يوميات شحات

[H.H.KH]

سلام عليكم ورحمة الله وبركاته
أنا قرأت المدونة ديه وعجبتنى جدا يارب تعجبكم كمان
المهم ابدأ بقى

مقدمة
شيء طبيعي جدا أنكم تشوفوا شحات في أي مكان مهما كان صحرا إن كان أو بستان لكن اللي مش طبيعي إنكم تشوفوا شحات هنا بينكم على النت , و ليه لأ هو الشحات ده مش بني أدم زيكوا و لا إيه . محدش يستغرب سيزول العجب حالا لما أحكيلكم قصتي....
أنا شاب عادي جدا حاصل على مؤهل جامعي . منذ خمس سنوات ذهبت لأصلي المغرب في أحد المساجد القريبة من منزلي و بعد الصلاة وجدت شاب لابس جلابية بيضة و في يده كيس قسطرة البول وواقف يشحت , و ما أن رآني هذا الشاب الا و أرتبك و أدار وجهه بسرعة , لكني عرفته , هذا الشاب كان يعمل معي في نفس الشركة التي عملت بها لمدة سنة و التي تقع في أحد محافظات الوجه البحري , مصدقتش عنية , لكن إرتباكه عندما رآني أكد لي أنه هو , لكن حاجة غريبة الولد ده كان متعلم تعليم متوسط و كان إنسان كويس و عادي...
لكن اللي بيعمله ده مش شحاتة , ده نصب رسمي .
قلت لنفسي إن كونه ذهب الى بلد آخر محدش يعرفه ده كويس لكن اللي مش كويس أنه ينصب و يدعي المرض و من هنا تبدأ قصتي , قررت أن أكون شحات فقط لا أدعي مرض ولا أكذب فقط أقول أني فقير و محتاج مساعدة و ده حقيقي و قررت أن يكون المكان الذي أشحت فيه بعيد جدا عن مقر سكني...
أنتظروا بقية قصتي و يومياتي
منقول

[عاشق البلانكو الابيض]

شكلها قصة جميلة فى انتظاااااارك

شكرررا على الموضوع

[H.H.KH]

المشاركة الأصلية كتبت بواسطة عاشق البلانكو الابيض

شكلها قصة جميلة فى انتظاااااارك

شكرررا على الموضوع

العفو..........وشكرا لمرورك .........وان شاء الله هتعجبك

[نقاء الروح]

قصة جميلة جدا ..
متشوقة اوي لتكملتها
بانتظاارك ياقمر وهتابعها معاكِ ان شاء الله
بس مكانها القسم الادبي

[H.H.KH]

المشاركة الأصلية كتبت بواسطة نقاء الروح

قصة جميلة جدا ..
متشوقة اوي لتكملتها
بانتظاارك ياقمر وهتابعها معاكِ ان شاء الله
بس مكانها القسم الادبي

ما انا بعد ما عملت الموضوع افتكرت برده ان مكانها القسم الادبى..........وان شاء الله لما تتابعيها هتعجبك وشكرا لمرورك يا قمر

[H.H.KH]

(2)

إن شحت إشحت جمل

زي ما قلت في المقدمة إن أنا قررت أن أكون شحات و لكن لا أكون متمارض و لا نصاب و قررت طبعا إني أشحت في مكان بعيد لا يعرفني فيه أحد . أيضا جلست مع نفسي و فكرت أني أضع بعض المباديء و الأسس اللي همشي عليها في مستقبل هذه المهنة الجديدة
بدأت أول حاجة منطلقا من مبدأ إن شحت إشحت جمل أن أكون شحات خمس نجوم يعني أنا معرفش أكون شحات تقلديدي زي الشحاتين اللي هدومهم مبهدلة و شكلهم وحش يعني المفروض أني أكون بلبسي العادي على طبيعتي المعنى التاني لخمس نجوم هما الناس اللي هشحت منهم لازم يكونوا ناس أغنياء جدا لأن أنا ميصحش أشحت من واحد زيي أو أفقر مني و كمان الناس الأغنية بيعطوا فلوس أكثر
الحاجة اللي كنت برضوا حريص عليها هي إني متبهدلش , يعني ميتقبضش عليا تحري و يتعملي محاضر تسول لأن أنا عمري ما دخلت قسم شرطة و الحمد لله . مشكلة تانية كنت عاملها حساب هي إن بطاقة الرقم القومي بتاعتي مكتوب فيها حاصل على بكالوريوس و لو لاقدر الله حصلي أي مكروه هبقى مادة إعلامية و هتفضح بين كل اللي يعرفوني .
برضو قبل البداية في أي شيء حددت طريقة الشحاتة أن تكون بسيطة جدا , إني أقول للشخص مباشرة إني محتاج مساعدة و بدون أي لف و لا دوران و لا أي أفلام من اللي بيعملها الشحاتين العاديين , كان عندي إحساس إني إنسان متعلم و هكون أفضل من جميع الشحاتين التقليديين
كنت عارف و متأكد أن مش بسهولة إني أتواجد داخل مجتمع راقي و أمارس الشحاتة بدون أي مشاكل و علشان كده قررت قبل البدأ الفعلي أن أعمل حاجة زي دراسة جدوى للمشروع و حددت لنفسي 60 يوم لكي أدرس كل شيء عن هذه المهنة من جميع نواحيها
بصراحة كنت خايف جدا أني أقدم على هذا المشروع , لدرجة إني أثناء دراستي للموضوع ده كنت بحلم بليل و كان بيجيلي كوابيس.
بدأت بموضوع تغيير المهنة في البطاقة و كان أسهل مما كنت متخيل , غيرتها من حاصل على بكالوريوس الى عامل عادي
عرفت معلومة أنه شرط أساسي أن أنا لازم يكون ليا حد يحميني و عرفت كمان أن الموضوع ده ديته فلوس , و لكني مكنتش مقتنع بالموضوع ده , جايز يكون صح في حالة الشحاتين اللي لهم أماكن محددة بيشحتوا فيها لكن أنا كان تخطيطي خلاف ذلك
أثناء عمل الدراسة للموضوع ده عرفت حاجات كتير عن عالم الشحاتين و أصبحت الخطوط العريضة للموضوع أكثر وضوحا لي ,
و السؤال اللي بيطرح نفسه دلوقتي أزاي عملت الدراسة دي و حصلت على نتائج ؟
الموضوع بسيط جدا زي أي سيرفاي عادي و أسهل كمان , بدأت بمواقف السيارات الأجرة , كان عندي معلومة قديمة أن السواقين اللي في المواقف عارفين أصل و فصل معظم الشحاتين اللي في الموقف , فقط أركب جنب السائق و أقول إنطباعي على أحد الشحاتين الموجودين في الموقف . و هو ما يصدق يبدأ يحكيلي عن أصله و فصلة فمثلا كان في الموقف شحات يده اليسرى مشلولة و عرفت أنها لا مشلولة و لا حاجة و أن الشحات ده بالذات عنده زريبة مواشي كبيرة . شخص أخر كان أكبر سنا و كان تخصص مناديل عرفت أنه عنده بيت أربعة أدوار و عايش عيشة كويسة , و طبعا الشحاتين اللي من هذا النوع مظبطين نفسهم لكن الأمر ميسلمش من محاضر تسول أو تشرد لكن نادرا ما يحدث
عرفت حاجات كتيرة عن الشحاتين و ممكن أبقى أقول بعض التفاصيل في سياق الكلام إذا احتاج الأمر , لكن أهم معلومة خرجت بيها من هذه الدراسة أنه توجد فجوه في الشحاتين الخمس نجوم تماما كما توجد أزمة في الخادمات المؤهل العالي اللي البعض بيسميهم مديرة منزل .
الموضوع ده كان سنة 2005 تقريبا شهر أبريل أو مايو كان إبني الوحيد عنده 3 سنوات و نصف و كنت قد تركت العمل في أوائل سنة 2005 بسبب المدير الجديد اللي كرهني في الشغل و أجبرني على ترك العمل و الأستقالة و زوجتي إنسانة طيبة و بنت ناس و كانت دائما تصبرني و تعطيني الأمل أني سأجد عمل أفضل منه
و في عز صيف 2005 قررت أني أبدأ
و لكن هل سأقول لزوجتي الحقيقة أني هشتغل شحات؟
و كيف أبدأ ؟

[H.H.KH]

ياااااااااه 106 مشاهدة و5 ردود .........خلاص مش مشكلة اللى دخلوا قرأوا وما ردوش .....يا إما الموضوع مش عاجبهم يا إما تافه لدرجة انهم مش عايزين يكتبوا تعليقهم عليه ........انا قلت برده يمكن اللى هيقرأه هيقول عليه كدا بس فى الاخر فى حاجة مهمة اتعلمتها.....

[Mr. Ali 1]

المشاركة الأصلية كتبت بواسطة H.H.KH

ياااااااااه 106 مشاهدة و5 ردود .........خلاص مش مشكلة اللى دخلوا قرأوا وما ردوش .....يا إما الموضوع مش عاجبهم يا إما تافه لدرجة انهم مش عايزين يكتبوا تعليقهم عليه ........انا قلت برده يمكن اللى هيقرأه هيقول عليه كدا بس فى الاخر فى حاجة مهمة اتعلمتها.....

بالعكس الحكاية شيقة وعايزين نعرف البقية
انتي بس اللي عايزة تشوقينا أكتر
منتظرين بقية القصة

[نقاء الروح]

رووعة كملي ..
بس دا راجل خطير بيعمل فالشحاته دراسة !
مش تتأخري علينا ياقمر

[عاشق البلانكو الابيض]

بالعكس دى قصة جميلة جدااااااا
ما يهمكيش عدد الردود والمشاهدات كملى
ده شكله شحااات فيلسووووف هههههـ
فى انتظااار الحلقة القادمة

[H.H.KH]

المشاركة الأصلية كتبت بواسطة Mr. Ali 1

بالعكس الحكاية شيقة وعايزين نعرف البقية
انتي بس اللي عايزة تشوقينا أكتر
منتظرين بقية القصة

شكرا ليك يا مستر على ادتنى حماس انى اكمل .........وان شاء الله تتابع للآخر وتعجب حضرتك....

وبشكر حضرتك عالمرور اللى اسعدنى

المشاركة الأصلية كتبت بواسطة نقاء الروح

رووعة كملي ..
بس دا راجل خطير بيعمل فالشحاته دراسة !
مش تتأخري علينا ياقمر

[COLOR="rgb(154, 205, 50)"]

لا ان شاء الله مش هتأخر هيكون كل يوم حلقة ان شاء الله .........وبشكرك عالمرور الرائع يا قمر

[/COLOR]

المشاركة الأصلية كتبت بواسطة عاشق البلانكو الابيض

بالعكس دى قصة جميلة جدااااااا
ما يهمكيش عدد الردود والمشاهدات كملى
ده شكله شحااات فيلسووووف هههههـ
فى انتظااار الحلقة القادمة

اصل اصبت بخيبة امل لما شفت الفرق الشاسع بين المشاهدات والردود......بس كلامك رفع من روحي المعنوية.....وان شاء الله تعجبك القصة كلها ....بشكرك عالمرور

[H.H.KH]

(3)

نويت الشحاتة

لم يكن يتخيل صديقي سامح أن كلمته التي ألقاها إلي و أنا راكب بجواره السيارة "أنت طول عمرك عبقري لكن خلي بالك الفرق بين العبقرية و الجنون شعرة" ثم ضحكنا لم يكن يتخيل أن هذه الكلمة التي لم يلق لها بالاً باتت من أهم العوامل في إتخاذ قراري بأن أكون شحاتاً

, قال هذه الكلمة بعدما إقترب منا شخص في إشارة المرور ليلمع الزجاج بفوطة قذرة ثم أعطاه سامح جنيهاً و كان تعليقي "انا عاوز أشتغل زي الراجل ده , لكن طبعا هشتغل في مكان بعيد محدش يعرفني فيه , الناس دي بتكسب جامد"

أخبرت أهلي و من يعرفني أنني سأذهب الى أحد المناطق السياحية لكي أعمل في السياحة و كان علي أن أختار إما الغردقة أو شرم الشيخ أو الساحل الشمالي
لم أكن أريد أن يكون زبائني المستهدفين من السياح الأجانب حتى لا أسيء الى سمعة مصر و المصريين و لكن كان الزبون المستهدف هم المصريين الأغنياء فقط لذلك وقع الإختيار على السفر الى الساحل الشمالي

منذ سنوات عندما كنت في الجامعة و حينها كانت تتشكل ملامح شخصيتي بفعل المجتمع المحيط بي نصحني أحد أصدقائي في معرض الحديث عن الشحاتين , ألا ترد هذا السائل صفر اليدين , لابد أن تعطيه أي شيء حتى لو شلن , فإن لم تجد فإبتسم له و أدعو له كما يدعو لك بل زده في الدعاء , ربنا سبحانه و تعالى بيقول , و أما السائل فلا تنهر
كنت متأكد أن الشعب المصري يخفي وراء وجوهه و هيأته قلوباً طيبة حنونة

كنت أريد العمل في هذا الكارير لمدة لا تتجاوز الثلاث سنوات أكوّن فيها مبلغاً أستطيع أن أبدأ به مشروعا يعود علي بالربح و من ثم أعيد ما أخذته من الناس على شكل صدقات , و ندرت أن أي مبلغ آخذه أخرج العشر للفقراء وعشر أخر للبر بصوره المختلفة من هدايا و صلة أرحام و عمارة مساجد و خلافه


و جاءت ساعة الصفر و كان يوم جمعة من جمع صيف 2005 الساعة السادسة صباحاً ودعت أهلي ذاهباً الى الأسكندرية و منها الى أتوبيس مرسى مطروح
أستقريت في أوتوبيس مطروح و تحرك الأوتوبيس من الموقف و بعد ساعة من السير في الطريق الساحلي الذي لم أراه من قبل في حياتي بدأت نفسي تحدثني , إيه الهبل ده ؟ شحاتة إيه و هباب إيه عليك و على أهلك ؟ ده جنان رسمي؟
هتشحت فين في الصحرا دي إنزل يا إبن المجنونة إشحت بقى , الصحرا قدامك كبيرة أهي

حينئذ أنقذني صوت من نفسي اللوامة " أنت إن شاء الله هتنزل مرسى مطروح يا أستاذ و لا هتنزل في الطريق؟"
ده الشاب اللي قاعد جنبي بيكلمني , قولت له أصل بصراحة أنا كنت عاوز أدور على شغل في أحد القرى السياحية في الساحل الشمالي , قاللي يعني حضرتك رايح لحد معين؟ قولتله لأ
قاللى انت عارف ان الساحل الشمالى ده طوله اكثرمن 300 كم ؟

قولتله أيوه و يمتد من غرب الإسكندرية لغاية مطروح و بعد كده السلوم و ليبيا يعني ,
" هو حضرتك منين" ده هو اللي بيقول قولتله من المنصورة , قالي يااه إحنا إشتغلنا في المنصورة كتير و عارفها كلها , قولتله إشتغلت في مجال إيه , رد عليا بطريقة إني المفروض أكون عارف الإجابة و قاللي في المعمار طبعاً , دا إحنا قضينا أيام جميلة في شارع الجلاء , قولتله أنا كنت متأكد إنك هتقول شارع الجلاء لأنى كلما سألت شخص كان يعمل أو يدرس في المنصورة يقولي أنه كان ساكن في شارع الجلاء - ربما لأن شارع الجلاء شارع طويل جداً و على جانبيه مناطق كثافتها السكانية عالية جداً - ثم ضحكت فضحك لضحكي

صمت و بعد فترة قولت له انت و الشباب اللي معاك بتشتغلوا في إيه بالظبط؟ ,
قالي إحنا نقاشين , بنشتغل في الدهانات , ماتيجي تشتغل معانا يا أستاذ , الا صحيح أنت إسمك أيه , قولتله إسمي مؤمن , قالي قول بجد أنت إسمك أيه قولتله و الله إسمي مؤمن قاللي عاشت الأسامي يا أستاذ مؤمن ,
قولتله أنت ليه مكنتش مصدق إن إسمي مؤمن , قاللي أصل ده إسم مطعم مشهور كنا شغالين جنبه ,
قولتله ده من منطلق إن مينفعش يكون واحد إسمه كنتاكي أو بيتزا هت فبالتالي مينفعش يكون إسمه مؤمن؟
سكت و إبتسم إبتسامة طالعة بالعافية يبدو أن كلمة "من منطلق" دي معجبتوش , بعد فترة صغيرة من الصمت قولتله و أنت إسمك إيه بقى قاللي إسمي عبود , مرضيتش أشتغله و أقوله دا إسمك و لا إسم موقف ميكروباص , الموضوع مش ناقص إشتغالات كفاية الهم اللي أنا فيه

قولتله ماشي يا سي عبود , إنت كنت بتقول أن أنا ممكن أشتغل معاكو , قالي أيوه دا أحنا محتاجين عمال , قولتله لكن أنا معرفش حاجة في النقاشة , قاللي مش مشكلة أنت ممكن تشتغل مساعد في الأول و بعد كده تلقط الصنعة , أنت شايف الواد ده و أشار الى أحد زملائه يجلس أمامنا إسمه أيمن و إحنا بنقوله يا بقلظ , بقلظ ده إتعلم الصنعة في اسبوعين فقط , الشغلانة سهلة أصعب حاجة فيها سكينة المعجون و الباقي كله سهل ,
قولتله و المساعد ده بيعمل إيه قالي ممكن يسنفر أو يبطن أو يساعد الصنايعية , قولتله و يوميته كام على كده , قاللي ممكن 35 لما نوصل إن شاء الله عم عرفة هيترسم عليك و يبينلك إنه مش محتاجك في الأول و بعدين هيحدد لك يوميه 25 أنت متوافقش قوله 40 و هو أكيد هيفاصل , و انت إتمسك ب 35 حتى لو قالك إمشي لأنه هيندهلك تاني ,
العجيب أن السيناريو ده حصل بالضبط مع عم عرفة مقاول الدهانات أول لما وصلنا موقع العمل .

و بدأت العمل بيوميه 35 جنيه مع عم عرفة إستمر 6 أسابيع تخللهم أجازة 5 أيام جمدت فيهم 1000 جنيه بالعافية
أول أسبوع أسندولي مهمة الصنفرة و دي أرخم مرحلة من مراحل الدهانات لدرجة أن صوابعي اليمين و الشمال تورمت و إلتهبت بشده و لما إشتكيت لعم عرفة قال لهم يا ولاد الكلب حرام عليكوا خلوه يبطن
في أخر الستة أسابيع كان الشغل إنتهى و عم عرفة قال هناخد أجازة إسبوع لغاية لما المحارة تتسلم و تنشف و بعدين نيجي نكبس شغل

أشرف سكلانة شخص طيب و أكثرهم خفة ظل نصحني و قاللي أوعى تبقي و لا مليم لعرفة لازم تقطع معاه فرط و يعطيك حسابك كله , خلي بالك لأنه هيستطيبك و بيحاسب كل واحد لوحده , دا راجل مسمار مقطوم
أول 3 أيام أنا كنت هسيب الشغل بالفعل لكن أخذت الموضوع تحدي

أنا إتعاملت مع عمال كتير قبل كده لكن أول مرة أعيش و أكل و أشرب و أشتغل معاهم و إنطباعي عنهم إنهم نفس الموديلات التانية من البشر اللي إتعاملت معاهم و قربت منهم بيفرق فقط إن مشاعرهم واضحة , اللي بيحبك بيكون واضح و اللي بيكرهك برضو بيكون واضح و أعتقد إن ده أفضل , كان بيضايقني إنهم بيشتموا بعض بالأب و الأم و أيضاً ريحة السجاير

في أخر الست أسابيع كنت بقيت أعرف أستعمل سكينة المعجون , صنعة حلوة فعلاً. .

لم تتركني فكرة الشحاتة طوال الستة أسابيع , دائماً كنت أفكر في الموضوع ده و كنت زعلان من نفسي لأني تراجعت في آخر لحظة لكن فعلاً أنا مكنتش حاسبها صح و الحمد لله أديني إتعلمت صنعة
تعرضت لموقف أثناء سفري مرة أخرى في منتصف الست أسابيع مش عاوز أذكر تفاصيلة و لا أتذكره أصلاً ندمت يومها أن أنا غيرت بطاقتي الى عامل عادي ربما لو كانت المهنة في البطاقة حاصل على بكالوريوس كان شفع لي بدلاً من الإهانة اللي شوفتها من شتيمة و لعن لأهلي و اللي جابوني , قررت على إثر ذلك أني أرجع المهنة تاني حاصل على بكالوريوس

بعد رجوعي من مرسى مطروح توكلت على الله و قررت أشحت في القاهرة , العاصمة العملاقة و كانت الأستراتيجية التي وضعتها ألا أتمركز في مكان واحد و شوارع العاصمة كبيرة لا تنتهي , قررت أن أسافر يومياً بالقطار و كل يوم أسرح في مكان مختلف عن اليوم السابق

أقنعت نفسي أن الموضوع ده مش شحاتة و لا تسول ده فقط طلب إعانة
مكثت في البيت إسبوع تقريباً رجّعت فيها المهنة في البطاقة لحاصل على بكالوريوس
و قبيل شهر رمضان بأيام سنة 2005 بدأت سنة أولى شحاتة............

[نقاء الروح]

جميييل اوي الجزء ده
متشوقة اشوف هيعمل ايه
هيكمل ويبقى شحات ولا هيحصل حاجة تانية
زي بتاع النقاشة دي
مرسي عالجزء ياعسل

[H.H.KH]

المشاركة الأصلية كتبت بواسطة نقاء الروح

جميييل اوي الجزء ده
متشوقة اشوف هيعمل ايه
هيكمل ويبقى شحات ولا هيحصل حاجة تانية
زي بتاع النقاشة دي
مرسي عالجزء ياعسل

العفو يا جميلة .......وهتشوفى هيعمل ايه الحلقة اللى جاية

[عاشق البلانكو الابيض]

جميلة جداااااا
بس ايه رايك تذودى
حلقة تانية بدل حلقة وحدة فى اليوم