|
||||||
| كليات المجموعة العلمية (الطب البشري - طب الأسنان - الطب البيطري - العلوم الطبية التطبيقية - العلاج الطبيعي - الصيدلة - التمريض - العلوم - الزراعة) |
 |
|
|
أدوات الموضوع | انواع عرض الموضوع |
|
|
|
#1
27-08-2009, 01:16 PM
|
|||
|
|||
""""((دليل الطالب المستجد ))""""""
بسم الله الرحمن الرحيم تجولت فى المنتديات وخصوصا منتدى الصيادلة اليوم لقيت موضوع مهم جدا ومفيد حبيت ان المنفعة تعم الكاتب جزاه الله خيرا تناول 11 ركن كل ركن يهم طالب اعدادى المستجد جدا وان شاء الله يفيده ويضعه بسلام على أول الطريق الصحيح أولا :- مدخل الى علم الصيدلة والسؤال الذي يطرح نفسه هل فعلا الصيدلة بقالة ؟ المشتركين معانا إن شاء الله حاجة من اتنين إما إن الصيدلة كانت هدفه من الأول وعنده قناعة بيها أو إن دخولة كلية الصيدلة بسبب التنسيق مش أكتر وفي الحالة دي أحيانا ممكن يكون مش مقتنع بالكلية والدراسة فيها والعمل كصيدلي أيضا من أسباب عدم الاقتناع النظر لأوضاع الصيادلة في مصر والوطن العربية والتهميش الجائر لدوره في المجال الصحي , لدرجة اقتناع الصيدلي نفسه بأنه مش أكتر من بقّال زي ما كتير بيقولوا القناعة دي بتتكون إما من الشارع والمجتمع وكتير مش بيدخلوا الكلية بعد ما كانت حلمهم بسبب النقطة دي ( نظرة المجتمع للصيدلي ) وأحيانا تتكون هذه القناعة أثناء الدراسة الجامعية ودا بيرجع لعدم مقدرة الطالب على الربط بين المواد اللي بيدرسها بالكلية وبين مجال العمل وأحيانا بعد التخرج بعد احتكاكه بسوق العمل وعدم وضع بعض الاعتبارات الاخرى في الحسبان لذا انطبعت الصورة النمطية للصيدلي إن دورة يجيب الدوا من الرف ويناوله للمريض وحاسبه عليه إلى حد ما قد تبدو بعض المبررات لذلك منطقية لكن الواجب علينا نبقى مستعدين ونحاول نعمل اللي علينا علشان نرتقي بمهنتنا لو رجعنا للأسباب هنلاقي إن أغلبها راجعة للصيدلي نفسه ويتحمل مسئولية كبيرة في ذلك وإن بايدنا كصيادلة زيادة على اننا نقتنع ان دورنا حيوي ومهم إننا نغير صورة الناس عن الصيدلي , وده عن طريق إننا نحترم مهنتنا أولا ونعرف دورنا فيها إيه ونقدر نقدم ايه للناس خلالها ثانيا عايزين الاول نعرف ايه هو معنى كلمة الصيدلة اللى بننتسب ليها وبيتقال علينا "صيدلى" او "صيدلانية" ؟؟! الصيدلة = الدواء ده باختصار شديد اما التفصيل فهو اللى احنا بناخده فى كليتنا من مواد واللى كلها بتصب بشكل او بآخر فى الدواء وكل مادة بناخدها حقيقة مهمة جدا ليك او ليكى كصيادلة وده اللى حنجيله بالتفصيل ان شاء الله تعالى فى دورتنا دى وتعالوا قبل ما نبدأ ناخد لمحة تاريخية عن مهنتنا الجميلة عشان نتآلف معاها اكتر ... يلا بينا يا شباب تاريخ كلمة الصيدلة كلمة الصيدلة لفظ حديث مطور للفظ === الصندلة. فالعلم الذي كان يهتم باستخراج الأدوية من المصادر الطبيعية ومزجها ووضعها في صيغتها الدوائية كان يسمى صندلةً، لأن العرب الذين كانوا يعملون في هذا المجال كانوا يضيفون مادة الصندل ذات الرائحة الزكية على مستحضراتهم الصيدلانية حتى تكتسب تلك المستحضرات رائحة جذابة لاستخدام الدواء. وانتم ان شاء الله حتعملوا كده زيهم فى مادة حتاخدوها من اول سنة اولى ان شاء الله وهى الصيدلانيات او الـ ceutics زى ماحنقول بعد كده عن اللى جواها واهميتها بعد ما عرفنا يعني ايه صيدلي نيجي لتاني حاجة تعرف على دورك أولا لازم تعرف انك جزء من منظومة صحية متكاملة كل واحد له دوره وتخصصه المشكلة بتكمن ان احد هذه المنظومات يسيب دوره الأساسي ويهتم بدور غيره وفي الحالة دي بيفقد هويته أولا وتقديره لدوره وفي نفس الوقت هيفقد احترامه لدى التخصصات الأخرى لأنه اهتم بدور غير دوره على حساب واجبه الأساسي دا فضلا عن انه يترك واجبه ولا يهتم بشئ آخر غير الماديات وساعتها هيفقد احترامه لدى كل الفئات والقطاعات يعني ايه دا كله ؟ يعني علشان تكسب احترام الناس بكل فئاتها لازم تركز على دورك الأساسي اللي هو " الأدوية Drugs " بمعنى ان الصيدلي لازم يكون اهتمامه بالأدوية Drug Oriented أكتر من أي اهتمام آخر ودا بيتطلب معرفة بسيطة بالأمراض تخدم بيها معرفتك بالادوية وتخدم بيها المرضى اللي بيجولك الصيدلية , عكس الطبيب اللي هو في الأساس Disease Oriented يعني اهتمامه الأول هو المرض وكيفية تشخيصه ومعرفته بالأدوية مش هي الأساس عنده في الحالة دي كل قطاع هيعرف دوره وهيبقاله كيانه الخاص , اللي هيبدأ كل واحد فينا يهتم بإنه يكونه من أول يوم له في الكلية ويعرف إنه خلاص محاسب على أي تقصير في حقه وحق المهنة وحق الناس وحق الله طبعا .. كده عرفنا دورنا ايه واهتمامنا هيكون بايه ... ننوي نية صادقة ونتوكل على الله ---------------------------------------------- 2- سنة أولى جامعة أهلاً وسهلاً بطلبة كليتنا الجميلة  في موضوعنا النهارده عايزين نعرف أهم الفروق بين المدرسة والجامعة والنقلة الي هتتنقلها بين يوم وليلة من طالب مدرسة إلى طالب جامعي محترم لأ وبيتقال لك يا دكتور كمان، والفرق على مستوى علاقاتك ومحاضراتك وتعاملاتك، وكمان شعورك في أول يوم إلى كلنا حسيناه. أول حاجه بقترح إنك تنزل خلال الفترة الجايه تحاول تزور كليتك عشان لما تروح إن شاء الله أول يوم يكون في ألفة بينك وبين المكان، لأن من الأخطاء الي عملتها إني ما شفتش كليتي غير اول يوم، ومش عايزة أقولكم إنه كان هاين عليا أعيط وأمشي بصراحة، اتصدمت صدمة كبيرة أوى، ليه؟ لأن تخيلي عن الجامعة مكنش كده خالص، فجعت لما دخلت مدرجة إعدادي، ده غير اني وصلت له بعد طول عناء وبهدلة وكنت سألت نص الجامعة تقريباً فين كلية صيدلة وفين مدرج إعدادي، ده غير الناس الي فكت لي طلاسم الجدول الي كنت مسكاه بالمقلوب تقريباً. ايه بقى سبب المفاجعة السابقة دي؟ إني لقيت ما لا يقل عن 1000 بني آدم في مدرج لا يتسع إلا لـ 500 واحد كده، ده غير إن الدكترو الي بيشرح ملهوش أي دعوه بأي حاجه، بمعنى آخر انت ما بقتش في مدرسة، يعني هوا مش هيجي يفهمك ولا هيسألك انت فاهم ولا لأ، هو بيشرح حتى لو رؤوس مواضيع وإنت كطالب جامعي المطلوب منك تفهم وتدور وتبحث في المراجع  اه والله هما كانوا بيقولوا لنا كده.بس ما تخفش اوي كده الدنيا مش سوده كده، بس بشرح لك انا حسيت بإيه أول يوم، اول محاضرة دخلتها كانت كيميا تحليلة وبنت عمها الكيمياء الفيزيائية وبعد منهم شرح عملي تحليلة، يعني من الآخر أصبحت مشبعة بالكيمياء في يوم واحد، الي بيتقال في دي بيتعاد في التانية بس المشكلة حاجه واحدة، ان محدش، رساني على الأساس، بمعنى آخر الكلام سهل جداً جداً وانت واخده في ثانوي وحافظه وفاهمه وعند استعداد تشرحه لزمايلك كلهم، بس المشكلة إن الأخوة الأعزاء الدكاترة بيدخله يخبطوك المحاضرة من غير أساسيات، يعني بقيت هتهبل في أول محاضرة وافهم يعني ايه ( كونك ودايل) الي بيقولها طول المحاضرة دي (Conc. , Dil.) وطلعوا في الآخر اختصار مخفف ومركز، دي المشكلة الوحيدة الي هتواجهك إنهم بيدوك الكلام على أساس انك تقريباً المفروض تكون عارف. على فكرة اوعى تتردد تسأل حد أكبر منك، هتلاقيهم طول النهار كواليك في الكلية ومحدش فيهم هيتأخر عنك ، والله ناس ما اعرفهمش كده من السنين الي أكبر مننا كانوا بيشرحوا لنا، مرة واحدة كانت قاعدة جنبي على سلم الكلية سألتها سؤال قعدت تضحك ربع ساعة يعني ايه الكلمة دي (vice versa) وانا بقى فكراها كلمة مهمة جداً ولو ما فهمتهاش يبقى المحاضرة راحت خلاص، طلع ان معناها والعكس بالعكس، يعني التيار يتناسب طردياً مع الجهد والعكس صحيحبالمقابل كليتنا فيها نخبة دكاترة لا يمكن يتعوضوا وحاول تتعلم منهم أد ما تقدر، كان عندنا دكاترة تحس انك قاعد في الفصل مش في الجامعة بيشرح كويس اوي ومن قلبه اوي، وبمنتهى المنطق والعقل، وتخيل كنا بناخد واجب في آخر المحاضرة وبنحله وبيشوفوه كمان وده بيسموه فى عالم الجامعات سيرش search وممكن يكون حاجة صغيرة كده او كبير شوية وفعلا بيكون مفيد جداااا فمتتضايقوش منه لانكم حتكتشفوا ان اللى دورتم عليه بنفسكم هو اللى ثبت فى عقولكم وحتلاقوا نفسكم فرحانين بيه جداااااااااااااتاني مشكلة هتقابلك في الكلية مصدر للمذاكرة، كتب او ورق طلبة او ورق دروس او كورسات ,, في ناس في كليتنا عمرها ما فتحت كتاب وفي ناس ما ذاكرتش غير من كتب، دي حاجه تعتمد عليك انت، بعد أسبوعين أو 3 من الدراسة هتلاقي ورق الدورس، في المكتبات المجاورة للجامعة أو الكلية، الكتب ممكن تتأخر عن الوقت ده، حاول توحد مصدر المزاكرة من أول مرة يعني مش هنزاكر شويه من هنا وشويه من هناك. ونصيجة لوجه الله لو حتذاكر من ورق مش من كتب الدكارتة تراجع ورا الناس اللى بتكتب لاننا اتقرصنا كتييييييير من غلطاتهم وطبعا هى مش غلطاتهم هم لكنها غلطتنا احنا لان هم زملاء مشكورين على اجتهادهم فى كتابة المحاضرة لكن انا اللى تواكلت ومحبتش اتعب نفسى فحاااااااسبوا جامد نقطة المحاضرات والمذاكرة واللغة هنتكلم عنها بالتفصيل في أيام الدورة القادمة، بس قلتها لكم هنا لأنها من أهم مشاكل سنة أولى جامعة نكمل باقي الفروقات بين الجامعة والمدرسة بعد الفاصل ان شاء الله ... تابع 
|
|
#2
27-08-2009, 01:25 PM
|
|||
|
|||
|
ماذا ندرس فى كلية الصيدلة السلام عليكم ورحمة الله وبركاته نشوف بقى اللى بندرسه ف صيدلة ... احنا محتاجين ايه يا شباب عشان نكون ناس experts او خبراء فى الادوية؟؟ واااااااااو خبراء مرة واحدة!!! ايوووووة المفترض ان حضرتك تتخرج كده ممكن نقول مش خبير بالضبط لكن عندك الارضية الصلبة اللى تقف عليها وبالتعليم المستمر او الـ continuous education تبقى خبير بسرعة جدا ان شاء الله محتاجين الاول نعرف ايه المكان اللى حتشتغل عليه الادوية بتاعتنا وحتعدل فى وظايفه اللى هو جسم الانسان يبقى حنلاقى نفسنا محتاجين نعرف تشريح جسم الانسان او مكوناته بمعنى ابسط وده اللى بنشوفه فى مادى الـ anatomy او مادة التشريح ومادة الـ histology او علم الانسجة وبعدين بعد مااتعرفنا علي الجسم نحب نعرف وظايف الاجهزة اللى جواه اللى لما بيحصل فيها اى خلل او disorder ساعتها الفريق الطبى بيتدخل وده اللى بنشوفه فى مادى الـphysiology وكده نكون ناس عندنا ارض خصبة نشتغل فيها على كل ما يختص بالدواء واحنا عارفين رايحين على فين ندخل ع الادوية بقى اللى هى اساس شغلنا يلا بينا ...... حنمسك الدواء من اول الـ designing بتاعه يعنى من اول ما حنصممه حنصممه؟؟؟!! مرة واحدة اه طبعا امال مين اللى بيخترع او بيصمم دواء غير حضرتك؟؟ نشوف الخطوات ...... اولا عايزين نعرف التركيب الكيميائى للدواء ده وشكله او الـ structure بتاعه ..... وازاى المركب ده بيتحضر فى المعامل ...... وايه التفاعلات اللى ممكن يعملها الدواء او المركب ده(اللى ممكن يكون جزء من دواء مش كله) وده اللى بنشوفه من سنة اولى فى مادة الـ organic chemistry او الكيمياء العضوية واللى بتقعد معانا لحد سنة تانية وبعدين تتغير للكيمياء الصيدلية او الـ ceutical chemistry ودى الكلام عليها يطول وهى مادة ممتعة بس عايزة اللى يفهمها وينظمها ويعرف يستفيد منها ........... وللحديث بقية ان شاء الله ---------------------- نكمل مع الـ ceutical المادة دى على صعوبتها (عشان الصراحة كويسة برده : ) ) الا انها مهمة جدا ودى بقى اللى لامة العضوية ومدخلة التصميم بتاع الدوا بجد فيها بحيث ان انت حتفضل تلعب فى الـ structure بتاع الدوا عشان تحسن خواصه او تغيرها خالص يعنى حاجة تخليه more lipid soluble عشان يعدى الغشاء الفاصل بين المخ والدم اللى هو الـ blood brain barrier (bbb) او نخليه polar او دايب ف المية عشان ميعديش او مثلا نزود الـ stability او استقرار المركب و نعمله prodrug او دواء غير نشيط عشان مثلا نحل مشكلة فى الدواء انه بيتكسر لو دخل نشيط او active على طول ....... الخ والامثلة فى شرح السيوتيكال تطووووووول اى اسئلة تانية عنها بقى فى الاسئلة ان شاء الله فى الحقيقة المادة دى بس عايزة انك تبص كتير على الـ structures بتاعتها وتحفظ المميز اللى فيها وتفهم كل مركب قدر المستطاع حتمشى جميلة جدا وده حنشوفه مع بعض فى طرق المذاكرة الـ creative او الابداعية فى الايام الجاية ان شاء الله احنا خلصنا تقريبا مرحلة التصميم العام للدواء عايزين بقى ندخل فى كيمياء الجسم ونتعرف على انواع المركبات الحيوية للجسم ولو حصل خلل فيها بيحصل ايه والتركيب الكيميائى للمواد الحيوية فى الجسم زى الكوليستيرول وغيره وده اللى بنشوفه فى مادة الـ biochemistry نشوف بقى خواص الدواء وبيشتغل ازاى والاعراض الجانبية بتاعته والمعلومات المهمة عنه بشكل عام واللى بنشوفه فى مادة الـ pharmacology واللى بتكمل فى الـ bioassay و الـ toxicologyاللى بتدرس سمية الأدوية او أي مواد تانية وطريقة انقاذ المريض وبتدرس التلوث بكل أنواعه ميه وهواء ومعادن وتأثيرها على كل عضو في الجسم بيكون ازاي (liver ,kidney, lung, reproductive system) وحضرتك كصيدلي ليك دور مهم في علم السموم والتسمم وكمان حضرتك عنصر في المنظومة الطبية لإنقاذ المريض سواء بتقديم معلومات مفيدة عن الدواء تساعد في انقاذ حياته او تشخيص مسبب التسمم من خلال الأعراض .... تمام ؟؟ طيب عايزين ايه تانى يا ترى؟؟؟؟ ااااااااااه لسة فيه مهمة جدا عايزين نطلع الدواء ده فى الاشكال الدوائية المختلفة الاقراص والشراب والتحاميل او اللبوس والمراهم والكريمات ...... الخ وده اللى بنشوفه فى مادة الصيدلانيات او الـ pharmaceutics اللى بتكون معانا على مدار اربع سنين من سنة اولى والمادة دى قيمة جدا لاننا مش بناخد فيها الاشكال الدوائية بس ..... لا كمان بناخد فيها ازاى نعمل الـ formulation او التركيبة بنتعلم فيها كمان حساب الجرعات وتظبيطها وده بيبقى شغل صيدلى المستشفى وبيكون فى جزء جوة الصيدلانيات اسمه الـ pharmacokinetics كمان بناخد فيها التشريعات الصيدلانية يعنى موقف الصيدلى القانونى فى المواقف العديدة وقانون الصيدلة ------------ معانا مادة العقاقير الطبية او الـpharmacognosy ودى بندرس فيها النباتات الطبية اللى لها قيمة علاجية عندنا وبندرس شكل النبات دى من بره وبنشوفه وهو مطحون powder تحت الميكروسكوب وبنعملها الاختبارات الكيميائية عشان نتأكد منها ومن بعض خواصها وبنكمل العقاقير الطبية بمادة كيمياء العقاقير او الـ phytochemistry وبناخد فيها الـ strucrtures بتاعة النباتات وخواصها الكيميائية والفيزيائية وبنكمل فى رابعة بمادة العقاقير التطبيقية او الـ applied ودى بقى اللى بنطبق فيها ( من اسمها ) اللى خدناه ف العقاقير وكيمياء العقاقيرفى السنين اللى قبل كده وناخد خليط من النباتات نفصله ونعرف خصائصه وهكذا من التطبيقات النباتيةيعنى م الاخر العقاقير ومشتقاتها مختصة بالنباتات الطبية بناخد كمان الكيمياء التحليلية analytical chemistry ومنها نوعين qualitative يعنى مجرد نتعرف على نوع العنصر او المادة او طبيعتها و quantitative واللى بنعرف فيها تركيز المادة وطبعا ده مهم جدا للصيادلة اللى حيفتحوا معامل تحاليل بعد التخرج او اللى حيشتغلوا فى معامل الشركات حناخد كمان مادة الصيدلة الصناعية ان شاء الله او الـ industrial pharmacy ودى بنتعرف فيها على الاجهزة اللى بيتم بها تصنيع الادوية المختلفة طبعا جميل جدا لشغل الشركات والمصانع ياترى نسينا حاجة ؟؟؟ ياااااااااااه نسينا البكتريا : ) اقصد مادة الـ microbiology واللى بتتكلم عن الميكروبات الكتيرة والمضادات الحيوية اللى بتعالجها وبنكمل المادة دى بمادة الـ public health او الصحة العامة واللى برده بتتكلم عن الميكروبات بس بتقولنا طرق انتشار العدوى ومدى خطورة المرض الميكروبى سواء كان مسببه بكتريا,, فيروس,, طفيلى,, ديدان ..... الخ واعراضه وازاى نمنعه وعلاجه اخر حاجة معانا هى اللى ممكن نقول عليها الحواشى المهمة زى مادة ادارة الاعمال الـ business management والرياضيات math ودى اللى بتساعدك بعد التخرج فى ادارة اعمالك والحسابات فى الصيدلية وكده وفيه مادة الحاسب الالى (مش عندنا ف اسكندرية لكن اعتقد فى المنصورة موجودة ومعرفش فين تانى) وطبعا دلوقتى بقينا لازم كلنا نعرف فى الكمبيوتر عشان التطور اللى حصل فى وسائل التعلم عشان نجارى العصر يعنى ونتقدم معاه
ومادة علم النفس الـ psycology اللى بتدينا خلفية عن نفسية المريض اللى بيتلقى الدواء و حنعرف بعد كده ان شاء الله ان ممكن العلاج النفسى يكون بأدوية كمان واللى حندرسها بالتفصيل فى الفارماكولوجى ----------------- فكرة ترتيب المواد دى على الاربع سنين مختلفة من محافظة للتانية عشان كده موزعتهاش على السنين لكن فى النهاية كلنا بناخد نفس المواد ممكن نجمعهم كلهم تحت بعض عشان نألف اسمائهم كده ؟؟ anatomy histology physiology organic chemistry ceutical chemistry biochemistry pharmacology bioassay toxicology pharmaceutics pharmacognosy phytochemistry applied pharmacognosy analytical chemistry industrial pharmacy microbiology public health business management math psycology
|
|
#4
27-08-2009, 01:28 PM
|
|||
|
|||
|
مشكلة اللغة وكيفية التغلب عليها
مشكلةاللغة تقريباً بنتغلب عليها بعد أول شهرين في الكلية بتكرار الكلمات والتعود على قراية الإنجليزي في حاجه صعبة بعض الطلاب بيستخدموها بس بحسها مضيعة للوقت إنه بيحاول معرفة معنى كل كلمة في الكتاب أو الورق الي بيزاكر منه حتى لو الكلمة مش علمية أو حتى مهمة في الموضوع، دي باعتبرها مضيعة وقت، كان من النصايح الي اتقالت لي في إعدادي اني ما احاولش اركب دماغي واعرف معنى كل كلمة في الصفحة، بمعنى آخر فهم المعنى العام للفقرة أو الجملة مناسب جداً ويفي بالغرض، لكن ابقى قاعد بذاكر بالقاموس دي صعبة اوى وهتضيع وقت وتصعب على نفسك، حضور المحاضرة هيفرق ويخليك تفهم ومش هتحتاج تعرف معنى كل كلمة، والموضوع تعود، يعني الترم التاني هتحس أد ايه الموضوع بقى أسهل، وبقيت تقرا أسرع وتستوعب أسرع بعد ما الكلمات بقت تتكرر وبقى عندك خلفية كويسة في المصطلحات الصيدلانية وغيرها يعنى الواحد مش بيلجأ للترجمة إلا لو مش قادر يفهم معنى الجملة خالص غير كده فهم المضمون كفايه جدا الافضل اننا نعرف المضمون فى السنوات الاولى من الدراسة لحد تانية كده ولو لسة كلمات كتير بتقع يبقى من تالتة نحاول نعرف جلها حتى لو قاعدين بنذاكر بقاموس وطبعا عبال الوصول لتالتة حتكون كلمات كتير اتعرفت واللى مش واضح كلمات قليلة بس حتكون مهمة والله اعلم أيضا من أنسب الطرق لمواجهة مشكلة اللغة هي أن يكثر الطالب من حضور المحاضرات خاصة في الاسابيع الأولى و ينصت جيدا لكل ما يقال و يفضل أن يحضر معه الكتاب في المحاضرات ويدون أي ملاحظة أو شرح أو معنى لمصطلح معين في الكتاب حيث يساعد هذا - بفضل الله - كثيرا في التغلب على مشكلة اللغة أثناء المذاكرة. كما يجب على الطالب أن يتحلى بالصبر و لا يبتئس ولا ييئس عندما يخرج من محاضرة بدون أن يفهم شيئا فكلنا مر بهذه المرحلة .. وبعد فترة من بداية الدراسة و حضور المحاضرات و الاستماع الجيد يألف الطالب تدريجياً للمصطلحات و الكلمات العلمية شيئا فشيئا و يتعود على اللغة تماماً تاخد بالك أيضا في موضوع المصطلحات انها في الاغلب بتتكون من مقاطع وكل مقطع له معنى علشان كده ممكن المقطع يتكرر في كذا كلمة , على سبيل المثال المقطع -itis لما ييجي في آخر الكلمة معناه التهاب Bronchitis - Gastritis - Menengitis وهتلاقي من ده كتير فحاول تركز على معاني المقاطع يعني متعتمدش على انك تترجم المصطلح وخلاص لكن حاول تستفيد من ترجمة مصطح بانك تترجم منه مصطلحات تانية وشوية شوية هتلاقي نفسك مش محتاج القاموس إلا في حدود
|
|
#7
27-08-2009, 01:46 PM
|
||||
|
||||
|
بس ممكن اقول راىء احنا نعمل ما فى وسعنا لكن هنبص لبرة وجوة مش هينفع احنا نعمل الى علينا ونسيب ربنا يردينا فى الى يريدة وذكروا دائما ان الحياة مش بمبى على طول لازم نكون عايشين الواقع لكن بفكر امستقبل وتذكروا حكمة حلوة جداااااااااااا* انت اليوم حيث اتت افكارك وانت الغد حيث تاخذك افكارك ************وشكرااا على الموضوع وياريت التعاون من كل الاعضاء كدة مش ردود بس
|
|
#8
27-08-2009, 02:08 PM
|
|||
|
|||
|
اقتباس:
رأيك طبعا على عينى وعلى راسى ولكن موضوع بره وجوه ده مش لازم نلتفت اليه كتير ... الطالب الشاطر اللى قدامه نهر فيه عسل ولبن وكل المشتهات وينهل منه قدر مااستطاع انا مشترك فى هذا المنتدى اللى بعتقد انه الاول للصيادلة واستفدت كتير منه بس الموضوع ده بالذات ملخص لكل الاشياء اما بالنسبة للافكار فانا زيي زيكم طالب مستجد معلوماتى ضحلة جدا فى هذا العلم وادينا بنتعلم وشكرا على المشاركة
|
|
#9
27-08-2009, 01:51 PM
|
|||
|
|||
|
نيجى بقى لموضوع الاختلاط
اخواتي الطلبة الجداد و الطلبة القدام ....... مبدئيا برحب بيكم جدا في منتداكم و منتدى كل الصيادلة .................. مع بداية دخول الجامعة او قل من قبل ذلك بشوية ..... من ثانوية عامة و الدروس و خلافه يبدا بعض الشباب و البنات في ترجمة ما في العقل الباطن مما شاهدوه في الافلام و المسلسلات عن الحياة الجامعية و الشباب اللي ماشي في الجنينة مع البنات و الشلل اللي هنا و هناك ولادو بنات ضحك و انبساط على الاخر .......... يا ترى ده صح ؟ ولا غلط ؟ ولو صح صح ليه و لو غلط غلط ليه ؟؟؟؟؟ مع بداية الجامعة حتلاقي 3 فرق في موضوع الاختلاط : صنف يقول لا ما كلمش بنات وصنف يقول دول زي اخواتي عادي يعني هوا انا حعمل ايه حرام ؟؟؟ و صنف نفسه يكلم بس مكسوف !!!! و لا اعلم لهم فريقا رابعا ........ طول حياتي الجامعية 5 سنين في صيدلة ............ انا مش حقولكم رايي دلوقتي و انا من انه فريق و لكن حسيب 3 زملاء لكم بيتحاوروا و هم في الطريق من الكلية لغاية محل الفطير ذهابا و ايابا يشتروا فطير في الاستراحة بين السكاشن و نسمع منهم ....... و بعد ما نسمع الحوار , اي حد عنده سؤال مرحبا به /بها الحوار بين احمد و حسن و رامي مستعدين ......يلا بينا نسمع : احمد : يااااااااااااااا النهاردة السكشن كان طحن قوي و التايتريشن كان غتيت , بس الحمد لله ربنا ستر و لسه عندنا الساعة 4 سكشن تاني فايتو رامي : انا يا عم كنت مظبط رانيا اللي جنبي كل سيكشن بتديني النتائج و تقول لي هيا و انا انقل منها و تمام التمام , وحتى كمان المحاضرات بتكتب كل كلمة بنت الايه صاروخ ورا الدكتور وانا بصور منها , ده حتى بتسجل كل الكلام على mp4 و تروح تفرغ المحاضرات ...... مش عاتقة حسن : الحمد لله انا اشتغلت وكانت حتعك بس ربنا ستر احمد : على فكرة يا رامي , موضوع انك تظبط مع رانيا ده مش تمام قوي رامي : ليه يا عم احمد الموضوع بييييس جدا , انا بنقل منها احمد : ايوه يا رامي ...انت شايفه بيييس ؟ رامي : طبعا يابني هوا انا بزني و لا بخرج معاها لوحدنا و لا بنركب العربية ولا بنتكلم قلة ادب ؟ احمد : طيب يا رامي , مين قال لك انه بيس ؟ رامي :يابني انا شايفه كده حسن يقاطعهم : يالا نعدي الشارع ..... خلي بالك يا رامي احمد : وجهة نظرك ده تقبل الصواب و الخطا لانك كمسلم فاهم ان ربنا حيحاسبك في الاخرة على حسب اللي الدين قاله , و بعدين انت عارف ان سيدنا انس خادم الرسول  بعد موت النبي خرج على التابعين وقال لهم ( انكم لتعملون اعمالا هي في اعينكم ادق من الشعر كنا نعدها على عهد النبي من الموبقات ) يعني المهلكات و دول التابعين فما بلك بينا احنا بقى يا رامي ... يبقى مش كل حاجة زي ما انت شايفهارامي : طيب يا سي احمد , ربنا ما حرمش الاختلاط ربنا حرم الخلوة و انا مش قاعد معاها لوحدينا ولا حاجة ده كلام عادي جدا و وقفة وسط الشلة بتاعتنا , انا و اسلام و ابراهيم و محمد و سمر و اسراء و منى و نادين و بتبقى وقفة حلوة و احيانا بننزل نروح كارفور او نتغذى بره حسن : اجيب لكم انا الفطير لحسن شكلكم مطولين ...... انا حعزم و امري لله احمد : يا رامي مستعد تسمع ...... رامي : معاك يا احمد , لما نشوف اخرها معاك احمد : مين قال ان ربنا ماحرمش الاختلاط ده فيه ادلة كتيييييييييييييييييييييييير على تحريم الاختلاط في القران و السنة رامي مقاطعا : نعممممممم , هات لي مرةواحدة الاختلاط جت في القران احمد : طيب ..... هوا الحشيش حرام ؟ رامي : طبعا احمد : موجود في القران ؟ رامي : لا , انت حتهيس يا ابو حميد احمد : نفس الكلام الاختلاط رامي يحك راسه : طيب , قول يا احمد احمد : من القران : قال تعالى " واذا سألتموهن فاسألوهن من وراء حجاب" * قال تعالى " وقل للمؤمنات يغضضن من أبصارهن ويحفظن فروجهن ولا يبدين زينتهن الا ما ظهر منها " * قال تعالى " ولا يضربن بأرجلهن ليعلم ما يخفين من زينتهن * قال تعالى " وقرن في بيوتكن ولا تبرجن تبرج الجاهلية الأولى" كل الالة ده يا رامي تدل على ان الرجل و الست لاوم يكونوا بعاد عن بعض و لا ينظر الرجل للمراة من الاصل مش يقف يتكلم معاها و يخرجوا و يهزروا و يظبطوا بعض محاضرات اما السنة بقى يا عم رامي فاكتر من كده كمان .... خد عندك * قال رسول الله " خير صفو ف الرجال أولها وشرها آخرها وخير صفوف النساء آخرها وشرها أولها " رواه مسلم. * وكان رسول الله إذا سلم قام النساء حين يقضي تسليمه ويمكث هو في مقامه يسيرا قبل أن يقوم قال نرى والله أعلم أن ذلك كان لكي ينصرف النساء قبل أن يدركهن أحد من الرجال " رواه البخاري. * وقال رسول الله " استأخرن فإنه ليس لكن أن تحققن الطريق عليكن بحافات الطريق " رواه أبو داود. * وجعل النبي موضعا للنساء في مصلى العيد ثم أقبل عليهن فوعظهن " رواه البخاري. * قالت النساء للنبي غلبنا عليك الرجال فاجعل لنا يوما من نفسك فوعدهن يوما لقيهن فيه فوعظهن وأمرهن "رواه البخاري * ويروى أن النبي قال " لو تركنا هذا الباب للنساء " قال نافع فلم يدخل منه ابن عمر حتى مات رواه أبو داود. * وكانت عائشة رضي الله عنها تطوف حجرة من الرجال لا تخالطهم * وكانت رضي الله عنها تعلم الرجال من وراء حجاب. عن أم حميد الساعدية رضي الله عنها أنها جاءت إلى رسول الله فقالت: يا رسول الله إني أحب الصلاة معك، فقال: "قد علمت أنك تحبين الصلاة معي، وصلاتكِ في بيتك خير لكِ من صلاتكِ في حجرتكِ، وصلاتكِ في حجرتكِ خير لك من صلاتكِ في داركِ، وصلاتكِ في داركِ خير لكِ من صلاتكِ في مسجد قومكِ، وصلاتكِ في مسجد قومكِ خير لكِ من صلاتكِ في مسجديتاخد كمان يا عم رامي ادلة من حياة الصحابة ؟ رامي : قول يا احمد لاني لسه عندي كلام حرد عليك به على كل اللي بتقوله ده احمد : ماشي يا سيدي ... خد عندك روي أنه دخلت على عائشة رضي الله عنها مولاة لها، فقالت لها: "يا أم المؤمنين طفتُ بالبيت سبعاً واستلمت الركن مرتين أو ثلاثاً، فقالت لها عائشة: لا آجركِ الله، لا آجركِ الله، تدافعين الرجال؟!!، كان عمر بن الخطاب رضي الله عنه شديد الغيرة على النساء، فهو الذي أشار على النبي بحجب نسائه فوافقه القرآن، فعن أنس بن مالك رضي الله عنه أنه قال: قال عمر رضي الله عنه: قلت: يا رسول الله يدخل عليك البر والفاجر، فلو أمرت أمهات المؤمنين بالحجاب فأنزل الله آية الحجاب"(، وكان رضي الله عنه "ينهى الرجال عن الدخول إلى المسجد من باب النساء" : نهى عمر ان أن يطوف الرجال مع النساء، قال: فرأى رجلاً معهن فضربه بالدرة" وعن ابن جريج أنه قال: أخبرني عطاء –إذ منع ابن هشام النساء الطواف مع الرجال- قال: كيف يمنعهن وقد طاف نساء النبي مع الرجال؟، قلت: أبعد الحجاب أو قبل؟ قال: أي لعمري لقد أدركته بعد الحجاب، قلت: كيف يخالطن الرجال؟ قال: لم يكن يخالطن، كانت عائشة رضي الله عنها تطوف حَجْرة (اي معتزلة )]) من الرجال لا تخالطهم ايه رايك بقى يا عم رامي في كل الادلة ده اللي بتقول قطعا ان الله تعالى و النبي صلى الله عليه و سلم و الصحابة كلهم نهوا عن الاختلاط و لم يحبوه في ابسط صوره فما بالك باللي بيحصل في الكلية و التظبيط في السكاشن و الهزار و الخروج ؟؟؟ اذا كان مجرد النظر بس او الكلام بس لا يجوز !!!! رامي : بس يا احمد كان فيه اختلاط على عهد النبي صلى الله عليه و سلم ... احمد مستغربا : اختلاط على عهد النبي صلى الله عليه و سلم !!!!! نشوف بقية الحوار بين احمد و رامي في الحلقة التانية عشان ما نطولش عليكم اكتر من كده و نشوف اختلاط ايه اللي كان على عهد الرسول صلى الله عليه و سلم ده !!
|
|
#10
27-08-2009, 01:53 PM
|
|||
|
|||
|
رامي: ايوه ... مش الست كانت بتطلع تجاهد و تداوي الجرحى كمان مع الرجالة (يعني لمس كمان يا شيخ ) وكانت بتنزل السوق و تروح المسجد و سمعت في التلفزيون ان سيدنا عمر ولى واحدة ست الحسبة في السوق و مسكت الولاية كمان و تقول لي يا عم احمد ان مفيش اختلاط , الصح بقى يا احمد انه فيه اختلاط بس لازم نكون مش بنعمل حاجة غلط و ده اللي بنعمله , احنا مش بنتكلم في قلة ادب و لا بنعمل حاجة وحشة , كل كلامنا عادي و هزار و بس و بنعتبرهم زي اخواتنا ----------------------------------------------------------------------------------------------------------حسن محضرا الفطير : الموضوع سخن , الحقوا الفطير بقى قبل ما يبرد يا جدعان , امسك يا رامي .. خد يا حمادة احمد : بص يا رامي الموضوع مش على اطلاقه كده رامي : مش فاهم احمد : يعني , فيه حاجة في الفقه اسمها القياس , يعني بتقيس حاجة على حاجة , لو حاجتين نفس الموقف و الملابسات تاخد نفس الحكم رامي : فهمنا ده , ايه علاقتها بموضوعنا بقى ؟ احمد : لانك قست المواقف ده على الاختلاط اللي بتتكلم عليه , و ده قياس مش صح حسن معلقا : يعني ايه يا احمد الكلام الكبير ده احمد : بص يا سيدي .... أما في المساجد والطرقات، فلم يكن فيها اختلاط بين الرجال والنساء بالصورة التي يريدها دعاة الاختلاط، لأن الرجال كانوا في زمن النبي وصحابته يُصَلُّون في مقدمة المسجد والنساء في مؤخرته مع عنايتهن بالحجاب والتحفظ من كل ما يثير الفتنةفعن عبد الرحمن بن عابس أنه قال: سمعت ابن عباس رضي الله عنهما قيل له: "أشهدت العيد مع النبي ؟ قال: نعم، ولولا مكاني من الصغر ما شهدتُه، حتى أتى العَلَم الذي عند دار كثير ابن الصامت فصلى ثم خطب، ثم أتى النساء ومعه بلال فوعظهن وذكَّرهن وأمرهن بالصدقة"(قال الحافظ ابن حجر: "قوله: (ثم أتى النساء) يُشعر بأن النساء كن على حدة من الرجال غير مختلطات بهم ولم يقتصر منع الاختلاط بين الرجال والنساء على الجمع الكثير فحسب، بل تناول ذلك المرأة الواحدة إذا صلت مع الرجال، فعن أنس رضي الله عنه أنه قال: "صلى النبي في بيت أم سليم، فقمتُ ويتيم خلفه، وأم سليم خلفنا وقد خصص في مسجده باباً للنساء يدخلن ويخرجن منه لا يخالطهن فيه الرجال، فقد ترجم أبو داود في سننه باباً بقوله (باب اعتزال النساء في المساجد عن الرجال)، ثم روى حديث عبد الله بن عمر رضي الله عنهما أنه قال: قال رسول الله : "لو تركنا هذا الباب للنساء"( قال نافع تلميذ عبد الله بن عمر: فلم يدخل منه ابن عمر حتى مات".وكان الرجال في عهده يؤمرون بالتريث في الانصراف حتى يمضي النساء ويخرجن من المسجد لئلا يختلط بهن الرجال في الطريق من المسجد إلى البيت مع ما هم عليه جميعاً رجالاً ونساءً من الإيمان والتقوى. فعن هند بنتالحارث أن أم سلمة زوج النبي رضي الله عنها قالت: "كان رسول الله إذا سَلَّم قام النساء حين يقضي تسليمه، ويمكث هو في مقامه يسيراً قبل أن يقوم. قال الإمام الزهري رحمه الله: نَرَى –والله أعلم- أن ذلك كان لكي ينصرف النساء قبل أن يدركهن أحد من الرجال"وفي رواية أخرى: "كان يُسَلِّم فينصرف النساء فيدخلن بيوتهن من قبل أن ينصرف رسول الله ويقول ابن قدامة: "إذا كان مع الإمام رجال ونساء، فالمستحب أن يثبت هو والرجال بقدر ما يَرَى أنهن قد انصرفن، ويقمن هن عقب تسليمه"، ثم يتابع قائلاً –عقب الاستشهاد بالحديث المذكور آنفاً-: "لأن الإخلال بذلك من أحد الفريقين يُفضي إلى اختلاط الرجال بالنساء"( وكان يُؤْذَن للنساء في الخروج إلى المساجد في الليل لكونه أستر وأخفى وأبعد عن الفتنة. يقول : "ائذنوا للنساء بالليل إلى المساجد"ويُروى عن عائشة رضي الله عنها أنها قالت: "كن نساء المؤمنات يشهدن مع رسول الله صلاة الفجر متلفعات بمروطهن، ثم ينقلبن إلى بيوتهن حين يقضين الصلاة، لا يعرفهن أحد من الغلس كما كان يُطلب منهن اجتناب الطيب والزينة لكونهما من دواعي الفتنة، يقول : "إذا شهدت إحداكن المسجد فلا تَمسَّ طيباً"(، ويقول: "أيما امرأة أصابت بخوراً فلا تشهد معنا العشاء الآخرة"). ولقد تنبهت أم المؤمنين عائشة رضي الله عنها إلى خطر تساهل المرأة في خروجها من بيتها فقالت: "لو أن رسول الله رأى ما أحدث النساء لمنعهن المسجد كما مُنعت نساء بني إسرائيل وكان النبي ينهى النساء أن يتوسطن الطريق ويأمرهن بلزوم حافاته حذراً من الاختلاط بالرجال والفتنة بمماسة بعضهم بعضاً أثناء السير في الطريق، فعن أبي أُسيد الأنصاري رضي الله عنه أنه سمع رسول الله يقول وهو خارج من المسجد وقد اختلط الرجال بالنساء في الطريق: "استأخرن، فإنه ليس لكن أن تحققن( الطريق، عليكن بحافات الطريق"، فكانت المرأة تلصق بالجدار، حتى إن ثوبها ليتعلق بالجدار من لصوقها به(.وأما مجالس العلم فقد كان النساء في عهده لا يختلطن فيه بالرجال الاختلاط الذي ينهى عنه المصلحون اليوم ويُرشد القرآن والسنة علماء الأمة إلى التحذير منه حذراً من فتنته، فقد كن يجلسن –في معزل عن الرجال- في مؤخرة المسجد، فيسمعن المواعظ والخطب ويتعلمن أحكام دينهن، مع عنايتهن بالحجاب وإخفاء الزينةوأما ساحات الجهاد خروجهن كان مع محارمهن لمصالح كثيرة لا يترتب عليه ما يُخشى عليهن من الفساد، لإيمانهن وتقواهن وإشراف محارمهن عليهن وعنايتهن بالحجاب بعد نزول آيته، بخلاف حال الكثير من نساء العصر، ومعلوم أن خروج المرأة من بيتها إلى العمل يختلف تماماً عن الحالة التي خرجن بها مع الرسول في الغزو، فقياس هذه على تلك يُعتبر قياساً مع الفارق. وأيضاً فما الذي فهمه السلف الصالح حول هذا وهم لا شك أدرى بمعاني النصوص من غيرهم وأقرب إلى التطبيق العلمي بكتاب الله وسنة رسوله ؟ فماهو الذي نُقل عنهم على مدار الزمن؟، هل وَسَّعُوا الدائرة كما يُنادي دعاة الاختلاط فنقلوا ما ورد في ذلك إلى أن تعمل المرأة في كل ميدان من ميادين الحياة مع الرجال تزاحمهم ويزاحمونها وتختلط معهم ويختلطون معها، أم أنهم فهموا أن تلك قضايا معينة لا تتعداها إلى غيرها؟. وإذا استعرضنا الفتوحات الإسلامية والغزوات على مدار التاريخ لم نجد هذه الظاهرة . و الأصل في المرأة أنها ليست من أهل الجهاد ولم يخاطبها الشارع بالقتال وقد نهى الفقهاء عن اصطحاب المرأة في ساحة القتال ،وإنما دلت السنة على جواز مشاركة المرأة في تطبيب المجاهدين عند الحاجة الى ذلك مع الاحتشام وهذا خلاف الأصل والحاجة تقدر بقدرها كما يجوز للرجل أن يعالج المرأة ا عند الحاجة وهذا من رفق الإسلام وسماحته تولية عمر رضي الله عنه الشفاء بنت عبد الله الحسبة على أهل السوق وتولي المرأة على الولاية العامة في الأندلس وغيرها من أمصار المسلمين ما ورد عن عمر ضعيف سندا ومنكراً متناً , فقد ذكر ابن سعد وابن حزم الخبر مرسلاً بغير إسناد فهو ضعيف لا تقوم به حجة وطعن فيه ابن العربي وجعله من دسائس المبتدعة ، كما أن هذا العمل لايليق بعمر وقد عرف بشدة غيرته على النساء وكان يكره خروج امرأته و سعى الى منعها من الذهاب الى المسجد,أما ما يروى بعد القرون المفضلة فلا حجة فيه بوجه من الوجوه لأنه ليس بسنة للخلفاء المأمورين بإتباعها ولأنه لا حجة أبداً في تصرفات الناس ولأنه ليس من مصادر التشريع الاستدلال بالوقائع التاريخية إنما الحجة في الكتاب والسنة وما أجمع عليه الأئمة. حسن : ايوه يا احمد بس : المرأة الشريفة المحافظة على عرضها لايضرها الإختلاط بالرجال ولا تتأثر بذلك وظروف الحياة وحاجة العصر تستدعى الاختلاط في كل مكل مجال ؟ احمد : الشريعة لم تبن على مقاصد المكلفين ونياتهم في الأحوال العامة لأن ذلك لايمكن ضبطه وإنما بنيت على الظاهر , ونحن متعبدون بإتباع الشرع , والغالب على الناس الإفتتان بالمرأة ولا عبرة بالنادر ويجب أن يكون الشرع حاكماً على شؤون الحياة , والحاصل انه لا دليل صحيح صريح يدل على جواز الإختلاط وكل دليل تمسكوا به فهو من الأدلة المشتبهة مع إعراضهم عن الأدلة المحكمة والقواعد المرعية والمقاصد الشرعية ,وحملهم على ذلك إتباع الهوى والاستجابة لداعي الشهوات. و بعدين يا حسن , الشهوة بين الرجل و الست اقوى الشهوات و ما نحطش البنزين جنب النار و نقول لهم ما تولعوش ..... حسن : ممممم ..... كلام معقول برده و صح رامي : انت قريت كل ده امتى ؟؟؟؟؟؟ احمد : ربك كريم يا رامي حسن : بس يا احمد الدنيا من حوالينا زي الفل و مفيش حاجة بتحصل من الاختلاط على الاقل في بلادنا يبقى ليه نخاف رامي : تصدق صح يا حسن , رد يا سي احمد ان شاء الله الحلقة القادمة نرى رد احمد على كلام حسن و رامي !!
|
|
#11
27-08-2009, 01:55 PM
|
|||
|
|||
|
احمد : كلامك ده مش مظبوط قوي يا ابوعلي ليه بقى .... معايا بحث فيه دراستين في الموضوع ده كنت لسه قاريه و عجبني جدا , استنوا اطلعه من الشنطة ..... ااااهه ... شوفوا بقى .... اقرا لكم ؟ حسن و رامي و هما ينظران لبعضهما : قول ...سمعنا احمد : الدراسة الاولى : قامت الباحثة فاطمة محمد رجاء مناصرة بدراسة أثر مشكلة الاختلاط على تعليم الفتاة المسلمة في الجامعات الأردنية فخرجت بالنتائج التالية السؤال الأول : هل يعد الاختلاط في الدراسة بنظرك مشكلة ؟ ـ أجاب 77 % من الطلاب والطالبات بنعم . السؤال الثاني : إذا كان الاختلاط مشكلة ، أذكر أهم السلبيات التي تعانيها بسببه ؟ فذكرت المشكلات التالية : أ ـ مشكلات أخلاقية : 1ـ إثارة الفتنة . 2ـ التصنع في التصرفات من قبل الجنسين . 3ـ تعرض الفتيات لمضايقات الشباب . 4ـ ضعف الوازع الديني بسبب تعود الطلبة على الممارسات الخاطئة واستباحة المنكرات لكثرة تكرارها . 5 ـ انتشار ظاهرة السفور ، بسبب تبرج الطالبات ولباسهن المخالف للزي الإسلامي ، فطالبات الجامعة اللاتي يرحن ويرجعن بين البيت والجامعة سافرات متبرجات يلبسن ثياب رقيقة قصيرة .. 6 ـ انتشار الجرائم الأخلاقية مثل الزنا ، فإن كثرة المخالطة مع وجود عوامل الفتنة تؤدي إلى ارتكاب الفاحشة 7ـ فساد الأخلاق عند الطرفين . ب ـ مشكلات أكاديمية : 1 ـ عدم الحرية في النقاش أثناء المحاضرات ، وهذا يظهر في عدم رغبة الطلاب والطالبات بالمشاركة في الدرس خيفة أن يخطئ أحدهم فيخرج أمام الجنس الآخر ، فتشوه صورته أمام من يود كسب رضاه من الجنس الآخر . 2 ـ تعاطف المدرسين مع الطالبات وذلك على حساب الطلاب. 3 ـ التغيب عن المحاضرات وعدم الالتزام بحضورها بسبب انشغال كل جنس مع الآخر . 4 ـ صعوبة ممارسة النشاطات الجادة والفاعلة وخاصة التي تمارس في ساحات الجامعة . 5 ـ تحويل الجامعة عن الغاية الأساسية التي وجدت من أجلها . 6 ـ فيه قتل للوقت لكثرة التفكير بالجنس الآخر . 6 ـ ضعف التحصيل العلمي . ج ـ مشكلات اقتصادية وقد حددها الطلبة بما يلي : 1 ـ محاولة إظهار كل من الجنسين كرمة وسخاءه أمام الجنس الآخر ، وبذلك يتحمل كل منهما مسؤوليات مادية كثيرة قد تضطره لإرهاق نفسه بالديون ، أو اللجوء إلى تصرفات غير مرغوب بها لتحصيل المال . 2 ـ المبالغة في النفقات على اللباس والمظهر الخارجي من قبل الجنسين وخاصة الطالبات . د ـ مشكلات اجتماعية : وتتلخص آراء الطلبة فيما يلي : 1 ـ التقليل من قدر المرأة في المجتمع حيث تصبح عارضة أزياء تلفت الأنظار ، فتعتبر نفسها كسلعة قابلة للعرض . 2 ـ له آثار سلبية في الحياة الأسرية للطلاب والطالبات المتزوجين ، فقد يكون سببا في دمار هذه الأسرة وتشتيت شملها بسبب تعرف الشاب على فتاة أخرى غير متزوجة مثلا ! 3 ـ عزوف الشباب عن الزواج والاكتفاء بالعلاقات غير المشروعة . وهذه المشكلات هي جزء من معاناة الشباب ، والضغوطات التي يسببها الاختلاط لهم والمآسي التي تترتب على ذلك . هـ مشكلات نفسية : ولقد ذكر الطلبة بعضاً من المشكلات النفسية منها : 1 ـ القلق والاضطراب والخوف من الجنس الآخر نتيجة ما يرى من ممارسات خاطئة . 2 ـ الصراع الداخلي في نفس الشاب . السؤال الثالث : اذكر أهم المعوقات التي يسببها الاختلاط على تحصيلك العلمي ؟ هناك من اعتبر أن للاختلاط معوقات ، ومنهم من يرى أن ليس للاختلاط معوقات وكانت النسب على النحو التالي : ـ أجاب 75 %بأن للاختلاط معوقات . ـ وأجاب 25 % ليس للاختلاط معوقات . ويبدو أن أهم المعوقات في نظر هذه المجموعة التي تعتبر أن للاختلاط معوقات هي : 1ـ الخوف من السؤال بصراحة خوفاً من التعرض لسخرية الآخرين واستهزائهم . 2 ـ تكرار التغيب عن المحاضرات للانشغال بالجنس الآخر . 3 ـ عدم المشاركة في المحاضرة خوفا من الوقوع في الخطأ. 4 ـ تعرض الأستاذ للحرج وعدم توضيح الكثير من القضايا لوجود الطالبات . 5 ـ إعطاء الأستاذ أكبر قدر من الاهتمام للطالبات على حساب الطلاب . 6 ـ إذا كان المعلم أنثى ، فهذا يؤثر على نفسية الطلاب ولا يقبلون تلقي العلم من امرأة . وبالتالي فإن كل هذا يؤدي إلى انخفاض مستوى التحصيل العلمي عند الطلبة . السؤال الرابع : يدعي البعض أن العلاقة التي تنشأ بين الجنسين تحفز على زيادة التحصيل العلمي لكونها باعثاً للتعلم ، فما رأيك في ذلك ؟ ـ فأجاب 90 % : ليس للاختلاط حافز على التعليم. ـ أجاب 10 % : الاختلاط يشكل حافزاً باعثاً على التعليم السؤال الخامس : هل وجود الجنسين في قاعة واحدة يعيق حرية الأستاذ في إيضاح عناصر الموضوع ؟ ـ أجاب 86 % يعيق . ـ أجاب 14 % لا يعيق . السؤال السادس : ما الآثار التي يسببها الاختلاط على حياتك الاجتماعية ؟ أذكرها ؟ ـ أجاب 86%أن له آثارها سلبية . فمن تلك الآثار : 1 ـ عدم الثقة الشباب بالفتيات وبالتالي العزوف عن الزواج . 2 ـ تفكك الروابط الاجتماعية وبروز المشكلات الأسرية. 3 ـ عدم قدرة الشباب على الزواج وبالتالي يتعرضوا للانحراف والفساد . 4 ـ كثرة التفكير في الجنس الآخر وإثارة الشهوة في النفس وتحررها من القيود التي يجب أن يلتزم بها . 5 ـ البعض يحبذ عند ذلك الانعزال والوحدة والابتعاد عن الآخرين حتى من بني جنسه لقلة ثقته بهم . 6 ـ قد يؤدي إلى الخجل والخوف من التعامل مع الجنس الآخر. 7 ـ آثار سلبية على علاقاتهم مع أهلهم في البيت ومع الآخرين في المجتمع . الدراسة الثانية : قام عبد الحليم محمود السيد وآخرون بدراسة المشكلات النفسية والاجتماعية لدى عينة من طلاب جامعة القاهرة حجمها( 3987) طالباً وطالبة ، وكشفت نتائج هذه الدراسة فيما يتعلق بالمشكلات مع الزملاء من الجنس الآخر عن أن أكثر مشكلات الطلبة أهمية مع زميلاتهم تتمثل : ـ المبالغة في الملبس . ـ عدم الالتزام بتعاليم الدين . ـ والتحرر من السلوك . ـ والاختلاط الزائد عن الحد بين الجنسين . ـ والخروج عن العادات والتقاليد . أما بالنسبة إلى المشكلات التي تعاني منها الطالبات في علاقتهن بزملائهن من الطلبة الذكور فتتمثل في : ـ عدم الالتزام بتعاليم الدين . ـ والتحرر في السلوك . ـ والاختلاط الزائد عن الحد بين الجنسين . ـ وعدم مراعاة مشاعر الزملاء . ـ وسوء الفهم المتبادل احمد : ايه رايكم بقى ؟؟؟؟؟ حسن : معنى الكلام ده يا احمد ان كل الاختلاط حرام ؟؟؟؟؟ ----------------------------------------------------------------- إن شاء الله خلينا نعرف رد احمد الحلقة القادمة و الاخيرة
|
|
#12
27-08-2009, 01:56 PM
|
|||
|
|||
|
احمد : لا يا حسن , لو اضطررت اضطرار كبير جدا ممكن بس يكون الموضوع مش حينفع الا بالاختلاط و الحاجة ضرورية جدا , فلازم تسال قبلها مش انت اللي تقول انها ضرورة فعلا و لو لزم يبقى يشترط لجواز الاختلاط على هذا النحو شروط: * ان تكون المرأة مستترة بالحجاب الشرعي . * ان لايكون هناك خلوة بين الرجل والمرأة. * الابتعاد عن الرجال مهما أمكن الا اذا دعت الحاجة الى ذلك * ان يكون حضور المرأة لحاجة يشق عليها تركها وتكون الحاجة طارئة ينتهي بزوالها. و اذا اضطررت لمحادثة امراة غير محرم لها الضوابط الشرعية لذلك : ألا يستطيع توصيل الكلام إليها عبر محرمها أو عبر امرأة من محارمه أن يكون بدون خلوة ألا يكون خارجًا عن الموضوع المباح أن تؤمن الفتنة فلو تحركت شهوته بالكلام أو صار يتلذذ به حرم عليه ألا يكون من المرأة خضوع بالقول (ترقيق صوت) أن تكون المرأة بكامل الحجاب و الحشمة أو يخاطبها من وراء الباب و الأحسن أن يكون بالهاتف و أحسن منه أن يكون برسالة مكتوبة أو بالبريد ال‘لكتروني مثلًا ألا يزيد على قدر الحاجة .... يعني الحاجة اللي تتقال في كلمة ماتقولهاش في كلمتين حسن : طيب يا احمد انا كتير مش بلاقي مكان اقعد فيه الا جنب بنت .... اعمل ايه احمد : بص يا حسن , انت لو تعبان و الدكتور قال لك لو قعدت في مكان فيه سجاير ممكن يضرك , حتعمل ايه ؟ حسن : اكيد مش حقعد احمد : طيب قعودك في المحاضرة جنب واحدة ده مضر جدا ليه لان ربنا امرنا بغض البصر و غض البصر في الحال ده حيكون صعب جدا و بعدين في صحيح مسلم عن أبي سعيد الخدري رضي الله عنه عن النبي صلى الله عليه وسلم قال: "إنَّ الدنيا حلوة خضرة وإنَّ الله مستخلفكم فيها فناظر كيف تعملون، فاتقوا الله واتقوا النساء فإنَّ أول فتنة بني إسرائيل في النساء". يعني ده اعظم فتنة فالمفروض ماتعرضش نفسك لها عشان ما تهلكش و تقع في الحرام و من وقع في الشبهات وقع في الحرام رامي : بجد يا احمد ..... جزاك الله كل خير , انت فهمتني كل حاجة و انا من النهاردة مش حعمل الموضوع ده ابدا و حمسح كل ارقام النليفونات بتاعت البنات و حشيلهم كمان من الفايس بوك حسن : الفطير يا جدعان , زمانه برد احمد و رامي مبتسمين : هههه , تسلم ايدك يا ابو على , و تسلم العزومة -------------------------------------------------------------------------- و بعد فقد انهينا الموضوع ... و لمن له /لها اي سؤال يتفضل جزاكم الله خيرا
|
|
#13
27-08-2009, 02:00 PM
|
|||
|
|||
|
هام جدا :-
حضور المحاضرات مهم ام مضيعة للوقت ؟؟ بسم الله الرحمن الرحيم بالنسبة لحضور المحاضرات ياترى نحضر ولا نكبر ؟؟؟ حيتقال علينا دحيحة بقى وكده ؟؟؟؟ فارقة يعنى ولا مش فارقة ؟؟؟ نشوف يا شباب مع بعض اجابات الاسئلة دى وان شاء الله لو فيه اى اسئلة تانية تخص هذا الموضوع نرجو منكم طرحها بلا تردد # أولا نحضر ولا نكبر؟؟؟؟ مش حقولك طبعاااااااا احضر لكن حقول بامانة على حسب المحاضر او الدكتور لو بتفهم منه او بتحصل ولو كلمة واحدة فعلا احضر واتأكد ان الكلمة دى حتنفعك ف يوم ما اما لو الدكتور كان بيقرأ من ورق مثلا او من على الباوربوينت مجرد قراءة مبتستفيدش منها اى حاجة على الاطلاق بل بالعكس ممكن لو فريت المحاضرة لوحدك تحس انها اسهل من كده يبقى احسن انك متحضرش ولا توجع دماغك فالامر يحتاج لموازنة عاقلة وحاول قدر الامكان ماتاخدش فى الحتة دى بخبرة اللى اكبر منك مااخدش؟؟؟؟؟؟!!!!!! طب لييييييه؟ عشان ممكن دكتور حد ميفهمش منه وانت تفهم منه او العكس فخلى حكمك منك وبسسسس ودى بالفعل حصلت قدامى كذا مرة ان تكون الاراء مختلفة تماما # ثانيا شكلنا بقى حنبقى عيال دحيحة وبتاع؟؟ مبدأيا الناس اللى عاملة نفسها ايزى (او كما يعتقدون فى انفسهم) وبيتفاخروا ان هم مش بيحضروا على انهم كده بقى الناس اللى مش معقدة دول من جواهم بيكونوا نفسهم يحضروا لكن معندهمش صبر مثلا او لاى سبب مبيحضروش واللى يدعو حد انه ميحضرش معاه محاضرة مفيدة بجد يبقى تعرف انه بجد غيران منه مش اكتر وربنا يبعدنا عن امثال هؤلاء : ) فمن الاخر سيبك من شكلك قدام اى حد لان محدش حينفعك اطلاقا واللى بتعمله فقط هو اللى حينفعك ان شاء الله لو كان صح # فارقة يعنى ولا مش فارقة؟؟ هى طبعا حتفرق معاك ف الفهم ومواكبة المنهج جدا واقل فائدة ممكن تاخدها من حضور المحاضرات هى انك تبقى كأنك قريت المنهج مرة فلو مادة حتى مفتحتهاش لاخر السنة حتكون عارف الدنيا فيها ماشية ازاى تمام؟؟ لكن لما تفتح حاجة وانت لسة اول مرة ف الاخر فعلا شئ مفججججججججججع جدااا ومتحاولش نصيحة لوجه الله تعمله لانى لما عملته مرة فى حياتى ....... الله المستعان وربنا ستار بقى على اللى حصل .........المهم ان حضور المحاضرات بيكون من الحاجات اللى بتنجز معاك فى الاخر ايام الزنقة الجامدة والامتحانات حتى لو كانت متعبة شوية طول السنة لكن حتحس بمتعة التعب ده اخر السنة وانت الحمد لله مذاكر او ع الاقل عارف المادة فيها ايه ومش قلقان اوى وساعتها اقولك بقلب قوى ان الامتحانات مش حتبقى زنقة فظيعة عليك بجد والله عن تجربة لان فيه مواد حضرت فيها وفيه مواد محضرتش وشفت الفرق بين الاتنين وشفت الفرق بينى وبين صحابى اللى حضروا اللى انا محضرتوش وازاى هم استريحوا واطمنوا ف الاخر اكتر منى ربنا يوفقكم يا شباب ونصيحة اخيرة ف الحتة دى حاولوا تنشطوا عقولكم وقت المحاضرات بانكم تسترخوا خمس دقايق والدكتور مثلا بيعمل حاجة او تطلعوا بره المدرج بين المحاضرات وبعضها يعنى بلاش التثبيت فى مكان واحد طووووول اليوم بحيث تملوا حتى من المحاضرات المفيدة هاتوا معاكم عصير يوصل الدموية كويس عشان التركيز يعنى ابتكروا طرق تنشطوا بيها عقولكم وتكسروا بيها الملل بين المحاضرات عشان تكملوا بأعلى تركيز ممكن وفقكم الله تعالى
إعداد د. أمنية عبد الرحمن
|
|
| العلامات المرجعية |
«
الموضوع السابق
|
الموضوع التالي
»
العرض المتطور
|
|
جميع الأوقات بتوقيت GMT +2. الساعة الآن 01:57 PM.
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
Copyright ©2000 - 2024, Jelsoft Enterprises Ltd.
