هل هذا مما عملت يداى فأندم ام هو قدر الله فأرضى ؟

[msrahmedseef]

اخوانى الاعزاء اما بعد
هذا تساؤل انا خريج كلية التربية سنى صغير ولكنى مريت بخبرات تحول سنى الى مسن انا عملت فى عدة مجالات وكان امامى عدة فرص منها كنت اعمل بشرم الشيخ وتركتها ولن اندم على تركها تعلمت مهنة الكهرباء وعملت فيها من وانا فى تانية كلية اشتغلت فى دمياط اشتغلت فى جمصة وكان من الفرص اللى انا ضيعتها العمل فى مصنع فى 6 اكتوبر كفنى ادارة و صيانة ماكينات تشكيل البلاستيك والصراحة مدير المصنع عرض علينا انا ومجموعة من اصدقائى ان يعطينا الخبرة اللازمة لهذا العمل من دورات من خبراء وحتى لو استدعى الامر ان يخرجنا فى دول اوروبية لتلقى التدريب اللازم بس كان المرتب اللى هو عرضة 750 جنية هذا الامر من 6 سنوات ماضية وكان بيوعدنا بان هذا المرتب مبدئى وفية زيادات سنوية ونسب وبونس واللى خلانى اتراجع عن العمل فى هذا المصنع انى كان عندى امل اشتغل معلم واشتغلت معلم مساعد فعلا وبعدين جتلى فرصة سفر مؤخرا السنة الماضية فى الطائف بالسعودية بمرتب مجزى جدا وبعدين حجات وعمرات مجانا الطائف على بعد 70 كيلو من مكة تخيلو وتراجعت برضة علشان املى فى التثبيت
التساؤل الوقتى هل هذا خطأ انا ارتكبتة بيدى فأندم علية ام هذا قدر من الله فنرضى ونصبر ونحتسب ؟
مع العلم ان السؤ كل السؤ من انفسنا و الخير كل الخير من الله
وآآآآآآآآآآآآآآآآآآآسف للاطالة

[احمد 720]

على فكرة يا اخى انا لسة رافض من يومين فقط عقد عمل كمعلم ( وليس معلم مساعد ) فى السعودية ولكنى رفضت البلد دى بلدنا وخيرها ده لازم يكون لينا مش لـ .................... .

واصبر وما صبرك الى بالله

[pirates]

مش انت لوحدك بس

[mratwa7]

كلامك خارج من قلوبنا جميعا لذلك لم اشعر بلاطاله
ان شاء الله اللى جاى احسن
و ما نيل المطالب بالتمنى ولكن................زز

[Mr.AI]

أخى الكريم أنا قدامى بدل العرض عشرة وكل ما أنوى أتراجع على أمل يبقى لينا حاجة فى مصر

[مسيو عاطف]

مشكلتنا اننا متعاقدين
ازاى بقى
يعنى احنا على وشك التثبيت ان شاء الله
وان سبنا التعاقد هيسيبنا وان قعدنا مش عارفين لغاية امتى
احنا زى اللى رقصت على السلم بالظبط

[Mr/ Mahmoud.K]

الحال من بعضه الكل خايف يطلع برا يبقى كده مسح كل اللي عمله يأستيكه ويرجع يبدأ من الصفر تاني هنا

[m.a.h.2050]

كل الشباب وعلي فكرة معظم الشباب اول التثبيت ما يتم باذن الله حياخدوا اجازة ويسافروا برا البلد دي

[hohoh]

انامختلف مع كل الناس اللى بتفكر فى السفر طاب ماتطلع وتسيب فرصة التعيين لواحد اخر وبعدين كل شئ وله تمن سفرك له تمن بعدك عن اولادك و اهلك له تمن واعتقد تمن حضن لولادك يسوى الكتير فاحمدوا الله واشكروه وانشاء الله خير

[جارةالوادى]

اولا كل واحد فى الدنيا مش بياخد غير نصيبه
ثانيا وارد جدا انك كنت سافرت ومرتحتش لاى سبب متاقلمتش مع الغربة مثلا مع المناخ مع الكفيل حتى يبقى ايه موقفك ساعتها هترجع مصر ومتلاقيش شغلك وعلى فكرة السفر حاليا مقامرة مش مغامرة بس لان الخليج متاثر جدا بالازمة العالمية ومعلش يعنى مش بيعتبرو المدرس المصرى لقطة زى الاول لاء بيعاملوه كانه سد خانة ومش مقتنعين بمستواه وطبعا لايغفل عنكم انه اقل مرتب
ثالثا بقى والله انا شايفة اننا مكن بشوية ضغط نتعين وتبقى احوالنا مستقرة شوية ودى حاجة كويسة بالنسبة لحضرتك كرجل انه ده ممكن يوفر لك وقت كاجازات او خلافه انك تعمل مشروع او تعمل حاجة توفر بيها دخل اخر لاسرتك او تزود بيه دخلك اما البنات برضو فتقدر تظبط احوال اسرتها او تسافر مع جوزها لو شغله فى الخارج يعنى الدنيا باذن الله هتتظبط وعلى فكرة اعرف ناس متعاقدين رجال كتير بيشتغلو شغل اخر لان التدريس اصلا مهنة غير مربحة سواء تعيين او تعاقد الاطبعا بالدروس الخصوصية اللى انا ضدها يعنى الموضوع فى الاساس مش تعيين او غيره الابس طلبا لشوية استقرار
على فكرة لو اشتغلنا فى بلدنا دى بنصف طاقتنا اللى ممكن نشتغل بيها برة دخلنا هيبقى كويس وحياتنا هتتظبط اكتر بس دايما زى المثل مابيقول زى القرع بنحب نمد لبرة

[nourhan200005]

ياخى لو كان لحضرتك رزق فى السفر او اى عمل من الذى تركته كنت هتاخذوه وكان ربنا هيوجهك له
ربنا بيقول(لاتدرى نفس ماذا تكسب غدا)
وكمان العمل ده ارزاق ربنا اللى مقسمها
انا اعرف واحد متخرج بقالوا حوالى عشر سنين ولحد دلوقتى ماشتغلش بعقد ولاتثبيت اشتغل بالحصه شويه ورجع اشتغل فى مدرسه خاصه وكان بيدى دروس واخيرا ربنا كرمه وسافر بس كافح كتير وزميله متثبتين مش متعاقدين
ربنا مبيخترش للانسان حاجه شر دائما بيختار له الخير حتى لو هو مش شايفه خير
وفى الاخر لازم تقول علمت ان رزقى لن ياخذوه غيرى فاطمئن قلبى

[said_math]

معك اخى بكل قلبى واحساسى ....ربنا معاك.....
وباذن الله خير.....اصبر وماصبرك الا بالله

فيه ناااااس غيرك كدا كتير مر بينا زيك كدا

والحمد لله على كل حاااااال
انا معاك فى كل كلمه وطبعا تفرق لو مش مرتبط او متزوج
العمر بيعدى الايااااااام تجرى
الواحد شغال بقاله 4 سنوات وحاسس انه شغال امبارح

[مستر / طاهر أبو خزيم]

انا معاكم فى كل اللى قولتوه لازم نصبر فاصبر وما صبرك الا بالله وبعدين الأرزاق بيد الله ولا بد ان نؤمن ان رزقك لن يأخذه غيرك مهما حدث ناس كتير جاتلها فرص للعمل بالخارج ورفضت على امل التثبيت وانشاء الله سيتم التثبيت قريبا وهنعل كل اللى نفسنا فيه

[eslamkobessy]

واعلم أن ما أصابك لم يكن ليخطئك وما أخطئك لم يكن ليصيبك

[شريف حسن .]

مصر أم الدنيا ورزقك ونصيبك لن يأخذه غيرك تأكد من ذلك