كل ماتريد ان تعرفه عن كليه الطب

[mostafahero]

ازيكم يا دكاترة اولى ( ايوه انتم ،،، انتم من انهاردة اسمكم دكاترة ) اتفقنا ؟؟ عاملين ايه يا دكاترة ( كويس كدا ..؟؟ ) ؟؟
ان شاء الله تكونوا كلكم فى احسن حال ...

طبعا كلكم خلصتوا الثانوية العامة بسهولتها ،، وبساطتها ،، وهيافتها ،،

على فكرة انا مش بخوفكم من الكلية ،، بس انا عاوز اعرفكم انكم داخلين مرحلة جديدة ،، يعنى لازم تذاكروا كويس اوى ،، و نظام الكلية ما بيعترفش بمجموعك فى الثانوى !!!! يعنى فى ناس بتبقى جايبه 100 % فى الثانوى وبيجيبوا مقبول فى الكلية ،،، وفى ناس يدوبك لحقوا طب بالعافية ، وبيجيبوا امتياز ....

الخلاصة انك لازم تذاكر كويس اوى عشان تقدر - بإذن الله - ترتب على الدفعة ،،،،
اتفقنا ..؟؟؟!!!

طيب فى الأول نعرف الطب كام سنة وهندرس فيهم ايه ؟؟؟ ...
الطب ست سنين :

-اول 3 سنين دراسة اكاديمية ..
-تانى 3 سنين دراسة اكلينيكية ..


1) فى اول سنة هتاخد 4 مواد ...

-تشريح ( Anatomy ) مادة جميلة و عليها 250 درجة ..
-علم وظائف الاعضاء ( Physiology ) مادة اجمل عليها 250 درجة ..
-الكيمياء الحيوية ( Biochemistry ) مادة لذيذة عليها 150 درجة ..
-علم الانسجة ( Histology ) مادة رخمة وسهلة عليها 150 درجة ..
ودول هنتكلم عنهم بالتفصيل لاحقاً ..

2) فى تانية هتاخد نفس المواد ، بس برانشات مختلفة ..
بالاضافة لمادة علم النفس و اللى عليها 50 درجة ..

3) سنة تالتة اللى بيقولوا عليها " سنة الكفاح " ...
هندرس فيها 4 مواد ..

-علم الامراض ( pathology ) عليها 300 درجة ..
-علم الادوية ( pharmacology ) عليها 300 درجة ..
-علم الاحياء المجهرية ( Microbiology ) عليها 200 درجة ..
-علم الطفيليات ( Parasitology ) عليه 150 درجة ..

4) سنة رابعة هندرس فيهم طب ...

-طب المجتمع ( Community ) عليها 300 درجة ..
-طب الرمد ( Ophthalmology ) عليها 250 درجة ..
-طب شرعى وسموم ( Toxicology & Forensic ) عليها 200 درجة ..
-طب الأنف و الأذن وحنجرة ( ENT ) عليها 200 درجة ..


5) سنة خامسة من السنين التقيلة شوية ..

برضو هندرس فيها طب ...

-طب الباطنة ( Internal Medicine ) عليها 900 درجة ..
-طب اطفال ( Pediatrics ) عليها 500 درجة ..


6)سنة ساتة .. هندرس فيها ...

-جراحة ( Surgery ) عليها 900 درجة ..
-طب نسا و ولادة ( Obstetrics & Gynecology ) عليها 500 درجة ..

واحد يقولى مش الطب سبع سنين ...؟؟؟؟
اقولك ان فى بعد الست سنين دراسة ، سنة تدريب ( امتياز ) ..
ما بتدرسش فيها ، لأنها مجرد تدريب ..

-طيب بما إنى لسه داخل أولى فانا عاوز اعرف عن المواد بتاعتى شوية تفاصيل ..!!!!!

فى البداية هتحتاج قاموس ودا هتشتريه من الكلية قاموس الدكتور فوزى جاب الله بحوالى 25 جنيه ..

Anatomy


- هتبدأ دراسة الاناتومى بمقدمة سهلة وصغيرة اوى ( Introduction ) .. عبارة عن شوية مصطلحات هتستخدمها فى باقى برنشات الاناتومى ...
تعتبر نظرة عامة على اساسيات الاناتومى بوجه عام ...
فى البداية هتحس انها صعبة جدا ومعقدة ،،،، لكن بعد ما تدخل فى البرانشات التانية هتعد تضحك على نفسك من سهولتها ..
- هتاخدوا اسبوعين محاضرات فى المقدمة دى و حوالى سكشنين ..
ملحوظة : ليكم سكشنان اناتومى كل اسبوع .. " الله على اللغة "
و السكاشن بتبقى فى المشرحة ...

هتبقى بيتكم التانى ان شاء الله ،،، متقلقوش ..

فى ميزة كبيرة فى كتاب المقدمة ( Introduction ) ، ان كل صفحة مترجمة فى الصفحة اللى قبلها ، طبعا دا مراعاةً لظروفكم ..
بعد كدا مفيش حاجة اسمها عربى فى كتاب تانى ..

- بعد كدا تخشوا على برانش كبير شوية ( Upper Limb ) " الطرف العلوى " ...
و فى نفس الوقت هتاخدوا جزء صغير اوى من برانش اسمه ( Embryology ) " علم الاجنة " ..
ودا عبارة عن كتاب كبير شوية هتاخدوا ربعه فى اولى و باقيته فى تانية ..

- دا تقريبا بيبقى معظم الترم الاول ..

- فى آخر الترم الاول هتاخدوا برانش متوسط الحجم ( Thorax ) " صدر " ..

-آخر حاجة هى برانش بالنسبالى كان ممتع و هو ( Lower Limb ) " الطرف السفلى " ...

...... دى كدا كل البرنشات اللى هتاخدوها فى اولى ......
:
:
:
- طيب ايه المصادر اللى نذاكر منها ..؟؟

- المتعارف عليه عندنا انك تذاكر من اى مصدر ،، المهم تلتزم بالمقرر ( اللى هو كتاب القسم )..
لكن افضل مصدر ممكن تذاكر منه هو كتب القسم ، فى كل البرنشات ( لأن فيها المقرر بس ) ...
- ايه نظام الامتحانات ..؟؟
بما ان رئيسة القسم الدكتورة " كريمان الجوهرى " سابت رئاسة القسم .. فممكن النظام يتغير ..
احتمال ان دكتور " مُحِب " هو اللى يمسك بعدها ..
لكن اعرفكم بنظام امتحاناتنا برضه تاخدوا فكرة ..

- تالت امتحانات على مدار السنة كل واحد ب 15 درجة عدا الاخير كان مضاف اليه امتحان شبه عملى عبارة عن رسمة تكتب بياناته المطلوبة ، عليه 10 درجات ..
بياخدوا اعلى درجتين من الثلاثة .. وبالتالى الناتج بيبقى ..
15+15+10=40 بالاضافة ل 10 درجات بحث يبقى 50 درجة ..
فيه كمان 60 درجة امتحان عملى فى آخر السنة قبل النظرى بشهر تقريبا ..
15 درجة امتحان شفوى ...
125 درجة امتحان نظرى ، مقسمة الى ..
50 درجة MCQ " اختيارات " ..
20 درجة Cases " حالات " ..
55 درجة Written " اسئلة مقال ..
و بكدا يبقى عندنا 250 درجة ..
- طيب انا هحتاج جثة و لا حاجة اذاكر عليه و لا اى حاجة كدا محترمة ..؟؟!!!!!
لأ طبعا كل اللى هتحتاجه عضم ( Bone ) البرنشات اللى عليك ..
و دا مش ضرورى اوى ، لكن هو بيسهل المذاكرة ..
و العضم دا بتشتريه من اى اسرة فى الكلية ، او م المشرحة اللى عندنا ،، او ممكن تاخدوا من حد اكبر منك تعرفه ،، او ممكن تأجره م الاسر برضه ..
المهم تحاول تشتريه بدرى ،، بس بيتهيألى الموضوع بالنسبة لدفعتكوا هيبقى اسهل شوية ...!! " بحكم ان عددكم قليل " ..

- طيب انا دلوقتى عاوز اعرف اى حاجة من المنهج نفسه ، مفيش اى شرح متسجل للمادة دى ..؟؟؟ " شكلكو متحمسين اوى .. "

- يا بنى اى حاجة هتحتاجها هتلاقيها عندنا بإذن الله ..

Physiology

- علم وظائف الاعضاء : من المواد الممتعة و اللى هتحس انها طب بجد ، حتى فى اول محاضرة الدكتور هيقولك المقولة الشهيرة اللى كل الاقسام بتقولها ( Physiology Of Today Is The Medicine Tomorrow )
..!!!
عموما هى مادة كويسة فعلا لكن مشكلتها انها طويلة شوية و من اكتر المواد اللى ممكن تضيعلك درجات ...
هتاخدوا فى اول محاضرة مقدمة كدا مش مهمة اوى ... لأنكم هتعرفوها بعد كدا كدا ..
هتاخدوا 5 شباتر بس ...
هتبدأو ببرانشين فى نفس الوقت :
1) برانش سهل اوى ومعروف من الثانوى ( Blood ) .. بيتكلم عن مكونات الدم و الحاجات اللى عارفنها دى ..
2) برانش اكبر شوية ( Nerve & Muscle ) .. و دا سهل برضوا ..

بعد كدا هتاخدوا برانش صغير لكنه محتاج حفظ شوية :
3) ( Autonomic Nervous System ) .. ودا بيتكلم عن الجهاز العصبى السيمباثاوى و الباراسيمباثاوى ...

و على آخر الترم الاول هتبدأو برانش عظيم .... اكبر من تلت المنهج تقريبا :
4) ( Cardio Vascular System ) .. و اختصاراً ( C.V.S ) .. ودا فعلا برانش كبير اوى .. لكنه ممتع شوية ..

آخر برانش هتاخدوه ، هو
5) ( Respiratory System ) .. براش سهل برضوا ..


- طيب هتذاكر منين ..؟؟

- انسب مصدر هو كتاب القسم فى معظم البرانشات لأن فى برانشات بيقى كاتب فيها كلام كتير اوى ..
فى مصدر تانى جميل و لذيذ و انا كنت بفضله - لأنه كان المختصر المفيد - الا و هو :
- مذكرات د/ عبد الحميد ..( بتاع الدروس ) ..
دول اشهر مصدرين للمذاكرة ..


- طيب ايه اخبار الدروس ..؟؟!!

- رقم 1 عندنا هو د/ عبد الحميد ... شرحه رااااااااائع و بيدى بحوالى 1200 ..
- فى بقى د/ رمضان .. و دا كان فى ناس بتاخد معاه لكنهم قلة .. ( مش عارف بيدى بكام ، بس هو قريب من د/ عبد الحميد ) ...
و كمان فى د/ جيهان .. و برضو قلة اللى كانوا بياخدوا معاها ..
::: طبعا دى مجرد اراء :::

- بالنسبة لتوزيعة الدرجات ...

- 25 درجة شفوى من لجنتين ..
-130 درجة امتحان فاينال :
50 درجة MCQ
80 درجة Essay

30 درجة عملى
65 درجة اعمال سنة عبارة عن :
3 امتحانات MCQ كل واحد ب 20 درجة ..
امتحان ب 10 درجات
بحث ب 5 درجات
كدا مجموعهم 75 درجة بيضربوا فى فاكتور معين عشان يبقوا 65 درجة ..


طبعا انت هتنزل فى الاول Blood ،،،، Nerve & Muscle

:::: Biochemistry ::::

قبل ما ندخل الكلية كنا بنسمع عنها كلام كتير ، وانها صعبة بقى والكلام الكبير دا ..
لازم تعرف ان البيو فى سنة اولى هى اسهل مادة .. من حيث المحتوى ..
لكن المشكلة ان رئيس القسم الجديد ، د/ هانى حليم بيحب اسئلة الاختيارات اوى ( MCQ ) ..
و اكتر حاجة بتضيع درجات هى الاختيارات دى عشان كدا لو فضل رئيس قسم يبقى لازم تحل كتاب ال MCQ بتاعه تالت اربع مرات ...

المهم :
هتبدأو فى الاول بشابتر مقدمة صغيرة هتعرفوا كل حاجة عنها بعد ما تدخلوا فى المنهج ..

بعد كدا هتاخدوا شيتر بيتكلم عن الاحماض الامينية ( Amino Acid ) ..
و البروتينات ( Proteins ) ..
و دا شابتر كبير شوية لكنه سهل اوى ...

بعد كدا تبدأو شابتر الانزيمات ( Enzymes ) ..
و دا من الشباتر السهلة اوى ..

هتدخلوا على شابتر ( DNA ) .. ودا فيه كتير من اللى خادتوه فى ثانوى ..
و فى الاخر خالص هتاخدوا شوية حاجات عن ( Metabolism ) ..
و دا شابتر فى اخر المنهج ..

- طيب نذاكر منين ..؟؟

- فى مصدرين زى بعض تقريبا :
1) كتاب القسم ..
2) ورق دكتور ايمن ..( بتاع الدروس ) ..


- طيب بالنسبة للدروس ..؟؟

- دكتور ايمن و بيدى بحوالى 500 جنيه فى السنة ... و دا من اكتر الناس اللى هتحس انها بتفهم و بتفهمك اوى ...

وفى د/ وليد ..
لكن الغالبية العظمى بتبقى عند د/ ايمن

::: Histology :::

- علم الانسجة : هتدرسوا فى سنة اولى جميع انواع الانسجة الموجودة فى الجسم ، وشكل الخلية فى كل نوع ..

الهستو من المواد اللى بتدخل فى بعضها و بتتنسى بسرعة ..
عشان كدا لازم تذاكرها كذا مرة ..

- فى الاول هتاخدوا فصل صغير اوى بيتكلم عن الصبغات ( Stain ) .. و انواعها واسماءها .. وكلام من دا .. ،،، هو شابتر صغير و سهل ..

- بعد كدا هتاخدوا شابتر عظيم بيتكلم عن الخلية و مكوناتها ( cytology ) ..
ودا من الشباتر المهمة اللى لازم تذاكرها كويس لأن ليه علاقة بباقى المنهج ..

الشباتر اللى بعد كدا هما :

Epithelial Tissue

Connective Tissue Proper

Cartilage

Bone

::: دا تقريبا منهج الترم الاول :::


Blood

Muscular Tissue

Nervous System

Circulatory System

Lymphoid ( Immune ) System

Respiratory System

::: و دا تقريبا منهج الترم التانى :::

...........
- سكشن الهستو من السكاشن المهم انك تشوف فيها الشرايح تحت الميكروسكوب عشان تقدر تفرق بين الشرايح ،، و بالتالى تبقى ضامن امتحان العملى اللى عليه 35 درجة ..
هو اى نعم سكشن ناس كتير مكنتش بتحبه ، بس لازم تحضره وتركز فيه اوى ..
كل سكشن بتاخدوا حوالى 3 شرايح ،، الدكتور بشرحهم و فى آخر السكشن بتشفوهم تحت الميكروسكوب ،،، فى ناس بتكبر دماغها و بتمشى علطول ..
ودول بيتعبوا فى مراجعة الشرايح آخر السنة عشان امتحان العملى ...

- نظرا لقلة دروس الهستو ، مفيش تسجيلات ليه عالنت .. لكن " دكتور مشرط " جزاه الله خيرا عمل شرح مبسط فى الموضوع دا
اتعلم هستولوجى صح ،، عشان تفهم ايه اللى جوا كل شريحه ،،

ياااااااااارب التوفيق
المصدر http://1aim.net/fourm/showthread.php...%D8%C8..-gt-gt

[المؤمن الصغير]

أشكر حضرتك يا دكتور على المعلومات المفيدة.

[Dr/Reem2011]

شكرا لحضرتك يا دكتور بس شكل حضرتك بتتكلم عن طب القاهره بس لان اخواتي في طب شبين وي معندهومش ترم مع بعض الاختلافات عن اللي حضرتك ذكرته عموما شكرا جزيلا

[ArabianPDA2]

الله عليك يا كبير يا مبشرني

فى ناس بتبقى جايبه 100 % فى الثانوى وبيجيبوا مقبول فى الكلية

علي فكره الهستولوجي هايف
بس رسوماته كتير مش اكتر والله
وربنا يستر فأم البشري ده

بس توبك رووووووووووووووووووووووووووووعه
يادوك

[sally khaledsy]

الموضوع حلو اوووى .....بس حضرتك بتتكلم عن القاهرة بس ....انا فى عين شمس و عايزة اعرف هوه المنهج بيبقى مختلف بنسبه كبيرة ولا لا .....عنى نفس المواد الى هدرسها فى اولى القاهرة نسها فى عين شمس

[mostafahero]

ارجو تثبيت الموضوع

[Dr/sara]

شكرا جزيلا على المجهود الرائع يا دكتور ربنا يجعله فى ميزان حسناتك

[حفيدة(عائشة) رضى الله عنها]

جزاكم الله خيرا
لابد من شكر موقع هدف واحد طب عين شمس الموقع المتميز موقع طبيب مسلم
جزاهم الله خير الجزاء
موقع اكثر من رائع

[Abdelrahman M M]

شكرا جزيلا لحضرتك يا دكتور على هذه المعلومات

[محمدخالدفتحي]

حقيقة معلومات هامة ورائعة وآراء هامة
ربنا يبارك فيك يا دكتور ويوفقك لما يحبه ويرضاه

[ران نيتشان]

ربنا يكرم حضرتك يا دكتور
جزاك الله خيرا