يوميات بيت مصرى جدا جدا [ ارجو التثبيت]

[مصرية وبحب بلدي]

الحلقة الاولى

استيقظت الأم سعاد في إرهاق واضح قبل الشروق بربع ساعة ....جاهدت لتحاول إيقاظ جسدها المجهد واللحاق بصلاة الفجر قبل الشروق ........مشيت على أطراف أصابعها كي لا توقظ زوجها الذي صلى قبلها ......توضأت وصلت الفجر وجلست لحظات ثم قامت الى المطبخ كى تحضر طعام الغداء كي يكون جاهزا عند عودتها من عملها ........

(حد فى الدنيا يصبح يقشر بصل ؟ ) تمتمت فى سرها ووجهها يزدادا احمرارا من تقشير البصل ....
.سارعت لوضع اللحم ليسلق وهى تدعو الله الا يكون الجزار كالعادة ضحك على زوجها وأعطاه لحم عجوز لا ينضج الا بعد 6سنوات !!!سارعت بضرب الطماطم فى الخلاط ومدت يدها لاخراج كيس من البسلة المخلوطة بالجزر الى أعدتها بالأمس وهى تشاهد المسلسل العربى وتغالب النوم ........)

.نظرت الى الساعة وجدتها السادسة والربع حالا ستبدأ غارة ايقاظ الأولاد للذهاب الى المدرسة مرت على غرفة ابنها خالد وجدته مستلقى على فراشه بالعرض والغطاء مكوم على الأرض والغرفة فى حالة فوضى كأن قنبلة نووية مرت بها !!!!!!!

(اصحى يا خالد يالا ح تتأخر عن المدرسة مش كل يوم تعذبنى على ما تصحى )

وأخذت تلتقط الاكواب الملقاة حول جهاز الكومبيوتر والأطباق الملقاء فوق الكتب فى ******ية عجيبة وحاولت بصعوبة استخراج كتبه من بين الانقاض بلا جدوى !!

(اصحى يابنى بلاش غلب على الصبح !!)

فرد عليها بصوت نائم متذمر (ياماما حرام عليكى انا نايم الساعة 3 سيبينى انام شوية)

ردت بصوت غاضب ( انت غبت امبارح من المدرسة يلا علشان تروح ولا عاوز ابوك يعملها لنا حكاية ؟ انت ناسى انك فى تانية ثانوى ؟ ثانوية عامة يابنى !!! 5 دقايق والاقيك لبست هدومك !!!! )

وخرجت من غرفته حاملة كارثة متحركة من الاكواب والاطباق والاوراق وذهبت الى المطبخ .....

وخرجت لغرفة ابنتها الصغرى ملك ذات الثمانى سنوات وكالعادة صراخ وبكاء وادعاء انها مصابة بمغص رهيييييب وان فيل هندى مر على قدمها بالليل ولهذا لا تستطيع الذهاب الى المدرسة !!

خرجت الام من غرفة ملك وهى تجرى على المطبخ بعد ما شمت رائحة شياط البسلة ....وأخذت تهذى بكلمات ساخطة ( على الخلفة واللى بيخلفوها !!) وانقذت البسلة بأعجوبة ووجدت اللحم – كالعادة - مازال أمامه ساعتين كى ينضج بعد ما امتص كل المرق ومازال كالجلد !!

وهنا فاض كيلها وصرخت فى كل النائمين ( حرام عليكم انا ح ألاقيها من الطبيخ ولا من الشغل ولا من تنضيف البيت ولا من المدارس .....يالا كلكم تصحوا فى دقيقة واحدة !!!!)

وكأن هذه الصرخة هى علامة الخطر بالنسبة لخالد وملك فقاموا على الفور من غرفهم وكالعادة المعركة اليومية على دخول الحمام التى انتهت بتسرب ملك كالزئبق من فتحة الحمام وتركته يتوعد لها عندما تخرج !!!!!!!

أعدت الأم الافطار ودخلت غرفتها كى ترتدى ملابسها على عجل كى تلحق بعملها فى موعدها فالأمر لا يحتمل شخطة من المدير ولا مقلب جديد من احدى الزميلات المخلصات !!!!!

استيقظ زوجها محمود على حركتها وهى ترتدى ملابسها ودون أن يفتح عينيه كى لا يطير النوم منهم قال لها بصوت متذمر ( هو مفيش يوم الواحد يصحى من غير سارينة الانذار دى ؟ )

كادت ترد عليه بعصبية ولكن لم تشأ ان تبدأ يومها بخناقة وجزت على أسنانها وهى تنظر للساعة فى استغاثة ( صباح الخير يا محمود الولاد ما بيصحوش الا بالطبل البلدى .......يالا أحسن ح تتأخر على شغلك انت كمان !!)

دفن رأسه تحت المخدة وهو يقول( لسه ح انام شوية كمان !!)

تمتمت فى سرها ( هم العيال جايبينه من برة ؟) وضبطت له المنبه ليوقظه بعد ربع ساعة كى لا تقوم غارة عند عودتها انها هى من تركته نائم وانها السبب فى تأخيره ) وضبطت له

اتمت ارتداء ملابسها وخرجت وجدت خالد وملك ارتدوا ملابس المدرسة ويتناولون الافطار ....... وامسكت شعر ملك لتمشيطه وهى تأكل فاعترضت وقالت ( ياماما كده الأكل ح ينزل فى شعرى !!!)

فقالت لها فى تعجب ( ياستى اللماضة دى مش بأشوفها الا فى البيت وفى المدرسة بتسيبى البنات يضربوكى ليه ؟)

فدافعت عن نفسها وقالت (لا ياماما محدش بيضربنى ده انا اللى بأموتهم من الضرب حتى اسألى خالد....... مش كده ياخالد ؟ )

(لا ياماما محدش بيضربنى ده انا اللى بأموتهم من الضرب حتى اسألى خالد....... مش كده ياخالد ؟ )

فأجاب على طريقة فؤاد المهندس (اه طبعا على يدىىىىىى !!)

فأنهت الأم الصراع المتوقع وقالت لخالد بطريقة آمرة ( خالد توصل أختك لحد باب المدرسة وما تسيبش ايديها مفهوم ؟ )

وهمت بالخروج ثم عادت لتتأكد انها أغلقت البوتاجاز ولم تترك الحنفية مفتوحة ثم مرت على غرفة ابنتها الكبرى سلمى وفتحتها بهدوء ووجدتها نائمة فى هدوء تحتضن الوسادة وكأنها تحتضن صورة فارس الاحلام وبجوارها عدة كتب يبدو انها أمضت الليل فى قراءتهم وأيقظتها بهدوء فاستيقظت وهى تبتسم لأمها وتقول ( لها صباح الخير ياقمر )

فأشرق وجه الأم لأول مرة منذ استيقاظها وقالت لابنتها فى حنان ( صباح النور ياحبيبتى .....بصى كملى سوا اللحمة واعملى الرز قبل ما اخواتك ييجوا وما تنسيش تنضفى البيت كويس .....يالا كملى نومك ياحبيبتى !!!)

فردت بصوت نصف نائم ( حاضر ياماما !!) ثم احتضنت وسادتها وأكملت أحلامها .....

نظرت اليها الأم بحنان وهمست (ربنا يعدلك ياسلمى يابنتى يارب !!!!!!!)

ونلتقى فى الحلقه القادمه

[أ/رضا عطيه]

جميييييييييييييييييييييييل
شكرا يامصريه على الموضوع الجميل
هذا هو حالنا

[stoof]

حلوة جدا .. وكلميها بقا انا بصراحة قريتها وانا مستمتع جدا ..شكرا جزيلا ^__^

[shimaa2009]

حلوه اوى ياريت تكميليها احنا فى انتظار الجزء الجديد

[نقاء الروح]

رووعة جدا ..

بلييييييز كمليها انا قريتها قبل كدة بس تاهت مني
و مش كملتها ..

و كانت عجباني اووي..

فياريت تكمليها و اتابعها معاك ..

و مرسي يا قمر ..

[مصرية وبحب بلدي]

ان شاء الله بكملها ويارب تعجب كل الناس وياريت الموضوع يتثبت

[Mohamed.Helmy]

لا والله جميلة جدا .. انا بقراها وبتخيل .. اندمجت جدا ... ياريت تكمليها

[مصرية وبحب بلدي]

الحلقة الثانية


دق المنبه بجوار سلمى معلنا العاشرة صباحا ومعلنا ايضا انتهاء الحلم الجميل الذى كانت تحلمه والذى تحلمه منذ سنوات!!!


مدت يدها لتسكت صوت المنبه المزعج وهى لا تزال مغمضة العينين وكأنها لا تريد ان تترك الحلم ابدا.....ثم قامت الى الحمام لتزيل اثار النوم عنها كى تبدأ رحلة الشقاء اليومى فى تنظيف الدمار الشامل الذى يتركه اخوتها خلفهم.......


دخلت المطبخ لتجد بقية الطعام لم يعد ومدفعية من الاطباق والحلل فى انتظارها


اعدت كوبا من الشاى وقطع من البسكويت لافطارهاواعادت فتح النار على اللحم كى تحدث المعجزة وينضج قبل وصول ثورة الجياع!!!!

ياساتر يارب هى حركة طالبان كانت بايتة مع خالد فى اودته(الغرفه)؟!....بجد حرام كل يوم انظفها واخليها تبرق وهم ساعتين زمن ويخليها كأن قطر امبابة عدى من جواها!!!

انا ايه اللى خلانى اسيب الشغل بس؟ مش كان احسن من وجع القلب ده؟ بس احسن ازاى؟ده انا كنت باخد بالعافية 200 جنيه وباصرف اكتر منهم مواصلات ولبس وخلافه......ده غير عدد ساعات الشغل اللى ممكن توصل من9 صباحا لحد 6 مساءا وساعات اكتر لما يكون فيها جرد ولا حاجة......

لما بقيت زى لاجئى الصومال من الطاحونة اللى دايرة فيها ليل و نهار ده غير المضايقات اللى لازم تتعرض لها اى بنت وخصوصا لو كانت مش مرتبطة.......ياستى خلى البساط احمدى هو فيه حد سامعنا ما تقولى عانس!!!!!

خلاص ما بقيتش اخاف من الكلمة دى من كتر ما حسيتها فى عيون الناس يعنى انا داخلة على 29 سنة دلوقتى .......اصحاب كتير لى اتجوزوا و ولادهم داخلوا المدرسة كمان وبيقولوا لى طنط سلمى!!يعنى خلاص فاضل لك زلطة وتاخدى استمارة ستة يا جميل!!!!

ونظرت الى المرآة انظر الى ملامحى قد لا اكون جميلة بالمعنى المفهوم ولكن ملامحى متناسقة وشعرى طويليعنى متوسط الجمال زى آلاف البنات وكمان اهلى حالتهم متوسطة ....

يبقى العريس هيجى على ايه يا سمسمة ؟ دلوقتى كل واحد بيحسبها بالورقة والقلم هى بنت مين وعندها كام وجميلة قد ايه؟الا من رحم ربى يييييييه انا تعبت من التفكيرفى الحدوتة دى ......يعنى اللى اتجوزوا خدوا ايه؟

يالا بلا جواز بلا وجع قلب.....

واخذت تنظف حجرة ملك الصغيرة وهى تضحك على تعليقاتها المكتوبة بين طيات كراسات المدرسة (يارب المدرسة تتهد يوم الاثنين اللى جاى !!) (مش فاهمة حاجة خالص فى الحساب ولا العربى !!) (الميس دى غلسة اوى!!)

وانهت تنظيف الحجرة وجلست تستريح قليلا وهى تلملم الوان ملك واوراقها ووجدت نفسها تلعب بالالوان وترسم وكأنها تنفس عن بخار مكتوم بصدرها لم يجد له طريقا الا على الورق.......

رسمت بيت كبير على جدرانه قلوب واشجار بلا حواجز او جدران وبه رجل طويل القامة قوى البنيان حاد النظرات ولكن على شفتيه ابتسامة حنونة .....يمسك بيده ورود ونجوم ..... وخلفه باب صغير نصف مغلق يطل منه رأس طفل جميل كأنه يختبأ من العالم ويحمل فى عيونه جمال الضوء ورقة النسيم....

وافاقت من احلامها على صوت جرس الباب وهو يعلن وصول اول القادمين وكان خالد......


(ايه اللى رجعك بدرى كده!!)


(عادى يا بنتى هو لازم استنى الحصة الاخيرة والحوارات دى؟ هو نص جنيه للبواب والدنيا تبقى فل!!)


فصرخت سلمى:(زوغت يافالح؟ والله لو بابا عرف ليقطم رقبتك)


فرد بملل (خلاص بقى خليكى حلوة وبلاش تقولى له وانا ح آكل وانام على طول علشان اسهر اذاكر للصبح يا جميل)




(امرى لله بس استنى شوية على ما اجهز لك الاكل..... ربنا يرحمنى من الغلب ده يارب!!)



فرد بتلقائية (ياستى ما احنا بقى لنا مية سنة بندعى...كبرى بقى يا سمسمة)


فتكهربت سلمى من رده الجارح وان كانت سمعت مثله كثيرا فى مجتمع لا يرحم الانثى الا لو كان فى احدى يديها صك اعتمادها كمخلوق من الدرجة الاولى ..... ولكنها لم تبدى ألمها وردت ببساطة (خليهم مية وواحد ياسيدى!!!!)

ونتقابل فى الحلقه الجايه

[light of the mo0on]

روووووووووووووووووووووعه
تسلم الهنادر ههههه

[Mohamed.Helmy]

كمليها بقى ... هاتى الحلقة التالتة بسرعة ..... معلش

[light of the mo0on]

كمليها رووووعه بجد

[مصرية وبحب بلدي]

اوكى يلا الحلقة التالتة

[مصرية وبحب بلدي]

الحلقة الثالثة

جلست سعاد تتابع المسلسل العربى وفى يدها جوارب خالد ترتقها وكأنها لا تريد ان تجلس بلا عمل.... كانت عيناها مثبتة على التليفزيون وقسمات وجهها تتغير مع تغير المشاهد من ابتسام الى حزن الى مصمصة الشفاة على حال الدنيا.... الى الدعاء على الازواج المفتريين.....فيرمقها زوجها بنظرة مداعبة من تحت الجريدة التى يقرأها فتسارع بالقول:اللى فى التمثيلية بس يا ابو خالد!!

ثم تبحث عن سلمى فلا تجدها بجوارها ثم تجدها فى البلكونة وحيدة تطالع المارة فتنادى عليها: تعالى ياسمسمة اتفرجى معانا دى الحلقة النهاردة حلوة اوى!!


فترد سلمى بلا اهتمامحلوة ايه بس يا ماما ده البطل بقاله5 حلقات بيطلع فى الروح ولسه ما ماتش.....هو انا ناقصة خنقة؟)

فمصمصت شفتاها وقالت لها (انتى كده مالكيش فى الطيب نصيب ده البطل عامل عمايل وهو بيموت!!طيب تعالى اعملى لنا كوبايتين شاى انا وابوكى....)

فذهبت سلمى الى المطبخ لعمل الشاى ففوجئت بملك تخرج من غرفتها كالصاروخ وتترك واجبها بالطبع لتقول لها (وانا كمان اعملى لى كوباية شاى يا ابلة سلمى أحسن دماغى اتقلبت خالص من الواجب وعمايله.....بس سكر كتير الله يكرمك!!)

وقبل ان ترد سلمى سمعت هدير صوت امها وهى تكاد تآكل ملك بأسنانها (شاى ايه اللى عاوزة تشربيه يا مقصوفة الرقبة؟ ادخلى يا هانم كملى واجب الحساب قبل ما أقوم لك
!!!)

فجريت ملك على غرفتها وهى تبرطم بكلمات غير مفهومة عن السكن على كوكب المريخ!!!

فابتسم الاب من خلف نظارته الطبية وقال لزوجته :
يا شيخة حرام عليكى كنتى سيبيها تتفرج على التمثيلية شوية!!

فردت بامتعاض: تمثيلية ايه بس؟ والله انك طيب.... دى طول النهار من ساعة ما رجعت من المدرسة وهى بتلعب على الكومبيوتر بتاع اخوها ولازقة فى التلفزيون ورامية الواجب لحد قبل ما تنام بساعة ..... ويقعد الهم لى انا!!

فصمت الاب كعلامة على استسلامه ثم نظر الى ساعته فوجدها تقارب التاسعة فسألها بقلق:هو الواد خالد اتأخر كده ليه؟ده ما رجعش من الساعة 3 من بعد ما اتغدى على طول؟!!


فمصمصت شفاها وردت باشفاق :عينى عليه يا حبيبى مموت نفسه فى الدروس الخصوصية والمذاكرة ...... ادعى له يا ابو خالد الله يكرمك !!

فرد بسخط: والله انتى اللى مدلعة الواد ده علشان الوحيد....مش فاهم يعنى ايه دروس فى كل المواد ليه يعنى ؟ ح يسقوا له العلم فى كوباية؟


فردت بدهشة: هو احنا بس اللى كده؟ ما كل الدنيا على ده الحال ....كل الناس بتاخد دروس فى كل المواد فى الثانوية العامة.....ده فيه كمان اهالى بيدوا فى المادة الواحدة درسين استاذ يشرح كويس والثانى بيحل مسائل ويراجع كويس!!

فأجاب بحنق بالغ: والله العظيم الدلع ده هو اللى ح يضيع الولد ده .....يعنى نبيع اللى ورانا وندخل بمرتبنا كله جمعيات علشان البيه ما يتعبش نفسه فى مادة ولا مادتين ويذاكرهم لوحده؟


وعاوزاه يطلع بعد كده راجل؟ اذا كان مش حاسس اصلا قد ايه احنا بنموت نفسنا ونحرم روحنا من كل حاجة علشان فلوس الدروس الخصوصية بتاعة الباشا.... وياريته حاسس بكده لا ده طول الليل عامل نفسه بيذاكر وهو قاعد على الكومبيوتر ما اعرفش بيعمل ايه.... والله حرام النار اللى مكويين بيها دى!!


باستسلام وهى تقول:


عندك حق والله انا مش عارفة فلوس الجمعيات دى ح تخلص امتى- ده حتى فلوس الجهاز اللى كنت بأشيلها لسلمى كل شهر - مش عارفة اشيل لها حاجة من فترة .....بس معلش ان شاء الله ييجى بفايدة ويجيب مجموع حلو يفرحنا ان شاء الله......


فأجاب بصدق:هو انا يا سعاد ح استخسر فى ابنى ؟ انا نفسى اشوفه احسن واحد فى الدنيا كلها ....بس اللى مزعلنى اننا زمان كنا بنشيل هم اهالينا ح يدفعوا مصاريفنا ازاى لكن دلوقتى الانانية بقت هى الاساس.....الابن مالوش دعوة اهله يجيبوا له الفلوس منين ؟ المهم انه ياخد دروس فى كل المواد حتى لو مش محتاج لها والمهم انه يجيب لبس عجيب زى اللى اصحابه لابسينه ويجيب احدث السيديهات والشرائط ويخرج ياكل فى المطعم الفلانى ويدخل السينما الفلانية مع الشلة والا ح يبقى ابوه دقة قديمة ومش عاوزه يبقى زى اصحابه.....



فردت باستسلام : ح نعمل ايه يا ابو خالد هو زمانهم كده....
ثم ضحكت لتلطيف الجو وقالت: انت اللى الظاهرعجزت علشان كده زعلان من الشباب.....ح ناخد زماننا وزمن غيرنا؟



فلانت ملامحه وابتسم: ماشى يا ستى انا عجزت بس انتى ما شاء الله عليكى كل سنة بتبقى احلى من اللى قبلها!!


فاحمر وجههاوارضاها اطراء زوجها لها وقالت بخجلبس بقى يا ابو خالد سلمى تسمعنا!)


ففوجئت بسلمى ممسكة صينية الشاى وهى تضحك وتقولانا هنا من الصبح يا جميل.... ولو عاوزانى اروح اجيب مشبك من دمياط وارجع بكرة انا تحت امرك!!)

ونتقابل فى الحلقه القادمه

[مصرية وبحب بلدي]

ونلتقى ان شاء الله غدا مع الحلقة الرابعة
ويارب تنال اعجابكم

[Mohamed.Helmy]

ههههههههههههههههه.. جميلة جدا بس هى كام حلقة ؟؟؟