💣 الغرور مقبرة النجاح 💣 An Extremely sensitive issue

[Mohamed_Hamza]

كلنا عارفين إن الغرور ده بيضيع كل تعبك وكل مجهودك فى الدنيا , فعمرك ما تلاقى نفسك ناجح طول ما إنت متملكك النجاح , وخليك فاكر دايما إن النجاح ده ممكن يروح فى لحظه , يعنى إوعى تفكر إنك طالما نجحت دلوقتى أو وصلت لحاجه معينة إنك ملكت الدنيا , لأ طبعا , الدنيا مملوكة بس للمتواضع , مش للمغرور والمتكبر , واحد يقولى إن ده مش غرور لكن ثقة بالنفس , أقوله إن الفرق بين الثقة بالنفس والغرور شعرة , لو إتقطعت إنقلبت الثقة بالنفس لغرور وماتعرفش تتخلص منه أبدا , وأول طريق الضياع بلا شك هو الغرور .

يعنى لما تلاقى واحد بيتكلم من تحت الجزمة عشان شايف نفسه إنه يقدر يخلص شغله , أو مذاكرته , أو أى حاجه فى وقت قصير بيقعد يركن الحاجه لحد ما الوقت يروح عليه وماتلاقيهوش عارف يعمل أى حاجه , ولا عارف يكمل شغله ولا حتى ينجح فى أى حاجه , كام مرة تيجى تفكر تذاكر تتغر فى نفسك وتقول إنك تقدر تخلص كل مذاكرتك فى زمن قياسى وبسرعة البرق , وفى وقت لا يذكر , وأول ما تبدأ تلاقى نفسك بتقولك إلعب شوية وبعدين إرجع كمل مذاكرة , لحد ما إمتحاناتك تقرب وتطلع فاشل فى الآخر .


لا والغريب تلاقى أهلك يقولوا عنك , ده مخه نضيف بس لعبى , لعبى إزاى يا عمى ؟؟ ومخه نضيف إزاى برضه ؟؟ هو إللى مخه نضيف بجد بيهمل كل حاجه فى حياته بالشكل ده ؟؟ يعنى هل من المنطق إن شخص قدامك يقولك أنا هالحق أخلص كل حاجه ولسه على الإمتحان بتاعه شهر مثلا وهو لسه ما بدأش ؟؟ الغرور ده بقى بيبدأ معاك من صغرك , وبيكبر معاك , وبتلاقى نفسك لما تكبر ويبقى عندك شغلك ولا شركتك ولا مصنعك بتتحول لإنسان مهمل بسبب الغرور ده .


يعنى الحكاية بتيجى إن الشخص بيتغر فى نفسه الأول , وبعدين الغرور ده بيتحول معاه لتكاسل عن الشغل , والتكاسل بيتحول لإهمال , والإهمال طبعا بيبقى فشل فى وقت قياسى , المهم إن كل واحد فينا يشوف النقط إللى بيقع فيها بالظبط إيه ويحاول على قد ما يقدر يتخلى عنها بأى طريقة , لكن لو هايفضل على طول شايف إنه منجز وكويس عمره ما هايخلص حاجه .


أعرف واحد طول عمره متفوق فى دراسته وبيطلع من الأوائل بلا منازع , كانت درجة تحصيله عاليه جدا , بيقدر يحصل أى كم فى وقت قياسى , جالك على ثانوية عامة أهمل كل حاجه , وقال إنه هايقدر يحصل كل حاجه قبل الغمتحان على طول , وفعلا قرب الإمتحان , والواد دماغه زى ما هى , لحد ما قرب الإمتحان وقعد يذاكر على قد ما يقدر , وإللى حصل إنه مالحقش يخلص إللى وراه وسقط .


يعنى ضيع مستقبله فى لحظه بسبب غروره إللى إتملكه , نفس الكلام ده بيحصل معانا كل يوم فى حياتنا اليومية , دايما بتلاقى ناس مش فدماغها أى حاجه غير إنها كويسه وتقدر تعمل كل حاجه , بس لما بييجى وقت الجد الفران بتدخل جحورها , وكل ده بسبب الغرور , أنا شايف إن مشكلة الغرور دى هى مشكلة العصر , لآزم كل واحد فينا يراجع نفسه ألف مرة قبل ما يستمر فى سيناريو الغرور , لإن الغرور ده ما هو إلا مقبرة النجاح .

منقول

[Mohamed_Hamza]

أوعى
أوعى
وهقولها خمسين مرة
"أوعى تجازف بمستقبلك عشان شوية حاجات تافهه "
خلص ثانوية الاول وبعدين اعمل الي انت عايزه ..
.................................................
بس خلص الثانوية الاول

[aalaaabdelhamed]

المشاركة الأصلية كتبت بواسطة mohamed_hamza

أوعى
أوعى
وهقولها خمسين مرة
"أوعى تجازف بمستقبلك عشان شوية حاجات تافهه "
خلص ثانوية الاول وبعدين اعمل الي انت عايزه ..
يكش تنضم لداعش حتى 💀 💣
بس خلص الثانوية الاول

عندك حق والله الواحد بيضيع نفسه عشان حاجات تافهة

[مهاب احمد محمد]

الغرور هو بدايه النهايه فعلا

[DODICONO]

من كان آخر كلامه لا إله الا الله دخل الجنة

[ElSayed Fekry]

المشاركة الأصلية كتبت بواسطة DODICONO

من كان آخر كلامه لا إله الا الله دخل الجنة

ملاحظة بس على التوقيع المفروض I wanna Be an Engineer

[رفيقة الامل]

يضيع العلم بين الحياء والكبر

[Duke Tefa]

قولنا حل بقي يا دوك في الفيزياء الحديثة خصوصاً اول فصل واخر فصل

[Mohamed_Hamza]

ايه مشكلتهم ياهندسة

[Duke Tefa]

اول فصل ده في رغي كتيييييير خالص وقوانين غريبة وشابكة في بعض وحاجة ارف
مش عارف الواحد يعمل فيهم ايه

[Mohamed_Hamza]

شوف فيديوهات محمد عبدالمعبود واحدة واحدة معاه كدا يا مصطفى وهتفهمهم ان شاء الله، هو شرحه كويس في الحديثة
والقوانين اللي داخلة فبعضها دي اكيد كل قانون منهم بتستخدمه في حالة معينة، بردو شوف المستر دا وهو بيحل ووقف الفيديو وحل المسألة قبله، وشغل الفيديو وقارن حلك بحله، لو نفس الحل اشطا، لو مختلف شوف طريقة حله ازاي، ورجع الفيديو من تاني لو مش فاهم حاجة وهكذا...
بردو لو معاك كتاب تاني شوف الشرح بتاعه انا فيه حاجات في الفيزيا مكنتش بفهمها من الامتحان وفهمتها من المثالي...
ممكن كلمة واحدة تغير طريقة فهمك للدرس تماما، بتحصل.

[Mohamed_Hamza]

ربنا معاكوا

[Duke Tefa]

تمام يا دوك جزاك الله كل خير
انا درس الالكترونيات الحديثة مش كنت فاهمه وفعلا فهمته من الاستاذ محمد عبد المعبود بارك الله فيه
مني الاخر انا فهمت الفيزياء من الاستاذ ده

[ران نيتشان]

موضوع مهم جدا .

[فن المذاكرة]

شكرا جدا جدا جدا جدا على هذا الموضوع