسبه انه لو دخل عربي وملحقش انجلش يقدر يعمل تحويل ورقي بعد كده مفيش مشكله خالص
لكن بالنسبه لتنسيق القاهره ياريت يسئل اي حد من القاهره برده وانا ليا واحد كان جايب اقل منه ودخل القاهره بس فرع الشيخ زايد

[X-Lance]

المشاركة الأصلية كتبت بواسطة سامياتى

ربنا يكرمك زى مابتفكر فى غيرك وتنصحه
اسأل الله العليم الخبير ان يرزقك من حيث لاتحتسب وان يوفقك فى كل خطوات حياتك

سؤالى هو ابنى حصل معاه بالظبط الكلام اللى قلته وبفكر فى تجاره انجلش القاهره بس قلقانه اكتب فى التنسيق تجاره بس وبعدين الاختيار لانجلش متجيش يبقى مقلب كبير
مجموع سنه تالته الاعتبارى هو 415 فهل ممكن تيجى ولا لآ
مع الشكر

هو بصراحة مش هقدر أفتى اذا كانت هتيجى أو لأ لسبب واحد .. ان التنسيق بيختلف من سنة للتانية و من جامعة لجامعة .. و مقدرش حتى أقولك انه ضمن انه يقبل فى تجارة انجليش عين شمس أو القاهرة لنفس السبب

يعنى مثلا السنة اللى فاتت كانت تجارة انجليش عين شمس بتقبل من علمى لحد مجموع اعتبارى 90% لكن السنة اللى قبلها كانت واخدة مجموع اعتبارى 91.5% , يمكن الفرق ده لأنهم ضاعفوا عدد الطلبة المقبولين عندنا فى عين شمس

لكن القاهرة السنة اللى فاتت كانت واخدة أكتر من 91% , فهو الموضوع معتمد على عدد الطلبة المتقدمين لتجارة انجليش فى كل جامعة اللى بيتغير كل سنة فهو معتمد بشكل كبير على التوفيق , بس أنا شايف فرص ابن حضرتك فى عين شمس أحسن من القاهرة لأن عدد المقبولين فى عين شمس زاد الضعف تقريبا

و ربنا يوفقوا ان شاء الله و يقبل

[X-Lance]

المشاركة الأصلية كتبت بواسطة سامياتى

ربنا يكرمك زى مابتفكر فى غيرك وتنصحه
اسأل الله العليم الخبير ان يرزقك من حيث لاتحتسب وان يوفقك فى كل خطوات حياتك

سؤالى هو ابنى حصل معاه بالظبط الكلام اللى قلته وبفكر فى تجاره انجلش القاهره بس قلقانه اكتب فى التنسيق تجاره بس وبعدين الاختيار لانجلش متجيش يبقى مقلب كبير
مجموع سنه تالته الاعتبارى هو 415 فهل ممكن تيجى ولا لآ
مع الشكر

و ليه فرصة برضو انه يدخل جامعة القاهرة فرع الشيخ زايد

[ahmed rashad 1991]

ربنا يكرمك زى مابتفكر فى غيرك وتنصحه

[X-Lance]

المشاركة الأصلية كتبت بواسطة هشام إرهى

طمنتنى اووووووووى كلام ف الجون

المشاركة الأصلية كتبت بواسطة sahar2012

ممتاز جداً وكلام منطقى

المشاركة الأصلية كتبت بواسطة ahmed rashad 1991

ربنا يكرمك زى مابتفكر فى غيرك وتنصحه

أنا عارف كويس الموقف اللى أنتوا فيه دلوقتى و حاسس بيكم لأنى كنت زيكم و أكتر لأن هندسة فرقت معايا على 0.2% فحبيت أطمنكم مش أكتر
و أنتوا بعد ما تخلصوا أول سنة فى الجامعة هتعرفوا الكلام ده كويس و أنتوا اللى هتنصحوا الناس الجديدة

[ahmed rashad 1991]

لوسمحت ايه هو المجموع الاعتبارى ؟؟ وبيتحسب ازاى ؟؟

[X-Lance]

المشاركة الأصلية كتبت بواسطة ahmed rashad 1991

لوسمحت ايه هو المجموع الاعتبارى ؟؟ وبيتحسب ازاى ؟؟

المجموع الاعتبارى زى ما قال أحمد كده :

المجموع الكلى + مجموع الانجلش مره تانيه + المستوى الرفيع لو كان انجلش من بعد 5 درجات

يعنى مثلا أنت جايب 379 و جايب فى الانجليش 47 و واخد مستوى رفيع انجليزى و جايب فيه مثلا 7.5 فأنت بتجمع 379 + 47 + 2.5 فيبقى مجموعك الاعتبارى 428.5 و اجمالى المجموع من 460 فكده يبقى مجموعك الاعتبارى 93.1%

[a7medl0vers]

ابن دفعتي xD
المجموع الاعتباري لانه هو موضحش
المجموع الكلي + مجموع الانجلش مره تانيه + المستوى الرفيع لو كان انجلش من بعد 5 درجات

والانجلش مطلوب 42.5 هو السنه اللي فاتت نزل ل 40 بس معتقدش انه هينزل السنه دي ولو نزل خير ليكم لان اكتر الدكاتره اشتكت من ان الدرجه تنزل ل 40 وبالتوفيق ليكم جميعا

[eng.mooon]

صح الصح
انا ف أولى حاسبات عين شمس
وبصراحه داخل الكليه تنسيق
بس لما دخلت لقبت دفعتنا 630 منهم 170 لاحقين هندسه وداخلين حاسبات
كنت مستغرب شويه ف الأول .. بس بعد كده عرفت ان الناس دى بتفهم وداخلين مجال بيحبوه
بعد ما دخلت الكليه نسيت الدنيا والهندسه وكل حاجه وحبيت الحاسبات جداً
بس مشكله الناس جهلهم بالكليه
محدش عارف احنا بندرس ايه ولا بنعمل ايه
الترم الأول كله فيه ماده واحده اللى خاصه بالكمبيوتر
والترم التانى هكذا وباقى المواد فيزيا وماث و الكترونيات
ولما كنت بقارن المناهج مع زمايلى اللى ف هندسه لقيت تقريبا نفس المناهج
ف لازم كل واحد ربنا يختارله مجال .. لازم يحب المجال ده عشان يمشى فيه
وربنا مبيخترش لحد حاجه وحشه

[X-Lance]

المشاركة الأصلية كتبت بواسطة eng.mooon

صح الصح
انا ف أولى حاسبات عين شمس
وبصراحه داخل الكليه تنسيق
بس لما دخلت لقبت دفعتنا 630 منهم 170 لاحقين هندسه وداخلين حاسبات
كنت مستغرب شويه ف الأول .. بس بعد كده عرفت ان الناس دى بتفهم وداخلين مجال بيحبوه
بعد ما دخلت الكليه نسيت الدنيا والهندسه وكل حاجه وحبيت الحاسبات جداً
بس مشكله الناس جهلهم بالكليه
محدش عارف احنا بندرس ايه ولا بنعمل ايه
الترم الأول كله فيه ماده واحده اللى خاصه بالكمبيوتر
والترم التانى هكذا وباقى المواد فيزيا وماث و الكترونيات
ولما كنت بقارن المناهج مع زمايلى اللى ف هندسه لقيت تقريبا نفس المناهج
ف لازم كل واحد ربنا يختارله مجال .. لازم يحب المجال ده عشان يمشى فيه
وربنا مبيخترش لحد حاجه وحشه

للأسف ناس قليلين اللى بيكونوا عارفين الكلام ده و هم لسه فى ثانوى
بس الغلط مش فيهم , الغلط فى الأساتذة و الأهالى اللى ثبتوا فى دماغهم فكرة كليات القمة
و انهم لازم يدخلوا الكلية اللى بتاخد أعلى مجموع و الغلط برضو فى نظام التعليم الفاشل اللى فى مصر
لما يكون واحد مشكلته الفيزياء و جايب فيها مجموع مش كويس و مش بيحبها لكن جايب فى باقى المواد درجات عالية و فى الأخر يدخل هندسة
هيكتشف بعد كده ان هندسة أصلا رياضة و فيزياء لكن هو داخلها عشان يبقى مهندس مش أكتر
لو كل واحد اتعرف على كل الكليات و اختار الكلية اللى عارف انه هيتفوق فيها
ساعتها مش هتلاقى حد شغال فى غير مجاله

[victor222]

طيب على كده اللى واخد مستوى عربى يضيف عادى فى المجموع الاختيارى ولا لا ولو كان لا كده المجموع هيقل هل ده هيبقى ليه مجموع خاص ولا هيعدوها