لو داخل اولي جامعة اسأل مجرب

[vampire1188]

مبروك يا عم إنك نفدت بجلدك من ثانوي .. ومبروك إنك هتبقا من طلاب الجامعة 1000 1000 مبروووك..
بص بقا يا أبو زُمل أنا زميل من زمايلك في الجامعة اسمي "مجرب" دخلت الجامعة قبلك وماعرفش مين فينا أنا ولا أنت هيخرج منها الأول ... المهم الزمن علمني حاجات – وأنتعارف إن الزمن ياما بيعلم- قلت لازم أعرفهالك علشان تبقا ماشي في الجامعة على نور .

بص يا سيدي! فتح دماغك معايا وخد نصيحة مجرب:
· طبعاً أنت خلصت ثانوي بهمه ومذاكرته وداخل الجامعة وأنت فاكر إن الجامعة دي صباح تكبير الدماغ من المذاكرة ..... لا لا أنت كده غلطان أوعا تفتكر الجامعة كلها فسح ولبس وخروج وأصحاب .. طبعاً الحاجات دي موجودة بس طبعاً المذاكرة الأول صحيح مش زي ثانوي بس مينفعش تخليها آخر حاجة ... قرب شويا كده أقلك على سر بيني وبينك ( أنت بجد ابتديت الدراسة المهمة في حياتك ) مواد ثانوي دي كانت أي كلام إنما دلوقتي هتدرس مواد تخصص وهي إلي هتشتغل بيها طول حياتك يعني علشان تبقى واد مخلص في شغلك لازم تبقى شاطر في المواد دي .

· في الجامعة الأصحاب بيكترو و هتلاقي ناس من كل صنف ولون المهم أوعى تنسا إن زي المثل مابيقول ( الصاحب ساحب) يعني إيه ؟؟!! يعني لازم تاخد بالك كويس لما تيجي تختار أصحابك .. طبعاً هتقلي: "و أنت مالك بيا وبأصحابي ؟؟!".... ساعتها هاأقولك أصلي ياما شفت ناس زمايلي كانوا طيبين و غلابة ولما صاحبوا ناس "نص كم" أتقلب حالهم وخد عندك إشي سقوط كام سنة وإشي إدمان على جواز عرفي و.................

· البنات... هتقلي طبعاً فاكهة الجامعة !!!!! وطبعاً هقلك أنت مضحوك عليك ... الشاب من دول يدخل الجامعة وأول حاجة يفكر فيها إزاي أصاحب بنت - أي بنت – وبعد ما يحصل المراد تلاقي الاثنين عايشين مع بعض الوهم بالنهار في شوارع الجامع وبالليل ع التليفون وتكون النتيجة إيه ؟؟! الولد هو إلي بيدبلر ... سامعك متغاظ وبتقلي: "إشمعنا الولد؟!" هقلك طبعاً البنت ممكن تدبلر معاه بس ده بيحصل أقل لأن البنات بيذاكرو في الخباثة!!

· معلهش يا جماعة... الولاد شويا علي جنب ويغمضوا عنيهم.. الكلمتين الجايين للبنات وبس .. بصي يا ستي :الجامعة دي معرض كبيييير قوي للهدوم .. شويا بدي على جينز على أستريتش على... على... المهم هقولك كلمة في ودنك بس بشرط قبل ما أقولها توعديني ما تزعليش ............ اتفقنا؟؟ (متخليش نفسك فرجة للي يسوا واللي ميسواش ) لأن مفيش شاب هيبصلك بصة بريئة .... أنا شايف كام بنت نفسهم يطبقوا في زمارة رقبتي بس إحنا اتفقنا من الأول إن مفيش زعل.

· آخر كلمتين بقا علشان أنا حاسس أني بقيت غتت ... بقلكم إيه اسمحولي أنصحكم نصيحة لوجه الله ... الرسول (ص) بيقول كلام حلو ومهم قوي عن الشباب ..عارفين بيقول إيه " لن تزولا قدما عبد يوم القيامة حتى يُسأل عن أربع" ... ومنها عن "شبابه فيما أبلاه؟ " يعني كل واحد فينا ربنا هيسأله عن فترة الجامعة دي عمل فيها إيه .. طبعا دي كل واحد فينا هيجاوب عليها لوحده .. ودي بالذات مفيهاش غشّّ!!

اللهم قد بلغت .. اللهم فاشهد ..

[شيماء شريف]

كلام مضبوط انت عارف لما دخلت الجامعة لقيت فييها اشكال بنات مايعلم بيها الا ربنا اللى عملالى وشها فرح ولبسها راحة ترقص واللى لابسة اسدال ونقاب سبحان الله تيارين مختلفين تماما

[ياسمينايا]

فعلا عندك حق حاجه غريبه تسلمي ع التوبيك

[wanda]

طب ممكن تقولى نظام كل دكتور من اللى هيدولى يا مجرب
والحمد لله انا كل محاضراتى فى مدرج واحد هو مدرج د

[vampire1188]

اه اتريقي اتريقي يااااااا واندا هانم !!

ماهو دا اللي احنا بناخده منكوا .. تريقة وبس ..

على العموم كله محتسب عند ربنا .. واحنا في شهر كريم ..

اني واي .. انتي بما انك مجموعة (ز) .. اللي هيا نفس مجموعتي ..

اللي هيا نفس المجموعة اللي هاتقندل على عيني واحضر فيها معاكوا للاسف .. معا اني تانية ..

بس عادي يعني ..

المهم .. بصي ياستي ..

اول انطباع .. ان الجدول فقري اوي .. هوا مش تشاؤم ..

بس مجرد ان محاضراتكوا كلها تبقي في اضيق مدرج في تجارة كلها .. يبقي دا ظلم يعني !!

ثانيا بقي .. نشوف الدكاترة كدا ..

اول واحد .. د/ هشام البحيري .. (ادارة)

راجل محترم وكويس ومخلص في شرحه جدا .. اي نعم هوا محبط شوية (طبعا مش زيي) .. بس هوا عموما بيحب اللي بيحضرله .. وبيقدر يميز دا في التصحيح اما بييجي يصحح الامتحان .. بيعرف الطالب دا حضرله ولا لأ .. بيعمل حركات قلة معا الطلبة ساعات .. يفضل يقولهم انا اقدر اسقطكوا ، انا اقدر ماخليكوش تحضروا الامتحان .. عاااااادي خالص .. ولا تاخدي بكلامه .. اهم حاجة تهتمي بمحاضرة وتركزي فيها جامد ..

تاني واحد .. د/ هشام سيد (سلوكية)

مممم يعني .. شغال .. هوا بصي من الاخر معظم الدكاترة بتوع ادارة الاعمال .. بيبقوا خنقة .. نادر اوي اللي بيبقي لذيذ .. بس عموما .. هوا د/ هشام السنة اللي فاتت كان بيدي مشتريات للفرقة التالته هـ .. اللي هيا (و) حاليا .. بس بيشد شوية ساعات .. سيبك من الحركات المملة اللي بيعملها .. تلاقيه يوطي صوته ويعليه مرة واحده .. عادي نوبروبليم .. اللي يهمك المحاضرة وبس ..

تالت بني ادم .. د/ اشرف على عبده ..

ماعرفش عنه حاجة .. انتي وحظك بقي !!

رابع شخصية .. د/ ناشد عبد السلام ..

زيه زي د/ مصطفي عبد الغني كدا .. راجل شخصية .. صوته عالي شوية بس محترم .. بيفهم كويس .. ساعات بيتنرفز بس بيهدي وبيكمل المحاضرة ولا كأن فيه حاجة حصلت .. وبرده من الاخر .. معظم الدكاترة بتوع قسم التامين ناس محترمين .. ودي بشهادة الطلبة بتوع تجارة .. وانا واحد منهم .. على العموم .. هوا كان بيدي مادة تأمين لتالته (د) السنة الي فاتت .. ونسبة كبيرة نجحت فيها يعني .. تفائلوا خير ان شاء الله !!

خامس دكتور .. صبري العطار ..

دا اقدر اقول عليه دكتور محترم .. بس مشكلته انه ماشي على نهج شوقي بشادي .. لإن الدكتورين دول عاملين كتاب واحد .. تقدروا تقولوا عامل اتفاقية شرح مشترك !! .. كان بيدي محاسبة مالية في مجموعة (هـ) السنة اللي فاتت ( اللي هيا و حاليا) وانا شخصيا اول محاضرة في حياتي احضرها في الجامعة كانت ليه .. هوا هاتتلاقوه بنضارة كدا وكلبوظة !! .. بس عادي .. محتاجله متابعة وتركيز .. وحل التطبيقات بتاعته .. بس الله اعلم بقي في الامتحان .. هل شوقي بشادي هوا اللي هايحطه ولا العطار ؟! .. الله اعلم ..

ودا كان ملخص عام للدكاترة بتوع سنة اولي مجموعة (ز) .. اللي هيا مجموعتي واعتز وافتخر انها مجموعتي ..

اما بالنسبة بقي للتوقيتات .. فهيا رخمة شوية .. بس عادي .. هاتاخدوا على كدا ..

[lala_2002]

موضوع بجد روعة

ربنا يكرمك يارب ويجعله فى ميزان حسناتك

وربنا يهدينا جميعا


على فكرة انا لسة حدخل كلية السنة دى ان شاء الله وربنا يستر

[king mo7amed]

والله النصائح دي مفيده جدا تحياتي ليك

[wanda]

ِكرا بس انا مش بتريق
المهم انا ولا فاهمة من جدولك حاجة ولا من اللى جيبته
المواعيد من كان لكام ده سؤال
والسؤال التانى
هو فية دراسه قبل العيد ؟؟
والسؤال الثالت
ينفع احضر مع اى مجموعه عادى يعنى بس بعد ما احضر مع مجموعتى
اصلى عايزة احضر فى العيوطى مرة

وشكررا بجد الدكاترة باين عليهم كويسين وانا اعتز انى فى (ز) طبعا
مجموعة الزلازال :P

[ahmedovich]

هو ايه العيوطى ده انا هحضر فيه يوم الاتنين شكله مدرج مش ولا بد

[ahmedovich]

هو الجدول فى رمضان ازاى

مكتوب ان فيه محاضرات من 5 ل 6.30

؟؟؟؟؟؟؟؟؟؟؟؟

[vampire1188]

المشاركة الأصلية كتبت بواسطة ahmedovich

هو الجدول فى رمضان ازاى

مكتوب ان فيه محاضرات من 5 ل 6.30

؟؟؟؟؟؟؟؟؟؟؟؟

الجداول يا عم الحاج في رمضان بتبقي كالاتي ..

تشوف مواعيد جدولك الاساسية .. وتقارنها بالموعيد دي ..

8.00 : 9.30 هاتبقي في رمضان >> 8.00 : 9.00

9.30 : 11.00 هاتبقي في رمضان >> 9.00 : 10.00

11.00 : 12.30 هاتبقي في رمضان >> 10.00 : 11.00

12.30 : 2.00 هاتبقي في رمضان >> 11.00 : 12.00

2.00 : 3.30 هاتبق في رمضان >> 12.00 : 1.00

3.30 : 5.00 هاتبقي في رمضان >> 1.00 : 2.00

5.00 : 6.30 هاتبقي في رمضان >> 2.00 : 3.00

6.30 : 8.00 هاتبقي في رمضان >> 3.00 : 4.00

[vampire1188]

اجاوبك واحده واحده ..

بالنسبة للمواعيد .. نتكلم فيها لاحقا .. لإن الجداول اكتشفت انه مشكوك فيها مؤخرا .. فبلاش نتكلم في النقطة دي

بالنسبة للسؤال التاني .. انا بقي مش عارف انتي ازاي اساسا تسألي سؤال زي دا !!

اكيد يعني فيه دراسة بعد العيد .. ولا انتي هاتخلصي رمضان والعيد وتأجزي وتاخدي الامتحان منازل ؟!!

ممكن يكون سؤالك غلط وكان قصدك فيه دراسة قبل العيد .. في تلك الحالة اقدر اقولك اه فيه ..

بس بتبقي خفيفة جدا .. المحاضرة بتبقي ساعة واحده بس .. والدكتور بيبقي جاي يتعرف مش اكتر .. والجو اصلا حر والناس مش طايقة نفسها .. فعاااادي .. عايزة تروحي روحي .. مش عايزة عادي مش هايشكلك مشكلة في الدراسة يعني .. هوا فيه نظرية بس بتقول انك بما انك لسه داخلة جامعة فيستحسن تروحي اول يوم عشان تخففي من رهبة الحضور وتعرفي الجامعة ومناطق المحاضرات واماكنها .. مناظر الدكاترة .. الخلق اللي هاتبقي معاكي في المدرج .. (اللي انا من ضمنهم ) ..

بالنسبة لسؤالك التالت .. اه تقدري تحضري في اي مجموعة تعجبك .. ان شالله تحضري معا انتظام حتى .. مش فارقه .. بس المهم تكون الاولوية لمجموعتك ودكاترتك .. لإن هما اللي هايحطوا الامتحان مشاي حد تاني ..

ملحوظة بس بسيطة .. مالك يعني محموقة اوي على العيوطي كدا ؟! .. هوا اه شكله من بره حلو وشيك وضخم كمان .. دا غير انه مكيف الهواء .. رطب صيفا .. ثلج شتاءا !! .. بس عادي تعالي في اي محاضرة يكون باب المدرج فيها مفتوح .. واقفي بس على البوابة كدا من بره .. واتفرجي .. هاتشوفيه ..

[wanda]

لاء انا هدخل
انا هدخل هو شكله حلو ولما يكون فى محاضرات جوة هقعد على الشباك

[vampire1188]

شباك ايه دا اللي تقعدي ليه ؟!

العيوطي مالوش غير شبابيك طويلة وكبيرة ومايتقعدش عليها اصلا !

[wanda]

انا هقعد اصلى طويله هههههههههه
قصدى هشب واقعد رخامة بقى وهجيب معايا جلنكس علشان التراب