كل ما تحب ان تعرفه عن ((كلية السياحة والفنادق))

[Eslam_Tourism]

التعريف بالكلية: هى كلية تدخل دراستها فى مجالات السياحة والفنادق و الارشاد السياحى .


أقسام الكلية: 1- الدراسات سياحية
2- الدراسات فندقية
3- الارشاد سياحى


شروط قبول الطالب بالكلية:1- ان يجتاز اختبار القدرات التى تعلن عنها الكلية بعد ظهور نتيجة التنسيق وترشيحة للكلية .

2-أن يكون الطالب حاصل على مجموع 70% (35 من 50 ) على الأقل فى اللغة الأجنبية الأولى .


3-يجوز قبول خريجى المدارس و المعاهد الفنية للسياحة والفنادق الذين يرغبون فى مواصلة دراستهم بكلية السياحة والفنادق بنسبة لا تزيد عن 10% من إجمالى عدد الطلاب المقبولين من حملة الثانوية العامة والمرشحين من قبل مكتب التنسيق فى نفس العام
ويشترط إجتيازهم إختبارات القدرات قبل التقدم لمكتب التنسيق مع مراعاة أن يكون الطالب حاصلاً فى الدبلوم المتخصص على مجموع 75% على الأقل، كما يشترط إجتياز الطالب إمتحان فى اللغات الأجنبية التى تعقدها الكلية حيث إن إجادة اللغات الأجنبية تعد شرطاً عاماً للقبول بالكلية .


نظام الدراسة:1- مدة الدراسة لنيل درجة البكالوريوس أربعة سنوات مقسمة إلى ثمانية فصول دراسية على أن تكون نتيجة السنة الدراسية وحدة واحدة تعلن فى نهاية العام.
2- يعتبر الطالب ناجحاً إذا حصل على 50% من مجموع درجات كل امتحان.
الطالب الذى يرسب فى أكثر من مقررين يبقى للإعادة .
3- فى بعض الجامعات زى جامعة الحلوان والمنصورة يكون التحصص فى القسم من السنة الاولى .

وفى البعض الاخر زى جامعة اسكندرية يكون التخصص فى القسم من السنة التانية على حسب تقديرات المواد .

مجموع الكلية: طبعا التنسيق بيختلف كل سنة ولكن كلية السياحة والفنادق عامة بتاخد :

- فى الادبى بتاخد من 86% لــ 90% تقريبا وممكن تزيد او تقل عن كدة حسب التنسيق .

- فى العلمى بتاخد من 88% لــ 91% تقريبا .
وممكن ترجعوا لموقع التنسيق عشان تتأكدوا اكتر .


نبذة عن الاقسام:1-الدراسات السياحية: هو قسم يقوم بدراسة علم السياحة و اعمال شركات السياحة وشركات الطيران وكل شىء يخص السياحة بجميع انواعها.


2-الدراسات الفندقية: تقوم الدراسة فيه على ثلاثة اشياء وهم :

الأول: إدارة الفنادق ويقوم الطلاب بتعلم كيفية إدارة المنتجعات السياحية - الأغذية والمشروبات - خدمة الغرف - المكاتب الأمامية.


ثانياً: الأغذية والمشروبات f&b يقوم الطلاب بدراسة قوائم الطعان وتقيمها - مراقبة الأغذية والمشروبات - كيفية الطهو الفندقى وأسسه.


ثالثاً: التسويق يقوم الطلاب بدراسة الإقتصاديات التسويقية لمختلفة المنشآت السياحية - عمل دراسة جدوى لإنشاء مشروع سياحى - دراسة النواجى المالية لإدارة المشاريع السياحية.


3-الارشاد السياحى:- تقوم الدراسة فى هذا القسم بتعريف الطلبة بجميع الحضارات المختلفة التى عاصرتها مصر كالحضارة الفرعونية والاسلامية .

- يقوم القسم بتعليم الطالب اللغة المصرية القديمة وطريقة كتابتها ومدى أهميتها فى شرح المعالم المصرية القديمة.

- يقوم القسم بإعداد رحلات دراسية تعليمية للطلبة لزيارة المواقع الأثرية المختلفة فى كافة أنحاء مصر (أسوان – الأقصر – القاهرة - ...) وتعليم الطلاب كيفية التعامل مع السائحين المصريين والأجانب كمرشدين سياحين وكيفية التواصل معهم فى الواقع العملى.

- ملحوظة : فى قسم الدراسات السياحية وقسم الدراسات الفندقية يتم تدريس لغتين طوال الاربع سنين يختارهم الطالب من بينهم اللغة الانجليزية اما فى قسم الارشاد السياحى فأغلب المواد باللغة الانجليزية بالاضافة الى اللغتين .

واضيف كمان ان اللغتين مبيدرسوش بعمق جامد اوى زى الكليات المتخصصة فى اللغات (زى كلية الالسن مثلا) ولكنها بتدرس اللغات كمقررات فرعية بجانب مقررات القسم اللى بتختاره وكمان انت لازم تعمق لغتك عن طريق الكورسات او اى حاجة تانية بقدر الامكان لانك لازم تتخرج من الكلية دى وانت معاك على الاقل انجلش .

التدريب الصيفى: - يقوم طلاب الكلية بالتدريب فى الصيف فى احدى شركات او مكاتب السياحة أو وكالات السفر او شركات الطيران بالنسبة لطلبة قسم الدراسات السياحية .

- وفى الفنادق او المطاعم او القرى السياحية بالنسبة لطلبة قسم الدراسات الفندقية .

- وزيارة الاماكن السياحية و الاثار المصرية والفرعونية بالنسبة لطلبة قسم الارشاد السياحى .

وعلى فكرة التدريب ده يعتبر فى كلية السياحة والفنادق مادة نجاح ورسوب ولكنها لا تضاف الى المجموع الكلى
عشان كده لازم تهتموا بالتدريب ده كويس وكمان بيديك خبرة عشان فرصتك فى التوظيف تكون اكتر لان معظم سوق العمل فى السياحة بيطلب الخبرة السابقة .

الجامعات التى تدخل فيها الكلية:- جامعة الاسكندرية - جامعة المنصورة - جامعة حلوان - جامعة المنيا - جامعة الفيوم - جامعة قناة السويس فرع الاسماعيلية - جامعة المنوفية (مدينة السادات) - جامعة جنوب الوادى فرع الاقصر .


مجالات عمل الخريجين: 1- خريجى قسم الدراسات السياحية: تتضمن : 1- شركات السياحة:
- قسم "Operation" تنفيذ البرامج السياحية.
- قسم السياحة الداخلية – قسم السياحة الدينية (الحج والعمرة).
- قسم السياحة الخارجية – قسم الحجز (برى– بحرى – طيران).
- قسم الطيران بالشركة او حجز تذاكر الطيران

2- شركات الطيران:
- حجز تذاكر الطيران.

3- في المطارات:
- الضيافة الجوية .


ويمكن ان يعملوا كمرشدين سياحيين اذا حصلوا على دبلومة ارشاد سياحى لمدة سنتين وممكن تبقى سنة واحدة زى دبلومة الارشاد اللى فى كلية سياحة وفنادق المنصورة
وعلى فكرة الدبلومة دى صعب ان حد ياخدها وكمان الحصول على رخصة الارشاد مش مضمونة اوى يعنى .


2- خريجى قسم الدراسات الفندقية: مطلوبين بشدة فى مصر و الدول العربية و بيترقوا بسرعة و مرتباتهم حلوة برضو و كل ما تثبت نفسك فى الفندق اللى انت بتشتغل فية بيعلى مرتبك وتحصل على منصب اكبر .
وعشان تتوظف بسرعة وبمرتب اكبر يفضل اللى معاهم خبرة سابقة ولغات وياريت تاخد الخبرات دى من وانت فى الكلية او فى التدريب الصيفى .


3- خريجى قسم الارشاد السياحى: بيشتغلوا مرشدين سياحين و ممكن يشتغلوا مدرسين فى اى لغة وخريجى هذا القسم بياخدوا رخصة الارشاد فور تخرجهم من الكلية وعلى فكرة الرخصة دى هى الاثبات الوحيد للمرشد السياحى انه مقيد فى نقابة المرشدين السياحيين .
اما بالنسبة لمرتباتهم فتبقى حسب اللغات اللى معاك وكل ما يبقى معاك لغة نادرة زى اليابانى او الصينى بتاخد فلوس اكتر وعالعموم مرتب المرشد السياحى بيتراوح ما بين (3000 الى 6000 جنية او اكتر ) وممكن تقل عن كدة لو معاكش لغة نادرة .

دبلوم الدراسات العليا : يمنح مجلس الجامعة بناء على إقتراح مجلس الكلية درجة دبلوم الدراسات العليا فى إحدى التخصصات الآتية:
1- السياحة
2- الفندقة
3- الإرشاد السياحى

شروط القيد بدبلوم الدراسات العليا : 1- أن يكون حاصلاً على مؤهل عال من إحدى جامعات جمهورية مصر العربية أو درجة معادلة من معهد عال معترف به.
2- يفضل من يعملون فى مجال السياحة والفندقة.
3- أن يجتاز بنجاح الإختبارات المقررة التى يقررها مجلس الكلية للتأكد من صلاحيته للدراسة.
4- مدة الدراسة لنيل أى دبلوم دراسات عليا سنتان جامعيتان فى أغلب الجامعات المصرية وقد تكون سنة واحدة فى جامعات اخرى
5- تقدم الطلبات في الموعد المحدد من كل عام.
__________________________________

ارجو انكم تكونوا عرفتوا كل حاجة عن الكلية .

[Eslam_Tourism]

اه يا جماعة الموضوع معجبكوش ولا اية ؟؟؟؟؟

[gygy_love 2008]

لا والله الموضوع جامد جدا وانا فى سياحه انجلش حلوان
بصراحه الكليه حلوة اوى بس انا اتخنقت منها ومش طايقاها والله
معرفش حد فيها خالص وكمان مش هاهمه حاجه خالص من اللى بيتقال عشان كدة اتخنقت وبفكر احول منها

[Eslam_Tourism]

المشاركة الأصلية كتبت بواسطة gygy_love 2008

لا والله الموضوع جامد جدا وانا فى سياحه انجلش حلوان
بصراحه الكليه حلوة اوى بس انا اتخنقت منها ومش طايقاها والله
معرفش حد فيها خالص وكمان مش هاهمه حاجه خالص من اللى بيتقال عشان كدة اتخنقت وبفكر احول منها

معقووووول هتحولى عشان مش عارفة حد فى الكلية ومش فاهمة من اللى بيتقال انتى اه اللى خلاكى تخشى انجلش اساسا مانا كنت عربى فى سنة اولى وجبت جيد جدا , هو الانجلش هيعملك اه يعنى ؟؟؟
و مادام بتقولى الكلية حلوة عايزة تحولى منها لية بقى ؟؟؟

[ابراهيم كازنوفا]

مشكووووووووووووووور جدا جدا

[Eslam_Tourism]

العفوووووووووو

[Sherif Shoman]

تسلم يا اسلام
انا لسه فى السنه الاولى
وان شاء الله هاختار قسم درسات سياحيه لسنه الجايه

[Eslam_Tourism]

ربنا يوفقك يا شريف وفعلا قسم دراسات سياحية قسم مميز لانة بيجمع بين التلات اقسام

[Pussycat]

الموضوع جامد اوي شكرااااااا
انا لسه اولي ربنا يسطر

[eslam_2009]

موضوع اكثــــــــــــــر من رائـــــــــــــع

[RoOz:D]

اشكرك الموضوع مفيـــد جدا بجد
اكثـر من رائع بالفعل

[Rien]

المشاركة الأصلية كتبت بواسطة Eslam_Tourism

وفى البعض الاخر زى جامعة اسكندرية يكون التخصص فى القسم من السنة التانية على حسب تقديرات المواد .

اخيرا فيه كلية فكرت فيها موجودة ف اسكندرية

شكرا لحضرتك
بس كنت عايزة افهم
التخصص على حسب تقديرات المواد ازاى ؟
وايه نظام الانترفيو ؟

[Eslam_Tourism]

المشاركة الأصلية كتبت بواسطة souhaits

اخيرا فيه كلية فكرت فيها موجودة ف اسكندرية

شكرا لحضرتك
بس كنت عايزة افهم
التخصص على حسب تقديرات المواد ازاى ؟
وايه نظام الانترفيو ؟

قسم الارشاد السياحى بياخد من تقديرات عالية فى مواد التاريخ واللغات
اما قسم الفنادق بياخد من تقديرات عالية فى اللغات
وقسم السياحة بتدخله بسهولة , المهم تعدى اول سنة من غير ما تسقط فى مادة يعنى بياخد من اى تقدير .


اما بالنسبة للانترفيو بيبقى سهل عامة بيحكى عن اسئلة عن الاثار والعواصم والسياحة وشوية اسئلة بالانجليزى عن نفسك .
بس انا مقدرش اقولك الاسئلة لانها بتختلف من جامعة لأخرى وعادة بتتغير حسب لجنة الانترفيو بس كله بيعدى منه .

[Rien]

المشاركة الأصلية كتبت بواسطة Eslam_Tourism

قسم الارشاد السياحى بياخد من تقديرات عالية فى مواد التاريخ واللغات
اما قسم الفنادق بياخد من تقديرات عالية فى اللغات
وقسم السياحة بتدخله بسهولة , المهم تعدى اول سنة من غير ما تسقط فى مادة يعنى بياخد من اى تقدير .


اما بالنسبة للانترفيو بيبقى سهل عامة بيحكى عن اسئلة عن الاثار والعواصم والسياحة وشوية اسئلة بالانجليزى عن نفسك .
بس انا مقدرش اقولك الاسئلة لانها بتختلف من جامعة لأخرى وعادة بتتغير حسب لجنة الانترفيو بس كله بيعدى منه .

مش عارفة ليه حاسة انى غيرت رأيى ف هذه اللحظة تحديدا ( Joking )
شكرا لحضرتك عالرد

[mohamed franchy]

انا عاو اعرف اذا كان قسم الارشاد السياحى يدرس بالانجليزية فى جميع الجامعات وخاصة الفيوم ام لا وارجو الرد سريعا ؟