ادخل هندسه من معهد فنى صناعى (لطلاب الثانوى عام ) 2013

[gaber2]

السلام عليكم ورحمه الله

اقدم لكم اليوم موضوع هام لكل من يرغب فى دخول كليه هندسه ..ولكن مجموعه اقل من الكليه ..مازال هناك امل ..وهو المعهد الفنى الصناعى ...بوابتك المضمونه باذن الله لدخول هندسه
سوف اعرض عليكم الموضوع فى صيغه سؤال وجواب للتسهيل باذن الله


س1: من يحق له الالتحاق بالمعهد الفنى الصناعى ؟
ج1:يحق الالتحاق لطلاب الثانوى العام العلمى رياضه وعلوم ...وطلاب الثانوى الصناعى

س2:ماهى مده الدراسه بالمعهد ؟
ج2:مده الدراسه بالمعهد سنتين

س3:ما هى الحد الادنى للمعهد الفنى الصناعى من ثانوى عام ؟
ج3:الحد الادنى يبدا من 56% وده لمعهد شمال سيناء ..واعلى معهد الصحافه 75%-79% على حسب ظروف التنسيق ..وفى معاهد اقل

س4:ماهو نظام الدراسه بالمعهد ؟
ج4:نظام الدراسه انك بتحضر المحاضرات وتذاكر وتجتهد ودول اهم حاجه ....وانك يكون عندك رغبه فى التفوق وتحقق حلمك ..وكمان تاخد دروس

س5:ازاى اقدم فى المعهد ؟
ج5:التقديم فى المعهد عن طريق مكتب التنسيق وهو بينزل مرحله تانيه ومرحله ثالثه ..وبيبقى اسمه ك.ت فنى صناعى (الصحافه -المطريه -...الخ)

س6:ايه نظام المذاكره فى المعهد ؟
ج6:نظام المذاكره سهل جدا ومنهج المعهد بسيط بالنسبه لثانوى عام ..وتقدر تجيب مجموع بسهوله لو اجتهت ..وانت داخل علشان تعوض فلازم تجتهد

س7:كليه هندسه بتاخد من كام من المعاهد الفنيه؟
ج7: كليه هندسه بتاخد من فوق 90%..ودى تقدر تجبها بسهوله فى المعهد باذن الله ..وممكن تجيب 98% مش صعبه باذن الله

س8:هو بعد المعهد بادخل على اولى هندسه ولا اعدادى ؟
ج8:انت بتدخل على اعدادى زيك زى طلاب ثانوى عام

س9: ما اقسام المعهد الفنى الصناعى بالصحافه ؟
ج9: اقسام كهربيه وهى اجهزه الكترونيه .....شبكات .... تك معلومات
الاقسام الميكانيكيه سيارات ..... تبريد وتكيف .....تـشغـيـل و تـشكـيـل

س10:ماهو القسم اللى بيدخله طلاب ثانوى عام فى المعهد ؟
ج10:بيدخلوا قسم تك معلومات غالبا ..وده افضل قسم

س11:ايه القسم اللى بيلتحق بيه طلاب ثانوى صناعى ؟
ج11:بيكملوا فى نفس القسم اللى كانو فى فى الدبلوم 3 سنين ..او بينضموا الى اقسام اخرى

س12:طيب لو معرفتش اعدى ال90% فى المعهد اعمل ايه ...يبقى ضيعت سنتين على الفاضى؟
ج12:لا ...انت ممكن تقدم فى معادله هندسه ...وهتمتحن فى مواد ثانوى عام (فيزيا -رياضه1-رياضه2)....ولو جبت 50% فقط نجحت يعنى بتدخل هندسه

س13:تنصحنى بايه لو ناوى ادخل المعهد؟
ج13: انصحك بالجد والاجتهاد ...وانك تكون على ثقه بالله وبنفسك انك تقدر تحقق حلمك ..وانك تبتعد عن اى حاجه ممكن تشغلك وتضيع وقتك

س14:ماهى مصاريف المعهد وهل هو حكومى ؟
ج14:مصاريف المعهد فى السنه 85جنيه ...وهو حكومى تبع وزاره التعليم العالى

س15:هل لو انا جبت مجموع هندسه لازم ادخل معادله ولا ايه؟
ج15: لو جبت مجموع هندسه من المعهد بتدخل هندسه على طول ولينا تنسيق خاص غير ثانوى عام ...المعادله للى مجبش مجموع هندسه يعنى فرصه تانيه للدخول لهندسه جوه المعهد

ودى صفحه المعهد الفنى الصناعى بالصحافه
وفيه تنسيق الكليات والاوائل المعهد

www.facebook.com/Snaa3y



انا خلصت السنادى المعهد الاول بفضل الله 97.8%..

[gaber2]

اى اسئله انا موجود ...هنا... وعلى صفحه المعهد

[سمير السراح]

طب اللي رايحه من عام وبعد كده راح اعدادي ايه الاقسام اللي متاحه ليه وهل كل الاقسام متاحه يعني ممكن يدخل مدني او كهربا عادي

[gaber2]

المشاركة الأصلية كتبت بواسطة سمير السراح

طب اللي رايحه من عام وبعد كده راح اعدادي ايه الاقسام اللي متاحه ليه وهل كل الاقسام متاحه يعني ممكن يدخل مدني او كهربا عادي

لو دخلت هندسه من المعهد ..بتدخل اعدادى ..وبحسب مجموع اعدادى بتدخل القسم ...كل اقسام هندسه متاحه ليك ملهاش دعوه كنت قسم ايه فى المعهد او انك خريج معهد
اول ما بتدخل اعدادى بتتعامل زى طالب ثانوى

[BedoGamal]

عارف كلامك اقنعنى بيه جدا جدا وانا كنت بقرا فى الموضوع دا ..بس بينى وبينك والله ما قادر اخشوا مش عايز سنتين تانى يضيعوا من عمرى كفاية هم الثانوية العامة الى الواحد خلص منو بقولك لنفسى لسة تانى ..انا نفسى بجد اخش هندسة واعوض انى مدخلتهاش علشان مجموعى مجبهاش السنة دى 88 بس لحد الان متحير مش عارف اعمل اية استنى مرحلة تانية واخش اى حاجة ولا اخشوا ولا اعمل اية ..

[gaber2]

المشاركة الأصلية كتبت بواسطة bedogamal

عارف كلامك اقنعنى بيه جدا جدا وانا كنت بقرا فى الموضوع دا ..بس بينى وبينك والله ما قادر اخشوا مش عايز سنتين تانى يضيعوا من عمرى كفاية هم الثانوية العامة الى الواحد خلص منو بقولك لنفسى لسة تانى ..انا نفسى بجد اخش هندسة واعوض انى مدخلتهاش علشان مجموعى مجبهاش السنة دى 88 بس لحد الان متحير مش عارف اعمل اية استنى مرحلة تانية واخش اى حاجة ولا اخشوا ولا اعمل اية ..

حته انك تضيع سنتين دى ...لو انت عندك حلم وعاوز تحققه فلازم تسعى لكده ولازم تضحى علشانه... انا كنت جايب 81 فى ثانوى وقررت انه لازم اعوض تقصيرى فى ثانوى فدخلت معهد وطلعت الاول بفضل الله ...بس فى ناس كانت جايه 91 ودخلت معايه بس انا كنت شايف المعهد فرصه علشان اثبت لنفى انى اقدر احقق حلمى .....وربنا يوفقك ويهديك

[ادهم محمد 1]

نصيحه لله ادخل المعهد او ادخل معهد ني صحي سنتين وهتشتغل علي طول

[gaber2]

المشاركة الأصلية كتبت بواسطة ادهم محمد 1

نصيحه لله ادخل المعهد او ادخل معهد ني صحي سنتين وهتشتغل علي طول

هو المعهد مينفعش تشتغل بيه .....بس اعتقد المعهد الصحى ينفع

[mahmoudesam2009]

ينفع طلاب الازهر يدخلوه

[gaber2]

المشاركة الأصلية كتبت بواسطة mahmoudesam2009

ينفع طلاب الازهر يدخلوه

ايوه ينفع يدخله طلاب ثانوى ازهرى

[مهاب احمد محمد]

يعني احنا نتعب ويطلع عنا وعين اهلنا ودفعنا كل الفلوس دي في الثانوية والدروس وذاكرنا ودخلنا هندسة علشان يجي واحد معملش حاجة وكان عمال يلعبلي ويحبلي طول السنة يدخل معهد ويدخل هندسة ليه ان شاء الله وعلي فكرة هتحس دايما انك اقل من الباقي حرام عليكم يعني واحد يجيب 80% او اقل وفي الاخر يدخل هندسة

[gaber2]

المشاركة الأصلية كتبت بواسطة مهاب احمد محمد

يعني احنا نتعب ويطلع عنا وعين اهلنا ودفعنا كل الفلوس دي في الثانوية والدروس وذاكرنا ودخلنا هندسة علشان يجي واحد معملش حاجة وكان عمال يلعبلي ويحبلي طول السنة يدخل معهد ويدخل هندسة ليه ان شاء الله وعلي فكرة هتحس دايما انك اقل من الباقي حرام عليكم يعني واحد يجيب 80% او اقل وفي الاخر يدخل هندسة

دى نسبه لطلاب صناعى 10% لدخول هندسه ...وانت فاكر اللى دخل معهد مبيخدش دروس يعنى ....وكمان فى معدين فى هندسه من صناعى زى محمد رضا فى حلوان وحسن عبد الحميد فى المطريه ....واللى بيدخل المعهد لو مذاكرش هيفشل ..يعنى انت فاكر انك هتلعب وهتدخل هندسه ...وحته اقل دى اجتهاد شخصى يعنى لو ذاكرت تجيب مجموع مذكرتش هتترمى فى الزباله ده لاى حد فى الدنيا ....امال هو بيدخل معهد سنتين ليه علشان كانه بيعيد ثانوى ...

[مهاب احمد محمد]

المشاركة الأصلية كتبت بواسطة gaber2

دى نسبه لطلاب صناعى 10% لدخول هندسه ...وانت فاكر اللى دخل معهد مبيخدش دروس يعنى ....وكمان فى معدين فى هندسه من صناعى زى محمد رضا فى حلوان وحسن عبد الحميد فى المطريه ....واللى بيدخل المعهد لو مذاكرش هيفشل ..يعنى انت فاكر انك هتلعب وهتدخل هندسه ...وحته اقل دى اجتهاد شخصى يعنى لو ذاكرت تجيب مجموع مذكرتش هتترمى فى الزباله ده لاى حد فى الدنيا ....امال هو بيدخل معهد سنتين ليه علشان كانه بيعيد ثانوى ...

متزعلش اوي كدة هو حد كلمك انا بقول راي هتمنعني اتكلم كمان عندك مانع يعني وبعدين لو سمحت براحة علشان انا زهقت من بعض الناس في الموقع كل ما اقول حاجة تقعدوا تتكلموا كتير كاني اجرمت

[gaber2]

المشاركة الأصلية كتبت بواسطة مهاب احمد محمد

متزعلش اوي كدة هو حد كلمك انا بقول راي هتمنعني اتكلم كمان عندك مانع يعني وبعدين لو سمحت براحة علشان انا زهقت من بعض الناس في الموقع كل ما اقول حاجة تقعدوا تتكلموا كتير كاني اجرمت

محدش منعك من حاجه ..بس انا بوضحلك الصوره بس ....اسف لو فهمت انى مضايق منك

[gaber2]

ربنا يوفق الجميع للخير